1 Samuee̱ 27
27
Ndabii̱ ki̱a̱ kisꞌijña ngi̱jii̱n xota̱ Filisteaa̱
1Kó Ndabii̱ bi̱ tsꞌén katsꞌénkjó ngi̱jin ini̱ma̱a̱: Kjo̱chó ni̱xtjin nga ngi̱ya tsja Sauu̱l ko̱yà án, kuíni nga ta̱sá nda nga kjin konga an, ki̱a̱ kjuín án nangii̱ xota̱ Filisteaa̱. Tsi bo̱a̱ sa̱ꞌin an, Sauu̱l ngiti̱ ko̱ngasejínna ngayeje nangi Israee̱l, kó bo̱a̱ tsí tsꞌén nga jmí ni sa̱ꞌínjo̱jínna.
2Kó Ndabii̱ jastjíe̱n, ko̱jo xi jun úchán jáxíꞌín xi nijan síndojo̱, kó kijíkoón nda̱ re Akii̱ ndií Maoo̱k, xi chji̱a̱ni na̱xi̱ńdáꞌniú Ngaa̱t. 3Kó Ndabii̱ ko̱jo já xí nijan tjimájo̱ ki̱a̱ nijan kisꞌińdo ko̱jo Akii̱ ki̱a̱ na̱xi̱ńdáꞌniú Ngaa̱t, kó nga ngo nga ngo kisꞌińdojo̱ xota̱ ndiꞌaa̱. Ndabii̱ ko̱jo nga jó ínchjiín, ko̱jo na̱ Ainoaa̱n, xi chji̱a̱ni na̱xi̱ńdáꞌniú Jesree̱l, ko̱jo na̱ Abingaii̱l kui xi chjo̱ón Nabaa̱l kamá, xi chji̱a̱ni na̱xi̱ Karmeloo̱.
4Kó kiꞌmíyaà Sauu̱l nga Ndabii̱ ki̱a̱ na̱xi̱ńdáꞌniú Ngaa̱t tsanga, kó ngiti̱ tsangasejín ngase. 5Kósꞌe̱ Ndabii̱, bi̱ katsoó Akii̱:
—Tsi ja̱koxi̱ nga nda kasasiee̱n an, te̱ꞌéní ngo ngi̱ndie nínga ka̱ma kotíjña̱ an ki̱a̱ kui ndí nangi xi̱xi̱i̱, ngatꞌa̱, míkjo̱a̱a̱ nga kui mosòo̱ ki̱a̱ nijan kꞌuijñá ki̱a̱ na̱xi̱ńdáꞌniú nínga botixómá nda̱ ree̱.
6Kó ti̱kuii ni̱xtjin Akii̱ katsꞌénkꞌasꞌiee̱n na̱xi̱ńdáꞌniú Siklaa̱j, kuíni nga na̱xi̱ńdáꞌniú Siklaa̱j, ki̱a̱ chji̱a̱ni já re xi chji̱a̱ni nangi Jundáa̱ ngaskande ngotꞌe̱.
7Kó Ndabii̱ ngo nó ko̱jo nijón sá kamaá nga kisꞌijña ki̱a̱ nangii̱ xota̱ Filisteaa̱. 8Kó Ndabii̱ ko̱jo já xí tsoꞌbájo̱ kijínijíngí nga kijíkjánjo̱ xota̱ Ngesuu̱r, ko̱jo xota̱ Ngésee̱r, ko̱jo xota̱ Amalee̱k, ngatꞌa̱ kui xota̱ tji̱e̱e̱ ki̱a̱ kisꞌińdo kui tꞌanangii̱ ndeskande koó ngasꞌe̱, xtji̱e̱e̱n na̱ngi, ngaskande nangi Ejipto̱. 9Kó Ndabii̱ nga askjan kui ngi̱ndiee̱ katsꞌénkjiesón xi chjo̱on xí xi̱ꞌin, kó kijíjo̱ ngayeje cho̱tsa̱nga̱, ko̱jo cho̱yojo xi̱ꞌin, ko̱jo bórró, ko̱jo cho̱toꞌoyitsꞌe̱n, ko̱jo ńjño, sꞌe̱ kijí nginí nínga tikón nda̱ xi ꞌmí Akii̱. 10Kó Akii̱, bi̱ katsoó nga asíyaá:
—Ñá tsangínchjaꞌánijnú kui nii̱ ngotꞌe̱.
Kó Ndabii̱, bi̱ katsó:
—Ki̱a̱ nangi xi tikón na̱ngii̱ nangi Jundáa̱, ko̱jo nangi xi síndo na̱ngii̱ nangi Jeramee̱l, ko̱jo nangi kixií xota̱ kenitaa̱. 11Ndabii̱ nde ngojín xi chjo̱on xí xi̱ꞌin xi katsꞌénkꞌangi, xi chji̱a̱ni na̱xi̱ńdáꞌniú Ngaa̱t, ngatꞌa̱ bi̱ katsó:
—Tsi ta̱ bi̱ ka̱tso̱ kui xotaa̱ kondra̱ tsa̱ñá: ¡Ndabii̱ boá xi bo̱a̱ katsꞌén kui nii̱! Kó kui nii̱ xi katsꞌén ngayeje ni̱xtjin nga kisꞌijña ki̱a̱ nangii̱ xota̱ Filisteaa̱. 12Kó Akii̱ kamáꞌniátakón Ndabii̱, ngatꞌa̱ bi̱ tsꞌén katsꞌénkjó: Xota̱ Israee̱l achichí jè kamáchꞌoó Ndabii̱, kuíni nga ngatsjéni̱xtjin nga moso̱na ka̱ma kui.
Currently Selected:
1 Samuee̱ 27: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
