1 Samuee̱ 21
21
Ndabii̱ tsangaa̱ Sauu̱l
1Kósꞌe̱ Ndabii̱ kijí ki̱a̱ na̱xi̱ńdáꞌniú Noo̱b, nínga tikón chináꞌmi Aimelee̱k, kó Aimelee̱k achichí kijíndikoón nga kamábe Ndabii̱, kó bi̱ katsoó:
—Ánní nga kjindibé so̱bo̱e̱ kon ji, kó nga jmíjín xi nijan kjindibéje̱ ji.
2Kó Ndabii̱, bi̱ katsoó chináꞌmi Aimelee̱k:
—Nda̱ ree̱ ngo xá katsangiyana, kó bi̱ katsóna: Nga jmíjín xi ngatamabe xá xí tsꞌéntsangiyañaa̱, kó jè bo̱a̱ kixiáa̱n já xí tsoꞌbájo̱na, ñá ngi̱ndie nínga ko̱ngasena. 3Kó ngotꞌe̱ ꞌne̱, a jmíjiín ún pan, ko̱jo tsi ta̱ ni xi tjiínri!
4Ta̱nga kui chináꞌmii̱, bi̱ katsoó Ndabii̱:
—Jmíjínna nichinie, ta̱nga tjínna pan xi je Ndi̱a̱ná ki xi Néná si̱ꞌankꞌasꞌiee̱n, ka̱má tsja an, ta̱nga ngototo tsi kui já xo̱ngo̱ò jmí ínchjín kisꞌiyojojo̱jín.
5Ta̱nga Ndabii̱, bi̱ katsoó chináꞌmii̱:
—Nga ja̱koxi̱, ínchjiín kjin kisꞌiṉdonijne̱ nga ján kui ni̱xtjin xi jetꞌaa̱. Kó kjiꞌanga tjín xá xí si̱ꞌanjne̱, kui já xo̱ngo̱ò tsꞌéntsjie yojoo̱, ndatsi jmí tsi xá xí ta̱xkiya xi̱ꞌba̱, kuíni nga ka̱má skji̱ni̱e̱ kui pan xi je tsjiee̱, kui ni̱xtjin xi̱ꞌbi̱.
6Kósꞌe̱ kui chináꞌmii̱ katsjaá pan xi je Ndi̱a̱ná kui xi Néná kiniꞌánkꞌasꞌiee̱n, ngatꞌa̱ ngiti̱ jmíjín kje̱ꞌe ngase pan ki̱a̱a̱, ta̱kuítsí kui pan xi je Ndi̱a̱ná ki xi Néná je kiniꞌánkꞌasꞌiee̱n, xi sꞌe̱ má kachjeꞌéxín ngindyi̱ko̱n Ndi̱a̱ná ki xi Néná, kó pan xi sꞌe̱ kachján má akasíkjoni, xikó má kjiꞌi kjo̱a̱xcha̱á. 7Ta̱nga kui ni̱xtjii̱n ki̱a̱ kisꞌijña ki̱a̱a̱ Ndoee̱j, nda̱ mosoo̱ Sauu̱l xi ngito̱ko̱o̱ já xí koo̱n cho̱tsa̱nga̱a̱ kamá, ki̱a̱ Ndiꞌandikoón Ndi̱a̱ná kui xi Néná.
8Kó Ndabii̱, bi̱ katsoó Aimelee̱k:
—A jmíjín kꞌi̱e̱e̱ ngo yá xi tjítokó ki̱cha̱yojó ko̱jo tsi ngo ki̱cha̱ndojó. Ngatꞌa̱ kji̱e̱ kjíbejín an ki̱cha̱ndojóna ko̱jo ni xi bixkánjo̱na, ngatꞌa̱ chjiéngá tsá si̱ꞌankjatjosón ni xi atíxoma nda̱ ree̱.
9Kó kui chináꞌmii̱, bi̱ katsoó:
—Ki̱cha̱ndojoó Ngoliaa̱t, nda̱ Filisteaa̱, kui xi kiniꞌínkꞌín ji ki̱a̱ nangi soón Elaa̱, kꞌi̱e̱ tikón nga tjíxtiéjinni ngo ńjño ki̱a̱ nga̱xto̱n ńjño efoo̱nd, tsi mejeén chjábé jí, chjábé, ngatꞌa̱ jmíjín ingo ki̱cha̱ndojó kꞌi̱e̱e̱.
Kó Ndabii̱, bi̱ katsó:
—¡Jmíjín ingo xi xikoó xi̱ꞌbi̱, ja̱ te̱ꞌéní!
10Kó ti̱kuii ni̱xtjin Ndabii̱ jastjíe̱n, kó tsangaa̱ Sauu̱l, kósꞌe̱ jachó ndiꞌaa̱ Akii̱ nda̱ ree̱ na̱xi̱ńdáꞌniú Ngaa̱t. 11Kó já mosoo̱ kui nda̱ ree̱, bi̱ katsoó Akii̱:
—A kuijín xi̱ꞌbi̱ xi Ndabii̱, nda̱ ree̱ kui nangii̱. A kuijín kuí xi̱ꞌbi̱ xi kandaa̱ só xi cháni nga bi̱ tsꞌén kanda:
«Sauu̱l katsꞌénkjiesón ngo mi̱ xota̱ xi kondra̱a̱,
ta̱nga Ndabii̱ tie mi̱ ma xi katsꞌénkjiesón kuí.»
12Kó Ndabii̱ ngi̱jin ini̱ma̱a̱ íjin kui eén, kó achichí katsakjónní Akii̱, nda̱ ree̱ na̱xi̱ńdáꞌniú Ngaa̱t. 13Kósꞌe̱ ngindyi̱ko̱n kui xotaa̱ kje̱ꞌe katsꞌén, kó xikoó tsi tsobeé katsꞌén yojoo̱, kó ta̱xkiya katsꞌénꞌindó ni ki̱a̱ nga̱ntjo̱a̱a̱ na̱xi̱ńdáꞌniuú, tji̱e̱nga kitsjien má ndáseé tsꞌoa. 14Kó Akii̱, bi̱ katsoó já mosoo̱: Kꞌi̱e̱ ndyi̱yajnú ngo nda̱ xi tsobeé kꞌi̱e̱e̱, míkjo̱a̱a̱ nga kꞌi̱e̱ kjindibájo̱jnú. 15¡A chajána xota̱ tsobé kꞌi̱e̱ ndiꞌana, tsi̱ꞌe̱ nga kꞌi̱e̱ jéꞌe̱jojnúꞌun kui nda̱ tsobeé ngindyikón án!
Currently Selected:
1 Samuee̱ 21: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
