1 Samuee̱ 26

Ndabii̱ katsꞌénjetakón nginií Sauu̱l ki̱a̱ na̱xi̱ńdáꞌniú Sii̱f

1Kó xota̱ xi chji̱a̱ni na̱xi̱ńdáꞌniú Sii̱f jachókoón Sauu̱l ki̱a̱ na̱xi̱ńdáꞌniú Ngabaa̱, kó bi̱ katsoó:

—A kuijín Ndabii̱ xi ki̱a̱ tikónꞌmá nínga soón na̱xi̱ Akilaa̱, ki̱a̱ xtji̱e̱e̱n kje̱n nangi Jesimoo̱n.

2Sꞌe̱ Sauu̱l jastjíe̱n, kó kijí xtji̱e̱e̱n nangi kixií na̱xi̱ńdáꞌniú Sii̱f, kó ján mi̱ jáxíꞌín xi chji̱a̱ni na̱xi̱ńdá Israee̱l xi jaꞌájin sꞌe̱ kijíjo̱, tsi̱ꞌe̱ nga ko̱ngase Ndabii̱ ki̱a̱ ngi̱ndie kixií na̱xi̱ńdáꞌniú Sii̱f.

3Kó Sauu̱l ki̱a̱ katsꞌénkjaꞌyá ki̱a̱ nangi soón na̱xi̱ Akilaa̱, kui xi tikón xtji̱e̱e̱n kje̱n nangi Jesimoo̱n, ki̱a̱ tꞌa ndi̱ya̱à. Kó nga Ndabii̱ ki̱a̱ kisꞌijña nangi kixií, kamákjiín nga Sauu̱l ki̱a̱ kijítji̱ngii̱ ki̱a̱ nangi kixií. 4Kuíni nga Ndabii̱ katsangiya xota̱ xi kijíkatsijenꞌmá, kó kamábe nga ja̱koxi̱ boá nga Sauu̱l je kjochó tiñaa̱ kui ngi̱ndiee̱.

5Sꞌe̱ jastjíe̱n Ndabii̱, kó kijí ki̱a̱ nínga tjítsꞌénkjaꞌyá Sauu̱l, kó kamábe Ndabii̱ nínga kjiꞌijña Sauu̱l, ko̱jo Abnee̱r ndií Nee̱r, nda̱ ngito̱ko̱o̱ jájuún. Kó Sauu̱l ki̱a̱ kisꞌifé ki̱a̱ ngamasiee̱n nínga síndo ndiꞌańjñoo̱, kó xota̱ na̱xi̱ńdaá ki̱a̱ kisꞌińdo nga ngo foaꞌatjiyajoo̱n. 6Kósꞌe̱ Ndabii̱, bi̱ katsoó Aimelee̱k nda̱ xi xota̱ tji̱e̱e̱ Ee̱t, ko̱jo Abisaii̱ ndií Sarbiaa̱, ntsꞌi̱e̱ Joaa̱b:

—ꞌYá xí ko̱e̱je̱jona nga kjuín án nínga tikón Sauu̱l. Kó bi̱ katsó Abisaii̱:

—An kjuínjòo̱. 7Kó bo̱a̱ tsꞌén Ndabii̱ ko̱jo Abisaii̱ nga jñoó kijí nínga síndo xotaa̱, kó kamábe nga Sauu̱l kjiꞌifé ki̱a̱ ngi̱ndie nínga síndo ndiꞌańjñoo̱, kó yá xí tjítokó ki̱cha̱ yojoó ki̱a̱ sikoón tꞌanangii̱ ki̱a̱ xtji̱e̱e̱n to̱ko̱, tji̱e̱nga Abnee̱r ko̱jo xota̱ na̱xi̱ńdaá ki̱a̱ kjiyojo nga ngo foaꞌatjiyajoo̱n Sauu̱l.

8Kósꞌe̱ Abisaii̱, bi̱ katsoó Ndabii̱:

—Ngotꞌe̱ ꞌne̱, Néná jè katsꞌénkꞌasꞌien ngi̱ya ndse̱ ji kondra̱a̱, te̱ꞌéndièní nga ti̱kuii yá xí tjítokó ki̱cha̱ yojoó ta̱ ngo ndi̱yà sanginsꞌiénñáa̱ ki̱a̱ nga̱són tꞌanangii̱, kó nde tsiejín kꞌo̱ndíyana.

9Ta̱nga Ndabii̱, bi̱ katsoó Abisaii̱:

—¡Ngata̱ niꞌínkꞌínjín ji! Ngatꞌa̱ ꞌyá xí ka̱maa̱ nga sa̱ꞌínkꞌién ngo xota̱ xi Néná jè jaꞌájin, kósꞌe̱ nga jmí ni ka̱májiín xi bo̱a̱ sa̱ꞌiín. 10Kó bi̱ katsó ngase Ndabii̱:

—Tikón Néná, nga ti̱kuíní Néná xí sa̱ꞌínꞌoón ko̱jo tsi kjo̱chó ni̱xtjin nga ko̱yà, ko̱jo tsi nga kjiꞌanga ko̱e̱je̱ kjo̱a̱xcha̱án ko̱yà, 11ta̱nga ngatsjandiejín Néná nga an sa̱ꞌinkꞌién an xota̱ xi kui je jaꞌájin. Ta̱sá chjábé jí yá xí tjítokó ki̱cha̱ yojó xi tikóntꞌa ki̱a̱ xtji̱e̱e̱n to̱ko̱, ko̱jo ti̱jì ndáfoaa̱, kó kju̱i̱tjaxi̱e̱ kuí ngi̱ndiee̱.

12Kósꞌe̱ Ndabii̱ iskjíbé yá xí tjítokó ki̱cha̱ yojoó, ko̱jo ti̱jì ndáfoa xi tikón ki̱a̱ tꞌa to̱ko̱ Sauu̱l, sꞌe̱ kijí. Kó nde ngojín xi kamábe kui jaá, ti̱nde kamákjínjiín ni xi kamaá, ti̱nde ngojín xi jaꞌaá, kjo̱a̱a̱ nga ngayejee̱ nga kjiyojofé, ngatꞌa̱ Néná boá xi katsꞌénkáfé tjèn. 13Sꞌe̱ Ndabii̱ jaꞌaxtikjá xi ingoboaá kui ngi̱ndiee̱, kó ki̱a̱ kijínijíngí nínga ꞌniú nkꞌaá na̱xi̱i̱, achichí kjin kisꞌijñanii̱ nínga síndo kui jaá. 14Kó Ndabii̱ askjandáyà má nga tsíchji̱a̱a̱ xota̱ na̱xi̱ńdaá ko̱jo Abnee̱r ndií Nee̱r, nga bi̱ katsoó:

—¡Abnee̱r, a ko̱ndókjo̱e̱jín ji! Kósꞌe̱ Abnee̱r, bi̱ katsó:

—Kó ꞌyání bo̱a̱ ji nga ꞌniú tindokjo̱e̱je ji nda̱ ree̱.

15Sꞌe̱ Ndabii̱, bi̱ katsoó Abnee̱r:

—A jijín bo̱a̱ kui nda̱a̱. A nda̱ chꞌokonjín boá ji. ꞌYá xí kjo̱chótji̱ngii̱ ji ki̱a̱ na̱xi̱ńdá Israee̱l. Kó ánní nga kichínjíi̱n ndi̱a̱ tse̱ kui xi nda̱ ree̱, ngatꞌa̱ ngo nda̱ xi chji̱a̱ni na̱xi̱ńdaá je tsꞌasꞌien tsi̱ꞌe̱ nga katsꞌénkꞌién ndi̱a̱ tse̱ kui xi nda̱ ree̱. 16Ndajínkjiꞌi ni xi kiniꞌín. Tikón Néná nga chjiéngá ko̱yè jí, ngatꞌa̱ kichinjíi̱n ndi̱a̱jnú, kui xi Néná jè jaꞌájin. Tsitsíjìi̱n nínga tikón yá xí tjítokó ki̱cha̱ yojoó, ko̱jo ti̱jì ndáfoa xi tikónsón tꞌa to̱ko̱ nínga fojña nda̱ ree̱.

17Kó Sauu̱l tsintꞌié nga nda̱a̱ Ndabii̱ boá xi̱ꞌba̱, kó bi̱ katsó: —¡A nda̱a̱jín bo̱a̱ xi̱ꞌba̱ ji ndí!

Kó Ndabii̱, bi̱ katsó:

—Jo̱o̱n nda̱na boá ji ndi̱a̱ ko̱jo ji re. 18Kó bi̱ katsó ngase Ndabii̱:

—Ánní nga ndi̱a̱na tsꞌénmongatji̱ngii̱ kui mosòo̱ xi̱ꞌbi̱. Mí xí katsꞌen an. Mí ni xi ndajín xi je katsꞌén ndsa̱ án.

19Ngotꞌe̱ ꞌne̱, ngo kjo̱a̱nda míꞌaá ji ndi̱a̱, ndaꞌyéchíi̱ ni xi ka̱tso̱ kui mosòo̱. Tsi Néná xí tjítsꞌéntsꞌeén kondra̱ tsa̱ꞌa̱n, ja̱ nga kjíbé kuí kjo̱a̱tjoó, ta̱nga tsi xota̱ nga̱sondiee̱ boá, ndajín ngatamaa̱ ngayeje kui xotaa̱ ngindyi̱ko̱n Néná. Ngatꞌa̱ ta̱ngatꞌanii̱ kui nga ijñámasien an kui tꞌanangi xi Néná jè katsjána, kó bo̱a̱ ndyi̱tsóna nga kje̱ꞌe ne sa̱ꞌinxátꞌáa̱.

20Ngotꞌe̱ ꞌne̱, tsi ko̱ya án, ngata̱ boeꞌéndièjín nga jínna kjinnii̱ nínga tikón Néná xtjón. Ngatꞌa̱ kui nda̱ ree̱ na̱xi̱ńdá Israee̱l tsꞌénmongatji̱ngii̱ kui xiꞌyá xí tsoꞌbá soboaá, xikó maá ngo xi tsꞌénmongatji̱ngii̱ ngo ni̱sie perndii̱ ki̱a̱ ngi̱jin kꞌijñaá.

21Kósꞌe̱ Sauu̱l, bi̱ katsó:

—Katsꞌenjé án. Ndibé nginí ji kꞌi̱e̱e̱ ji ndína Ndabii̱, ngatꞌa̱ jè ngiti̱ jmí ni xi ndajín sa̱ꞌinjo̱jaán, ngatꞌa̱ ngotꞌe̱ ꞌne̱, achichí tjó kamaá kjo̱a̱mindyionna. ¡Kjo̱a̱kitikjo̱a̱ boá ni xi tjítsꞌen an, ta̱nisién ndajínkjiꞌi kui nii̱!

22Kó Ndabii̱, bi̱ katsoó:

—Jéꞌe̱n, kꞌi̱e̱ tikón yá xí tjítokó ki̱cha̱ yojòo̱ nda̱ ree̱. ¡Ngatjandibá ngo mosòo̱ kꞌi̱e̱e̱, kó nga kjíbé kuí yá xí tjítokó ki̱cha̱ yojoó! 23Néná boá xi ngatsjaá chjí xí tsoboaá nga ngo nga ngo xota̱ xi kixi̱ ko̱jo xi ꞌniátakón kjima, ngatꞌa̱ ndatsi Néná je katsꞌénkꞌasꞌienna ngi̱ya ndsa̱ án jí ngotꞌe̱, kamámejénjínna nga ndsa̱ án, ngo ni xi ndajín sa̱ꞌinjo̱ an kui nda̱ xi Néná jè jaꞌájii̱n. 24Kó ngotꞌe̱ ꞌne̱, xikótsꞌèn ꞌniú kamábendikón án kjo̱a̱mindyiòo̱n, ti̱ bo̱a̱ ti̱ tsꞌén mejénna nga Néná ꞌniú nda ngasasieén kjo̱a̱mindyionna, kó nga jmíni̱xtjin nga kjo̱a̱ni̱ma̱ sa̱ꞌínkjaꞌana.

25Kósꞌe̱ Sauu̱l, bi̱ katsoó Ndabii̱:

—¡Néná ngatsꞌénchíkonñeé, Ndabii̱, ji xí ndí ndína ji! ¡Ja̱koxi̱ boá nga kꞌuieé ngaꞌniú ko̱jo nga nda ka̱ma ngayeje ni xi si̱ꞌin ji! Kósꞌe̱ Ndabii̱ kijí nginí ndi̱ya̱à, sꞌe̱ Sauu̱l kijí nginí ndiꞌaa̱.

Currently Selected:

1 Samuee̱ 26: MAIX

Highlight

Compare

Copy