1 Samuee̱ 23
23
Nga kisꞌijña Ndabii̱ ki̱a̱ nangi kixií
1Kó tjín xí kijítsóyaà Ndabii̱ nga xota̱ Filisteaa̱ ndyi̱kjánjo̱ xota̱ na̱xi̱ńdáꞌniú Keilaa̱, ko̱jo nga je ndyi̱tsꞌènchéjeé nínga mindyiá ni xi maxchaá. 2Kósꞌe̱ Ndabii̱ asíyaá Néná nga bi̱ katsoó:
—A kjuínkjánjo̱ án kui xota̱ Filisteaa̱.
Kó Néná bi̱ katsoó:
—Tꞌen ji, kó ti̱xkénje̱ ji xota̱ Filisteaa̱, kó ꞌna̱xiéꞌé ji xota̱ na̱xi̱ńdáꞌniú Keilaa̱.
3Ta̱nga jáxíꞌín xi síndojo̱ Ndabii̱, bi̱ katsoó:
—Tsi nga kꞌi̱e̱ tindyionjne̱ nangi Jundáa̱, kó achichí ndyi̱ndakonjne̱, kó ngase má tsi ki̱a̱ kongínjne̱ na̱xi̱ńdáꞌniú Keilaa̱ nga kongínki̱xkánjo̱jne̱ jájuún xota̱ Filisteaa̱.
4Kósꞌe̱ Ndabii̱ ti̱ asíyá nginií Néná. Kó Néná bi̱ katsoó:
—Ti̱sítji̱n ji, kó tꞌenja̱ye ji na̱xi̱ńdáꞌniú Keilaa̱, ngatꞌa̱ Án boá xi sa̱ꞌinkꞌasꞌien An ngi̱ya ndse̱ ji xota̱ Filisteaa̱.
5Kó Ndabii̱ ko̱jo já xí tjimájo̱, kijí na̱xi̱ńdáꞌniú Keilaa̱, kó askjanjo̱ xota̱ Filisteaa̱, kósꞌe̱ kijíjo̱ cho̱o̱, kó katsꞌénchaja kui xotaa̱, kó bo̱a̱ tsꞌén Ndabii̱ katsꞌéndé xota̱ xi chji̱a̱ni na̱xi̱ńdáꞌniú Keilaa̱.
6Kó kjiꞌanga Abiataa̱r ndií Aimelee̱k tsanga nga kijí ki̱a̱ na̱xi̱ńdáꞌniú Keilaa̱ ki̱a̱ nínga tikón Ndabii̱, kijíjo̱ ńjño ndioo̱ nga. 7Kó nga kiꞌmíyaà Sauu̱l, nga Ndabii̱ je kijí ki̱a̱ na̱xi̱ńdáꞌniú Keilaa̱, bi̱ katsó Sauu̱l:
—Néná boá xi je katsꞌénkꞌasꞌien ngi̱ya ndsa̱ án, ngatꞌa̱ je ki̱a̱ kisꞌijñaꞌya ngo na̱xi̱ńdáꞌniú xí nga̱ntjo̱a̱ ko̱jo ni xi ꞌbíchjájo̱ni tjiín. 8Kósꞌe̱ Sauu̱l ítikó ngayeje xota̱ na̱xi̱ńdaá tsi̱ꞌe̱ nga ko̱e̱je̱ kjo̱a̱xchán ki̱a̱ na̱xi̱ńdáꞌniú Keilaa̱, kó nga ku̱i̱ꞌíchjáꞌyá nga skjánjo̱ Ndabii̱ ko̱jo xota̱ xi tsoꞌbájo̱. 9Ta̱nga nga kamákjiín Ndabii̱ nga Sauu̱l kamámejeén sa̱ꞌínkꞌién, bi̱ katsoó chináꞌmi Abiataa̱r:
—Ndibéje̱ní ńjño ndioo̱.
10Kósꞌe̱ bi̱ katsó Ndabii̱:
—Ji Ne, ji xi Nee̱ xota̱ Israee̱l ji, kui mosòo̱ xi̱ꞌbi̱ jè be nga Sauu̱l mejeén kji̱ndi̱bá kꞌi̱e̱ na̱xi̱ńdáꞌniú Keilaa̱, tsi̱ꞌe̱ nga sa̱ꞌínkjié kui na̱xi̱ńdáꞌniuú ta̱ngatꞌanii̱ an. 11Kó a sa̱ꞌínkꞌasꞌienna xota̱ xi chji̱a̱ni na̱xi̱ńdáꞌniú Keilaa̱ ngi̱ya tsja Sauu̱l. A kji̱ndi̱bá Sauu̱l, xikótsꞌèn je tsintꞌié kuí mosòo̱ xi̱ꞌbi̱. Ji Ne xi tsi̱ꞌe̱ xota̱ Israee̱l, ꞌniú míꞌaá nga tꞌíyée̱ kui mosòo̱ ni xi ka̱maa̱. Kó Néná, bi̱ katsó:
—Jo̱o̱n, kji̱ndi̱bá boá.
12Kó Ndabii̱ ti̱ bi̱ ti̱ katsó nginí nga asíyá:
—A sa̱ꞌínkꞌasꞌienna xota̱ xi chji̱a̱ni na̱xi̱ńdáꞌniú Keilaa̱ ngi̱ya tsja Sauu̱l. Kó Néná, bi̱ katsó: Jo̱o̱n, sa̱ꞌínkꞌasꞌieénri.
13Kósꞌe̱ Ndabii̱ jastjíe̱n kui ko̱jo jun úchán jáxíꞌín xi tsoꞌbájo̱, kó jatjoni na̱xi̱ńdáꞌniú Keilaa̱, kó ta̱ nínga kamámejénrií kijí.
Kó kiꞌmíyaà Sauu̱l nga Ndabii̱ jatjoni ki̱a̱ na̱xi̱ńdáꞌniú Keilaa̱, sꞌe̱ ngiti̱ kijíjínni.
Nga kisꞌijñaꞌma Ndabii̱ ki̱a̱ nangi kixií
14Kó Ndabii̱ ki̱a̱ kisꞌijña nangi kixií, ki̱a̱ ngi̱ndie xi niꞌin fóchó ki̱a̱ xtji̱e̱e̱n na̱xi̱ xi chji̱a̱ni nangi Sii̱f. Kó Sauu̱l ndyiojón ndyiojón tsangase Ndabii̱, ta̱nga Néná katsꞌénkꞌasꞌiénjiín ngi̱ya tsja.
15Kó nga kamábe Ndabii̱ nga Sauu̱l kamámejeén sa̱ꞌínkꞌién, ki̱a̱ kisꞌijña ki̱a̱ na̱xi̱ńdáꞌniú Oree̱, ki̱a̱ tꞌa nangi kixií nangi Sii̱f. 16Kó Jonataa̱n ndií Sauu̱l, kijíkoón Ndabii̱ ki̱a̱ na̱xi̱ńdáꞌniú Oree̱, kó ki̱a̱ katsjángaꞌniuú Ndabii̱ ngi̱ya tsja Néná, 17kó bi̱ katsoó:
—Ngata̱ ndakinjín má ji, ngatꞌa̱ Sauu̱l na̱ꞌmina sa̱kójiín ji. Jí boá xi ko̱ti̱xome ji na̱xi̱ńdá Israee̱l, kó án boá xi ka̱ma an xi ma joó xi ko̱tíxoma, kó ngaskande ti̱kuii Sauu̱l na̱ꞌmina je be kui nii̱ nga.
18Kósꞌe̱ nga joó índa ngo ni ngindyi̱ko̱n Néná, kó Ndabii̱ ki̱a̱ kisꞌijña ki̱a̱ na̱xi̱ńdáꞌniú Oree̱, sꞌe̱ Jonataa̱n kijí nginí ndiꞌaa̱.
19Jaskan xota̱ xi chji̱a̱ni na̱xi̱ńdáꞌniú Sii̱f kijínijíngí nga kijítsóyaà Sauu̱l ki̱a̱ na̱xi̱ńdáꞌniú Ngabaa̱, kó bi̱ katsoó:
—Ndabii̱ ki̱a̱ tikónꞌmá nangijne̱, ki̱a̱ ngi̱jin ndi̱jo̱ yiꞌii̱ na̱xi̱ńdáꞌniú Oree̱, ki̱a̱ tꞌa tji̱ngi̱ Akilaa̱, kui xi tikón xtji̱e̱e̱n na̱ngii̱ nangi kixií Jesimoo̱n. 20Kuíni nga ji re, tsá tꞌenja̱ye ji ngotꞌe̱, xikótsꞌèn mejeén ji, kó ji̱n boá xi si̱ꞌankꞌasꞌienjne̱ ngi̱ya ndse̱ ji.
21Kó bi̱ katsó Sauu̱l:
—¡Néná ngatsꞌénchíkonñéjnú jún, ngatꞌa̱ ni̱ma̱ kamájnú jún an! 22Tangínjnú, kó ꞌniú míꞌájnúꞌun, nga ti̱ndyi̱nséyà ngasejnú, kó tsitsijenjnúu̱ ngi̱ndie nínga ꞌbíjñá, kó ꞌyání bo̱a̱ xi je kamábe ki̱a̱a̱, ngatꞌa̱ jè kiꞌmíyàna nga achichí xò maña̱ kui nda̱a̱. 23Tangínjnú tsobo̱a̱, kó tꞌíyájnúꞌun ngayeje ngi̱ndie nínga ꞌbíjñaꞌma, kósꞌe̱ tꞌíyá nda nda nginíjnúꞌun, sꞌe̱ jaskan an kjuínjo̱jnúꞌun, kó tsi ki̱a̱ tikón kui nangii̱, ki̱a̱ kongase an ngi̱jii̱n ngayeje xota̱ na̱xi̱ńdáꞌniú xí kjín mi̱ maa̱, xi chji̱a̱ni nangi Jundáa̱.
24Kó bo̱a̱ tsꞌén kui xotaa̱ jatjoni na̱xi̱ńdáꞌniuú, kó kijí nangi Sii̱f, kó ki̱a̱ kijítjoón Sauu̱l.
Ta̱nga Ndabii̱ ko̱jo xotaa̱ je ki̱a̱ síndo ki̱a̱ nangi kixí xi ꞌmí Maoo̱n, ki̱a̱ nangi Araba̱ xtji̱e̱e̱n na̱ngii̱ nangi kixií Jesimoo̱n. 25Jaskan Sauu̱l ko̱jo xotaa̱ jatjoni ki̱a̱a̱ nga kijíngase Ndabii̱, ta̱nga kui nii̱ kiꞌmíyaà Ndabii̱, kó jatjajenni kui ndi̱jo̱jee̱, sꞌe̱ ki̱a̱ kisꞌijña ki̱a̱ nangi kixií Maoo̱n.
Kjiꞌanga tsintꞌié kuí nii̱ Sauu̱l, kijíngátji̱ngii̱ Ndabii̱ ngaskande nangi kixií Maoo̱n. 26Kó Sauu̱l ngo ndieè na̱xi̱i̱ kijínijíngíni, kó Ndabii̱ ko̱jo xotaa̱ xi ingo ndieè kijínijíngíni kui. Kó Ndabii̱ achichí tsá kijí nga jatjongii̱ yojoo̱, ta̱nga Sauu̱l ko̱jo xotaa̱ ja̱bo̱a̱ jè jaꞌatjiyajoo̱n Ndabii̱, tsi̱ꞌe̱ nga stso̱bo̱a̱ kui ko̱jo xota̱a̱. 27Ti̱ kjiꞌa jachókoón Sauu̱l ngo nda̱ xi tsꞌényaꞌa ngo én, nga bi̱ katsoó:
—¡Tsá ye ji, kó ndibé jí kꞌi̱e̱e̱, ngatꞌa̱ xota̱ Filisteaa̱ je katsꞌéntsi̱ꞌe̱ na̱xi̱ńdaá!
28Kuíni nga Sauu̱l kijíꞌoyá nginí kó ngiti̱ kijítji̱ngíjiín Ndabii̱, kó kijíkjánjo̱ xota̱ Filisteaa̱, kuíni nga kui ngi̱ndiee̱ Selaa̱-Amaa̱-Lekoo̱t kiꞌmí.
29Kósꞌe̱ Ndabii̱ jatjoni ki̱a̱a̱, kó ki̱a̱ kijíkꞌíjñá ngi̱ndie xi ꞌniú tikón xi chji̱a̱ni nangi Ee̱n-Ngandii̱.
Currently Selected:
1 Samuee̱ 23: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
