1 Samuee̱ 4
4
Xota̱ Filisteaa̱ katsꞌéntsi̱ꞌe̱ koxa̱a̱ kjo̱a̱ꞌbíndaa̱ Néná
1Kui ni̱xtjin jàn xota̱ Israee̱l kijíkjánjo̱ xota̱ Filisteaa̱, kó xota̱ Israee̱l ki̱a̱ kisꞌińdo ki̱a̱ nangi Eben-Esee̱r, sꞌe̱ xota̱ Filisteaa̱ ki̱a̱ kisꞌińdo ki̱a̱ nangi Afee̱k. 2Kó xota̱ Filisteaa̱ íngoo̱ko̱n nga kijíkjánjo̱ xota̱ Israee̱l, sꞌe̱ katsꞌeén xota̱ Israee̱l, kó mara̱ tsita̱ nijón mi̱ jájún xi katsꞌénkjiesón.
3Kjiꞌanga xota̱ na̱xi̱ńdaá kijí nginí nínga tsꞌénkjaꞌyá, xota̱ xi xchá xí chji̱a̱ni xota̱ Israee̱l, bi̱ katsoó xkjín: Míkjo̱a̱a̱ nga Néná katsꞌénꞌónná ngotꞌe̱ ngindyi̱ko̱n xota̱ Filisteaa̱. Tjianchja̱ꞌà koxa̱ kjo̱a̱ꞌbíndaa̱ Néná xi tikón ki̱a̱ na̱xi̱ńdáꞌniú Silo̱, tsi̱ꞌe̱ nga Néná ki̱a̱ kꞌuijñájinná, kó kꞌo̱xiéꞌáná ngi̱ya tsja kondra̱ná.
4Kó xota̱ na̱xi̱ńdaá katsangiyakjaꞌá koxa̱ kjo̱a̱ꞌbíndaa̱ Néná xí tsi̱ꞌe̱ jájuún, kui xi atíxoma ki̱a̱ ngi̱jii̱n nga jó keruu̱b, kui koxa̱ xi tikón ki̱a̱ na̱xi̱ńdáꞌniú Siloo̱, kó nga jó ndií Elii̱ kui xi Ofnii̱ ko̱jo Finee̱ kui askondá kui koxa̱ kjo̱a̱ꞌbíndaa̱.
5Kó kjiꞌanga je tikón koxa̱ kjo̱a̱ꞌbíndaa̱ Néná, ki̱a̱ nínga síndo ndiꞌańjñoo̱ xota̱ Israee̱l, ngayejee̱ nga achichí ꞌniú askjandáyátsjá, kó ngaskande jatsié má tꞌanangii̱. 6Nga tsintꞌié xota̱ Filisteaa̱ kui nii̱, bi̱ katsó: Míjínra kjo̱a̱a̱ nga achichí ꞌniú ndyi̱kjandáyatsja xota̱ ebreoo̱ ki̱a̱ nínga síndo ndiꞌańjñoo̱.
Kó tsintꞌié nga koxa̱ kjo̱a̱ꞌbíndaa̱ Néná je ki̱a̱ tikón ki̱a̱ nínga síndo ndiꞌańjñoo̱ xota̱ Israee̱l. 7Achichí katsakjónní xota̱ Filisteaa̱, kó bi̱ katsó:
Nee̱ kui xotaa̱ jè jachó nínga síndo ndiꞌańjñoo̱, ¡xi̱xꞌi̱a̱n xò ñá, ngatꞌa̱ kji̱e̱ ngo ndi̱yà má kui nii̱! 8¡Xi̱xꞌi̱a̱n xò ñá! ꞌYá xí ko̱síko̱joná ngi̱ya tsja kui Ne xi̱ꞌbi̱, kui xi achichí ngaꞌniú tjiín. ¡Kuí bí kui Nee̱ xi katsjachjií xota̱ Ejiptoo̱ nga katsangiyaa̱ ngayeje chiꞌin ki̱a̱ nangi kixií!
Kje̱ꞌe xí bi̱ katsó:
9¡Jún ntsꞌie, ti̱ꞌangaꞌniújnú, kó ti̱xkán xi̱ꞌin xi̱ꞌinjnú! Tsi̱ꞌe̱ nga jmí tsi mosoo̱ xota̱ ebreoo̱ ka̱má ñá, xikótsꞌèn kui kamá moso̱ná. ¡Ti̱ꞌanxi̱ꞌínjnú yojojnú, ti̱xkánjnú!
10Kó xota̱ Filisteaa̱ askjan, sꞌe̱ kiniꞌánchaja xota̱ Israee̱l, kó nga ngo nga ngo kui já Israee̱l tsanga nga kijí ndiꞌańjñoo̱. Achichí kamá xota̱ Israee̱l xi kiniꞌánkjiesoón, kantié mi̱ ma já xí tjimáyise xi jesoón. 11Kó xota̱ Filisteaa̱ katsꞌéntsi̱ꞌe̱ koxa̱ kjo̱a̱ꞌbíndaa̱ Néná, kó kiniꞌánkjiesón Ofnii̱ ko̱jo Finee̱, kui xi nga jó ndií Elii̱ kamá.
Nga kꞌien Elii̱
12Kó ti̱kuii ni̱xtjin, ngo nda̱ xi chji̱a̱ni xota̱ tji̱e̱e̱ Benjaa̱ jachó manga manga, ndeskande nínga tjíbixkaán, ngaskande na̱xi̱ńdáꞌniú Silo̱, kó katjondiyá má ńjño xi yajá, ko̱jo ndyi̱a̱ maá ndiso to̱ko̱, 13kó nga jachó ki̱a̱ kui ngi̱ndiee̱, Elii̱ ki̱a̱ tikónsón yáxíríee̱, nga tsꞌénkotsijen tꞌa ndi̱ya̱à, kó ngaskande kjifotsié má ini̱ma̱a̱ ta̱ngatꞌanii̱ koxa̱ kjo̱a̱ꞌbíndaa̱ Néná. Kjiꞌanga jachó kui nda̱a̱ tsi̱ꞌe̱ nga ka̱tso̱ya ni xi kjimaa̱, ngayeje xota̱ na̱xi̱ńdaá askjandáyá. 14Kó nga tsintꞌié Elii̱ nga askjandáyá kui xotaa̱, bi̱ katsó:
—Mí xí mejeén tsó kui kjo̱a̱se xi kjimaa̱.
Kó kui nda̱a̱ achichí tsá kijí, kó jachókoón Elii̱ nga katsóyaà ni xi kamaá.
15Kó Elii̱ je xchá kamá ngatꞌa̱ je ichítié ko̱jo yichán jin nó kisꞌiee̱, kó je kamáti̱ka̱.
16Kó kui nda̱a̱, bi̱ katsoó Elii̱:
—Án boá kui nda̱ xi kjindibáni nínga kjima kjo̱a̱xcha̱án, ta̱ kjindibáꞌmá án.
Sꞌe̱ Elii̱, bi̱ katsoó:
—Mí xí kamá xi̱ꞌin.
17Kó kui nda̱a̱, bi̱ katsoó:
—Xota̱ Israee̱l je tsangaa̱ xota̱ Filisteaa̱, kó achichí má xota̱ na̱xi̱ńdaá xi je kiniꞌánkjiesón, ti̱ jesón nga jó ndíi̱, Ofnii̱ ko̱jo Finee̱ nga, kó koxa̱ kjo̱a̱ꞌbíndaa̱ Néná, xota̱ Filisteaa̱ je iskjíbéchéjé.
18Kjiꞌanga koxa̱ kjo̱a̱ꞌbíndaa̱ Néná, katsó kui nda̱a̱, xtji̱e̱e̱n nga̱xto̱n Elii̱ tsꞌákani, ki̱a̱ tꞌa nga̱ntjo̱a̱a̱, kó katꞌosén, sꞌe̱ kꞌien, ngatꞌa̱ je xchá kamá, kó achichí je kamá nga. Elii̱ kuí boá xi kamá nendiꞌamasiee̱n xota̱ Israee̱l yichán nó.
19Kó kja̱ndaa̱ Elii̱, kui xi chjo̱on Finee̱, ndí yaꞌa, kó je mejeén makjachó ni̱xtjin nga stse̱n ndií katsaki, ta̱nga nga tsintꞌié nga je kachjeꞌéxín koxa̱ kjo̱a̱ꞌbíndaa̱ Néná, ko̱jo nga kamábe nga je kꞌien chiꞌyaá, ko̱jo nga tsintꞌié nga je kiniꞌánkꞌién xi̱ꞌii̱n, kisꞌijñaxtien, ngatꞌa̱ kjindibá tsi̱ndi̱o̱o̱ ndií, kó ti̱ kjiꞌa katsen ndií, kó kꞌien. 20Kó ngije kjiꞌme, kui ínchjín xi ki̱a̱ síndotꞌaa̱, bi̱ katsoó:
—Ngata̱ ndakinjín má ji, ngatꞌa̱ ngo ndí xíꞌín ikꞌié ji, ta̱nga ngiti̱ tsíchji̱a̱jín kui xota̱chjo̱on, ti̱nde ngiti̱ katsꞌénsénjín.
21Kó kui ndií Ikaboo̱nd ikítꞌa jaꞌén, nga bi̱ katsó: Xota̱ Israee̱l je ngiti̱ jmí kjo̱a̱jejiín, ngatꞌa̱ je kachjeꞌéxiín koxa̱ kjo̱a̱ꞌbíndaa̱ Néná, tsó kui jaꞌeén. Kó nga ko̱jo chiꞌyaá, ko̱jo xi̱ꞌii̱n kui xota̱chjo̱on je jesón nga. 22Kuíni nga bi̱ kiꞌmíni: Kjo̱a̱jee̱ na̱xi̱ńdá Israee̱l je tsangínjo̱ꞌniú, ngatꞌa̱ koxa̱ kjo̱a̱ꞌbíndaa̱ Néná je tsangínjo̱chéjé.
Currently Selected:
1 Samuee̱ 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
