1 Samuee̱ 28

1Kui ni̱xtjin jàn, xota̱ Filisteaa̱ ítikó xtín jájuún tsi̱ꞌe̱ nga skjánjo̱ xota̱ Israee̱l. Kó Akii̱, bi̱ katsoó Ndabii̱:

—Nda má ngatamakjiín nga ji, ko̱jo xota̱a̱, chjiéngá nijan kongínjo̱jnúꞌun nga kongín kjo̱a̱xcha̱án.

2Kó Ndabii̱, bi̱ katsoó Akii̱:

—Ndakjíꞌí, ja̱ jè yé ji mí ni xi ka̱maa̱ sa̱ꞌin kui mosòo̱.

Kósꞌe̱ Akii̱, bi̱ katsoó Ndabii̱:

—Ja̱ kuíni nga án boá xi skoón jí ngayeje ni̱xtjin nga kotíjña̱ an nga̱sondie.

Sauu̱l kijíkoón ngo na̱ xi kotꞌasón xi chji̱a̱ni nangi Endoo̱r

3Ngije kꞌien Samuee̱, ngayeje xota̱ Israee̱l askjandátjé, kó ki̱a̱ na̱xi̱ńdáꞌniú Ramaa̱ akjanijín. Kó Sauu̱l ja̱bo̱a̱ jè tsangatji̱ngii̱ ngayeje xota̱ xi tjiꞌe ko̱jo xi kotꞌasón kui nangii̱.

4Kó xota̱ Filisteaa̱ ítikó yojoo̱, sꞌe̱ kijí, kó ki̱a̱ katsꞌénkjaꞌyá ki̱a̱ na̱xi̱ńdáꞌniú Sunee̱n, kó Sauu̱l ti̱ ítikó ngayeje xota̱ Israee̱l, kó ki̱a̱ katsꞌénkjaꞌyá ki̱a̱ na̱xi̱ńdáꞌniú Ngilboa̱.

5Ta̱nga nga kamábe Sauu̱l ngi̱ndie nínga síndo ndiꞌańjñoo̱ xota̱ Filisteaa̱, achichí katsakjónní, kó ꞌniú nda̱ kamaá ini̱ma̱a̱. 6Kó Sauu̱l asíyaá Néná, ta̱nga Néná jmíni̱xtjin katsꞌénseén, ti̱nde ngi̱jin chi̱nii̱ tsíchji̱a̱jojín, ti̱nde nga katsꞌénkjién Urii̱n, ti̱nde jmí jáchji̱ni̱e̱ꞌe̱én tsíchji̱a̱jojínni. 7Kósꞌe̱ bi̱ katsoó já mosoo̱:

—Ti̱ndyi̱séjnúꞌun ngo na̱ xi tsꞌénkjién a̱siénni̱xtjin nga kotꞌasón, tsi̱ꞌe̱ nga kjuinkóo̱n, kó kuí kosíyáa̱ ni xi mejénna skuie an. Kó kui já mosoo̱, bi̱ katsoó:

—Ki̱a̱ nangi Endoo̱r tikón ngo na̱ xi tsꞌénkjién a̱siénni̱xtjin xi kotꞌasón.

8Kósꞌe̱ Sauu̱l asíkjoyá yojoo̱, kó kje̱ꞌe ńjño tsajá, sꞌe̱ kijíjo̱ jó já, kó nga je jñoó jachó ndiꞌaa̱ kui xota̱chjo̱on, kó bi̱ katsoó:

—ꞌNiú míꞌaá nga tꞌíyéní nga si̱ꞌinkjìn jí a̱siénni̱xtjin xi kotꞌasoón, kósꞌe̱ ngatjandibá kui xi xiyaá ꞌyání bo̱a̱.

9Kó kui xota̱chjo̱on, bi̱ katsó:

—Ja̱ jè yé ji ni xi katsꞌén Sauu̱l, kótsꞌèn nga jè katsꞌénkjié kui na̱xi̱ńdaá ngayeje xota̱ xi kotꞌasoón, ko̱jo xi chji̱a̱jo xota̱ xi je jesoón. Kó míkjo̱a̱a̱ nga ngo chja̱ya̱ tiꞌbíjñíní tsi̱ꞌe̱ nga ko̱ya án.

10Kósꞌe̱ Sauu̱l katsjaá tsꞌoa nga bi̱ katsoó:

—¡Tikón Néná nga ka̱majéjiín kjo̱a̱a̱ kui nii̱!

11Kósꞌe̱ bi̱ katsó kui xota̱chjo̱on:

—ꞌYá xí mejeén nga kuichjiáa̱ tsi̱ꞌe̱ nga ku̱i̱chji̱a̱joo.

Kó Sauu̱l, bi̱ katsó:

—Mejénna nga Samuee̱ ko̱ndókjoée̱ tsi̱ꞌe̱ nga ku̱i̱chji̱a̱jona.

12Kó nga kamábe Samuee̱ kui naa̱, ꞌniú askjandáyà nga bi̱ katsoó Sauu̱l:

13—Ánní nga an kichꞌíṉche̱jení. ¡Kó jí boá xi Sauu̱l ji!

Kósꞌe̱ nda̱ ree̱, bi̱ katsoó:

—Ngata̱ ndakinjín má ji. Mí xí tiye ji ngotꞌe̱.

Kó kui xota̱chjo̱on, bi̱ katsoó Sauu̱l:

—Ngo ne tsꞌénbe an xi tsꞌénfínijíngíni tꞌanangii̱.

14Kó Sauu̱l, bi̱ katsoó kui xota̱chjo̱on:

—Kó kjíꞌí xi tiye ji.

Kó kui naa̱, bi̱ katsó:

—Tsꞌénbe an ngo xota̱ xi xchá xí tsꞌéndibá, xi ngo ńjñobichitjé kjiꞌiꞌmanii̱ yojoo̱. Kó kjiꞌá boá nga kamákjiín Sauu̱l, nga Samuee̱ boá xi̱ꞌba̱, kósꞌe̱ asiéntikoó ngaskande nga kisitꞌaa̱ kje̱n tꞌanangii̱. 15Kó Samuee̱, bi̱ katsoó Sauu̱l:

—Ánní nga an tiniꞌínxtíní nga an tindokjo̱e̱ní.

Kó bi̱ katsó Sauu̱l:

—Achichí nda̱ kjimana ngatꞌa̱ xota̱ Filisteaa̱ ndyi̱kjánjo̱na, kó Néná jè íjñámasienna, kó ngiti̱ tsꞌensénjínna, ti̱nde tsꞌénkjiénjín jáchji̱ni̱e̱ꞌe̱én, ko̱jo tsi ngi̱jin ńjñá jàn chji̱a̱jona, kuíni nga ji tsíchji̱a̱a̱, tsi̱ꞌe̱ nga kꞌuiyéní mí ni xi ka̱ma sa̱ꞌin an.

16Kó Samuee̱, bi̱ katsó:

—Tsi Néná jè íjñámasiee̱n ji, ko̱jo tsi kondra̱ tse̱ je tikónni, míkjo̱a̱a̱ nga an tibosíyéní kuí nii̱.

17Néná bo̱a̱ xi je katsꞌénkjatjosón nga tsíchji̱a̱jona nga bi̱ katsó: Jè jaꞌáxiín nga ji xi ko̱ti̱xome ngase ji, kó Ndabii̱ boá xi je katsjaá nga kui xi ko̱tíxoma, kui nda̱ xi nijan ma ji. 18Ngatꞌa̱ jí boá xi kandaꞌyéꞌínjíi̱n ni xi katsó Néná, ti̱nde kiniꞌínkjatjosénjín ji kjo̱a̱ xi katsjaá nga si̱ꞌinkjie ji xota̱ Amalee̱k. Kuíni nga Néná boá xi bo̱a̱ kjiꞌi ni xi katsꞌénjoo̱ ngotꞌe̱.

19Kó ti̱ Néná boá xi sa̱ꞌínkꞌasꞌiee̱n ji xota̱ ko̱jo xota̱ xi chji̱a̱ni na̱xi̱ńdá Israee̱l, ngi̱ya tsja xota̱ Filisteaa̱, kó ndyiojón ji ko̱jo ndíi̱ kꞌi̱e̱ ku̱i̱ndyionjo̱jnúꞌun kꞌi̱e̱e̱, tji̱e̱nga Néná ti̱ sa̱ꞌínkꞌasꞌien ngi̱ya tsja xota̱ Filisteaa̱ jájún xi chji̱a̱ni Israee̱l nga.

20Kósꞌe̱ tji̱e̱nmá tsꞌákatójó tꞌanangii̱ Sauu̱l, ndatsi bi̱ nkꞌaa̱ kamá, kó achichí katsakjónní kjo̱a̱a̱ ni xi katsó Samuee̱, kó nde ngiti̱ jmí ngaꞌniú kisꞌiejiín, ngatꞌa̱ nga ngo ni̱xtjii̱n ko̱jo nga ngo kui ni̱xtji̱e̱e̱n nga jmí ni iskjiniejín.

21Kósꞌe̱ kui naa̱ kijíkóntiñaa̱ Sauu̱l, kó kamábe nga achichí nda̱ kjimaa̱, kósꞌe̱ bi̱ katsoó:

—Ji re, kui na̱ mosòo̱ jè katsꞌénkjatjosón ni xi kasèe̱, kó ndasénjín kamána tsi ko̱yà án, ngatꞌa̱ tsintꞌieꞌée̱n ni xi kasení. 22ꞌNiú míꞌaá tsi̱ꞌe̱ nga ko̱nda̱ꞌyée̱ kui na̱ mosoo̱, mejénna nga xi̱ni̱ ji chií pan, tsi̱ꞌe̱ nga kꞌuieé ngaꞌniú nga kꞌuínrá jí ndi̱yàa̱.

23Ta̱nga Sauu̱l kamámejénjín, kó bi̱ katsó:

—Jmí, skjíni̱e̱jín an. Kósꞌe̱ já mosoo̱ ko̱jo kui naa̱ ꞌniú katsꞌeén, kó bo̱a̱ katsꞌén Sauu̱l, jastjíe̱n tꞌanangii̱, sꞌe̱ ki̱a̱ nga̱són ṉchaa̱n kisꞌijñasón.

24Kó kui xota̱chjo̱on ngo cho̱yojo xi je tikoón ki̱a̱ ndiꞌaa̱, sꞌe̱ xi tsá xi boaꞌa katsꞌénkꞌién, kó iskjíbé to ndso̱ko̱a̱n ṉño̱pan, katsꞌénda̱ꞌyo̱, sꞌe̱ katsꞌénchján pan xi jmí nisanjiín, 25kósꞌe̱ kijíjoo̱ Sauu̱l ko̱jo já mosoo̱, kó iskjinie, sꞌe̱ ngijee̱ jastjíe̱n, kó ti̱kuii ni̱xtji̱e̱e̱n kijí.

Currently Selected:

1 Samuee̱ 28: MAIX

Highlight

Compare

Copy