1 Samuee̱ 13
13
Nga ikixkánjo̱ xota̱ Filisteaa̱
1Xi ma joó nó nga atíxoma Sauu̱l ki̱a̱ na̱xi̱ńdá Israee̱l, 2kó kui ni̱xtjii̱n, Sauu̱l jaꞌájin ján mi̱ jáxíꞌín xi chji̱a̱ni xota̱ Israee̱l, kó jó mi̱ kamá kui jaá xi nijan kisꞌińdojo̱ Sauu̱l ki̱a̱ nangi Mikmaa̱, ko̱jo ki̱a̱ na̱xi̱ Betee̱l, kó ingo mi̱ ma xi nijan kisꞌińdojo̱ Jonataa̱n ki̱a̱ na̱xi̱ńdáꞌniú Ngabaa̱, ngi̱ndie xi chji̱a̱ni xota̱ tji̱e̱e̱ Benjaa̱. Kó xota̱ na̱xi̱ńdá xí ngasee̱ katsangiya nga kijí ndiꞌaa̱ nga ngo nga ngo.
3Kó Jonataa̱n askjanjo̱ xtín jájún xi síndojo̱ já Filisteaa̱ xi síndo ki̱a̱ na̱xi̱i̱, kó nga tsintꞌié xota̱ Filisteaa̱ ni xi kamaá, Sauu̱l katsꞌénkjaniee̱ tjio ngayeje na̱xi̱ńdaá, kó bi̱ katsó nga askjandáyà: ¡Ndaꞌyájnú jún xota̱ ebreoo̱! 4Kó ngayeje xota̱ Israee̱l tsintꞌié nga Sauu̱l katsꞌeén xota̱ Filisteaa̱, kó kuíni nga xota̱ Filisteaa̱ achichí ꞌniú katsꞌénxchánjo̱ xota̱ Israee̱l. Kó xota̱ Israee̱l ki̱a̱ kamátikó nga kijítji̱ngii̱ Sauu̱l ki̱a̱ Ngilngaa̱l.
5Kó xota̱ Filisteaa̱ kamátikó, tsi̱ꞌe̱ nga skjánjo̱ xota̱ Israee̱l, kó kantié mi̱ karro̱ kamá, ko̱jo jun mi̱ jájún ndi̱je̱, ko̱jo achichí kamá xota̱ xi kijítji̱ngii̱ xikó maá tsomí xí tjín tꞌa ndáchíkoón, kó kijínijíngí, sꞌe̱ ki̱a̱ katsꞌénkjaꞌyá ki̱a̱ nangi Mikmaa̱, xtji̱e̱e̱n nínga fotjo tsꞌueé ki̱a̱ na̱xi̱ńdáꞌniú Bee̱t-Abee̱n.
6Kó kjiꞌanga xota̱ Israee̱l je kamábe nga ndajín ka̱maa̱, ngatꞌa̱ xota̱ na̱xi̱ńdaá ngiti̱ kisꞌiejiín ngi̱ndie nínga kjo̱tjoni, ki̱a̱ kijíkꞌíndoꞌmá ngi̱yaa̱ ti̱xa̱na̱xi̱i̱, ko̱jo ngi̱ya ti̱xa̱ xi tjiín ndáfoa, ko̱jo ngi̱jin ndi̱jo̱ yiꞌii̱, ko̱jo ngi̱ya ti̱xa̱, ko̱jo ngi̱yaa̱ ndáńchꞌi̱. 7Kó ti̱ tjín xota̱ ebreoo̱ xi jaꞌatio ndejèꞌ Jorndaa̱n, kó ki̱a̱ kijí xtji̱e̱e̱n Ngaa̱nd, nangi xi chji̱a̱ni Ngalaa̱nd, ta̱nga Sauu̱l to̱kó ki̱a̱ kisꞌijñara ki̱a̱ Ngilngaa̱l, kó ngayeje xota̱ na̱xi̱ńdaá ndatsi jatsié má ti̱ kuí xí ki̱a̱ kijítji̱nginii̱.
8Kó Sauu̱l yito ni̱xtjin askoyá, xikó kjiꞌi ni̱xtjin xi katsoó Samuee̱, ta̱nga nga Samuee̱ tsꞌénfochójín ki̱a̱ Ngilngaa̱l, tjín xota̱ na̱xi̱ńdaá xi kastsojoboa nga índomasien Sauu̱l. 9Kósꞌe̱ Sauu̱l, bi̱ katsó: Ndibájo̱jnúꞌun kꞌi̱e̱e̱ ngo kjo̱a̱tjó xi kꞌuití, ko̱jo ngo kjo̱a̱tjó tsi̱ꞌe̱ nga kjóndàa̱ Néná. Kó Sauu̱l katsꞌénkꞌasꞌien kui kjo̱a̱tjoó, 10kó ngije kamaá nga katsꞌénkꞌasꞌien kui kjo̱a̱tjoó, jachó Samuee̱ ki̱a̱a̱, kó Sauu̱l kijíkjaꞌáyíndi̱yà, tsi̱ꞌe̱ nga sa̱ꞌínchikonñé.
11Kósꞌe̱ bi̱ katsó Samuee̱:
—Mí xí kiniꞌín ji.
Kó bi̱ katsó Sauu̱l:
—Kjo̱a̱a̱ nga kamábe án nga tjín xota̱ na̱xi̱ńdaá xi ndyi̱ꞌbíndomasienna, ko̱jo nga ji tifoéꞌe̱jín ji ni̱xtjin xi je ikꞌínda, ko̱jo nga xota̱ Filisteaa̱ je ki̱a̱ ndyi̱ꞌbitíkó xkjín ki̱a̱ nangi Mikmaa̱, 12kó bi̱ tsꞌén katsꞌenkjó án: Ngotꞌe̱ ꞌne̱, xota̱ Filisteaa̱ kji̱ndi̱bákjánjo̱na ki̱a̱ Ngilngaa̱l, kó án kji̱e̱ tsꞌenkjaꞌajindajín an Néná, kuíni nga katsꞌen an ngo kjo̱a̱ꞌniú nga ta̱sá katsꞌenkꞌasꞌièe̱n kjo̱a̱tjó Néná.
13Ta̱nga Samuee̱, bi̱ katsoó Sauu̱l:
—¡Kjo̱a̱chi̱ni boá ni xi kiniꞌín ji! Kji̱e̱ kiniꞌínkjatjosénjín ji kjo̱a̱botíxomaa̱ Néná, kui xi katsjaá Ne xi tse̱. Tsi bo̱a̱ kjiꞌi ni xi kiniꞌín ji katsaki, Néná ngatsjéni̱xtjin nga katsꞌén nga ji ko̱jo xota̱ ndiꞌàa̱ xi ko̱ti̱xomájnú nangi Israee̱l. 14Ta̱nga ngotꞌe̱ ꞌne̱, jmí tsi tsie ka̱maa̱ nga ji xi ko̱ti̱xome ji. Kuíni nga Néná je tsangase ngo nda̱ xi sasieén ini̱ma̱a̱ Kui, kó Kuí boá xi jaꞌájin nga kui xi ka̱ma ngito̱ko̱o̱ xota̱ na̱xi̱ńdaá, ngatꞌa̱ ji kiniꞌínkjatjosénjín ji ni xi atíxomaa̱ Néná.
15Kósꞌe̱ Samuee̱ jastjíe̱n, kó kijínijíngí xtji̱e̱e̱n Ngilngaa̱l, sꞌe̱ kijí na̱xi̱ńdáꞌniú Ngabaa̱, ngi̱ndie xi chji̱a̱ni xota̱ tji̱e̱e̱ Benjaa̱. Kósꞌe̱ Sauu̱l íxki̱ xota̱ xi ki̱a̱ síndojo̱: Kamára̱ jun úchán jáxíꞌín ngayejee̱. 16Kó Sauu̱l, ko̱jo Jonata̱n ndií, ko̱jo jájuún ki̱a̱ kisꞌińdo ki̱a̱ na̱xi̱ńdáꞌniú Ngabaa̱, ngi̱ndie xi chji̱a̱ni xota̱ tji̱e̱e̱ Benjaa̱, tji̱e̱nga xota̱ Filisteaa̱ ki̱a̱ índo ndiꞌańjñoo̱ ki̱a̱ nangi Mikmaa̱, 17kó ki̱a̱ nínga síndo ndiꞌańjñoo̱ xota̱ Filisteaa̱ jatjoni ján tjín jájún, kó ngo tjín xí kijí xtji̱e̱e̱n ndi̱yà xí fíni Ofra̱, xtji̱e̱e̱n nangi Suaa̱l, 18ko̱jo ingo xtín jájuún xi kijí xtji̱e̱e̱n na̱xi̱ńdáꞌniú Bee̱t-Oroo̱n, kó xi ma ján tjiín, xtji̱e̱e̱n nangi xi kotsijennii̱ nangi soón Seboii̱n kijí, xtji̱e̱e̱n nangi kixií.
19Kó nde ngojín xota̱ chji̱ni̱e̱ki̱cha̱ xi kisꞌie ngayeje nangi Israee̱l, ngatꞌa̱ bi̱ katsó xota̱ Filisteaa̱: Nga jmí ki̱cha̱ndojó ko̱jo yá xí tjítokó ki̱cha̱yojó sa̱ꞌíndajín xota̱ ebreoo̱. 20Kuíni nga ngayeje xota̱ Israee̱l chjiéngá ki̱a̱ kijí nínga síndo xota̱ Filisteaa̱, tsi̱ꞌe̱ nga katsꞌényojó ki̱cha̱ńtsó xí tsꞌénkjién nga bokján tꞌanangii̱, ko̱jo ki̱cha̱ batakaa̱, ko̱jo jachaa̱, ko̱jo ki̱cha̱ntꞌi̱u̱a̱a̱. 21Kó kjiꞌanga kiniꞌányojó ki̱cha̱ńtsó xí tsꞌénkjién nga bokján tꞌanangii̱, ko̱jo ki̱cha̱ batakaa̱, jin ngramo̱ to̱ntiboa kachjeꞌéchjií, kó nga kiniꞌányojó jachaa̱, ko̱jo nga kiniꞌányojó ki̱cha̱ xi tsꞌénkjién nga bokján tꞌanangii̱, ján ngramo̱ to̱ntiboa kachjeꞌéchjií nga ngo nga ngo. 22Kó bo̱a̱ tsꞌén ni̱xtjin nga kamá kui kjo̱a̱xcha̱án, nde ngojín xota̱ na̱xi̱ńdá xí nijan síndojo̱ Sauu̱l ko̱jo Jonataa̱n xi kisꞌiee̱ ki̱cha̱ndojó, ko̱jo tsi yá xí tjítokó ki̱cha̱yojó, ta̱kuítsí Sauu̱l ko̱jo Jonataa̱n xi kisꞌiee̱ kui nii̱. 23Kó ngo xtín xota̱ Filisteaa̱ xi kijí ngaskande nínga bitjani nangi Mikmaa̱.
Currently Selected:
1 Samuee̱ 13: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
