1 Samuee̱ 5
5
Koxa̱a̱ kjo̱a̱ꞌbíndaa̱ Néná ki̱a̱ kisꞌijña ngi̱jii̱n xota̱ Filisteaa̱
1Xota̱ Filisteaa̱ kijíjo̱chejé koxa̱ kjo̱a̱ꞌbíndaa̱ Néná, kó kijíjo̱ ndeskande nangi Ebee̱n-Esee̱r, ngaskande na̱xi̱ńdáꞌniú Asndoo̱nd. 2Kó ngije xota̱ Filisteaa̱ kijíjo̱chejé koxa̱ kjo̱a̱ꞌbíndaa̱ Néná, ki̱a̱ kijíjo̱ ngi̱ya na̱ngo̱xi̱i̱ ne Ndangoo̱n, kó ki̱a̱ íjñatꞌaa̱ kui nee̱.
3Ta̱nga nga kamángindyiojón, kjiꞌanga xota̱ xi chji̱a̱ni na̱xi̱ńdáꞌniú Asndoo̱nd achichí ta̱jñó jastjíe̱n, kamábe nga ne Ndangoo̱n, ki̱a̱ kjiꞌijña kje̱n nínga tikón koxa̱ kjo̱a̱ꞌbíndaa̱ Néná, kósꞌe̱ kachjábé ne Ndangoo̱n, kó tsangínjo̱ nginí ngi̱ndiee̱.
4Kó nga kamángindyiojón, ti̱ achichí ta̱jño̱ó jastjíe̱n nginí xota̱ na̱xi̱ńdáꞌniú Asndoo̱nd, kó ti̱ kamábe nginí nga ne Ndangoo̱n ki̱a̱ kjiꞌijña tꞌanangii̱, kje̱n koxa̱ kjo̱a̱ꞌbíndaa̱ Néná, kó to̱ko̱ ne Ndangoo̱n ko̱jo nga jó tsja je kiti nga kjiyojo ki̱a̱ ngindiee̱ yaá nga̱ntjo̱a̱a̱, kó ta̱ kisꞌijña ka̱tòn tsí yojo xi kisꞌijña ngasee̱. 5Kuíni nga já chináꞌmii̱ ne Ndangoo̱n, ko̱jo ngayeje xota̱ xi ꞌbosꞌien na̱ngo̱xi̱i̱ kui nee̱, ngaskande ngotꞌe̱ tsjájónjín ngindiee̱ yaá nga̱ntjo̱a̱a̱ na̱ngo̱xi̱i̱ ne Ndangoo̱n.
6Kó Néná achichí ꞌniú katsꞌénjo̱ xota̱ na̱xi̱ńdáꞌniú Asndoo̱nd, kó atíjeé nga katsangiyaa̱ ṉdoꞌon yiꞌi xi on, ko̱jo ngayeje xota̱ xi kisꞌińdo nga ngo foaꞌatjiyajoo̱n kui ngi̱ndiee̱.
7Kó nga bo̱a̱ kamaá, xota̱ na̱xi̱ńdáꞌniú Asndoo̱nd, bi̱ katsó: Ka̱májín kꞌi̱e̱ kꞌuijñájinná koxa̱ kjo̱a̱ꞌbíndaa̱ Nee̱ xota̱ Israee̱l, ngatꞌa̱ achichí nga ꞌniú ndajín tjítsꞌénjo̱ná ñá, ko̱jo ne Ndangoo̱n kui ne xi tsa̱ñá.
8Kó ítikó ngayeje já ngito̱ko̱o̱ xota̱ Filisteaa̱, kó bi̱ katsoó:
—Mí xí si̱ꞌáa̱n koxa̱ kjo̱a̱ꞌbíndaa̱ Nee̱ xota̱ Israee̱l.
Kó bi̱ katsó kui xotaa̱:
—Chjiéngá kongínjo̱ na̱xi̱ńdáꞌniú Ngaa̱t kui koxa̱ kjo̱a̱ꞌbíndaa̱ Nee̱ xota̱ Israee̱l.
Kósꞌe̱ tsangínjo̱ kui koxa̱ kjo̱a̱ꞌbíndaa̱ Néná.
9Ta̱nga ngije tsangínjo̱ kui koxa̱a̱, Néná katsꞌénꞌoón kui xota̱ na̱xi̱ńdáꞌniuú nga katsangiyaa̱ chiꞌin xi ta̱nisién ꞌniú, kó ngayeje jáxíꞌiín kui ngi̱ndiee̱, xi xchá xí kjindí kisꞌiee̱ ṉdo yiꞌi xi on tji̱xin yojoo̱. 10Kósꞌe̱ kui xotaa̱ katsangiya koxa̱ kjo̱a̱ꞌbíndaa̱ Néná ki̱a̱ na̱xi̱ńdáꞌniú Ekroo̱n.
Kó kjiꞌanga kui koxa̱ kjo̱a̱ꞌbíndaa̱ jachó ki̱a̱ na̱xi̱ńdáꞌniú Ekroo̱n, xota̱ xi chji̱a̱ni kui ngi̱ndiee̱, achichí ꞌniú askjandáyà nga bi̱ katsó: ¡Jè kꞌi̱e̱ jeꞌejo̱ koxa̱ kjo̱a̱ꞌbíndaa̱ Nee̱ xota̱ Israee̱l, tsi̱ꞌe̱ nga ñá sa̱ꞌínkꞌiénná ko̱jo xota̱ na̱xi̱ńdáná!
11Kó katsangiyaa̱ én, ko̱jo ítikó ngayeje já ngito̱ko̱o̱ xota̱ Filisteaa̱, kó bi̱ katsoó: ¡ꞌNa̱xiéjnú kꞌi̱e̱e̱ koxa̱ kjo̱a̱ꞌbíndaa̱ Nee̱ xota̱ Israee̱l, kó tangínjo̱ nginíjnú ngi̱ndiee̱, tsi̱ꞌe̱ nga sa̱ꞌínkꞌiénjínná ñá ko̱jo xota̱ na̱xi̱ńdáná!
Ngatꞌa̱ ngayeje xota̱a̱ kui na̱xi̱ńdáꞌniuú, achichí ndyi̱tsakjónní nga kju̱i̱e̱són, kjo̱a̱a̱ nga Néná achichí ꞌniú atíjeé kui xotaa̱. 12Kó xota̱ xi jesónjiín, ṉdo yiꞌi xi on tsajaá, kó ngayeje xotaa̱ kui na̱xi̱ńdáꞌniuú, achichí ni̱ma̱ katsó nga askjandáyà, nga ngaskande ndiꞌakꞌajmii̱ kandaꞌyaá ni xi katsó.
Currently Selected:
1 Samuee̱ 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
