1 Samuee̱ 24
24
Ndabii̱ katsꞌénjetakoón Sauu̱l ki̱a̱ Ee̱n-Ngandii̱
1Kó kjiꞌanga Sauu̱l je kamaá nga kijíngátji̱ngii̱ xota̱ Filisteaa̱, kiꞌmíyaà nga Ndabii̱ ki̱a̱ tikón ki̱a̱ nangi kixií Ee̱n-Ngandii̱.
2Kó Sauu̱l kijíjo̱ ján mi̱ jáxíꞌín xi katjoꞌójin xi chji̱a̱ni ngayeje nangi Israee̱l, kó kijíngase Ndabii̱ ko̱jo xota̱a̱ ki̱a̱ nínga síndo na̱xi̱ nínga ꞌbítso̱ma tindso̱ kꞌijñaá. 3Kó nga jachó ngo nchꞌoaá cho̱tsa̱nga̱ xi tikón ki̱a̱ ngi̱ya ndi̱ya̱à, nínga tikón ngo ti̱xa̱na̱xi̱, ki̱a̱ tsꞌasꞌien Sauu̱l, tsi̱ꞌe̱ nga kijíkjati.
Kó Ndabii̱ ko̱jo já xí tsoꞌbájo̱ ki̱a̱ kisꞌińdo ki̱a̱ ngi̱chí ngiyaa̱ kui ti̱xa̱na̱xi̱i̱, 4kó kui já xí tsoꞌbájo̱ Ndabii̱, bi̱ katsoó:
—¡Ngotꞌe̱ ꞌne̱, nga je kjochó ni̱xtjin kjiꞌanga Néná bi̱ katsoó ji: Án boá xi sa̱ꞌinkꞌasꞌien An ngi̱ya ndse̱ ji kondra̱a̱, kó ta̱ ni xi mejeénri ti̱ꞌinje̱ ji! Kósꞌe̱ jastjíe̱n Ndabii̱, kó si̱e̱n si̱e̱n tsatie nga̱ndee̱ ńjño xi yajá Sauu̱l. 5Sꞌe̱ jaskan ngije kamá kui nii̱, achichí ni xi kamaá ini̱ma̱a̱ Ndabii̱ ngatꞌa̱ tsatie ńjño xi kjitꞌa nga̱xto̱n Sauu̱l. 6Kó bi̱ katsoó já xí tjimájo̱:
—¡Néná ngatjaꞌáxínna nga bo̱a̱ sa̱ꞌinjo̱ an ndi̱a̱na, kui nda̱ xi Néná jaꞌájin! ¡Nga sa̱ꞌinkꞌienjín an, ngatꞌa̱ kuí boá xi Néná jè jaꞌájin! 7Kó Ndabii̱ kui eén katsꞌénkjién nga katsꞌénxchánjo̱ já xí tjimájo̱, kó katsjandièjiín nga skjánjo̱ Sauu̱l. Kósꞌe̱ Sauu̱l jataxieni kui ti̱xa̱na̱xi̱i̱, kó kijíra ndi̱ya̱à.
8Ti̱ kjiꞌa jastjíe̱n Ndabii̱, kó jatjoxieni ti̱xa̱na̱xi̱i̱, sꞌe̱ askjandáyátji̱ngii̱ Sauu̱l, nga bi̱ katsoó:
—¡Ji re, ji xi ndi̱a̱na ji! Kó nga askotsijenni Sauu̱l nga̱xto̱n, Ndabii̱ asiéntikoó ngaskande nga kisitꞌaa̱ kje̱n tꞌanangii̱ nga katsꞌéndikón. 9Sꞌe̱ Ndabii̱ tji̱e̱n má bi̱ katsoó Sauu̱l:
—Míkjo̱a̱a̱ nga ndaꞌyée̱ én xí chji̱a̱ xota̱ xi bi̱ tsoó: Ndabii̱ ni xi ndajín mejeén sa̱ꞌínjoo̱ ji. 10Ngotꞌe̱ ꞌne̱, kuí ma ni̱xtjii̱n nga kamábe ndyikin ji, kótsꞌèn nga Néná boá xi katsꞌénkꞌasꞌiee̱n ngi̱ya ndsa̱ án ki̱a̱ ngi̱yaa̱ ti̱xa̱na̱xi̱i̱, kó kandokjo̱a̱ kjo̱a̱a̱ nga si̱ꞌankꞌiee̱n ji, ta̱nga ni̱ma̱ kamána ji, ngatꞌa̱ bi̱ kixian an: Ka̱májín ni xi ndajín sa̱ꞌinjo̱ an ndi̱a̱na, kui nda̱ xi Néná jaꞌájii̱n.
11Kó tsitsíjin ji na̱ꞌmi, tsitsíjìi̱n nga nga̱ndee̱ ńjñóo̱ nga kꞌi̱e̱ tjiyá ndsa̱ án, ngatꞌa̱ nga tsatie an nga̱ndee̱ ńjñóo̱ katsꞌenkꞌiénjaán.
Ngatamaye ji kó ti̱ꞌinkjé jí nga jmí ni xi ndajín tjítsꞌenjo̱jaán ji, ti̱nde tsꞌénkjánjo̱jaán, ti̱nde jmí jé tjítsꞌenjín an kondra̱ tse̱, ndatsi nga ja̱koxi̱ jí boá xi timindyiséní tsi̱ꞌe̱ nga si̱ꞌinkꞌínní.
12Néná xí ngatamabe tsi nda ko̱jo tsi ndajín ndyi̱niꞌán ji ko̱jo an, kó Néná boá xi nga tsꞌéngojo, ta̱nga an, jmí ni sa̱ꞌinjo̱jaán jí.
13Xikó tsó ngo énkjínkón xi tjín xota̱ xi xcháná: Xota̱ xi ndajiín, ti̱kuíní xi fotjoo̱ ni xi ndajiín, kuíni nga jmí tsi kondra̱ tse̱ ka̱ma ndsa̱ án. 14ꞌYá xí tsoꞌbátji̱ngii̱ nda̱ ree̱ na̱xi̱ńdá Israee̱l. ꞌYá xí tsꞌénmongatji̱ngii̱. A ngo ńñá xí je kꞌien. Axa̱ ngo xiꞌyá. 15Néná boá xi ngatama nendiꞌamasiee̱n, kó kuí boá xi ka̱tso̱yà tsi nda ko̱jo tsi ndajín ndyi̱niꞌán ji ko̱jo an, kó ngatjíni kjo̱a̱ndana, sꞌe̱ ngatꞌaxiéꞌána ngi̱ya ndse̱.
16Kó ngije kamaá Ndabii̱ nga bo̱a̱ kjiꞌi ni xi katsoó Sauu̱l, Sauu̱l bi̱ katsó:
—¡A ji boá xi tindokjo̱e̱ ji Ndabi̱, ji xi ndína ji! Kósꞌe̱ Sauu̱l achichí ꞌniú askjandá, 17kó bi̱ katsoó Ndabii̱:
—Achichí kixi̱ ngase ji, ta̱bo̱a̱jiín an, ngatꞌa̱ ni xi nda boá xi kiniꞌínje̱ní án, kó án, ndajíntsꞌèn tsꞌénꞌbichjií ji. 18Jí boá xi je akake ji ngotꞌe̱ nga ni xi nda kiniꞌínje̱ní, ngatꞌa̱ Néná ngi̱ya ndse̱ ji katsꞌénkꞌasꞌienna, kó jí kiniꞌínkꞌínjínní, 19ngatꞌa̱, ꞌyá nda̱ xi sa̱ko̱ó kondra̱a̱, kó sa̱ꞌínkjí kjo̱a̱nda kjo̱a̱nda nga jmí ni sa̱ꞌínjo̱jín. Néná nda ngatsꞌénjoo̱ ji kjo̱a̱a̱ ni nda xi kiniꞌínje̱ní kui ni̱xtjii̱n.
20Ngotꞌe̱ ꞌne̱, jè be an nga ja̱koxi̱ boá nga ji xi ko̱ti̱xome ji, kó kjiꞌanga ji xi ko̱ti̱xome ji, nda kꞌuijñá kui ngi̱ndie nínga botíxoma xi chji̱a̱ni na̱xi̱ńdá Israee̱l. 21Ngotꞌe̱ ꞌne̱, te̱ꞌé ji ndso̱ꞌbe ji nga si̱ꞌinkjìn jí jaꞌeén Néná, nga si̱ꞌinkjiéjín ji xota̱ tji̱e̱na ngije kꞌien an, ti̱nde si̱ꞌinkjiéjín ji jaꞌénna ki̱a̱ ndiꞌaa̱ xota̱ xi xchána.
22Kósꞌe̱ Ndabii̱ katsjaá tsꞌoa Sauu̱l nga sa̱ꞌínkjatjosón ni xi katsoó. Kósꞌe̱ Sauu̱l kijí ndiꞌaa̱, kó Ndabii̱ ko̱jo já xí tsoꞌbájo̱ kijínijíngí nginí ki̱a̱ ngi̱ndie xi ꞌniú tikón nínga síndoo̱.
Currently Selected:
1 Samuee̱ 24: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
