1 Samuee̱ 19
19
Sauu̱l kamámejeén katsꞌénkꞌién Ndabii̱
1Kó Sauu̱l tsíchji̱a̱jo Jonataa̱n ndií, ko̱jo ngayeje xota̱ xi mosoo̱, tsi̱ꞌe̱ nga sa̱ꞌínkꞌién Ndabii̱, ta̱nga Jonataa̱n kui xi ndií Sauu̱l kamá, achichí tjó kamaá Ndabii̱, 2kó kijítsóyaà Ndabii̱, nga bi̱ katsoó:
Na̱ꞌmina Sauu̱l mején xoò sa̱ꞌínkꞌieén jí. Kuíni nga ꞌniú míꞌaá nga xchíi̱n yojòo̱ ndyiojón ta̱jñó, ki̱a̱ ti̱ndyinꞌmí ji ngo ngi̱ndie xi ꞌma. 3Kó an kjuín án, kó ki̱a̱ kotíjña̱tꞌáa̱ na̱ꞌmina, ki̱a̱ tiña nínga tindyin ji, kó kuichjiájo an kjo̱a̱a̱ ji, kóra̱ ka̱tso̱na, sꞌe̱ xiyàa̱ ngijee̱.
4Kó Jonataa̱n nda tsíchji̱a̱jo Sauu̱l na̱ꞌmii̱ kjo̱a̱a̱ Ndabii̱, kó bi̱ katsoó:
—Ji nda̱ re, ngata̱ niꞌínjéjín ji kondra̱a̱ nda̱ mosòo̱ Ndabii̱, ngatꞌa̱ jmí ni xi ndajínkjiꞌi katsꞌénjo̱jiín jí, kó achichí nda ni xi tjítsꞌén nganda tse̱ kui nda̱a̱, 5ngatꞌa̱ ndasénjín kamaá yojoo̱ nga kijítsꞌenkꞌién nda̱ Filisteaa̱, kó Ndi̱a̱ná kui xi Néná boá xi katsjaá nga kui xi katsꞌén ngandaa̱ ngayeje xota̱ na̱xi̱ńdá Israee̱l. Kó jí má xi kamáyè ji kui nii̱, kó achichí tsjá kamaá. Kó ngotꞌe̱ ꞌne̱, míkjo̱a̱a̱ nga si̱ꞌin jé jí kjo̱a̱a̱ nga mejeén si̱ꞌinkꞌin ji Ndabii̱, kui nda̱ xi jmí jéjiín, ndatsi nde jmí kjo̱a̱jiín nga bo̱a̱ si̱ꞌin ji.
6Kó Sauu̱l katsꞌénseén ni xi katsó Jonataa̱n, kó bi̱ katsó:
—Tsja an ndso̱ꞌba án nga tikón Ndi̱a̱ná kui xi Néná, nga ko̱yàjín Ndabii̱.
7Kósꞌe̱ Jonataa̱n tsíchji̱a̱a̱ Ndabii̱, kó katsóyaà ngayeje kui nii̱, sꞌe̱ ti̱kuii kijíjo̱ Ndabii̱ nínga tikón Sauu̱l, kó ki̱a̱ kisꞌijña Ndabii̱ ngindyi̱ko̱n kui nda̱ ree̱ xikoó ngasꞌe̱.
8Jaskan ti̱ kisꞌie nginí ingo kjo̱a̱xchán, kó Ndabii̱ jatjo, kó kijíkjánjo̱ xota̱ Filisteaa̱, kó achichí má xi katsꞌénkjiesón, ko̱jo xi tsanga ngindyi̱ko̱n kui.
9Ta̱nga kui a̱siénni̱xtjin xi ndajín xi Ndi̱a̱ná kui xi Néná katsangiyaa̱, ti̱ kisꞌijñajin nginií Sauu̱l nga tikónsón yáxíríe̱ ki̱a̱ ndiꞌaa̱, nga kjiyatsja ngo yáyojó, tji̱e̱nga Ndabii̱ tjítsꞌénkjánié só. 10Kó Sauu̱l kamámejeén asieén yáyojó Ndabii̱ tsi̱ꞌe̱ nga ki̱a̱ ko̱ótꞌa xó nínga tikón, ta̱nga Ndabii̱ jatjaxínboaꞌá, kó yáyojoó Sauu̱l ki̱a̱ kastiesꞌieén xoó, kó ta̱sá tsanga Ndabii̱ kui ni̱xtji̱e̱e̱n, tsi̱ꞌe̱ nga jatjoꞌaa̱ yojoo̱.
11Ta̱nga Sauu̱l katsangiya xota̱ xi kijí ki̱a̱ ndiꞌaa̱ Ndabii̱, tsi̱ꞌe̱ nga skondá, kó nga ta̱jño̱ó sa̱ꞌínkꞌién, kó na̱ Mikaa̱l chjo̱ón Ndabii̱ katsóyaà kui nii̱, nga bi̱ katsoó: Tsi xchínjíi̱n ji yojòo̱ kui ni̱xtji̱e̱e̱n, ndyiojón jè si̱ꞌankꞌiee̱n ki.
12Kó na̱ Mikaa̱l, ki̱a̱ nga̱ntjo̱a̱masienkjaá ndiꞌaa̱ katsꞌénkjatjajenni Ndabii̱, kó Ndabii̱ tsanga má kijí. ¡Kó jatjoꞌaa̱ yojoo̱! 13Kó na̱ Mikaa̱l iskjíbé ngo a̱sie̱én ni xi ne katsoó, kó ki̱a̱ íjñá ngi̱ya nínga foyojo, sꞌe̱ ngo ńjñońtjibé íꞌmáni, kó nga̱són to̱ko̱ ngo ni xi tsja̱a̱ tindso̱ chjo̱on kamándani íjñaá.
14Kó kjiꞌanga Sauu̱l katsangiya xota̱ tsi̱ꞌe̱, nga stso̱bo̱a̱ Ndabii̱, na̱ Mikaa̱l, bi̱ katsoó: Ónrií.
15Kósꞌe̱ Sauu̱l ti̱ katsangiya nginí xota̱ tsi̱ꞌe̱ nga ko̱e̱je̱katsijee̱n Ndabii̱, kó bi̱ katsoó: ¡Ndibájo̱jnúꞌun kꞌi̱e̱e̱ ndatsi nga̱són ṉchaa̱n kjiꞌijña tsi̱ꞌe̱ nga sa̱ꞌinkꞌién an!
16Ta̱nga nga jachó kui jaá ki̱a̱ ndiꞌaa̱ Ndabii̱, kamábe nga ki̱a̱ ṉchaa̱n tikón kui a̱sie̱én ni xi ne katsoó, kó nga nga̱són to̱ko̱ tikoón ngo ni xi tsja̱a̱ tindso̱ chjo̱on kamándani. 17Kó Sauu̱l, bi̱ katsoó na̱ Mikaa̱l:
—Míkjo̱a̱a̱ nga bo̱a̱ tsꞌén ikꞌíndiseje̱ní, kó katseꞌéndièe̱ kondra̱na nga tsanga.
Kósꞌe̱ na̱ Mikaa̱l, bi̱ katsoó Sauu̱l:
—Ngatꞌa̱ kuí boá xi bi̱ katsóna: Te̱ꞌéndièní nga konga an tsájmi̱ sa̱ꞌinkꞌieén.
Sauu̱l tsangatji̱ngii̱ Ndabii̱
18Kó bo̱a̱ tsꞌén nga Ndabii̱ tsangaꞌma nga jatjongii̱ yojoo̱, sꞌe̱ ki̱a̱ jachókoón Samuee̱ ki̱a̱ na̱xi̱ńdáꞌniú Ramaa̱, kó katsóyaà ngayeje ni xi katsꞌénjo̱ Sauu̱l. Kósꞌe̱ kui ko̱jo Samuee̱ kijí, kó ki̱a̱ kisꞌińdo ki̱a̱ nangi Nayoo̱t. 19Ta̱nga tjín xí kijítsóyaà Sauu̱l nga Ndabii̱ ki̱a̱ tikón Nayoo̱t, nangi xi chji̱a̱ni na̱xi̱ńdáꞌniú Ramaa̱. 20Kósꞌe̱ Sauu̱l katsangiya xota̱, tsi̱ꞌe̱ nga stso̱bo̱a̱ Ndabii̱, kó kui jaá kamábe ngo xtín jáchji̱ni̱e̱ꞌén xí ndyi̱tsóyà én xí Ndi̱a̱ná kui xi Néná tsjaá, kó Samuee̱ boá xi kisꞌijñatjoón.
Kó A̱si̱énni̱xtjii̱n Ndi̱a̱ná kui xi Néná kisꞌijñajii̱n kui já xí katsangiya Sauu̱l, kó ti̱ katsóyàtjón én xí Ndi̱a̱ná kui xi Néná tsja̱a nga.
21Kó kiꞌmíyaà kui nii̱ Sauu̱l, sꞌe̱ ti̱ katsangiya nginí kje̱ꞌe xota̱, kó ti̱ tsíchji̱a̱ nginí xikoó chji̱ni̱e̱ꞌe̱én Ndi̱a̱ná kui xi Néná nga.
Kó ti̱ katsangiya nginí xota̱ xi ma jaán ndi̱yà, kó ti̱ tsíchji̱a̱ nginí ndatsa kui nga xikoó chji̱ni̱e̱ꞌe̱én Ndi̱a̱ná kui xi Néná.
22Kósꞌe̱ ti̱kuii Sauu̱l kijí na̱xi̱ńdáꞌniú Ramaa̱, kó nga jachó nínga tikón ngo ndáńchꞌi̱ xi je, xi ꞌmí Sekuu̱, bi̱ katsó nga asíyaá xotaa̱:
—Ñá síndo Samuee̱ ko̱jo Ndabii̱.
Kó ngo nda̱ xi bi̱ katsoó:
—Ki̱a̱ síndo nangi Nayoo̱t, ngi̱ndie xi tikón ki̱a̱ na̱xi̱ńdáꞌniú Ramaa̱.
23Kósꞌe̱ kijí Sauu̱l ki̱a̱ nangi Nayoo̱t, ngi̱ndie xi tikón ki̱a̱ na̱xi̱ńdáꞌniú Ramaa̱, kó A̱si̱énni̱xtjii̱n Néná kjindibánié kuí, kó to̱kó kijíra nga tsꞌénchji̱a̱ xikoó ngo nda̱chji̱ni̱e̱ꞌe̱én Néná, ngaskande nga jachó ki̱a̱ nangi Nayoo̱t, kui ngi̱ndie xi tikón ki̱a̱ na̱xi̱ńdáꞌniú Ramaa̱. 24Kó jaꞌáxín ńjño xi yajá, kó ti̱ bo̱a̱ ti̱ tsꞌén tsíchji̱a̱ ngindyi̱ko̱n Samuee̱, kó nga ngo ni̱xtjii̱n ko̱jo nga ngo ni̱xtji̱e̱e̱n nga kisꞌijña kjiꞌixtí. Kuíni nga kisꞌieni ngo énkjín xí bi̱ tsó: A ko̱jo Sauu̱l boá xi tikónjii̱n jáchji̱ni̱e̱ꞌe̱én Néná nga.
Currently Selected:
1 Samuee̱ 19: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
