1 Samuee̱ 22
22
1Kó Ndabii̱ jatjoxieni kui ngi̱ndiee̱, sꞌe̱ ki̱a̱ kijíkꞌíjñá ti̱xa̱na̱xi̱i̱ nangi Andulaa̱n, kó nga tsintꞌié já ntsꞌi̱e̱ ko̱jo xota̱ ndiꞌaa̱ na̱ꞌmii̱, kijíkoón nínga tikón. 2Kó ngayeje xota̱ xi kjo̱a̱ni̱ma̱ ndyi̱foaꞌatio, ko̱jo ngayeje xi to̱n tjitjieén, ko̱jo ngayeje xi síndo xtinda, ki̱a̱ kamátikójo̱ Ndabii̱, kó kuí boá xi kamá ngito̱ko̱o̱, kó mara̱ nijón úchán jáxíꞌín xi nijan kijíjo̱.
3Sꞌe̱ jaskan Ndabii̱ kijí ki̱a̱ na̱xi̱ńdáꞌniú Mispa̱, ngi̱ndie xi chji̱a̱ni nangi Moaa̱b, kó bi̱ katsoó nda̱ ree̱ nangi Moaa̱b:
—ꞌNiú míꞌaá nga ko̱e̱ꞌéndiè ji nga kꞌi̱e̱ kꞌuíndojo̱jnú na̱ꞌmina ko̱jo na̱ana, ngaskande nga sku̱i̱e̱ an ni xi mejeén Ndi̱a̱ná kui xi Néná nga sa̱ꞌínjo̱na.
4Kósꞌe̱ Ndabii̱ kijíjo̱ xota̱ xi xchaá nínga tikón nda̱ ree̱ nangi Moaa̱b, kó ki̱a̱ kisꞌińdojo̱ ngayeje ni̱xtjin nga kisꞌijña Ndabii̱ ki̱a̱ ngi̱ndie xi ꞌniú tikoón.
5Ta̱nga nda̱chji̱ni̱e̱ꞌe̱én xi ꞌmí Ngaa̱nd, bi̱ katsoó Ndabii̱:
—Ngata̱ kꞌi̱e̱jín mindyin ji kui ngi̱ndie xi ꞌniú tikoón, ta̱sá tꞌen ji nangi Jundáa̱.
Kó Ndabii̱ kijí, sꞌe̱ jachó nínga tikón kꞌijñaá na̱xi̱ńdáꞌniú Aree̱t.
Sauu̱l katsꞌénkꞌién já chináꞌmii̱ na̱xi̱ńdáꞌniú Noo̱b
6Kó Sauu̱l kiꞌmíyaà kjo̱a̱a̱ Ndabii̱ ko̱jo já xí nijan síndojo̱. Kó Sauu̱l ki̱a̱ kisꞌijña nangi Ngabaa̱, kó ngo ngindiee̱ ngo yátamarisko̱ xi tikón ki̱a̱ na̱xi̱ńdáꞌniú Ramaa̱ kisꞌijñangi, nga tsꞌényaꞌa yá xí tjítokó ki̱cha̱yojoó, kó ngayeje já mosoo̱ ki̱a̱ kisꞌińdo nga ngo foaꞌatjiyajoo̱n kui. 7Kó Sauu̱l bi̱ katsoó já mosoo̱ xi síndo nga ngo foaꞌatjiyajoo̱n:
—Ndaꞌyájnúꞌun ngotꞌe̱ ꞌne̱ jún xota̱ tji̱e̱e̱ Benja̱: A beriítakónjnú nga ndií Isaii̱ tsja̱ajnú jún, ngi̱ndie nínga kꞌuitji̱e̱jnú ni ko̱jo nínga kꞌuitji̱e̱jnú tostsi̱je̱è, ko̱jo a jún boá xi sa̱ꞌínjnú ngito̱ko̱o̱ jájún xi ngo mi̱, ko̱jo tsi xi úchán xota̱ ko̱tíxomaa̱, 8tsi̱ꞌe̱ nga ngayeje jún an ku̱i̱xkánjo̱jnúꞌun, kó nga jmíjín xi ka̱tso̱yàna nga ndína je ki̱a̱ nijan kamájo̱ ndií Isaii̱, ko̱jo nga jmíjín xi ni̱ma̱ ka̱maa̱ an nga ka̱tso̱yàna kótsꞌèn nga ndína je índajo̱ moso̱na kondra̱ tsa̱ꞌa̱n, tsi̱ꞌe̱ nga an skondáꞌmána, ngaskande kui ni̱xtjin xi̱ꞌbi̱.
9Kósꞌe̱ Ndoee̱j, nda̱ xi chji̱a̱ni nangi Endoo̱n, kui xi ngito̱ko̱o̱ já xí mosoo̱ Sauu̱l kamá, bi̱ katsó:
—Án má xi kamábe an nga ndií Isaii̱ kijí na̱xi̱ńdáꞌniú Noo̱b, nínga tikón Aimelee̱k ndií Aitoo̱b, 10kó Aimelee̱k asíyaá Ndi̱a̱ná kui xi Néná kjo̱a̱a̱ Ndabii̱, kó katsjaá nichinie, kó ti̱ katsjaá ki̱cha̱ndojoó Ngoliaa̱t, nda̱ Filisteaa̱ nga.
11Kósꞌe̱ nda̱ ree̱ katsangiyakjaꞌá chináꞌmi Aimelee̱k ndií Aitoo̱b, ko̱jo ngayeje xota̱ ndiꞌaa̱ na̱ꞌmii̱, ko̱jo kui já chináꞌmi xi síndo na̱xi̱ńdáꞌniú Noo̱b, kó ngayejee̱ kui jaá kijíkoón nda̱ ree̱. 12Kó Sauu̱l, bi̱ katsoó:
—¡Ndaꞌyéní, ji xi ndií Aitoo̱b ji!
Kó bi̱ katsó kui nda̱a̱.
—¡Tsꞌéntꞌieñaá, ndi̱a̱, kꞌi̱e̱ tikón an kꞌi̱e̱e̱!
13Sꞌe̱ Sauu̱l, bi̱ katsoó:
—Míkjo̱a̱a̱ nga ngo ni ikꞌíndajnú ji ko̱jo ndií Isaii̱ kondra̱ tsa̱ꞌa̱n, kó nga katseꞌée̱ nichinie ko̱jo ngo ki̱cha̱ndojó, ko̱jo nga ngaskande Ndi̱a̱ná kui xi Néná akasíyée̱ kjo̱a̱a̱ kui, tsi̱ꞌe̱ nga an skjánjo̱na, kó nga an tsꞌénkondaꞌmana ngotꞌe̱ ꞌne̱.
14Kósꞌe̱ Aimelee̱k, bi̱ katsoó nda̱ ree̱:
—Ta̱nga ꞌyání xí tjín ngi̱jii̱n ngayeje mosòo̱ xi bo̱a̱ tsꞌén ꞌniátakón kamá xikoó Ndabii̱, kui xi xkandàa̱ má nga, ko̱jo ngito̱ko̱o̱ xota̱ xi koo̱n ji ma, ko̱jo achichí ꞌniú yandikón ngi̱ya ndiꞌàa̱ nga. 15A ngotꞌe̱ boá nga itsꞌi̱yañáa̱ nga tsíꞌáa̱ Ndi̱a̱ná kui xi Néná kjo̱a̱a̱ kui. ¡Jmí, bo̱a̱ sa̱ꞌin an! Jmíjín kótsꞌèn nga nda̱ ree̱ ka̱maa̱ nga ngo ni ku̱i̱ꞌíniéna an ko̱jo tsi xota̱ ndiꞌana, ngatꞌa̱ jmí ni bejín kui mosòo̱ xi̱ꞌbi̱ kjo̱a̱a̱ kui nii̱, tsi ni xi chichí ko̱jo tsi ni xi je.
16Ta̱nga nda̱ ree̱, bi̱ katsó:
—¡Ja̱koxi̱ boá nga ko̱yè jí Aimelee̱k, ko̱jo ngayeje xota̱ ndiꞌaa̱ na̱ꞌmíi̱!
17Kósꞌe̱ nda̱ ree̱, bi̱ katsoó jájún xi kondaa̱ kui xi síndotꞌaa̱ kui:
—¡Tangínjnú, kó ti̱ꞌankjiesónjnú já chináꞌmii̱ Ndi̱a̱ná kui xi Néná! Ngatꞌa̱ kui xotaa̱, ki̱a̱ nijan majo̱ Ndabii̱, ngatꞌa̱ ndatsi kamábe nga tsꞌénmonga, katsóyàjínna.
Ta̱nga já mosoo̱ ree̱, kamámejénjiín katsꞌénkꞌién já chináꞌmii̱ Ndi̱a̱ná kui xi Néná. 18Kósꞌe̱ nda̱ ree̱, bi̱ katsoó Ndoee̱j:
—¡Tꞌen ji, kó te̱ꞌéchjíi̱ já chináꞌmii̱!
Kó Ndoee̱j, kui nda̱ xi chji̱a̱ni xota̱ tji̱e̱e̱ Endoo̱n kijí kondra̱a̱ já chináꞌmii̱, kó kui ni̱xtjii̱n ichítié ko̱jo kantjiꞌún má jáxíꞌín xi ndyi̱yajá ńjño efoo̱nd xi lino̱ kamándani katsꞌénkjiesón. 19Kó ki̱a̱ na̱xi̱ńdáꞌniú Noo̱b, nínga na̱xi̱ńdáꞌniuú já chináꞌmii̱, ki̱cha̱ndojó katsꞌénkjiesónni ngayeje xotaa̱, xi chjo̱on xí xi̱ꞌin, ko̱jo jákjíndí xi̱xi̱, ko̱jo ndínda, ko̱jo cho̱yojo xi̱ꞌin, ko̱jo bórró, ko̱jo cho̱tsa̱nga̱.
20Ta̱nga ngo xota̱ tji̱e̱e̱ Aimelee̱k, kui xi ndií Aitoo̱b kamá xi ꞌmí Abiataa̱r jatjoꞌmaa̱ yojoo̱, kó ki̱a̱ kijí nínga tikón Ndabii̱. 21Kó Abiataa̱r katsóyaà Ndabii̱, nga Sauu̱l katsꞌénkjiesón já chináꞌmii̱ Ndi̱a̱ná kui xi Néná. 22Kósꞌe̱ Ndabii̱, bi̱ katsoó Abiataa̱r:
—Ja̱ bo̱a̱ jè be an nga kui ni̱xtjii̱n, kjiꞌanga ki̱a̱ kisꞌijña ki̱a̱a̱ Ndoee̱j, nda̱ xi chji̱a̱ni xota̱ tji̱e̱e̱ Endoo̱n, nga ja̱koxi̱ nga kuí xí ka̱tso̱yaa̱ Sauu̱l ngayeje ni xi ka̱maa̱. ¡Án boá xi konna kjo̱a̱a̱ nga kiniꞌánkꞌién ngayeje xota̱ ndiꞌaa̱ na̱ꞌmíi̱! 23Ta̱sá kꞌi̱e̱ ti̱ndyinra ji kꞌi̱e̱e̱, kó ngata̱ ndakinjín má ji, ngatꞌa̱ kui xi mejeén nga an sa̱ꞌínkꞌiénna, ti̱ mejénrií nga ji sa̱ꞌínkꞌieén nga, ta̱nga jmí ni ka̱májiín kꞌi̱e̱ nínga tikón an.
Currently Selected:
1 Samuee̱ 22: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
