1 Samuee̱ 20
20
Jonataa̱n asíko̱jo Ndabii̱
1Kó Ndabii̱ tsangaꞌma nga jatjoni nangi Nayoo̱t, ngi̱ndie xi tikón ki̱a̱ na̱xi̱ńdáꞌniú Ramaa̱, kó jachó nínga tikón Jonataa̱n, kósꞌe̱ bi̱ katsoó:
—Mí xí katsꞌen an. Mí ni xi ndajín, axa̱ mí jé xí katsꞌenjo̱ an na̱ꞌmíi̱, tsi̱ꞌe̱ nga an sa̱ꞌínkꞌiénna.
2Kó Jonataa̱n, bi̱ katsó:
—¡Jmí, jmí ni kiniꞌínjín ji, ti̱nde ko̱yèjín ji! Ngatꞌa̱ na̱ꞌmina án tjón tsóyàna ngayeje ni xi tsꞌén, tsi ni xi xi̱xi̱ ko̱jo tsi ni xi yiꞌi, kó míkjo̱a̱a̱ nga an ku̱i̱ꞌíꞌmána na̱ꞌmina kui nii̱. ¡Jmí, bo̱a̱jín ka̱ma!
3Kó Ndabii̱ ingo ndi̱yà katsjá nginí tsꞌoa nga bi̱ katsó:
—Na̱ꞌmíi̱ jè be nda nda nga nda tsꞌákaa̱ an, kó bi̱ra̱ tsꞌén katsꞌénkjó: Mejénjínna nga sku̱i̱e̱ kui nii̱ Jonataa̱n, ngatꞌa̱ tsita̱ tsjájín ka̱maa̱. Ta̱nga ja̱koxi̱ boá nga tikón Néná, ko̱jo nga tikón ini̱màa̱, nga jè ta̱ chiboá tsí chajaa̱ nga ko̱yà án.
4Kó Jonataa̱n, bi̱ katsoó Ndabii̱:
—Mí ni xi mejeén ini̱màa̱ nga sa̱ꞌin an nganda tse̱.
5Kó Ndabii̱, bi̱ katsoó Jonataa̱n:
—Ndyiojón boá nga si̱ꞌan sꞌueé sá tja̱tsi̱e̱e̱, kó chjiéngá ki̱a̱ nijan skjíni̱e̱jo an nichinie nda̱ ree̱, ta̱nga te̱ꞌéndièní nga ki̱a̱ kotíjña̱ꞌma an ki̱a̱ nínga jno̱o̱, ngaskande nga ka̱mangixoón ni̱xtjin xi ma jaán. 6Tsi na̱ꞌmíi̱ ka̱makjiín nga jmíjín an ki̱a̱a̱, bi̱ tꞌíi̱n: Ndabii̱ achichí ꞌniú katsꞌénna tsi̱ꞌe̱ nga tsjandièe̱ nga ko̱e̱je̱ na̱xi̱ńdáꞌniú Belee̱n, ngatꞌa̱ ngayeje xtín xota̱ ndiꞌaa̱ tsꞌenkꞌásꞌién ngo kjo̱a̱tjó xki̱ nó ki̱a̱a̱. 7Kó tsi bi̱ ka̱tso̱ kui nda̱ ree̱:
—¡Ndakjíꞌí! Ja̱ kui nda̱ mosòo̱ kꞌuieé kjo̱a̱xió, ta̱nga tsi sa̱ꞌínxchán, ngatamakjiín nga ni xi ndajín boá xi mejeén sa̱ꞌínjo̱na.
8Kó bo̱a̱ tsꞌén ngo kjo̱a̱nda míꞌaá, nda ti̱ꞌinje̱ ji kui mosòo̱, ngatꞌa̱ ngo ni ikꞌíndeje̱ ji ngindyi̱ko̱n Ndi̱a̱ná kui xi Néná. Ta̱nga tsi tjín ni xi ndajín xi tjíjinna, ta̱sá ti̱ jii ti̱ꞌinkꞌinní. Míkjo̱a̱a̱ nga ki̱a̱ kꞌuínje̱ní nínga tikón na̱ꞌmíi̱.
9Kó Jonataa̱n, bi̱ katsoó:
—¡Nga jmíni̱xtjin bo̱a̱ ka̱maa̱ ji! Ngatꞌa̱ tsi skuie an nga na̱ꞌmina tjín ni xi ndajínkjiꞌi xi mejeén sa̱ꞌínjoo̱, a xiyàjínñaá.
10Kósꞌe̱ Ndabii̱, bi̱ katsoó Jonataa̱n:
—Kó ꞌyá xí ka̱tso̱yàna tsi na̱ꞌmíi̱ sa̱ꞌínxchán nga ku̱i̱chji̱a̱joo.
11Kó Jonataa̱n, bi̱ katsoó Ndabii̱:
—¡Ja̱bíꞌi̱n, tjiàn nínga jno̱ jàn! Kó nga joó nga kijí nínga jno̱o̱. 12Kósꞌe̱ Jonataa̱n, bi̱ katsoó Ndabii̱:
—¡Ndi̱a̱ná kui xi Néná xí tsi̱ꞌe̱ xota̱ na̱xi̱ńdá Israee̱l xí chistiko̱ nga ndyiojón ko̱jo tsi ngii̱, kui chi̱bo̱a̱a̱, kosíyáa̱ na̱ꞌmina tsi nda sa̱ꞌínjoo̱ ji, kó án má xi sangiyaa én! 13Ta̱nga tsi na̱ꞌmina tjín ni xi ndajínkjiꞌi xi mejeén sa̱ꞌínjoo̱, kó tsi xiyàjaán tsi̱ꞌe̱ nga kꞌuieé kjo̱a̱xió nga kꞌuin jí, ja̱ Ndi̱a̱ná kui xi Néná bo̱a̱ kjiꞌi ni xi ngatsꞌénjo̱ Jonataa̱n, kó ngatásón ngasee̱.
Kó Ndi̱a̱ná kui xi Néná ngatꞌíjñajoo̱ ji, xikótsꞌèn kisꞌijñajo̱ na̱ꞌmina. 14Kó tsi to̱kó tikón ngase an nga̱sondie, ti̱ꞌinkjìn jí kjo̱a̱ni̱ma̱takoón Ndi̱a̱ná kui xi Néná kjo̱a̱a̱ an, kó tsi ko̱yà án, 15nga jmíni̱xtjin ꞌbíjñímasin ji kjo̱a̱ni̱ma̱takóo̱n kjo̱a̱a̱ xota̱ ndiꞌana, ti̱ ndatsi Ndi̱a̱ná kui xi Néná je katsꞌénkjié ngayeje kondra̱a̱ Ndabii̱ kui tꞌanangii̱. 16Ko̱jo kjiꞌanga Ndi̱a̱ná kui xi Néná ku̱i̱ꞌaa̱ xki̱ xota̱ xi kondra̱a̱ Ndabii̱.
Kó bo̱a̱ tsꞌén Jonataa̱n ngo ni índajo̱ xota̱ ndiꞌaa̱ Ndabii̱. 17Kósꞌe̱ Jonataa̱n ti̱ katsjá nginií tsꞌoa Ndabii̱ kjo̱a̱a̱ nga achichí tjó kamaá, ngatꞌa̱ bo̱a̱ tsꞌén katsꞌéntjó xikoó tsi ti̱kuii yojoo̱. 18Kó bi̱ katsó ngase Jonataa̱n:
—Ndyiojón boá ni̱xtjin nga niꞌán sꞌueé sá tja̱tsi̱e̱e̱, kó xcha̱ nga jmíjín ji ngatꞌa̱ kꞌuijñátiya yáxíríe̱ xi mindyinní ji. 19Kuíni nga xi ma jaán ni̱xtjin kji̱ndi̱béjaye ji, kó ki̱a̱ tꞌen ji nínga kixindyinꞌmí ji ni̱xtjin nga indyiándikoón na̱ꞌmina, kó ki̱a̱ ti̱ndyin ji ki̱a̱ tꞌa ndi̱jo̱ xi ꞌmí Esee̱l.
20Kó án ján yáyojó skjini an xtji̱e̱e̱n xi ingoboaá, xikoó tsi tsꞌénkjitꞌoyà an nínga chjiní yáyojoó. 21Sꞌe̱ jaskan sangiya an moso̱na nga bi̱ xiáa̱n: ¡Tꞌen ji, kó tꞌendyi̱sé ji yáyojoó! Kó tsi bi̱ xiáa̱n moso̱na: ¡Jànꞌa̱n ki̱a̱ kjiyojo yáyojoó ki̱a̱ tiñaa̱ nínga tindyin ji, chje̱ꞌéꞌyé ji! Kósꞌe̱ kjiꞌa boá nga ndibé jí, ngatꞌa̱ tikón Ndi̱a̱ná kui xi Néná, nga tjiín kjo̱a̱xió, kó jmí ni ka̱májiín.
22Ta̱nga tsi bi̱ xiáa̱n moso̱na: Kjin ngasenii̱ nínga tindyin ji kjiyojo yáyojoó, ta̱sá tꞌen ji, ngatꞌa̱ Néná boá xi kjin tsꞌéntsangiyaa.
23Kó kjo̱a̱a̱ ni xi je kandokjo̱a̱ni̱jmì, Néná boá xi ngatama chistiko̱ná jí ko̱jo an ngatsjéni̱xtjin.
24Kósꞌe̱ Ndabii̱ ki̱a̱ kisꞌijñaꞌma ngi̱jin nínga jno̱o̱, kó nga jachó ni̱xtjin nga ma sꞌueé sá tja̱tsi̱e̱e̱, nda̱ ree̱ kisꞌijña nga iskjinie nichinie. 25Kó xikó tsꞌén síkijí kui nda̱ ree̱ ki̱a̱ kisꞌijña ngo ngi̱ndie xi tikón ki̱a̱ tꞌa xoó, kó Jonataa̱n xtji̱e̱e̱n kje̱n kisꞌijña, sꞌe̱ Abnee̱r ki̱a̱ kisꞌijñatꞌaa̱ Sauu̱l, ta̱nga ngi̱ndie xi tsi̱ꞌe̱ Ndabii̱ kisꞌijñatiya. 26Ta̱nga kui ni̱xtjii̱n Sauu̱l jmí ni katsójín, ngatꞌa̱ bi̱ tsꞌén katsꞌénkjó: ¡Tjínrá ni xi kamaá Ndabii̱, kó kji̱e̱ tsꞌéntsjiejínra̱ yojoo̱!
27Kó nga kamángindyiojón, ni̱xtjin xi ma joó sꞌueé saá, ti̱ kisꞌijñatiya ngi̱ndie nínga ꞌbíjñá Ndabii̱. Kósꞌe̱ Sauu̱l, bi̱ katsoó ndií xi ꞌmí Jonataa̱n:
—Ánní nga ndií Isaii̱ tsꞌénfoeꞌekjiniejín nichinie ndeskande koó ngojña̱ ko̱jo ngotꞌe̱.
28Kó Jonataa̱n, bi̱ katsoó Sauu̱l:
—Ndabii̱ achichí ꞌniú tsíꞌána tsi̱ꞌe̱ nga tsjandièe̱ nga ko̱e̱je̱ na̱xi̱ńdáꞌniú Belee̱n, 29kó bi̱ katsóna:
—Ngo kjo̱a̱nda míꞌaá, te̱ꞌéndièní nga kjuín án, ngatꞌa̱ xtín xota̱ ndiꞌana ngo kjo̱a̱tjó sa̱ꞌínkꞌasꞌien ki̱a̱ na̱xi̱ńdáꞌniújne̱, kó ntsꞌié án boá xi bo̱a̱ katsóna nga chjiéngá ki̱a̱ kotíjña̱ an. Kuíni nga tsi ja̱koxi̱ nga nda tsꞌákaa̱ an, te̱ꞌéndièní nga kjuínkátsijée̱n ntsꞌié án. Kuíni nga jeꞌéjín kꞌi̱e̱ tꞌa yámíxa̱a̱ nda̱ ree̱.
30Kósꞌe̱ Sauu̱l achichí ꞌniú katsꞌénxchánjo̱ Jonataa̱n, kó bi̱ katsoó:
—¡Jí boá xi ndií ngo na̱ xi ꞌniú ndajín ko̱jo xi kitikjo̱a̱! A bejín an nga ki̱a̱ nijan majo̱ ji ndií Isaii̱, tsi̱ꞌe̱ nga kjo̱a̱soboá kꞌuieé jí, kjo̱a̱soboá boá ni xi niꞌín ji, ko̱jo kjo̱a̱soboaá na̱áa̱n boá ji nga. 31Ngatꞌa̱ tji̱e̱nga ndií Isaii̱ tikón kui nga̱sondiee̱, ngiti̱ ndajín ku̱i̱ndyin ji, ko̱jo ngiti̱ ndajín kꞌuijñá kui ngi̱ndie nínga botíxomaa̱. Kó kuíni nga ngotꞌe̱ ꞌne̱, nangíyé ji xota̱ tsi̱ꞌe̱ nga kji̱ndi̱bájo̱ kꞌi̱e̱e̱, ngatꞌa̱ chjiéngá ko̱yà.
32Ta̱nga Jonataa̱n, bi̱ katsoó na̱ꞌmii̱:
—Míkjo̱a̱a̱ nga si̱ꞌankꞌien kon. Mí ni xi katsꞌén.
33Kósꞌe̱ Sauu̱l iskjinií ngo yáyojó Jonataa̱n tsi̱ꞌe̱ nga sa̱ꞌínꞌoón, kó kjiꞌá boá nga kamákjiín Jonataa̱n nga na̱ꞌmii̱ ja̱bo̱a̱ je katsjaákon nga sa̱ꞌínkꞌién Ndabii̱. 34Kó Jonataa̱n achichí katsꞌénxchán nga jastjíe̱n tꞌa yámíxa̱a̱, kó jmí ni iskjiniejín ni̱xtjin xi ma joó saá, ngatꞌa̱ on kamaá kjo̱a̱a̱ Ndabii̱, ko̱jo kjo̱a̱a̱ nga na̱ꞌmii̱ achichí kjo̱a̱soboá xi katsꞌénkjaꞌa.
35Kó nga kamángindyiojón, nga ta̱jño̱ó Jonataa̱n kijí nínga jno̱o̱, kó xikótsꞌèn je índa ni̱xtjin xi katsó, kijíjo̱ ngo nda̱ xo̱ngò. 36Kó bi̱ katsoó kui nda̱ xo̱ngo̱ò:
—Ti̱yi jí, kó tꞌenchje̱ꞌéꞌyé ji yáyojó xi skjini an.
Kó tji̱e̱nga tsanga kui nda̱ xo̱ngo̱ò, Jonataa̱n iskjiní yáyojoó tsi̱ꞌe̱ nga jaꞌatjoón kui nda̱ xo̱ngo̱ò. 37Kó kjiꞌanga jachó kui nda̱ mosoo̱ nínga tikón yáyojó xi iskjiní Jonataa̱n, kui nda̱a̱ ꞌniú tsíchji̱a̱a̱ mosoo̱ nga bi̱ katsoó:
—¡A kjinjín ngasenii̱ nínga tindyin ji kjiꞌijña kui yáyojoó! 38Kó Jonataa̱n ti̱ askjandáyà nginií kui mosoo̱, nga bi̱ katsoó:
—¡Tsá tꞌen ji, kó ngata̱ ki̱a̱jín mindyin ji! Kó nda̱ mosoo̱ Jonataa̱n jaꞌáꞌyá yáyojoó, sꞌe̱ kijíkoón ndi̱a̱a̱.
39Ta̱nga kui nda̱ mosoo̱ nde chií kamákjínjiín kui nii̱, ta̱kuítsí Jonataa̱n ko̱jo Ndabii̱ xi be kui nii̱. 40Kósꞌe̱ Jonataa̱n katsꞌénkꞌasꞌiee̱n ni xi kjánjo̱ kui nda̱ moso̱ xi tsoꞌbájo̱, kó bi̱ katsoó:
—Tꞌen ji, kó tꞌenje̱ ji kui nii̱ na̱xi̱ńdáꞌniuú.
41Kó ngije kijí kui mosoo̱, Ndabii̱ jatjoxie xtji̱e̱e̱n na̱ngii̱ kui ngi̱ndiee̱, kósꞌe̱ ján ndi̱yà asiéntikoó ngaskande nga kisitꞌaa̱ xtjien tꞌanangii̱, sꞌe̱ jaskan ja̱kꞌi̱e̱ ja̱ngaján katsjaá ngo ndsó tꞌanijon xkjín, kó achichí askjandá nga joó, ta̱nga Ndabii̱ boá xi ꞌniú ngase askjandá.
42Kósꞌe̱ Jonataa̱n, bi̱ katsoó Ndabii̱:
—Tꞌen xió xió ji, ngatꞌa̱ nga jó ñá jè katseꞌé ndso̱ꞌba nga kiniꞌánkjién Jaꞌeén Ndi̱a̱ná kui xi Néná nga bi̱ kiꞌmí: Ndi̱a̱ná kui xi Néná boá xi ngatama chistiko̱na ngatsjéni̱xtjin, ko̱jo kjo̱a̱a̱ xota̱ tji̱e̱ná. Kó Ndabii̱ jastjíe̱n, sꞌe̱ kijíni kui ngi̱ndiee̱, kó Jonataa̱n kijí nginí na̱xi̱ńdáꞌniuú.
Currently Selected:
1 Samuee̱ 20: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
