1 Samuee̱ 18
18
Ni xi índa Jonataa̱n ko̱jo Ndabii̱
1Kó ngije kamaá Ndabii̱ nga tsíchji̱a̱jo Sauu̱l, ini̱ma̱a̱ Jonataa̱n nda tsaꞌa Ndabii̱, kó tjó kamaá kui nda̱a̱ xikó maá tsi ti̱kuii yojoo̱. 2Kó kui ni̱xtjii̱n Sauu̱l ngiti̱ katsjandièjiín Ndabii̱ nga kijí nginí ndiꞌaa̱ na̱ꞌmii̱. 3Kó Jonataa̱n ko̱jo Ndabii̱ ngo ni índa, ngatꞌa̱ achichí tjó kamaá Ndabii̱, xikó maá tsi ti̱kuii yojoo̱. 4Kósꞌe̱ Jonataa̱n jaꞌáxín ńjñobichitjé xi yaꞌa, kó Ndabii̱ katsjaá, ko̱jo ńjño xi boajá nga fí kjo̱a̱xcha̱án, kó ngaskande ki̱cha̱ndojoó, ko̱jo yáchjonyáa̱, ko̱jo tji̱xi̱ín katsjaá nga.
5Kó Ndabii̱, kijí ta̱ nínga katsangiya Sauu̱l, kó nda katsꞌénkjó ni xi katsꞌén, kó Sauu̱l ngaskande katsjáxaá nga kui xi kisꞌijñatjoón jájún xi fí kjo̱a̱xcha̱án, kó ngayeje xota̱ na̱xi̱ńdaá ko̱jo já xí mosoo̱ Sauu̱l nda kasasiee̱n Ndabii̱.
Sauu̱l kamáchi̱ni̱ kjo̱a̱a̱ Ndabii̱
6Kó kjiꞌanga jájún xi askjaa̱n je ndyi̱fíꞌoyá nginí ndiꞌaa̱, ngije kijíꞌoyá nginí Ndabii̱ nga katsꞌénkꞌién nda̱ Filisteaa̱, ngayeje ínchjín xí chji̱a̱ni ngayeje na̱xi̱ńdáꞌniú xi chji̱a̱ni Israee̱l, kisie ko̱jo kitié nga kijíkjaꞌáyíndi̱yà nda̱ re Sauu̱l, kó katsꞌénkjanie panderoo̱, ko̱jo kisie só xi tsjatsó, ko̱jo katsꞌénkjanie ni xi niꞌánkjanieni só. 7Kó kui ínchjiín kitié ko̱jo kisie ngo só xi bi̱ tsó:
Sauu̱l katsꞌénkjiesón ngo mi̱ xota̱ xi kondra̱a̱,
ta̱nga Ndabii̱ tie mi̱ ma xi katsꞌénkjiesón kuí.
8Kó Sauu̱l achichí katsꞌénxchán, ngatꞌa̱ tsjajín kamaá kui eén, sꞌe̱ bi̱ katsó: Ndabii̱ tie mi̱ ma xi katsꞌénkꞌién kuí tjíꞌmií, kó an ta̱ ngo tsí mi̱ ma xi katsꞌenkꞌién an tjíꞌmína. ¡Ta̱kuítsí ni xi chaja ngasee̱, nga kui xi ka̱ma re! 9Kó ndeskande koó kjiꞌa Sauu̱l, ngiti̱ ndajín kasasiee̱n Ndabii̱.
10Kó nga kamángindyiojón, ngo a̱siénni̱xtjin xi ndajín Néná katsangiyaa̱ Sauu̱l, kó ta̱soboá kisꞌijñaxtindà ngi̱ya ndiꞌaa̱. Kó Ndabii̱ katsꞌénkjanie só xikó katsꞌén kje̱ꞌe ni̱xtjin, tji̱e̱nga Sauu̱l tjiyátsjà yáyojoó. 11Kó Sauu̱l iskjiní kui yáyojoó, ngatꞌa̱ bi̱ tsꞌén katsꞌénkjó: ¡Ndabii̱ boá xí kosièe̱n ki̱a̱ tꞌa xoó! Ta̱nga Ndabii̱ jó ndi̱yà jatjaxínboaꞌaá kui yáyojoó.
12Kó Sauu̱l katsakjónnií Ndabii̱, ngatꞌa̱ Néná kisꞌijñajo̱, ta̱nga Ndi̱a̱ná kui xi Néná je íjñámasien Sauu̱l. 13Kuíni nga Sauu̱l ngiti̱ katsjandièjín nga ki̱a̱ kisꞌijña ngase Ndabii̱ ki̱a̱ kje̱n, ta̱sá ngito̱ko̱o̱ ngo mi̱ jájuún katsꞌén, sꞌe̱ Ndabii̱, bo̱a̱ fí bo̱a̱ ndibá katsꞌén nga kitsjientjoón kui jájuún. 14Kó Ndabii̱ achichí nda katsꞌénkjó ngayeje ni xi katsꞌén, ngatꞌa̱ Néná kisꞌijñajo̱. 15Nga kamábe Sauu̱l nga ta̱nisién nda katsꞌénkjó ni xi katsꞌén Ndabii̱, achichí katsakjónnií. 16Ta̱nga ngayeje xota̱ na̱xi̱ńdá xí chji̱a̱ni Israee̱l ko̱jo na̱xi̱ńdáꞌniú Jundáa̱, achichí tjó kamaá Ndabii̱, ngatꞌa̱ bo̱a̱ fí bo̱a̱ ndibá katsꞌén ngindyi̱ko̱n kui jájuún.
17Kó Sauu̱l, bi̱ katsoó Ndabii̱: Ngotꞌe̱ ꞌne̱, ka̱má tsjaa nga ku̱i̱ndyinje̱ ji tsa̱kjìn xí xchána xi ꞌmí na̱ Meraa̱b, tsi ji xi ngo nda̱ chꞌokonna ka̱ma ji, nga ku̱i̱xkén ji kjo̱a̱xcha̱án xí tsi̱ꞌe̱ Néná.
Ta̱nga Sauu̱l, bi̱ tsꞌén katsꞌénkjó: Jmí tsi an xi sa̱ꞌínkꞌién an kui, ta̱sá xota̱ Filisteaa̱ xi ngatsꞌénkꞌién.
18Ta̱nga Ndabii̱, bi̱ katsoó Sauu̱l: Kó ꞌyání an, ko̱jo mí ta̱ nii̱ bo̱a̱ kjo̱a̱mindyionna, ko̱jo ꞌyání bo̱a̱ xtín xota̱ ndiꞌaa̱ na̱ꞌmina ki̱a̱ na̱xi̱ńdá Israee̱l, tsi̱ꞌe̱ nga xkandaa̱ nda̱ ree̱ ka̱ma an.
19Ta̱nga ngije jachó ni̱xtjin nga na̱ Meraa̱b, tsa̱kji̱ín Sauu̱l sa̱ꞌínkꞌasꞌiee̱n Ndabii̱, kui naa̱ ta̱sá Andriee̱l, nda̱ xi chji̱a̱ni nangi Meolaa̱t katseꞌeé nga kui kꞌuijñájo̱. 20Ta̱nga na̱ Mikaa̱l, xi ingo tsa̱kji̱ín Sauu̱l, tjó kamaá Ndabii̱, kó kiꞌmíyaà Sauu̱l kui nii̱, kó nda kasasiee̱n kui kjo̱a̱a̱, 21sꞌe̱ bi̱ tsꞌén katsꞌénkjó Sauu̱l: Tsjañáa̱ nga kꞌuijñájo̱ Ndabii̱, tsi̱ꞌe̱ nga kui xi ka̱ma xikoó tsi ngo chja̱ya̱, kó nga xota̱ Filisteaa̱ sa̱ꞌínkꞌién kuí. Kó Sauu̱l, bi̱ katsoó Ndabii̱ xi ma joó ndi̱yà: ¡Ngotꞌe̱ ꞌne̱, nga xkandana ka̱ma ji!
22Kó Sauu̱l, bi̱ katsoó já mosoo̱: Ndokjo̱a̱jo si̱e̱n si̱e̱njnú Ndabii̱, nga bi̱ tꞌínjnúu̱: Achichí tjoó ji nda̱ ree̱ ko̱jo ngayeje xota̱ xi mosoo̱ nga. ¡Jo̱ꞌo tꞌín ji nga ji xi ka̱ma ji xkandaa̱ nda̱ ree̱!
23Kó já mosoo̱ Sauu̱l bo̱a̱ katsoó Ndabii̱ ni xi kiꞌmií, ta̱nga Ndabii̱ bi̱ katsó: A beriítakónjnú nga niꞌínjín kjiꞌi nga xkandaa̱ nda̱ ree̱ ka̱ma an. Xota̱ ni̱ma̱ xi jmí to̱njiín boá án, kó nde jmí ni chjíjiín an.
24Kó já mosoo̱ kijí tsóyaà Sauu̱l ni xi katsó Ndabii̱, kó bo̱a̱ má katsoó xikoó én xí tsíchji̱a̱ Ndabii̱. 25Kósꞌe̱ Sauu̱l, bi̱ katsó:
—Bi̱ tꞌínjnúu̱ Ndabii̱: Nda̱ ree̱ mejénjín xoò nga ni si̱ꞌankꞌasꞌiee̱n kjo̱a̱a̱ tsa̱kji̱ín, ta̱ kuí xò tsí ni xi míꞌá nga úchán tji̱xi̱ín yojondikoón xota̱ Filisteaa̱ si̱ꞌinkꞌasꞌíi̱n, tsi̱ꞌe̱ nga si̱ꞌingojo ji kjo̱a̱a̱ xota̱ kondra̱a̱ ree̱.
Ngatꞌa̱ Sauu̱l katsꞌénkjó nga Ndabii̱ kꞌo̱ka ngi̱ya tsja xota̱ Filisteaa̱, tsi̱ꞌe̱ nga si̱ꞌankꞌién.
26Kó kjiꞌanga kui já mosoo̱ katsóyaà Ndabii̱ kui nii̱, nda kasasiee̱n nga xkandaa̱ nda̱ ree̱ ka̱ma, kó ngindiee̱ nga kjo̱chó kui ni̱xtjii̱n, 27Ndabii̱ jastjíe̱n nga kijíjo̱ xota̱a̱, kó jó úchán jáxíꞌín xi chji̱a̱ni xota̱ Filisteaa̱ katsꞌénkjiesón, sꞌe̱ kijíjo̱ kui tji̱xi̱ín yojondikoón, kósꞌe̱ nda̱ ree̱ katsꞌénkꞌasꞌiee̱n, tsi̱ꞌe̱ nga xkandaa̱ nda̱ ree̱ ka̱ma kui. Kósꞌe̱ Sauu̱l katsjaá Ndabii̱ tsa̱kji̱ín kui xi ꞌmí na̱ Mikaa̱l, tsi̱ꞌe̱ nga chjo̱ón ka̱ma.
28Nga kamábe kui nii̱ Sauu̱l, kamákjiín nga Ndi̱a̱ná kui xi Néná tikónjo̱ Ndabii̱, kó nga kui tsa̱kji̱ín kui xi ꞌmí na̱ Mikaa̱l achichí tjó kamaá Ndabii̱. 29Kó Sauu̱l ꞌniú ngase katsakjónnií Ndabii̱, kó ngatsjéni̱xtjin nga kondra̱ kamaá kui.
30Kó já ngito̱ko̱o̱ xota̱ Filisteaa̱ kijíkjánrá ngase, kó xki̱ nga kijí kjo̱a̱xchán, Ndabii̱ nda ngase askjan, ta̱bo̱a̱jiín ngayeje já mosoo̱ Sauu̱l, kuíni nga achichí ꞌniú kamáyàndikón jaꞌeén Ndabii̱.
Currently Selected:
1 Samuee̱ 18: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
