1 Samuee̱ 30
30
Ndabii̱ katsꞌeén nga askjanjo̱ xota̱ Amalee̱k
1Kó xi ma ján ni̱xtjin nga Ndabii̱ ko̱jo já xí tsoꞌbájo̱ jachó ki̱a̱ na̱xi̱ńdáꞌniú Siklaa̱j, xota̱ Amalee̱k je tsꞌasꞌiennié nga askjanjo̱ xotaa̱ nangi Nengee̱b, ko̱jo na̱xi̱ńdáꞌniú Siklaa̱j, kó katsꞌénkjié ko̱jo ítí kui ngi̱ndiee̱. 2Kó kijíjo̱ꞌniú ínchjiín ko̱jo ngayeje xota̱ xi síndo ki̱a̱a̱, xi xchá xí kjindí, ta̱nga nde ngojín xi katsꞌénkjiesón, ta̱ kijíjo̱ꞌniú tsí ki̱a̱ xtji̱e̱e̱n ndi̱yà nínga kijí. 3Kó kjiꞌanga jachó Ndabii̱ ko̱jo xota̱a̱ ki̱a̱ na̱xi̱ńdáꞌniuú, kamábe nga je ikꞌítí kui ngi̱ndiee̱, kó nga ínchjiín ko̱jo ndí xíꞌiín, ko̱jo ndí ínchjiín tsangínjo̱ꞌniú. 4Kósꞌe̱ Ndabii̱ ko̱jo já xí tsoꞌbájo̱, achichí ꞌniú askjandá, ngaskande nga ngiti̱ jmí ngaꞌniú kisꞌiejiín nga askjandátjé. 5Kó ti̱ kijíjo̱ꞌniú nga jó ínchjín xí kisꞌińdojo̱ Ndabii̱, kui xi ꞌmí na̱ Ainoaa̱n, xi chji̱a̱ni na̱xi̱ńdáꞌniú Jesree̱l, ko̱jo na̱ Abingaii̱l kui xi chjo̱ón Nabaa̱l kamá, xi chji̱a̱ni na̱xi̱ Karmeloo̱.
6Kó Ndabii̱ achichí nda̱ kamaá, ngatꞌa̱ xota̱ na̱xi̱ńdaá kamámejeén nga ndi̱jo̱ tsꞌaya, ngatꞌa̱ achichí xtì kamaá ini̱ma̱a̱, kjo̱a̱a̱ nga ngo nga ngo ndí xíꞌiín ko̱jo tsi ndí ínchjiín xi tsangínjo̱ꞌniú.
Ta̱nga Ndabii̱ Néná katsjangaꞌniuú.
7Kósꞌe̱ bi̱ katsoó chináꞌmi Abiataa̱r ndií Aimelee̱k:
—ꞌNiú míꞌaá nga kꞌi̱e̱ ndibéje̱ní ńjño ndioo̱. Kó chináꞌmi Abiataa̱r kijíjo̱ kui ńjñoo̱ nínga tikón Ndabii̱, 8kó Ndabii̱ asíyaá Néná nga bi̱ katsoó:
—A kjuintjíngíñáa̱ kui xota̱ kondraa̱. Kó a kjóchótji̱ngí ngasèe̱. Kó Néná bi̱ katsó:
—Tꞌentji̱ngíi̱, ngatꞌa̱ nga ja̱koxi̱, kjóchítji̱ngíríi̱, kó ja̱koxi̱ boá nga ko̱ꞌna̱xiéꞌé ji kui xota̱a̱.
9Kó bo̱a̱ tsꞌén Ndabii̱ kijí, ko̱jo nga jun úchán jáxíꞌín xi tsoꞌbájo̱, kó jachó ngaskande xo̱ngàndántꞌié Besoo̱r, nínga kisꞌińdo chiboa jáxíꞌiín. 10Ta̱nga Ndabii̱ to̱kó kijíra ko̱jo nga nijón úchán jáxíꞌiín, ngatꞌa̱ jó úchán kamá xi kisꞌińdo, kjo̱a̱a̱ nga achichí je jenda, kó kamájín jaꞌatio xo̱ngàndántꞌié Besoo̱r. 11Kó ki̱a̱ ngi̱jin kꞌijñaá kasakoo̱ ngo nda̱ Ejipto̱, kó tsangínjoo̱ Ndabii̱ kui nda̱a̱, kó katseꞌeé pan xi iskjinie, ko̱jo katseꞌeé ndáfoa, 12kó ti̱ katseꞌeé ngo ndso̱ꞌba ṉño̱ pan xi kiniꞌánkꞌájinni toꞌingo̱ xi kixí, ko̱jo jó én tostsi̱jè. Kó ngije iskjinie kui nii̱, kasako nginií ngaꞌniú, ngatꞌa̱ je ján ni̱xtjinnii̱ nga jmí pan iskjiniejín, ti̱nde jmí ndáfoa katsꞌejín. 13Kósꞌe̱ Ndabii̱, bi̱ katsó nga asíyaá kui nda̱a̱:
—ꞌYá xotaa̱ xi ndokjo̱e̱ni ji. Ñá kjindibéni ji.
Kó kui nda̱ xi chji̱a̱ni Ejiptoo̱, bi̱ katsó:
—Ngo nda̱ xo̱ngò xí chji̱a̱ni Ejiptoo̱ an, mosoo̱ xota̱ Amalee̱k, kó je ján ni̱xtjinnii̱ nga íjñámasienna ndi̱a̱na ngatꞌa̱ kamáꞌonna. 14Ji̱n boá xi ikitjasꞌi̱e̱nniéjne̱ xota̱ xi síndo xtji̱e̱e̱n na̱ngii̱ nangi Nengee̱b, ko̱jo ngi̱ndie xi chji̱a̱ni nangi Jundáa̱, ko̱jo na̱ngii̱ nangi Kalee̱b, kó ikꞌítíjne̱ na̱xi̱ńdáꞌniú Siklaa̱j.
15Kó Ndabii̱, bi̱ katsoó:
—A ka̱ma kꞌuínje̱ní nínga síndo kui jájuún.
Kó bi̱ katsó kui nda̱a̱:
—Ngiboanéná tꞌín ji nga si̱ꞌinkꞌínjínní, ti̱nde si̱ꞌinkꞌasꞌínjínní ngi̱ya tsja ndi̱a̱na, kó án kjuínjoo̱ nínga síndo kui xotaa̱. 16Kó bo̱a̱ tsꞌén kijíjo̱ kui nda̱a̱, kó nga jachó kamábe nga kui jaá ki̱a̱ síndo tsojoboa ngayeje kui ngi̱ndiee̱, nga ndyi̱kjinie ko̱jo nga ndyi̱ꞌbi, ko̱jo nga ndyi̱tsꞌèn sꞌué, ta̱ngatꞌanii̱ ngayeje ni katsꞌén kui kjo̱a̱xcha̱án, ki̱a̱ nangii̱ xota̱ Filisteaa̱, ko̱jo nangi Jundáa̱.
17Kó Ndabii̱ askjanjo̱ kui jaá ndeskande nga ta̱jño̱ó, ngaskande nga kamángixoón, kó nde ngojín xi jatjongii̱ yojoo̱, ta̱kuítsí nga nijón úchán já xo̱ngò xí kisꞌińdosoón cho̱toꞌoyitsꞌeèn xi tsanga.
18Kó Ndabii̱ katsꞌéndé ngayeje xota̱ Amalee̱k xi tsangínjo̱ꞌniuú, kó ti̱ katsꞌéndé nga jó ínchjiín. 19Kó kasako yejé nginií nii̱, xi xi̱xi̱ ko̱jo xi yiꞌi, ko̱jo ndí xí ínchjín, ko̱jo ndí xí xi̱ꞌii̱n, ko̱jo ngayeje ni xi kiniꞌánchejeé, kasako nginií ngayeje.
20Kó Ndabii̱ iskjíbé ngayeje xtín cho̱tsa̱nga̱ ko̱jo cho̱yojoo̱, kó ki̱a̱ katsꞌénkjítjoón cho̱ xi kasakoꞌoyá nginií, kó bi̱ katsó kui xotaa̱: ¡Kuí bí kui nii̱ xi je katsꞌén Ndabii̱!
21Kósꞌe̱ Ndabii̱ jachókoón xi jó úchán jáxíꞌín xi achichí je jendaa̱, kui xi kamájiín kijíjo̱ Ndabii̱, kui xi ki̱a̱ kisꞌińdo ki̱a̱ tꞌa xo̱ngàndántꞌié Besoo̱r, kó kui jaá kijíkjaꞌáyíndi̱yà Ndabii̱ ko̱jo xota̱ xi tjimájo̱, kó kjiꞌanga jachó Ndabii̱ ki̱a̱a̱, katsꞌéntinde kui xotaa̱.
22Kósꞌe̱ ngayeje xota̱ xi ꞌniú ndajiín, kui xi nijan kijíjo̱ Ndabii̱, bi̱ katsó:
—Kjo̱a̱a̱ nga kꞌi̱e̱jín nijan kijíjo̱ná, kuíni nga ko̱e̱ꞌéjáa̱n ni xi kasakoꞌoyá nginíná, ta̱kuítsí chjo̱ón ko̱jo ndií, xi nga ngo nga ngo ngakjíbé, sꞌe̱ ngatjíjo̱ni kꞌi̱e̱e̱.
23Ta̱nga Ndabii̱ bi̱ katsoó:
—Jún ntsꞌie, ngata̱ bo̱a̱jín niꞌánjnú kjo̱a̱a̱ ni xi je katsjáná Néná, ngatꞌa̱ Néná boá xi tsꞌénkoón ñá, ko̱jo Kuí boá xi katsꞌénkꞌasꞌienná ngi̱ya tsja kui xota̱ xí kjindibá kjánjo̱ná. 24¡Kó ꞌyá xí ko̱siénnijónjnú kjo̱a̱a̱ kui nii̱! Ngatꞌa̱ xikó kjiꞌi ni xi tsoboaá xi kijí kjo̱a̱xcha̱án, ti̱ bo̱a̱ ti̱ kjiꞌi ni xi tsoboaá xota̱ xi askondá nijnú, kó ngayejee̱ nga ndse̱je̱n ngasakoó.
25Kó ndeskande koó kjiꞌa, kui nii̱ xi kjo̱a̱kiti kamá ki̱a̱ na̱xi̱ńdá Israee̱l, ngaskande ngotꞌe̱.
26Kó nga jachó Ndabii̱ ki̱a̱ na̱xi̱ńdáꞌniú Siklaa̱j, katsangiyaa̱ chiboa kui nii̱ xota̱ xi xchaá na̱xi̱ńdáꞌniú Jundáa̱, kui xi xota̱ xi nda yaꞌa manii̱, kó bi̱ katsoó: Kꞌi̱e̱ tikónjnú kꞌi̱e̱e̱ chiboa ni xi kasakojne̱ kjo̱a̱xcha̱án nga ikixkánjo̱jne̱ xota̱ xi kondra̱a̱ Néná. 27Kó ti̱ katsangiyaa̱ xota̱ xi síndo ki̱a̱ na̱xi̱ńdáꞌniú Betee̱l, ko̱jo xi síndo xtji̱e̱e̱n na̱ngii̱ na̱xi̱ńdáꞌniú Ramoo̱t-Nengee̱b, ko̱jo xi síndo na̱xi̱ńdáꞌniú Jatii̱r, 28ko̱jo xi síndo na̱xi̱ńdáꞌniú Aroee̱r, ko̱jo xi síndo na̱xi̱ńdáꞌniú Sifmoo̱t, ko̱jo xi síndo na̱xi̱ńdáꞌniú Estemoaa̱, 29ko̱jo xi síndo na̱xi̱ńdáꞌniú Rakaa̱l, ko̱jo xi síndo na̱xi̱ńdáꞌniú Jeramee̱l, ko̱jo xi síndo na̱xi̱ńdáꞌniuú xota̱ kenitaa̱, 30ko̱jo xi síndo na̱xi̱ńdáꞌniú Jormaa̱, ko̱jo xi síndo na̱xi̱ńdáꞌniú Korasaa̱n, ko̱jo xi síndo na̱xi̱ńdáꞌniú Ataa̱k, 31ko̱jo xi síndo na̱xi̱ńdáꞌniú Ebroo̱n, ko̱jo ngayeje ngi̱ndie nínga jaꞌa Ndabii̱ ko̱jo xota̱a̱.
Currently Selected:
1 Samuee̱ 30: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
