1 Samuee̱ 14
14
Jonataa̱n askjanjo̱ xota̱ Filisteaa̱
1Ngo ndi̱yà Jonata̱n ndií Sauu̱l, tsíchji̱a̱jo nda̱ moso̱ xi bosikójo xi boaꞌa ni xi bixkánjoo̱, kó bi̱ katsoó:
—Ja̱bíꞌi̱n, kó tjiàn nínga síndo xtín jájuún xota̱ Filisteaa̱, kui ngi̱ndie xi tikón ki̱a̱ xi ingoboá jàn.
Ta̱nga nde katsóyàjiín na̱ꞌmii̱ kui nii̱. 2Kó Sauu̱l ki̱a̱ kisꞌijña tsindioó na̱xi̱ńdáꞌniú Ngabaa̱, ki̱a̱ xtji̱e̱e̱n ngindiee̱ yángranandaa̱ xi tikón ki̱a̱ nangi Mingroo̱n, kó xota̱ xi ki̱a̱ nijan síndojo̱, mara̱ tsi ta̱ jun úchán jáxíꞌín kamá, 3kó ki̱a̱ nijan kisꞌijña Ayiaa̱ ndií Aitoo̱b, ntsꞌi̱e̱ Akaboo̱nd ndií Finee̱, ndínde Elii̱, kui xi chináꞌmii̱ Néná kamá ki̱a̱ na̱xi̱ńdáꞌniú Siloo̱ kui xi yajá ńjño efoo̱nd. Xota̱ Israee̱l nde kamábejín nga kijí Jonataa̱n. 4Kó ngi̱jii̱n kui ndi̱yà nínga kamámejeén jaꞌa Jonataa̱n, tsi̱ꞌe̱ nga kjo̱chó nínga síndo ndiꞌańjñoo̱ xota̱ Filisteaa̱, kisꞌijña ngo ndi̱jo̱je xi yojó nga jó ngoboaá, ngo xi Bosee̱ kiꞌmí, kó xi ingoo̱ Senee̱ kiꞌmí. 5Ngo kui ndi̱jo̱o̱ xi nkꞌa ngase kamá, xi ki̱a̱ kisꞌijña xtji̱e̱e̱n ta̱ꞌii̱n, kje̱n nangi Mikmaa̱, kó xi ingoo̱ ki̱a̱ kisꞌijña xtji̱e̱e̱n na̱ngi, kje̱n na̱xi̱ńdáꞌniú Ngabaa̱.
6Kó Jonataa̱n, bi̱ katsoó nda̱ xi bosikójo xi boaꞌa ni xi bixkánjoo̱:
—Ja̱bíꞌi̱n, kó tjiàn nínga síndo ndiꞌańjñoo̱ kui xota̱ xi jmíjiín sirkunsisioo̱n. Tsi ta̱ꞌa nga Néná tjín ni xi sa̱ꞌín kjo̱a̱nda tsa̱ñá, ngatꞌa̱ Néná niꞌínjín ka̱maa̱ nga sa̱ꞌín nga ñá xí si̱ꞌán, tsi kjín ko̱jo tsi chiboa xota̱ timajo̱.
7Kó kui nda̱ xi yaꞌa ni xi bixkánjoo̱, bi̱ katsoó:
—Ndakjíꞌí, ja̱ ti̱ꞌin ji ngayeje ni xi tjíjin ini̱màa̱, ngatꞌa̱ kꞌi̱e̱ tikónjo̱o̱ kꞌi̱e̱e̱ tsi̱ꞌe̱ nga si̱ꞌin ji ni xi mejeén.
8Kósꞌe̱ bi̱ katsó Jonataa̱n:
—¡Jéꞌe̱n, ki̱a̱ kjóchó ngaskande nínga síndo nga jó kui jaá, kó ko̱e̱ꞌéndièe̱ nga sku̱i̱e̱ná! 9Kó tsi bi̱ ka̱tso̱ná: Chiyárajnú ngaskande nga kjóchójne̱. Kjiꞌá boá nga ki̱a̱ ku̱i̱ndyión ngi̱ndiená, kó kongínnijíngí jàn nínga síndo kui xtín jájuún xota̱ Filisteaa̱. 10Ta̱nga tsi bi̱ ka̱tso̱ná kui jaá: ¡Ndibánijíngíjnú nínga tindyionjne̱! Kjiꞌa boá nga kongínnijíngí, ngatꞌa̱ Néná boá xi jè ngi̱ya ndsa̱ katsꞌénkꞌasꞌienná kuí xota̱ Filisteaa̱. Kuí bí kui nii̱ xi chi̱bo̱a̱ ka̱máná.
11Kó nga joó nga akoó yojoo̱ jájún xi síndo ndiꞌańjñoo̱ xota̱ Filisteaa̱, kó xota̱ Filisteaa̱, bi̱ katsó: ¡Jànꞌa̱n xota̱ ebreoo̱ je ndyi̱fotjoni ti̱xa̱na̱xi̱ nínga kisꞌińdoꞌmaá!
12Kó kui jáxíꞌín xi ndyi̱yaꞌa ni xi bixkánjoo̱, bi̱ katsoó Jonataa̱n ko̱jo nda̱ xi bosikójoo̱, nga tsíchji̱a̱jo:
—Ndibánijíngíjnú kꞌi̱e̱e̱, kó ngo ni kꞌuiyájne̱.
Kó Jonataa̱n, bi̱ katsoó nda̱ xi bosikójoo̱ xi yaꞌa ni xi bixkánjoo̱:
—Ndibétji̱ngíní, ngatꞌa̱ Néná boá xi jè ngi̱ya tsja xota̱ Israee̱l katsꞌénkꞌasꞌienná kuí xotaa̱. 13Kó Jonataa̱n kijínijíngí nga katsꞌénkjién tsja ko̱jo se, kó nga̱xto̱n tji̱e̱ngii̱ kui nda̱ xi bosikójo xi yaꞌa ni xi bixkánjoo̱, kó askjanjo̱ xota̱ Filisteaa̱, kó kui xota̱ xi ixó kje̱n Jonataa̱n, kui nda̱ xi tsoꞌbájo̱ katsꞌénkjiesón nga̱xto̱n Jonataa̱n. 14Kuí bí xi̱ꞌbi̱ kjo̱a̱bixkán xí tjón xi katsꞌén Jonataa̱n ko̱jo nda̱ xi bosikójo xi boaꞌa ni xi bixkánjoo̱, kó mara̱ tsi ta̱ kan jáxíꞌín xi katsꞌénkjiesón ki̱a̱ ngo ngi̱ndie xi mara̱ masien kilometro̱ nga̱són tꞌanangii̱. 15Kó achichí katsakjónní ngayeje xotaa̱ ki̱a̱ nínga síndo ndiꞌańjñoo̱, ko̱jo nínga jno̱o̱, ko̱jo ngayeje jájún xi ndyi̱konda ndiꞌańjñoo̱, kó ti̱ bo̱a̱ ti̱ tsꞌén katsakjónní kui xota̱ xi ꞌbítso̱matjoón nga. Kó ngo kjo̱a̱ndi̱ko̱n kamá kuí tꞌanangii̱, kó, ¡Néná íkitsie maá ndikón xotaa̱!
16Kó jájún xi konda na̱xi̱ńdáꞌniuú Sauu̱l, ndeskande ki̱a̱ na̱xi̱ńdáꞌniú Ngabaa̱ kamábe nga achichí katsakjónní xota̱ Israee̱l, ngatꞌa̱ ta̱xkiya kijí kꞌi̱e̱ kijí jàn. 17Kósꞌe̱ Sauu̱l, bi̱ katsoó xota̱ xi ki̱a̱ síndojo̱:
—Tꞌíxki̱jnú xotaa̱, kó tsitsíjenjnúu̱ ꞌyání xi je kijí xi xota̱ tsa̱ñá. Kó ngije ikꞌíxki̱ xotaa̱, kamábe nga jmíjín Jonataa̱n, ko̱jo nda̱ xi bosikójo xi boaꞌa ni xi bixkánjoo̱. 18Kósꞌe̱ Sauu̱l, bi̱ katsoó Ayiaa̱:
—Ndibéje̱ní koxa̱ kjo̱a̱ꞌbíndaa̱ Néná kꞌi̱e̱e̱. Ngatꞌa̱ kui ni̱xtjin jàn, koxa̱ kjo̱a̱ꞌbíndaa̱ Néná ki̱a̱ kisꞌijñajii̱n xota̱ Israee̱l. 19Tji̱e̱nga Sauu̱l tsꞌénchji̱a̱jo chináꞌmii̱, kjo̱a̱se xi kisꞌie ki̱a̱ nínga síndo ndiꞌańjñoo̱ xota̱ Filisteaa̱, saꞌniú sáꞌniú ngase kamá, kuíni nga Sauu̱l, bi̱ katsoó chináꞌmii̱:
—¡Ngiti̱ bo̱a̱jín niꞌín ngase ji!
20Kó Sauu̱l ko̱jo ngayeje xota̱ na̱xi̱ńdá xí ki̱a̱ síndojo̱, kijí ngaskande nínga kjima kjo̱a̱xcha̱án, kó kamábe nga ti̱kuii xota̱ Filisteaa̱ askjanjo̱ xkjín, ngatꞌa̱ ja̱kꞌi̱e̱ ja̱ngaján ti̱kuii ki̱cha̱ndojoó katsꞌénkꞌiénni xkjín, kó ꞌniú kamátsobéjii̱n kui xotaa̱. 21Kó xota̱ ebreo̱ xi nijan kamámára xtín jájuún xota̱ Filisteaa̱, kui xi kijínijíngí nínga síndo ndiꞌańjñoo̱, ki̱a̱ nijan kamájo̱ xota̱ Israee̱l, kui xi tsoꞌbájo̱ Sauu̱l ko̱jo Jonataa̱n. 22Kó ti̱ bo̱a̱ ti̱ katsꞌén ngayeje xota̱ Israee̱l kui xi kisꞌińdoꞌmá ki̱a̱ na̱xi̱ xi chji̱a̱ni xota̱ tji̱e̱e̱ Efraii̱n, nga tsintꞌié nga ndyi̱monga xota̱ Filisteaa̱, ti̱ ngo tjín kamá nga kijíngátji̱ngii̱ kui jaá nga askjanjo̱ nga. 23Bo̱a̱ tsꞌén kui ni̱xtjii̱n, Néná tsꞌaxiéꞌá xota̱ Israee̱l. Kó kui kjo̱a̱xcha̱án ngaskande Bee̱t-Abee̱n jachó.
Ni xi katsó nga sa̱ꞌínkjatjosón Sauu̱l
24Ta̱nga kui ni̱xtjii̱n, xota̱ Israee̱l achichí nda̱ kamaá, ngatꞌa̱ Sauu̱l ja̱bo̱a̱ jè katsjátsꞌoá nga bi̱ katsoó: ¡Ngatꞌíko̱jonii̱ ta̱ꞌya xota̱ní xi skji̱ni̱e̱ nichinie ngindiee̱ nga ka̱majñoó, ko̱jo tsi ngindiee̱ nga sa̱ꞌingojo an ni xi katsꞌénjo̱na kondra̱na! Kó nde ngojín xota̱ na̱xi̱ńdaá xi iskjinie nichinie.
25Kó ngayeje xota̱ na̱xi̱ńdaá, jachó ngo ngindie kꞌijñá nínga achichí ndo̱bo̱a̱a̱ cho̱ndo̱ꞌo̱sièn tjín, kó ntsjieén katjonsón má nga̱són tꞌanangii̱. 26Kó kjiꞌanga xota̱ Israee̱l tsꞌasꞌienjin kui ngindie kꞌijñaá, kamábe nga tsꞌénmonga má kui ntsjieén, ta̱nga nde ngojín xi iskjinie, ngatꞌa̱ katsakjónnií ni xi katsó Sauu̱l. 27Ta̱nga Jonataa̱n tsintꞌiéjín kjiꞌanga na̱ꞌmii̱ katsjátsꞌoá ni xi katsoó xota̱ na̱xi̱ńdaá, kó iskjíbé yánísié xi yaꞌa, sꞌe̱ katsangisꞌiee̱n ngo ndo̱bo̱a̱ cho̱ndo̱ꞌo̱sièn, sꞌe̱ iskjinie ntsjieén, kó nda ngase kixindyia ndyi̱ko̱n.
28Kósꞌe̱ ngo nda̱ xi chji̱a̱ni xota̱ na̱xi̱ńdaá, bi̱ katsoó Jonataa̱n:
—Na̱ꞌmíi̱ ja̱bo̱a̱ jè katsjaátsꞌoa xota̱ na̱xi̱ńdaá nga bo̱a̱ katsó nga ngatꞌíko̱jonii̱ tsi tjín xí nichinie skji̱ni̱e̱ kui ni̱xtjii̱n. Kó xotaa̱ achichí nda̱ kamaá nga kjifesón bojó.
29Kó Jonataa̱n, bi̱ katsó:
—Na̱ꞌmina achichí kjo̱a̱xti je jeꞌejoo̱ ngayeje xota̱ na̱xi̱ńdáná. ¡Tsitsíjenjnúu̱ ngotꞌe̱ ꞌne̱ kótsꞌèn je kamáꞌna̱ má ndyikón án, nga je askotꞌa chií an kui ntsjieén! 30Mí ni xi je ka̱ma tsi ngotꞌe̱ xota̱ na̱xi̱ńdaá je iskjinie chií ni xi jaꞌáxiín kondra̱a̱. A mí xota̱ Filisteaa̱ je ꞌniú ngase kiniꞌánchaja tsobo̱a̱.
31Kui ni̱xtjii̱n xota̱ Israee̱l katsꞌénchaja xota̱ Filisteaa̱ ndeskande nangi Mikmaa̱, ngaskande na̱xi̱ńdáꞌniú Ayaloo̱n, ta̱nga achichí je jenda. 32Sꞌe̱ jaskan xota̱ Israee̱l tsanga má nga iskjíbé ni xi katsꞌeén, ko̱jo cho̱tsa̱nga̱a̱, ko̱jo cho̱yojo ínchjiín, ko̱jo ndií cho̱yojoo̱, kó ki̱a̱ katsꞌénkꞌién ki̱a̱ tꞌanangii̱, kósꞌe̱ xota̱ na̱xi̱ńdaá ngaskande jiín kui cho̱o̱ iskjinie. 33Kó tjín xí kijítsóyaà Sauu̱l kui nii̱, nga bi̱ katsoó:
—Xota̱ na̱xi̱ńdaá ndyi̱tsꞌénjé kondraa̱ Néná, ngatꞌa̱ yojo xi tjiín jín ndyi̱kjinie.
Kó bi̱ katsó Sauu̱l:
—¡Achichí nga ndajínkjiꞌi ni xi kiniꞌánjnú jún! Ngotꞌe̱ ꞌne̱, ngo ndi̱jo̱ xi ꞌniú je ti̱ꞌangátíkjayájnú kꞌi̱e̱e̱.
34Kó bi̱ katsó ngase Sauu̱l:
—Tangínjnú ngi̱jii̱n xtín jájuún, kó bo̱a̱ tꞌínjnúu̱ nga ngo nga ngo, nga ngatjandibájo̱ cho̱yojo xi̱ꞌii̱n, ko̱jo cho̱tsa̱nga̱a̱, kó kꞌi̱e̱ ngatsꞌénkꞌién kui cho̱o̱ kꞌi̱e̱e̱, ko̱jo kꞌi̱e̱ ngakjinie nga, kó nga sa̱ꞌínjéjín nga skji̱ni̱e̱ yojo xi tjiín jín. Kó kui ni̱xtji̱e̱e̱n ngayeje xtín jájuún, kuí má bo̱a̱ xi jachójo̱ cho̱yojoo̱, kó ki̱a̱ katsꞌénkꞌién. 35Kó Sauu̱l ngo ṉchandikón katsꞌéndaa̱ Néná, kuí boá kui ṉchandikoón xi tjón katsꞌéndaa̱ Ndi̱a̱ná kui xi Néná.
36Sꞌe̱ bi̱ katsó Sauu̱l:
—¡Tjianjayá kuí ni̱xtji̱e̱e̱n nínga síndo xota̱ Filisteaa̱, kó chja̱ꞌáxíi̱n ngayeje ni xi tjiín, ngaskande nga si̱si̱eén, kó nde ngojín xota̱ xi si̱ꞌankꞌangí!
Kó bi̱ katsó kui jaá:
—Ti̱ꞌin ji ngayeje ni xi nda maá jí nga si̱ꞌin ji.
Ta̱nga chináꞌmii̱, bi̱ katsó:
—Tjón Néná ko̱siyáa̱ ni xi si̱ꞌán.
37Kó Sauu̱l asíyaá Néná, nga bi̱ katsoó:
—A kjuínjáya an nga skjanjo̱ an xota̱ Filisteaa̱. A si̱ꞌinkꞌasꞌin jí ngi̱ya tsja xota̱ Israee̱l kui xotaa̱. Ta̱nga kui ni̱xtjii̱n jmí ni katsójín Néná. 38Kósꞌe̱ Sauu̱l, bi̱ katsó:
—Ndibáboáꞌájnú ngayeje jún xi ngito̱ko̱o̱ xota̱ na̱xi̱ńdaá, kó mejénna nga stsitsíjenjnúu̱ ꞌyání xi katsꞌén kui jeé ngotꞌe̱. 39Tikón boá Néná, Kui xi ꞌboxiéꞌá xota̱ na̱xi̱ńdá Israee̱l, nga ndatsi ndína Jonataa̱n xi bo̱a̱ katsꞌeén, chjiéngá ko̱yà.
Ta̱nga nde ngojín xota̱ na̱xi̱ńdaá xi tsíchji̱a̱. 40Kósꞌe̱ bi̱ katsoó ngayeje xota̱ Israee̱l:
—Jún ki̱a̱ ku̱i̱ndyiónjnú ngo ndiè, kó an ko̱jo ndína Jonataa̱n xtji̱e̱e̱n xi ingo ndieè ku̱i̱ndyionjne̱.
Kó xota̱ na̱xi̱ńdaá, bi̱ katsoó Sauu̱l:
—Ndakjíꞌí, ni xi bee̱takín nga ndakjiꞌi ti̱ꞌin ji.
41Kósꞌe̱ Sauu̱l, bi̱ katsoó Néná: Ji xi Nee̱ xota̱ Israee̱l ji, te̱ꞌéjne̱ ngo kjo̱a̱chꞌáṉcha̱ xi nda kjo̱tjo xki̱i̱! Kó Jonataa̱n ko̱jo Sauu̱l katjoꞌójinni kui kjo̱a̱chꞌáṉcha̱a̱, tji̱e̱nga xota̱ na̱xi̱ńdaá jmí jé kisꞌiejiín. 42Kósꞌe̱ bi̱ katsó Sauu̱l:
—Ngo kjo̱a̱chꞌáṉcha̱ ti̱ꞌánjnú kjo̱a̱a̱ an ko̱jo ndína Jonataa̱n. Kó nga kiniꞌán kui kjo̱a̱chꞌáṉchaa̱, Jonataa̱n katjoꞌójin.
43Kósꞌe̱ Sauu̱l, bi̱ katsoó Jonataa̱n:
—Tꞌíyéní mí ni xi kiniꞌín ji.
Kó Jonataa̱n, bi̱ katsó:
—¡Ja̱koxi̱ boá nga iskjíni̱e̱ chií an ntsjién xi ndyi̱ko̱n yánísiéna tsajájón! Kó kuí kjo̱a̱a̱ nga ko̱yà án ngotꞌe̱.
44Kó bi̱ katsó Sauu̱l:
—¡Néná ngatsꞌénjéna, ko̱jo tsie ngase ni xi ndajín ngatásoón ni xi sa̱ꞌínjo̱na nga ja̱koxi̱ boá nga ko̱yè jí Jonataa̱n!
45Ta̱nga xota̱ na̱xi̱ńdaá, bi̱ katsoó Sauu̱l:
—A chjiéngá ko̱yà Jonataa̱n, kui nda̱ xi bo̱a̱ tsꞌén ꞌniú tsꞌaxiéꞌá xota̱ na̱xi̱ńdá Israee̱l. ¡Jmí, nga bo̱a̱jín ngatama! Tikón Néná nga nde ngo tsja̱to̱ko̱ kꞌo̱kajín tꞌanangii̱, ngatꞌa̱ kui ni xi katsꞌén ngotꞌe̱. Néná boá xi asíko̱jo.
Kó bo̱a̱ tsꞌén xota̱ na̱xi̱ńdaá tsꞌaxiéꞌá Jonataa̱n, kó kiniꞌánkꞌiénjínni. 46Kó Sauu̱l ngiti̱ kijítji̱ngíjiín xota̱ Filisteaa̱, kó xota̱ Filisteaa̱ kijí nginí ngi̱ndiee̱.
47Kó bo̱a̱ tsꞌén ngije re kamá Sauu̱l tsi̱ꞌe̱ na̱xi̱ńdá Israee̱l, askjanjo̱ ngayeje kondra̱ xi síndo nga ngo foaꞌatjiyajoo̱n, xikoó: Xota̱ Moaa̱b, ko̱jo xota̱ Amoo̱n, ko̱jo xota̱ Endoo̱n, ko̱jo já re xi chji̱a̱ni nangi Sobaa̱, ko̱jo xota̱ Filisteaa̱. Kó ta̱ nínga kijí, nga kui xi katsꞌén kjo̱a̱xcha̱án. 48Kó ngo xtín jájún katsꞌenda xi katsꞌénkjié xota̱ Amalee̱k, kó tsꞌaxiéꞌá xota̱ Israee̱l ngi̱ya tsja xota̱ xi jaꞌáxiín nii̱.
49Ndí xí kisꞌiee̱ Sauu̱l kuí boá xi Jonataa̱n, ko̱jo Isbii̱, ko̱jo Malkisúaa̱. Jó kamá ndí xí ínchjiín, xi xchaá na̱ Meraa̱b kiꞌmí, kó xi kjindií na̱ Mikaa̱l kiꞌmí. 50Chjo̱ón Sauu̱l, na̱ Ainoaa̱n kiꞌmí, kui xi tsa̱kji̱ín Aimaa̱ kamá. Kó nda̱ ngito̱ko̱o̱ jájuún, Abnee̱r kiꞌmí, kui xi ndií Nee̱r kamá, tsinii̱ Sauu̱l. 51Ngatꞌa̱ Sii̱ kui xi na̱ꞌmii̱ Sauu̱l, ko̱jo Nee̱r, kui xi kamá na̱ꞌmii̱ Abnee̱r, xota̱ tji̱e̱e̱ Abiee̱l kamá.
52Kó ngayeje ni̱xtjin nga kisꞌijña Sauu̱l, achichí ꞌniú ikixkánjo̱ xota̱ Filisteaa̱, kó kjiꞌanga Sauu̱l kamábe ngo xota̱ xi ꞌniú ko̱jo xi chꞌokon kamaá, kui iskjíbé tsi̱ꞌe̱ nga ki̱a̱ nijan kamá jájuún.
Currently Selected:
1 Samuee̱ 14: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
