1 Samuee̱ 3
3
Néná katsjáxaá Samuee̱
1Nda̱ xo̱ngò Samuee̱ katsꞌén xaá Néná nga nijan katsꞌénxájo̱ Elii̱. Kui ni̱xtjin jàn Néná tsijen jmíjín xi katsjaá ngo én, ti̱nde tsijen jmíjín xi ni akoó. 2Elii̱ ngiti̱ ndajín tsijen kamaá, kó ngo ndi̱yà nga je kjiꞌijña Elii̱ ki̱a̱ ngi̱ndie nínga tsꞌénkjaꞌyá, 3kjiꞌanga to̱kó tjítí ngase ndiꞌí xí tsꞌentsíjee̱n Ndiꞌandikoón Néná, ki̱a̱ tiña nínga tikón koxa̱ kjo̱a̱ꞌbíndaa̱, Samuee̱ ki̱a̱ kjiꞌijña Ndiꞌandikoón Néná, 4kó Néná tsíchji̱a̱a̱ Samuee̱, sꞌe̱ Samuee̱, bi̱ katsó:
—¡Kꞌi̱e̱ tikón an kꞌi̱e̱e̱!
5Kó Samuee̱ tsangá má nga kijí nínga tikón Elii̱, kó bi̱ katsó:
—¡Kꞌi̱e̱ tikón an kꞌi̱e̱e̱, ngatꞌa̱ án boá xi kandokjo̱e̱ní!
Kó Elii̱, bi̱ katsó:
—Jijín bo̱a̱ xi tsꞌénchji̱a̱a̱, tꞌen nginí ji, kó tsjajni nginí ji.
Kó kijí nginí Samuee̱ nínga tjítsꞌénkjaꞌyá, kó kisꞌie nginí. 6Kósꞌe̱ Néná ti̱ tsíchji̱a̱ nginií Samuee̱, nga bi̱ katsoó:
—Samue̱.
Kó Samuee̱ jastjíe̱n, sꞌe̱ kijíkón nginií Elii̱, kó bi̱ katsoó:
—¡Kꞌi̱e̱ tikón an kꞌi̱e̱e̱, ngatꞌa̱ jí boá xi kandokjo̱e̱ní!
Kó bi̱ katsó Elii̱:
—¡Jmí xi̱ꞌin, ánjín bo̱a̱ xi tsíchji̱a̱a̱, tꞌen nginí ji, kó tsjajni ji!
7Samuee̱ nde kji̱e̱ bejín ꞌyání xi Néná, ngatꞌa̱ Néná kji̱e̱sa tsóyàjiín eén.
8Kó Néná ti̱ tsíchji̱a̱ nginií Samuee̱ xi ma jaán ndi̱yà. Kó Samuee̱ jastjíe̱n, kó ti̱ kijíkón nginií Elii̱, sꞌe̱ bi̱ katsoó:
—¡Kꞌi̱e̱ tikón an kꞌi̱e̱e̱, ngatꞌa̱ jí boá xi kandokjo̱e̱ní!
Kósꞌe̱ kjiꞌá boá nga Elii̱, kamákjiín nga Néná boá xi tsꞌénchji̱a̱a̱ kui nda̱ xo̱ngo̱ò. 9Kó Elii̱, bi̱ katsoó Samuee̱:
—Tꞌen nginí ji, kó tsjajni ji, kó tsi ku̱i̱chji̱a̱ nginií, bi̱ tꞌíi̱n: Ndokjo̱e̱ ji Ndi̱a̱, ngatꞌa̱ kui mosòo̱ xi̱ꞌbi̱, tsꞌéntꞌieéri.
Kó kijíkjajña nginí Samuee̱ ki̱a̱ ngi̱ndie nínga tikón. 10Kósꞌe̱ Néná jachókoón Samuee̱, kó bo̱a̱ tsꞌén tsíchji̱a̱jo nginí xikó ja̱ bo̱a̱ je katsoó:
—¡Samue̱, Samue̱!
Kó Samuee̱, bi̱ katsó:
—¡Ndokjo̱e̱ ji Ndi̱a̱, ngatꞌa̱ kui mosòo̱ xi̱ꞌbi̱, tsꞌéntꞌieéri!
11Kó Néná, bi̱ katsoó Samuee̱:
—Jéꞌe̱n, ngo ni sa̱ꞌin an ki̱a̱ na̱xi̱ńdá Israee̱l, kó ngayeje xota̱ xi ku̱i̱ntꞌiè, achichí ni xi ka̱maa̱ ti̱xa̱nijon. 12Kó kui ni̱xtjii̱n sa̱ꞌinkjatjosón an ngayeje ni xi je kixian an kondraa̱ Elii̱ kjo̱a̱a̱ xota̱ ndiꞌaa̱, ndeskande nga kꞌuitjátsꞌennii̱, ngaskande nga kju̱i̱e̱. 13Ngatꞌa̱ jè kixiyàa̱ nga sa̱ꞌinjée̱ xota̱ ndiꞌaa̱ kjo̱a̱a̱ ni xi ndajín xi katsꞌén ndií, kjiꞌanga chꞌo katsóna, kó kuí jmí ni katsójiín, tsi̱ꞌe̱ nga ngiti̱ bo̱a̱jín sa̱ꞌín katsaki. 14Kuíni nga je katsja an ndso̱ꞌba án kjo̱a̱a̱ xota̱ ndiꞌaa̱ Elii̱, nga kui ni xi ꞌniú ndajín xi katsꞌén, jmíni̱xtjin ka̱majetakoón, ndatsi kjo̱a̱tjó ko̱jo tsi chji̱e̱ sa̱ꞌínkꞌasꞌien.
15Kó Samuee̱ kisꞌie ngaskande nga kisisie̱èn, sꞌe̱ iskjíxꞌá Ndiꞌaa̱ Néná, ta̱nga katsakjónní nga ka̱tso̱yaa̱ Elii̱ ni xi katsoó Néná. 16Kósꞌe̱ Elii̱ tsíchji̱a̱a̱ Samuee̱, kó bi̱ katsoó:
—Samue̱, ji xi̱ꞌin.
Kó Samuee̱, bi̱ katsó:
—¡Kꞌi̱e̱ tikón an kꞌi̱e̱e̱!
17Kó bi̱ katsó Elii̱:
—Mí nii̱ bo̱a̱ xi tsíchji̱a̱joo Néná. ꞌNiú míꞌaá nga ngata̱ ꞌbíꞌmíjínní. Kó tsi ngo én xí tsíchji̱a̱joo Néná kꞌuiꞌmíní, bo̱a̱ kjiꞌi ni xi ngatsꞌénjoo̱ ji, kó ngatásón ngasee̱.
18Kó Samuee̱ katsóyaà ngayeje én xí Néná tsíchji̱a̱jo, kó nde ngojín ni xi íꞌmaá. Kósꞌe̱ Elii̱, bi̱ katsó:
—Néná boá xi tsíchji̱a̱joo. Ja̱ ngatsꞌén ni xi nda sasieén kuí nga sa̱ꞌín.
19Kó Samuee̱ kamáxchá ngase, kó Néná asíko̱jo, ko̱jo jatjosón ngayeje én xí tsíchji̱a̱jo. 20Kó ngayeje na̱xi̱ńdá Israee̱l, ndeskande nangi Ndaa̱n, ngaskande nangi Beersebaa̱ nga kamáyà nga Samuee̱ boá xi nda̱chji̱ni̱e̱ꞌe̱én Néná kamá. 21Kó Néná ti̱ akó nginí yojoo̱ ko̱jo ti̱ katsjá nginí én ki̱a̱ na̱xi̱ńdáꞌniú Silo̱, ngatꞌa̱ ki̱a̱ boá nínga Néná tsíchji̱a̱jo Samuee̱, kó ndeskande na̱xi̱ńdáꞌniú Silo̱ boá nínga chji̱a̱ Néná, kó Samuee̱ katsóyaà kui eén xota̱ na̱xi̱ńdaá.
Currently Selected:
1 Samuee̱ 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
