1 Samuee̱ 15

Sauu̱l tsintꞌiéꞌénjín kó Néná katsꞌénchꞌó

1Jaskan Samuee̱, bi̱ katsoó Sauu̱l:

—Néná boá xi katsangiyana nga katsangijoon isti̱, tsi̱ꞌe̱ nga ji xi ka̱ma ji ree̱ xota̱ na̱xi̱ńdá Israee̱l, kó kuíni nga ndaꞌyé ji ngotꞌe̱ ꞌne̱ ni xi tsó Néná. 2Bi̱ tsó Néná xí tsi̱ꞌe̱ jájuún: Án boá xi sa̱ꞌinjée̱ xota̱ Amalee̱k kjo̱a̱a̱ ni xi katsꞌénjo̱ xota̱ Israee̱l, kjiꞌanga íchjaá ndi̱yà nga jatjoni nangi Ejiptoo̱. 3Kuíni nga tꞌen ji, kó ti̱xkénje̱ ji xota̱ Amalee̱k, kó ti̱ꞌinkjie ji ngayeje ni xi tjiín, kó ngata̱ ni̱ma̱jín maá. ¡Ti̱ꞌankꞌiènjnú ngayeje xota̱ Amalee̱k, ko̱jo ínchjín, ko̱jo jákjíndí, ko̱jo ndínda, ko̱jo cho̱yojo xi̱ꞌin, ko̱jo cho̱tsa̱nga̱, ko̱jo cho̱toꞌoyitsꞌén, ko̱jo bórró!

4Kó Sauu̱l ítikó xota̱ na̱xi̱ńdaá, kó íxki̱ ki̱a̱ na̱xi̱ńdáꞌniú Telaii̱n, kó jó úchán mi̱ kamá jáxíꞌín xi tjimáyisee̱, ko̱jo tie mi̱ ma jáxíꞌín xi chji̱a̱ni xota̱ tji̱e̱e̱ Jundáa̱. 5Kó Sauu̱l kijí ki̱a̱ na̱xi̱ńdáꞌniú Amalee̱k, sꞌe̱ ki̱a̱ kisꞌińdoxtíkjaá xotaa̱ ki̱a̱ nangi soón. 6Sꞌe̱ Sauu̱l, bi̱ katsoó xota̱ xi chji̱a̱ni na̱xi̱ńdáꞌniú Kee̱n:

—¡Tji̱taxión boaꞌájnúu̱, kó tja̱tjójnú ki̱a̱ nínga síndo xota̱ Amalee̱k, tsi̱ꞌe̱ nga ki̱a̱jín nijan sa̱ꞌinkjiéjnúꞌun, ngatꞌa̱ ni̱ma̱ kamájnú jún xota̱ Israee̱l kjiꞌanga jatjoni nangi Ejiptoo̱. Kó xota̱ na̱xi̱ńdáꞌniú Kee̱n katsꞌénkjii̱n yojoo̱ xota̱ Amalee̱k.

7Kó Sauu̱l katsꞌeén nga askjanjo̱ xota̱ Amalee̱k, ndeskande na̱xi̱ńdáꞌniú Abilaa̱, ngaskande na̱xi̱ńdáꞌniú Suu̱r, kui xi tikón tiñaa̱ nangi Ejiptoo̱. 8Kó katsoboá tikón Angaa̱j, nda̱ ree̱ xota̱ Amalee̱k, ta̱nga ki̱cha̱ndojó katsꞌénkjiesónni ngayeje xota̱ na̱xi̱ńdaá. 9Ta̱nga Sauu̱l ko̱jo xota̱ na̱xi̱ńdaá katsꞌénkꞌiénjín Angaa̱j, ko̱jo katsꞌénkjiesónjín cho̱tsa̱nga̱ xi ꞌniú nda ngasee̱, ko̱jo cho̱yojo xi ꞌniú yiꞌii̱, ko̱jo cho̱tsa̱nga̱ xi jaꞌatji ndi̱ja̱a̱, ko̱jo ngayeje ni xi ndaa̱, ta̱ kuí tsi ni xi katsꞌénkjié, ngayeje ni xi ndajiín ko̱jo ni xi jmí ni chjíjiín.

10Kósꞌe̱ ingo ndi̱yà nginí nga Néná tsíchji̱a̱jo Samuee̱, nga bi̱ katsoó: 11Achichí ndasen kjimana nga re katsꞌen an Sauu̱l, ngatꞌa̱ jè katsꞌénkjinna yojoo̱, kó ngiti̱ tjítsꞌénkjátjosónjín kjo̱a̱botíxomana.

Kó achichí nda̱ kamaá Samuee̱ kjo̱a̱a̱ kui nii̱, kó nga ngo ni̱xtji̱e̱e̱n ni̱ma̱ katsó nga tsíchji̱a̱a̱ Néná. 12Nga kamángindyiojón, achichí ta̱jñó jastjíe̱n Samuee̱, nga kijíkoón Sauu̱l, ngatꞌa̱ kamámejeén sku̱i̱e̱ kui ta̱jño̱ó, kó kiꞌmíyaà Samuee̱ nga Sauu̱l je ki̱a̱ jachó na̱xi̱ Karmeloo̱, kó nga ki̱a̱ iskjininkꞌa ngo xó nkꞌa, sꞌe̱ jaꞌatjiya Samuee̱, kó ki̱a̱ kijíjayani Ngilngaa̱l.

13Kósꞌe̱ Samuee̱ kijí nínga tikón Sauu̱l, kó Sauu̱l, bi̱ katsoó:

—¡Néná ngatsꞌénchíkonñeé ji! Án boá xi katsꞌenkjatjosón kjo̱a̱botíxomaa̱ Ndi̱a̱ná kui xi Néná.

14Ta̱nga Samuee̱, bi̱ katsó:

—Ja̱ mí ni xi mejeén tsó ni xi tsꞌéntꞌie an nga ndyi̱kjandayà kui cho̱tsa̱nga̱a̱, ko̱jo kui cho̱yojoo̱.

15Kó Sauu̱l, bi̱ katsó:

—Nangi Amalee̱k boá nínga kjindibáni kui cho̱o̱, ngatꞌa̱ xota̱ na̱xi̱ńdaá íjñátꞌaxín cho̱tsa̱nga̱ ko̱jo cho̱yojo xi ꞌniú nda ngasee̱, tsi̱ꞌe̱ nga sa̱ꞌínkꞌasꞌiee̱n kjo̱a̱tjó Ndi̱a̱ kui xi Ne tse̱, ta̱nga ni xi ngasee̱ xota̱ Amalee̱k kiniꞌánkjié yejejne̱.

16Kósꞌe̱ Samuee̱, bi̱ katsoó Sauu̱l:

—Si̱e̱nñá, ta̱sá te̱ꞌéndièmáraní nga xiyaá ni xi katsóna Néná kui ni̱xtji̱e̱e̱n.

Kó bi̱ katsó Sauu̱l:

—Ja̱ tꞌíyéní tsobo̱a̱.

17Kó Samuee̱, bi̱ katsoó:

—Ndatsi achichí chichí kjimaa̱ yojòo̱, a mí tsí jí boá xi ngito̱ko̱o̱ xota̱ tji̱e̱e̱ xota̱ Israee̱l ji. Kó a mí tsí Néná je jaꞌájiin nga ji xi ka̱ma ji ree̱ xota̱ Israee̱l, 18kó Néná bo̱a̱ xi kamáꞌniátakoón nga si̱ꞌin ji ngo xá, nga bi̱ katsoó: Tꞌen ji, kó ti̱ꞌinkjie ndo̱jò ndójo̱ jí ngayeje xota̱jé xí chji̱a̱ni Amalee̱k, kó ti̱xkénje̱ ji ngaskande nga si̱ꞌinkjie ji. 19Kó ji, ánní nga kandaꞌyéjín ji ni xi katsoó Néná, kó ta̱sá kachjábé jí ni xi kachjeꞌéxíi̱n kui xotaa̱, ko̱jo nga ni xi ndajínkjiꞌi kiniꞌín ji ngindyi̱ko̱n Néná.

20Ta̱nga Sauu̱l, bi̱ katsoó Samuee̱:

—Jmí, ta̱sá jè tsintꞌieꞌée̱n Ndi̱a̱ná kui xi Néná, ko̱jo nga je katsꞌen ni xi atíxomana Kui, kó kꞌi̱e̱ jéꞌe̱jo an Angaa̱j, nda̱ ree̱ xota̱ Amalee̱k, kó ti̱ je katsꞌenkjié yeje an xota̱ Amalee̱k nga. 21Ta̱nga xota̱ na̱xi̱ńdaá iskjíbé cho̱tsa̱nga̱, ko̱jo cho̱yojoo̱, ko̱jo ni xi ꞌniú nda ngasee̱ ni xi chjiéngá si̱ꞌankjatsónjne̱ katsaki, tsi̱ꞌe̱ nga Néná, Kui xi Ne tse̱ si̱ꞌankꞌasꞌienjne̱ kjo̱a̱tjó ki̱a̱ Ngilngaa̱l.

22Ta̱nga Samuee̱, bi̱ katsoó:

—Kó a bee̱takín nga tsja ngase ka̱maa̱ Ndi̱a̱ná kui xi Néná, kjo̱a̱a̱ kjo̱a̱tjó ko̱jo cho̱ xi si̱ꞌankꞌasꞌiee̱n, ta̱bo̱a̱jiín nga ko̱ndaꞌyáꞌeén ni xi tsó Kuí. Nga ja̱koxi̱ nda ngase kjiꞌi nga ko̱nda̱ꞌyáꞌeén, ta̱bo̱a̱jiín kjo̱a̱tjó xi niꞌánkꞌasꞌiee̱n, ko̱jo nga nda ngase nga ko̱si̱e̱nnijoo̱n ni xi ka̱tso̱, ta̱bo̱a̱jiín xinieé cho̱tsa̱nga̱ xi jaꞌatji ndi̱ja̱a̱ xi niꞌánkꞌasꞌiee̱n Kui. 23Ngatꞌa̱ kjo̱a̱kitikjo̱a̱a̱, xikónií tsi ngo jé xí tsꞌén ngo tjiꞌe, ko̱jo tsi xikónií tsi ngo ne xi tsꞌénda xotaa̱, ko̱jo tsi kui a̱sie̱én tjíniꞌándikón. Kó kjo̱a̱a̱ nga kiniꞌínchꞌí ji kjo̱a̱botíxomaa̱ Néná, kuíni nga Ndi̱a̱ná kui xi Néná ti̱ je katsꞌénchꞌoó ji ngotꞌe̱ ꞌne̱, kó ngiti̱ mejénjiín nga re ka̱ma ngase ji.

24Kó Sauu̱l, bi̱ katsoó Samuee̱:

—Katsꞌénjé án, kjénní nga katsꞌénkjatjosónjín an kjo̱a̱botíxomaa̱ Ndi̱a̱ná kui xi Néná xi atíxomana, ko̱jo kui én xi kiꞌmíyéní jí. Bo̱a̱ katsꞌen an, ngatꞌa̱ katsakjon an xota̱ na̱xi̱ńdaá, kó ta̱sá katsjandièe̱ nga ta̱ ni xi mejénrií katsꞌén, 25ta̱nga ngotꞌe̱ ꞌne̱, mejénna nga si̱ꞌinjetakínní, kó nga kji̱ndi̱béchinní tsi̱ꞌe̱ nga ni̱ma̱kjo̱a̱ sa̱ꞌín ngiñá an yojona, ngindyi̱ko̱n Ndi̱a̱ná kui xi Néná.

26Ta̱nga Samuee̱, bi̱ katsoó Sauu̱l:

—Jmí, ngiti̱ kjuinkónjaán, ngatꞌa̱ kiniꞌínchꞌí ji kjo̱a̱botíxomaa̱ Ndi̱a̱ná kui xi Néná, kó Néná je katsꞌénchꞌoó, nga ngiti̱ rejín ka̱ma ji ngase ki̱a̱ na̱xi̱ńdá Israee̱l.

27Kósꞌe̱ kjiꞌanga tsꞌénfoaꞌatjiya Samuee̱, tsi̱ꞌe̱ nga je ko̱e̱je̱ katsaki, Sauu̱l iskjien ńjño xi fotꞌa nga̱xtón xi yajá Samuee̱, ta̱nga kui ńjñoo̱ katjoje̱ntꞌa, 28kósꞌe̱ Samuee̱, bi̱ katsoó Sauu̱l:

—Néná ti̱ bo̱a̱ ti̱ tsꞌén je tsꞌeje̱ntꞌaa̱ nga ji ko̱ti̱xome ngase ji ki̱a̱ na̱xi̱ńdá Israee̱l, kó ngo nda̱ xi xingi̱ ji, xi nda ngase ta̱bo̱a̱jiín jí, je katsjaá nga kui xi ko̱tíxoma. 29Kó ingo ni ngase, kui Ndi̱a̱ná kui xi Néná xí kjo̱a̱jee̱ xota̱ Israee̱l, ꞌbindísójín, ti̱nde tsꞌénkꞌoyàjín yojoo̱, ngatꞌa̱ Kui, jmí tsi xota̱ nga̱sondie tsi̱ꞌe̱ nga sa̱ꞌínkꞌoyà yojoo̱.

30Kó bi̱ katsó ngase Sauu̱l:

—Katsꞌenjé án, ta̱nga ꞌniú míꞌaá nga che̱ndikínní ngindyi̱ko̱n xota̱ xi xchaá nangina, ko̱jo ngindyi̱ko̱n xota̱ Israee̱l, kó ndibé nginí ji nínga tikón an, tsi̱ꞌe̱ nga ka̱ma sa̱ꞌindikón án Ndi̱a̱ná kui xi Néná, kui xi Ne tse̱.

31Kósꞌe̱ Samuee̱ kijí nginí nínga tikón Sauu̱l, kó Sauu̱l katsꞌéntsjaà Ndi̱a̱ná kui xi Néná.

32Jaskan bi̱ katsó Samuee̱:

—Ndibájo̱jnúꞌun Angaa̱j, nda̱ ree̱ xota̱ Amalee̱k. Kó Angaa̱j ndatsi ńꞌniúki̱cha̱ tjítꞌa, achichí tsjá kamaá nga jachókoón Samuee̱, kó bi̱ katsó Angaa̱j, ja̱koxi̱ rá nga je jaꞌa kui ni xi ndajín xi tsꞌénná kjo̱a̱bo̱yaa̱. 33Ta̱nga Samuee̱, bi̱ katsó:

—Xikótsꞌèn nga ki̱cha̱ndojóo̱ katsꞌénkꞌién ínchjín xi jmí ndí kisꞌiejiín, ti̱ bo̱a̱ ti̱ tsꞌén na̱áa̱n jmí ndí kꞌuiéjiín ngi̱jii̱n ínchjín xí ngasee̱. Kó Samuee̱ katsꞌénkꞌién Angaa̱j ngindyi̱ko̱n Néná ki̱a̱ Ngilngaa̱l. 34Jaskan Samuee̱ kijí na̱xi̱ńdáꞌniú Ramaa̱, kó Sauu̱l kijínijíngí ndiꞌaa̱ ki̱a̱ na̱xi̱ńdáꞌniú Ngabaa̱. 35Kó Samuee̱ nginijánjín kamábe ngase Sauu̱l, ngaskande nga kꞌien, ta̱nga Samuee̱ achichí askjandátjé Sauu̱l, ngatꞌa̱ ndasen kamaá Néná nga Sauu̱l katsjaá xá nga kui xi ka̱ma ree̱ xota̱ Israee̱l.

Currently Selected:

1 Samuee̱ 15: MAIX

Highlight

Compare

Copy