1 Samuee̱ 25
25
Nga kꞌien Samuee̱
1Kó jachó ni̱xtjin nga kꞌien Samuee̱, kó ngayeje xota̱ Israee̱l kamátikó, kó askjandátjé, sꞌe̱ ki̱a̱ akjanijín nínga tikón ndiꞌaa̱ ki̱a̱ na̱xi̱ńdáꞌniú Ramaa̱. Kósꞌe̱ Ndabii̱ kijí xtji̱e̱e̱n nangi kixií Paraa̱n.
Ndabii̱ ko̱jo Nabaa̱l, ko̱jo na̱ Abingaii̱l
2Kó ki̱a̱ na̱xi̱ńdáꞌniú Maoo̱n kisꞌijña ngo nda̱ xi achichí ni kisꞌiee̱ ki̱a̱ na̱xi̱ Karmeloo̱, ꞌniú cho̱n kamá kui nda̱a̱, ngatꞌa̱ ján mi̱ cho̱tsa̱nga̱ ko̱jo ngo mi̱ tindso̱ ínchjín kisꞌiee̱, kó ki̱a̱ na̱xi̱ Karmeloo̱ tsatie tsja̱a̱ cho̱tsa̱nga̱a̱. 3Kui nda̱ Nabaa̱l kiꞌmí, kó chjo̱ón na̱ Abingaii̱l kiꞌmí, kó achichí tsjá kisꞌie kui naa̱, ko̱jo achichí nda katsꞌénkjó ni xi katsꞌén, ta̱nga Nabaa̱l chꞌoꞌa kamá, ko̱jo ni xi ndajínkjiꞌi katsꞌén, ngatꞌa̱ xota̱ tji̱e̱e̱ Kalee̱b kjindibáni.
4Kó nga kisꞌijña Ndabii̱ ki̱a̱ nangi kixií, tsintꞌié nga Nabaa̱l tsja̱a̱ cho̱tsa̱nga̱a̱ tsꞌénbotie, 5kó katsangiyaa̱ tie já xo̱ngò, xí bi̱ katsoó:
—Tangínjnú ki̱a̱ na̱xi̱ Karmeloo̱, kó tangínjnú nínga tikón Nabaa̱l, kó ti̱ꞌantindéjnú nga si̱ꞌankjiénjnú jaꞌénna, 6sꞌe̱ tꞌínjnúu̱:
Ngatꞌieé kjo̱a̱xió ji, ko̱jo xota̱ ndiꞌàa̱, ko̱jo ngayeje ni xi tjiín.
7Jè kiꞌmíyàna nga tjiín xota̱ xi botie tsja̱a̱ cho̱tsa̱nga̱a̱, ko̱jo nga kui já xí koo̱n cho̱tsa̱nga̱a̱ kꞌi̱e̱ síndojo̱jne̱, kó jmíni̱xtjin nga ndajín kiniꞌánjo̱jne̱, ti̱nde ngojín ni xi kichajá ngayeje ni̱xtjin nga síndo ki̱a̱ na̱xi̱ Karmeloo̱. 8Ka̱má tasíyée̱ ji já mosòo̱, kó kuí ka̱tso̱yaa̱ kui nii̱. Kuíni nga mejénna nga nda kꞌo̱kaa̱ kui já xo̱ngo̱ò, ngatꞌa̱ ni̱xtjin xi nda boá nga ndyi̱foéꞌe̱jne̱, kó ꞌniú míꞌaá tsi̱ꞌe̱ nga ko̱e̱ꞌée̱ kui mosòo̱, ko̱jo Ndabii̱ ni xi ka̱machjieén xi tikón ngi̱ya ndse̱ ji.
9Kó nga jachó já xo̱ngo̱ò xí katsangiya Ndabii̱, katsóyaà Nabaa̱l ngayeje ni xi katsó Ndabii̱, kósꞌe̱ xió askoyá. 10Kósꞌe̱ Nabaa̱l, bi̱ katsoó já xo̱ngò xí katsangiya Ndabii̱:
—ꞌYá ta̱ kuii̱ bo̱a̱ xi Ndabii̱, kó ꞌyá ta̱ kuii̱ bo̱a̱ xi ndií Isaii̱. Achichí má xota̱ moso̱ xi kui ni̱xtjii̱n ndyi̱mongaa̱ ndi̱a̱a̱. 11Kó a skjíbé án panna, ko̱jo ndáfoana, ko̱jo yojoo̱ cho̱ xi katsꞌenkꞌién an, tsi̱ꞌe̱ nga skji̱ni̱e̱ já xí botie tsja̱a̱ cho̱tsa̱nga̱na, kósꞌe̱ kui xota̱ xi nde bejín an ñá kjindibáni kui tsjàa̱.
12Kósꞌe̱ já moso̱ xi katsangiya Ndabii̱ kijí nginí ndi̱yà nínga kjindibáni, kó nga jachó katsóyaà Ndabii̱ ngayeje ni xi kiꞌmií. 13Kósꞌe̱ Ndabii̱, bi̱ katsoó já xí tjimájo̱:
—¡Tasiéngíjnú ki̱cha̱ndojójnú nga ngo nga ngojnú! Kó bo̱a̱ katsꞌén kui jaá, kó ko̱jo Ndabii̱ asiéngí ki̱cha̱ndojoó kui nga, kó nijan kijíjo̱ Ndabii̱ mara̱ tsi ta̱ nijón úchán jáxíꞌín, sꞌe̱ ngi jó úchán índo xi askoo̱n ni xi tsꞌénkjién.
14Ta̱nga ngo nda̱ mosoo̱ Nabaa̱l xi katsóyaà na̱ Abingaii̱l, chjo̱ón Nabaa̱l, nga bi̱ katsoó:
—Ndabii̱ katsangiya moso̱ xi kjindibáni nangi kixií tsi̱ꞌe̱ nga sa̱ꞌíntinde ndi̱a̱ná, ta̱nga ndi̱a̱a̱ katsꞌénchꞌó kui xotaa̱. 15Ta̱nga kui jaá achichí nda katsꞌénjo̱jne̱, kó jmíni̱xtjin nga ni xi ndajín katsꞌénjo̱jne̱, ti̱nde jmí ni kichajájínjne̱ nga kixindyionjne̱ ngi̱jin kꞌijñá jàn. 16Nga ni̱xtjin ko̱jo nga ni̱xtji̱e̱n nga askonjne̱, kó xikoó tsi xó xí jaꞌatjiyajonjne̱ kamá kjiꞌanga ndyi̱chonjne̱ cho̱tsa̱nga̱.
17Ngotꞌe̱ ꞌne̱, nda chísée̱n ni xi si̱ꞌin ji, ngatꞌa̱ nga jè bo̱a̱ kjiꞌi ni xi ndajín xi je tjíꞌmí kondra̱a̱ ndi̱a̱ná, ko̱jo kondra̱a̱ ngayeje xota̱ ndiꞌaa̱, ngatꞌa̱ achichí nga ndajín, kó nde ngojín xi ma chji̱a̱jo.
18Kósꞌe̱ na̱ Abingaii̱l tsá katsꞌén nga iskjíbé jó úchán pan, ko̱jo jó ti̱jìtjíxin bino̱, ko̱jo ún cho̱tsa̱nga̱ xi je kiniꞌánchján, ko̱jo yichán kilo̱ to ndso̱ko̱a̱n ṉño̱pan xi je kamátsjó, ko̱jo úchán én tostsi̱jè yiꞌi, ko̱jo jó úchán ṉño̱ tjen toꞌingo̱ xi je kixí, kó bórroó katsꞌenkaꞌa ngayeje kui nii̱. 19Kó bi̱ katsoó já mosoo̱:
—Tangíntjónjnúꞌun, kó an kjuintjíngíjnúꞌun. Ta̱nga katsóyàjiín xi̱ꞌii̱n kui nii̱. 20Kó kisꞌijñasoón bórroó nga kijí, sꞌe̱ jaꞌajaya ngi̱ndie nínga ꞌmaa̱ na̱xi̱i̱, kó Ndabii̱ ko̱jo já xí tjimájo̱ kasakoo̱ na̱ Abingaii̱l. 21Ndabii̱ ja̱ bo̱a̱ jè bi̱ katsó:
Nga ja̱koxi̱ ta̱kjo̱a̱ndaní nga askóo̱n ngayeje ni xi tjiín kui nda̱a̱ ki̱a̱ nangi kixií, kó nde ngo ni kichajájiín, kó ni xi ndajín íchjína kuí kjo̱a̱a̱ ni xi nda xi katsꞌée̱n. 22¡Bo̱a̱ kjiꞌi ni ngatsꞌénjo̱ Néná kondra̱a̱ Ndabii̱, kó ngatásón ngasee̱, ta̱nga tsi ngotꞌe̱ ko̱jo tsi ndyiojón sa̱ꞌinkjatsón án ngayeje ni xi tjiín, kó sa̱ꞌinkꞌién an ngayeje jáxíꞌiín!
23Kó kjiꞌanga na̱ Abingaii̱l kamábe Ndabii̱, tji̱e̱nmá jatjajenni bórroó, kó nga jachókoón Ndabii̱ asiéntikoó ngaskande nga kisitꞌaa̱ kje̱n tꞌanangii̱, 24kósꞌe̱ ki̱a̱ kisꞌijña tꞌa se Ndabii̱, sꞌe̱ bi̱ katsoó:
—¡Ji ndi̱a̱, an ngatꞌákaniéna ni xi ꞌniú ndajiín! Ta̱nga ꞌniú míꞌaá nga te̱ꞌéndiè ji nga kui na̱ mosòo̱ kuichjiájo ngotjoón, kó ndaꞌyé ji ni xi kuichjiá an. 25ꞌNiú míꞌaá ji ndi̱a̱, nga ngata̱ niꞌínsénjíi̱n Nabaa̱l, ngatꞌa̱ ta̱nisién nga ndajín, ngatꞌa̱ xikó ꞌmí kuí, bo̱a̱ kón, Nabaa̱l ꞌmí, kó kitikjo̱a̱ boá, ta̱nga an, nga na̱ moso̱ tse̱ an, kamábejín an moso̱ xi kanangiye ji, 26kó ngotꞌe̱ ꞌne̱ ndi̱a̱, tikón boá Néná, kó tikón ini̱màa̱, ngatꞌa̱ Néná boá xi katsjandièjín nga xota̱ si̱ꞌinkꞌin ji, kó nga jí má si̱ꞌingojo ji. Bo̱a̱ kon ngatama kondra̱a̱, xikoó Nabaa̱l, ko̱jo kui xota̱ xi mejeén nga ndajín sa̱ꞌínjo̱ ndi̱a̱na.
27Kó ngotꞌe̱ ꞌne̱, kui nii̱ xi jeꞌejoo̱ na̱ mosòo̱ ndi̱a̱a̱, kó ngataꞌeé kui nii̱ moso̱ xi kꞌi̱e̱ síndojo̱ ndi̱a̱na. 28ꞌNiú míꞌaá nga si̱ꞌinjetakínní kjo̱a̱a̱ ni xi ndajín xi katsꞌen an, ngatꞌa̱ Néná boá xi ꞌniú ku̱i̱ꞌíjñá xota̱ tji̱e̱ tse̱ ji ndi̱a̱, kjo̱a̱a̱ nga jí boá ndi̱a̱ xi bixkén ji kjo̱a̱xcha̱án Néná, ko̱jo nga kꞌuiéjiín ni xi ndajín ngayeje ni̱xtjin nga ku̱i̱ndyin ji nga̱sondie.
29Kó ndatsi ngo xota̱ xi ka̱mamejeén sa̱ꞌínkꞌieén jí, ta̱nga kjo̱a̱mindyiòo̱n ji ndi̱a̱, ki̱a̱ nijan tikón kjo̱a̱mindyioo̱n xota̱ xi síndo ngindyi̱ko̱n Néná, kui xi Nèe̱ nga, kó kuí boá xi ko̱títsojo kjo̱a̱mindyioo̱n kondra̱ tse̱, xikoó tsi ki̱a̱ ku̱i̱ndyiá ngo ni xi chjiníni ndi̱jo̱ ndayojo.
30Kó kjiꞌanga Néná sa̱ꞌínkjatjosón ni nda xi katsóyàtjoón kjo̱a̱a̱ ji ndi̱a̱, ko̱jo ngije ji xi tibotíxomée̱ xota̱ Israee̱l, 31kui nii̱ ndi̱a̱, jmí ni si̱ꞌinkjéjín ji nga ndajín kiniꞌín, kjo̱a̱a̱ nga kju̱i̱e̱són xota̱ xi jmí jéjiín, ko̱jo tsi kiniꞌíngaje ji. Kó kjiꞌanga Néná tsja̱angaꞌniuú ji ndi̱a̱, ngatjaꞌátsjiee̱n kui na̱ mosòo̱.
32Kó Ndabii̱, bi̱ katsoó na̱ Abingaii̱l:
—¡Ngatamachikonñé Néná, kui xi Nee̱ xota̱ Israee̱l, kui xi katsangiyaa ji ngotꞌe̱ tsi̱ꞌe̱ nga an jéꞌe̱chínní! 33¡Ngatamachikonñé kjo̱a̱kjíntakóo̱n, kó ngatamachikonñé ji, ngatꞌa̱ jí boá xi ikꞌíchjée̱ tsi̱ꞌe̱ nga jmíjín xi kju̱i̱e̱són, ko̱jo nga án má bo̱a̱ xi sa̱ꞌingojo an!
34Ngatꞌa̱, ¡tikón Néná, kui xi Nee̱ xota̱ Israee̱l, nga kuí boá xi íchjaá nga jmí ni xi ndajín sa̱ꞌinjo̱jaán ji! Ngatꞌa̱ tsi tsájín kjindibéchinní ngindiee̱ nga si̱si̱én, nde ingojínra̱ xota̱ kisꞌińdo ngase nga̱sondie xi chji̱a̱ni Nabaa̱l tsobo̱a̱.
35Kó Ndabii̱ má xi iskjíbé ni xi yaꞌa na̱ Abingaii̱l, kó bi̱ katsoó:
—Tꞌen xió xió ji ndiꞌàa̱, ngatꞌa̱ jè katsꞌensée̱n ni xi kase ji, ko̱jo katsꞌenjo̱ꞌo an ni xi kichjiéꞌé ji.
36Kó na̱ Abingaii̱l kijí nginí nínga tikón Nabaa̱l, kó kamábe nga kui nda̱a̱ ngo sꞌué ꞌniú tjítsꞌén ki̱a̱ ndiꞌaa̱, xikó maá tsi ngo sꞌué xí tsꞌén ngo nda̱ re, kó Nabaa̱l achichí tsjá kisꞌiee̱ ini̱ma̱a̱, kó achichí ꞌniú je chꞌi̱, kuíni nga nde katsóyàjiín na̱ Abingaii̱l ni xi katsꞌén, ngaskande nga kisisie̱én.
37Kó nga kamángindyiojón, ngije ngiti̱ chꞌi̱jín Nabaa̱l, chjo̱ón katsóyaà kui nii̱, kó achichí katsakjónní nga ngaskande kꞌienya má. 38Kó ngije jaꞌa tie ni̱xtjin, Néná katsjaá ngo chiꞌin Nabaa̱l, kó kꞌien.
39Kó ngije tsintꞌié Ndabii̱ nga je kꞌien Nabaa̱l, bi̱ katsó: ¡Ngatamachikonñé Néná, ngatꞌa̱ kuí boá xi katsꞌéndajin ni xi ndajín xi mejeén sa̱ꞌínjo̱na Nabaa̱l katsaki, kó nga jmí ni katsꞌénjo̱jínna, ta̱nga ti̱kuíní Nabaa̱l xi tsꞌákanieé ni xi ndajín xi sa̱ꞌínjo̱na katsaki! Jaskan ngije kamá kui nii̱, Ndabii̱ katsangiyaa̱ xota̱xchà na̱ Abingaii̱l tsi̱ꞌe̱ nga kui kꞌuijñájo̱. 40Kó kjiꞌanga já mosoo̱ Ndabii̱ kijí ki̱a̱ na̱xi̱ Karmeloo̱ nínga tikón na̱ Abingaii̱l, bi̱ katsoó:
—Ndabii̱ boá xi katsangiyajne̱ nínga tindyin ji, tsi̱ꞌe̱ nga chjo̱ón kui ka̱ma ji, 41kó na̱ Abingaii̱l jastjíe̱n, kó asiéntikoó ngaskande nga kisitꞌaa̱ xtjien tꞌanangii̱ nga bi̱ katsó:
—Kꞌi̱e̱ tikòn kui na̱ mosoo̱ kꞌi̱e̱e̱, tsi̱ꞌe̱ nga an konijón an se mosoo̱ ndi̱a̱na.
42Sꞌe̱ na̱ Abingaii̱l tsá jastjíe̱n kó kisꞌijñasoón ngo bórró, kó kijíjo̱ nga ún ínchjín xo̱ngò xí tsꞌenseén, sꞌe̱ kijítji̱ngii̱ xota̱xchà xí katsangiya Ndabii̱, kósꞌe̱ chjo̱ón Ndabii̱ kamá.
43Kó Ndabii̱ ti̱ kisꞌijñajo̱ na̱ Ainoaa̱n nga, kui xi chji̱a̱ni na̱xi̱ńdáꞌniú Jesree̱l, kó nga joó nga chjo̱ón kamá. 44Ngatꞌa̱ Sauu̱l ja̱bo̱a̱ jè katsjaá tsa̱kji̱ín, kui xi ꞌmí na̱ Mikaa̱l, chjo̱ón Ndabii̱, kui nda̱ xi ꞌmí Paltii̱, kui xi ndií Laii̱ kamá, xi chji̱a̱ni nangi Ngalii̱n.
Currently Selected:
1 Samuee̱ 25: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
