1 Samuee̱ 29
29
Xota̱ Filisteaa̱ kamáꞌniátakónjín Ndabii̱
1Kó xota̱ Filisteaa̱ ítikó ngayeje jájuún ki̱a̱ na̱xi̱ńdáꞌniú Afee̱k, tji̱e̱nga xota̱ Israee̱l ki̱a̱ índo ndiꞌańjñoo̱ ki̱a̱ tꞌa ndáńchꞌi̱ xi tikón ki̱a̱ na̱xi̱ńdáꞌniú Jesree̱l.
2Kó tji̱e̱nga já ngito̱ko̱o̱ xota̱ Filisteaa̱ ítikó jájuún, xki̱ úchán ko̱jo xki̱ ngo mi̱, Ndabii̱ ko̱jo já xí tsoꞌbájo̱, ki̱a̱ kijítji̱ngii̱ Akii̱, xtji̱e̱e̱n nga̱xto̱n kui jaá. 3Kósꞌe̱ já ngito̱ko̱o̱ xota̱ Filisteaa̱, bi̱ katsó:
—Mí xí ndyi̱tsꞌèn kꞌi̱e̱e̱ kui xota̱ ebreoo̱.
Kó Akii̱, bi̱ katsoó kui já ngito̱ko̱o̱:
—A kuijín kuí nda̱a̱ xi Ndabii̱, nda̱ xi mosoo̱ Sauu̱l, nda̱ ree̱ na̱xi̱ńdá Israee̱l, kui xi je kjín nónií nga kꞌi̱e̱ tikónjo̱na, kó ndeskande koó nga jeꞌe kꞌi̱e̱e̱, nga jmí ni xi ndajínkjiꞌi tjítsꞌénjínná.
4Ta̱nga já ngito̱ko̱o̱ xota̱ Filisteaa̱ achichí katsꞌénxchánjo̱ Akii̱, kó bi̱ katsoó:
—Nangíyé ji kui nda̱a̱, tsi̱ꞌe̱ nga ko̱e̱je̱ nginí ngi̱ndie xi ji katseꞌée̱, kó nga ki̱a̱jín nijan ko̱e̱je̱joná nga kongín ki̱xkàn, ngatꞌa̱ tsita̱ kondra̱ná ka̱ma ngi̱jii̱n kui kjo̱a̱xcha̱án. Kó tsi tsi̱ꞌe̱ nga nda kꞌuijñájo̱ ndi̱a̱a̱ kui, a mí tsí xota̱ná boá xi sa̱ꞌínkjiesón.
5A kuijín kuí nda̱a̱ xi Ndabii̱, xi bi̱ tsó só xi kisie xotaa̱ nga kisie:
Sauu̱l katsꞌénkjiesón ngo mi̱ xota̱ xi kondra̱a̱,
ta̱nga Ndabii̱ tie mi̱ ma xi katsꞌénkjiesón kuí.
6Kósꞌe̱ Akii̱ tsíchji̱a̱a̱ Ndabii̱, kó bi̱ katsoó:
—Tikón Néná nga be án nga kixi̱ ji, kó nda kasasienna nga ma fotje ji ko̱jo nga ma bitjasꞌi̱n ji ngi̱jii̱n nínga síndo ndiꞌańjñoo̱, ngatꞌa̱ ngojín ni xi ndajín xi je kiniꞌín ji ndeskande koó ni̱xtjin nga jéꞌe̱ ji, kó ngaskande ngotꞌe̱, ta̱nga kui já ngito̱ko̱o̱ ndajín tsꞌákaa̱ ji. 7Kuíni nga ta̱sá tꞌen nginí ji ndiꞌàa̱, kó xió tꞌen ji, tsi̱ꞌe̱ nga chꞌójín ka̱maa̱ já ngito̱ko̱o̱ xota̱ Filisteaa̱.
8Ta̱nga Ndabii̱, bi̱ katsoó Akii̱:
—Mí xí katsꞌen an. Mí ni xi ndajínkjiꞌi xi je katsꞌén kui mosòo̱ xi̱ꞌbi̱ ndeskande koó nga kꞌi̱e̱ tikónjo̱o̱ ji, tsi̱ꞌe̱ nga kjuínjín an, kó skjanjo̱jín an kondra̱a̱ nda̱ re xi ndi̱a̱na.
9Kó Akii̱, bi̱ katsoó Ndabii̱:
—Jè be an nga nda ji xota̱ ngindyikón án, ko̱jo nga xikoó tsi ngo ndítsjiee̱ Néná boá jí, ta̱nga já ngito̱ko̱o̱ xota̱ Filisteaa̱, jè bo̱a̱ katsó nga kꞌuínje̱jínjne̱ kui kjo̱a̱xcha̱án.
10Kuíni nga chjiéngá ndyiojón ta̱jñó ti̱sítji̱n ji, kó tꞌenje̱ jí já mosoo̱ ndi̱a̱a̱ xi kjindibájo̱o̱ kꞌi̱e̱e̱, kó ti̱ kjiꞌa ngije ikístji̱e̱jnú ngije si̱si̱eén, tja̱tjójnú kui ngi̱ndiee̱.
11Kó Ndabii̱ ko̱jo já xí tjimájo̱, achichí ta̱jñó jastjíe̱n, tsi̱ꞌe̱ nga ko̱e̱je̱ nginí nangii̱ xota̱ Filisteaa̱, tji̱e̱nga xota̱ Filisteaa̱ kijí xtji̱e̱e̱n na̱xi̱ńdáꞌniú Jesree̱l.
Currently Selected:
1 Samuee̱ 29: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
