1 Samuee̱ 16

Samuee̱ katsjáxaá Ndabii̱

1Ngo ni̱xtjin Ndi̱a̱ná kui xi Néná, bi̱ katsoó Samuee̱:

—Ngaskande kjiꞌání nga to̱kó xchieꞌé jí kjo̱a̱a̱ Sauu̱l, xi jè katsꞌenchꞌó an nga ngiti̱ kuijín xi ko̱tíxoma ngase ki̱a̱ na̱xi̱ńdá Israee̱l. Tꞌíkitsie ji isti̱ ndi̱ja̱a̱, sꞌe̱ tꞌen ji, ngatꞌa̱ ki̱a̱ sangiyaa nínga tikón Isaii̱, kui nda̱ xi chji̱a̱ni na̱xi̱ńdáꞌniú Belee̱n, ngatꞌa̱ nga ngi̱jii̱n ndií je íjñanda an, ngo nda̱ xi re ka̱ma.

2Ta̱nga bi̱ katsó Samuee̱:

—Kó kótsꞌèn kjuín án. Tsi sku̱i̱e̱ Sauu̱l kui nii̱, sa̱ꞌínkꞌiénna. Kó Ndi̱a̱ná kui xi Néná, bi̱ katsó: —Tꞌenje̱ ji ngo ndií cho̱yojo chjo̱on, kó bi̱ tꞌíi̱n: Ngo kjo̱a̱tjó sa̱ꞌinkꞌasꞌièe̱n Ndi̱a̱ná kui xi Néná. 3Kó ndokjoée̱ nda̱ xi ꞌmí Isaii̱, tsi̱ꞌe̱ nga kji̱ndi̱bá nínga ka̱ma kjo̱a̱tjoó, kósꞌe̱ án xiyaá ni xi si̱ꞌin ji ngijee̱, kó jí boá xi ko̱na̱ngínjin ji isti̱ kui xi an kokoo.

4Kó Samuee̱ katsꞌén ngayeje ni xi katsoó Ndi̱a̱ná kui xi Néná. Kó nga jachó na̱xi̱ńdáꞌniú Belee̱n, xota̱ xi xchaá kui ngi̱ndiee̱ kijíkjaꞌáyíndi̱yà, kó ndyi̱tsakjón má, sꞌe̱ bi̱ katsoó:

—A kjo̱a̱xió boá nga kjoéꞌe̱ ji kꞌi̱e̱e̱. 5Kó bi̱ katsó Samuee̱:

—Jo̱o̱n, kjo̱a̱tjó boá xi kjoéꞌe̱jòo̱ Ndi̱a̱ná kui xi Néná. Ti̱ꞌantsjiejnú yojojnú, kó ndibájnú nínga si̱ꞌankꞌasꞌien kui kjo̱a̱tjoó. Kó ngije katsꞌentsjie yojoo̱ Isaii̱ ko̱jo jaá, katsóyaà tsi̱ꞌe̱ nga ko̱e̱je̱ nínga si̱ꞌankꞌasꞌien kui kjo̱a̱tjoó.

6Kó kjiꞌanga jachó kui jaá, Samuee̱ kamábe Eliaa̱b, kó bi̱ tsꞌén katsꞌénkjó: ¡Ja̱koxi̱ boá nga kui nda̱ xi je katjoꞌójii̱n, je tikón ngindyi̱ko̱n Ndi̱a̱ná kui xi Néná!

7Ta̱nga Ndi̱a̱ná kui xi Néná, bi̱ katsoó Samuee̱: —Ngata̱ ki̱a̱jín tsitsijìi̱n kjo̱a̱a̱ xikó kjiꞌi, ko̱jo tsi xikótsꞌèn nga nkꞌa, ngatꞌa̱ kuijín bo̱a̱ xi tsꞌénfoaꞌajin An. Ngatꞌa̱ An jmí tsi bo̱a̱ tsꞌén kotsijen An xikótsꞌèn kotsijen xotaa̱, ngatꞌa̱ xotaa̱ ta̱ ni sónkꞌá tsí bo̱a̱ xi kotsijee̱n, ta̱nga An, ini̱ma̱a̱ boá xi kotsijée̱n.

8Kósꞌe̱ Isaii̱ tsíchji̱a̱a̱ Aminandaa̱b, sꞌe̱ katsꞌénkjaꞌa ngindyi̱ko̱n Samuee̱, kó bi̱ katsó Samuee̱:

—¡Ti̱nde kuijín xi̱ꞌbi̱ xi je jaꞌájin Ndi̱a̱ná kui xi Néná nga!

9Jaskan Isaii̱, katsꞌénkjaꞌa Samaa̱, kósꞌe̱ bi̱ katsó Samuee̱:

—Ti̱nde kuijín xi̱ꞌbi̱ xi je jaꞌájin Ndi̱a̱ná kui xi Néná nga.

10Kó Isaii̱ bo̱a̱ tsꞌén katsꞌénkjaꞌa nga yito ndií ngindyi̱ko̱n Samuee̱, ta̱nga Samuee̱, bi̱ katsoó Isaii̱:

—Ndi̱a̱ná kui xi Néná jmí tsi kui jaá xi je jaꞌájin.

11Sꞌe̱ Samuee̱, bi̱ katsoó Isaii̱:

—A kuí bí xi̱ꞌbi̱ xi ngayeje ndíi̱.

Kó bi̱ katsó Isaii̱:

—Tikón ingo nda̱ xi kjindií, ta̱nga cho̱tsa̱nga̱ tsꞌénkoón ngotꞌe̱.

Kó bi̱ katsó Samuee̱:

—Ngatjíchjaꞌá, ngatꞌa̱ kji̱e̱ ku̱i̱ndyiontꞌajín ñá yámíxa̱a̱ ngaskande nga kjo̱e̱ꞌe kꞌi̱e̱e̱.

12Kó katsangiyakjaꞌá kuí nda̱ xo̱ngo̱ò, kósꞌe̱ katsꞌénkꞌasꞌien. Kui nda̱ xo̱ngo̱ò chán kamá tsja̱to̱ko̱, kó achichí tsjákón kamá ndyi̱ko̱n, ko̱jo achichí tsjá kisꞌie kje̱n. Kósꞌe̱ Ndi̱a̱ná kui xi Néná, bi̱ katsoó Samuee̱:

—¡Ti̱sítji̱n ji, kó nangínjìn ji isti̱, ngatꞌa̱ kuí boá kui nda̱ xo̱ngo̱ò!

13Kósꞌe̱ Samuee̱ iskjíbé ndi̱ja̱ xi ndyi̱a̱a̱ istii̱, kó katsangijon Ndabii̱ isti̱ ngindyi̱ko̱n já ntsꞌi̱e̱ xi ngasee̱, kósꞌe̱ ndeskande koó kjiꞌa, A̱si̱énni̱xtjii̱n Ndi̱a̱ná kui xi Néná kjindibánié Ndabii̱. Kó Samuee̱ jastjíe̱n ki̱a̱a̱, sꞌe̱ kijí nginí na̱xi̱ńdáꞌniú Ramaa̱.

Ndabii̱ katsꞌénkjanie yána̱xo̱o̱ nganda tsi̱ꞌe̱ Sauu̱l

14Kó A̱si̱énni̱xtjii̱n Ndi̱a̱ná kui xi Néná katsꞌénkjii̱n yojoo̱ Sauu̱l, kó ngo a̱siénni̱xtjin xi ndajín katsangiyaa̱ Néná, xi ítsꞌi̱yanii̱ nga katsꞌénkjaꞌatio kjo̱a̱ni̱ma̱. 15Kó já mosoo̱ Sauu̱l, bi̱ katsoó:

—¡Jéꞌe̱n, ngo a̱siénni̱xtjin xi ndajín xi katsangiya Néná tjítsꞌenniꞌiín ji ngotꞌe̱ ꞌne̱! 16Ji ndi̱a̱, ja̱ te̱ꞌée̱ ngo kjo̱a̱ já mosòo̱, tsi̱ꞌe̱ nga ku̱i̱ndyi̱sé ji̱n ngo nda̱ xi maa̱ tsꞌénkjánié arpa̱, ki̱a̱ ka̱maa̱ kjiꞌanga kji̱ndi̱bánieé kui a̱siénni̱xtjin xi ndajín xi katsangiyaa̱ Néná, nga sa̱ꞌínkjanie arpaa̱, nda ku̱i̱ndyin ji.

17Kósꞌe̱ Sauu̱l, bi̱ katsoó kui já mosoo̱:

—Ti̱ndyi̱séjnúꞌun ngo xi maa̱ nda tsꞌénkjánié, kó ndibájo̱jnúꞌun kꞌi̱e̱e̱.

18Kósꞌe̱ ngo kui já mosoo̱, xi bi̱ katsó:

—Jè kamábe an ngo nda̱ xo̱ngò xi ndií nda̱ xi ꞌmí Isaii̱, xi chji̱a̱ni na̱xi̱ńdáꞌniú Belee̱n, xi achichí nda maa̱ tsꞌénkjánié yána̱xo̱o̱, kó tjiín ngaꞌniú, ko̱jo achichí chꞌokon, nda̱ xi fí kjo̱a̱xcha̱án boá, achichí nda chji̱a̱ nga chji̱a̱, ko̱jo achichí tsjákjiꞌi, kó Ndi̱a̱ná kui xi Néná boá xi tikónjo̱ kui nda̱ xo̱ngo̱ò.

19Kósꞌe̱ Sauu̱l katsangiyaa̱ ngo chji̱ni̱e̱ꞌén Isaii̱, xi bi̱ katsoó: Nangíyéni ndíi̱ Ndabii̱, kui xi koo̱n cho̱tsa̱nga̱a̱.

20Kó Isaii̱ iskjíbé ngo bórró xi katsꞌénkaꞌanijín pan, ko̱jo ngo ti̱jìtjíxin xí ndyi̱a̱ bino̱, ko̱jo ngo ndií tindso̱, kó Ndabi̱ ndií, katsangiyajoo̱ Sauu̱l kui nichiniee̱.

21Kó Ndabii̱ kijí nínga tikón Sauu̱l, kó ki̱a̱ kisꞌijña nínga tikón kuí, kó achichí tjó kamaá Ndabii̱, kó kuí boá xi katsꞌén nda̱ xi boaꞌa ni xi bixkánjoo̱ nga fí kjo̱a̱xcha̱án.

22Kósꞌe̱ Sauu̱l katsangiyaa̱ én Isaii̱, nga bi̱ katsoó:

—ꞌNiú míꞌaá nga kꞌi̱e̱ ngatꞌíjñajo̱rana Ndabii̱, ngatꞌa̱ achichí nda tsꞌénkana kui. 23Kó kjiꞌanga kui a̱siénni̱xtjin xi ndajín xi Ndi̱a̱ná kui xi Néná katsangiyaa̱ Sauu̱l kisꞌijñajii̱n kui nda̱a̱, Ndabii̱ iskjíbé arpaa̱, kó katsꞌénkjanie, kósꞌe̱ Sauu̱l kamándaya nginí, kó nda kisꞌiee̱, ngatꞌa̱ kui a̱siénni̱xtjin xi ndajiín katsꞌénkjin tsaá yojoo̱ Sauu̱l.

Currently Selected:

1 Samuee̱ 16: MAIX

Highlight

Compare

Copy