1 Samuee̱ 12
12
Én xí tsíchji̱a̱jo Samuee̱ xota̱ na̱xi̱ńdaá
1Kósꞌe̱ Samuee̱, bi̱ katsoó ngayeje xota̱ Israee̱l:
—Ngotꞌe̱ ꞌne̱, jè tsintꞌie an ngayeje ni xi kiꞌmíjnúꞌun, kó jè katsꞌen an nga ngo nda̱ re xi ko̱tíxomájnú. 2Kó ngotꞌe̱ ꞌne̱, kꞌi̱e̱ tikón rejnú xi ko̱e̱je̱tjónjnú. An jè ꞌniú xchá án, kó jè kichjí tokó án, ta̱nga kꞌi̱e̱ síndojinjnú ndína, ndeskande koó nga kjindí án nga kꞌi̱e̱ tsoꞌbájinjnúꞌun, ngaskande ngotꞌe̱. 3Kꞌi̱e̱ tikòn an kꞌi̱e̱e̱ ngotꞌe̱, kó tꞌíyájnú ngindyi̱ko̱n Néná ko̱jo ngindyi̱ko̱n kui nda̱ xi je jaꞌájin Kui, tsi tjín xí jaꞌaxíi̱n cho̱yojo xi̱ꞌii̱n, ko̱jo tsi tjín xí jaꞌaxíi̱n bórroó, ko̱jo tsi tjín xí tsꞌenṉcha̱jo an nga ngo ni katsꞌen an, ko̱jo tsi tjín xí to̱n iskjíbée̱ tsi̱ꞌe̱ nga asiko̱jo an nga ichjá án ndyikón án, tsi bo̱a̱ katsꞌen an, ja̱ tsjaꞌoyángiñáa̱ ngayeje kui nii̱.
4Kósꞌe̱ bi̱ katsó kui jaá:
—Kji̱e̱ ngo ndi̱yà chꞌíṉche̱jejne̱, ti̱nde kji̱e̱ ngo ndi̱yà nga kjo̱a̱ꞌniú kiniꞌínjne̱ nga kiniꞌánjne̱ xáa̱, ko̱jo jmí chejé kiniꞌínjínjne̱. 5Kósꞌe̱ Samuee̱, bi̱ katsó:
—Néná ko̱jo kui nda̱ xi je jaꞌájin Kui, kuí boá xi chistiko̱ nga jmí ni chꞌokjiꞌi katsꞌénjín an.
Kó ngayeje xotaa̱, bi̱ katsó:
—¡Jo̱o̱n, chistiko̱ ji̱n téi!
6Kósꞌe̱ Samuee̱, bi̱ katsoó xota̱ na̱xi̱ńdaá:
—Néná boá xi jaꞌájin Moisee̱ ko̱jo Aaroo̱n, kó Kuí boá xi tsꞌaxié xota̱ xi xchájnú ki̱a̱ nangi Ejiptoo̱. 7Ngotꞌe̱ ꞌne̱, nda má ndaꞌyájnúꞌun, ngatꞌa̱ án boá xi kuichjiájojnúꞌun ngindyi̱ko̱n Néná, kjo̱a̱a̱ ngayeje ni nda xi Néná katsꞌénjo̱jnú jún ko̱jo xota̱ xi xchájnú. 8Kjiꞌanga jachó Jakoo̱b na̱xi̱ńdá Ejipto̱, xota̱ xi xchájnú ni̱ma̱ katsó nga tsíchji̱a̱a̱ Néná, kó Néná katsangiya Moisee̱ ko̱jo Aaroo̱n, tsi̱ꞌe̱ nga kui tsꞌaxié kui xotaa̱ ki̱a̱ nangi Ejiptoo̱, kósꞌe̱ kꞌi̱e̱ katsꞌénkꞌíndo kui ngi̱ndiee̱.
9Ta̱nga kui xotaa̱ katsꞌénchíyà Néná, kó kuíni nga Néná ki̱a̱ katsꞌénkꞌasꞌienni ngi̱ya tsja Sísaraa̱, nda̱ ngito̱ko̱o̱ jájuún na̱xi̱ńdáꞌniú Asoo̱r, ko̱jo ngi̱ya tsja xota̱ Filisteaa̱, ko̱jo ngi̱ya tsja nda̱ ree̱ nangi Moaa̱b, kui xi askjanjo̱ kui xotaa̱.
10Kósꞌe̱ ngijee̱ achichí ni̱ma̱ katsó nga tsíchji̱a̱a̱ Néná, nga bi̱ katsó: ¡Kiniꞌánjéjne̱! ¡Kjo̱a̱a̱ nga jè ikꞌíjñámasienjne̱ ji, kó ta̱sá ne Baa̱l, ko̱jo na̱ ne Astaroo̱t kiniꞌánxátꞌajne̱! ¡Ngotꞌe̱ ꞌne̱, chjiáꞌájne̱ ji nga ko̱ꞌna̱xiéꞌéjne̱ ngi̱ya tsja kondra̱jne̱, kó jí boá xi si̱ꞌanxátꞌajne̱ ji ngijee̱!
11Kósꞌe̱ Néná katsangiya Jerobaa̱l, ko̱jo Baraa̱k, ko̱jo Jeftee̱, ko̱jo Samuee̱, kó katsꞌéndé ngi̱ya tsja kondra̱a̱, kui xi síndo nga ngo foaꞌatjiyajoo̱n, kó nda kixindyionjnú ngijee̱.
12Ta̱nga kjiꞌanga kamáyàjnú nga Najaa̱, nda̱ ree̱ xota̱ amonitaa̱ jún askjanjo̱jnú, jún bi̱ kiꞌmíjnúꞌun: ¡Jmí, ta̱sá ngo re mejénjne̱ xi ko̱tíxomajne̱! Ndatsi yàjnú nga Ndi̱a̱ná kui xi Néná boá xi Rejnú kamá.
13Kó kuíni nga ngotꞌe̱ ꞌne̱, ja̱ kꞌi̱e̱ tikón kꞌi̱e̱e̱ kui nda̱ re xi jún kachjeꞌéjinjnú, kui xi jún kichjiáꞌájnúꞌun. Ja̱ Néná boá xi je katsjájnú ngo nda̱ re xi ko̱tíxomájnú. 14Tsi yandikónjnú Néná, kó tsi Kui xi ndyi̱niꞌánxátꞌajnúu̱, ndaꞌyáꞌénjnúu̱ nda̱a̱, kó ngata̱ kitikjo̱a̱jín niꞌánjnú yojojnú ni xi ka̱tso̱ Néná, kósꞌe̱ kjiꞌá boá nga jún ko̱jo nda̱ re xi botixómájnú, nda ku̱i̱ndyiónjnú nga kongintjingíjnú Néná, kui xi Nejnú. 15Ta̱nga tsi ko̱nda̱ꞌyáꞌénjínjnúu̱ ni xi ka̱tso̱jnú Néná, kó tsi kitikjo̱a̱ ka̱majnú, Néná kondra̱ tsa̱jún kꞌuijñáni, xikó katsꞌénjo̱ xota̱ xi xchájnú.
16Kuíni nga xió ti̱ndyiónjnú, kó tsitsíjenjnúu̱ kui ni yiꞌi xi tsꞌén Néná ngindyikónjnú. 17A mí tsí ngotꞌe̱ ꞌné nga chjaꞌáꞌyá to ndso̱ko̱a̱n ṉño̱paa̱n. Kuíni nga ꞌniú kuichjiáa̱ Néná, tsi̱ꞌe̱ nga sa̱ngíyá cho̱ꞌo̱o̱n ko̱jo stseé, kó bo̱a̱ tsꞌén xcha̱jnú nga ta̱nisién ndajínkjiꞌi ni xi kiniꞌánjnú ngindyi̱ko̱n Néná, nga ngo nda̱ re kichjiáꞌájnú.
18Kósꞌe̱ Samuee̱ tsíchji̱a̱a̱ Néná, kó kui ni̱xtjii̱n Néná katsangiya cho̱ꞌo̱n ko̱jo ngo stsé ꞌniú. Kó ngayeje xota̱ na̱xi̱ńdaá achichí katsakjónnií Néná ko̱jo Samuee̱.
19Kósꞌe̱ ngayeje xota̱ na̱xi̱ńdá, bi̱ katsoó Samuee̱:
—Ndokjoée̱ Nèe̱, kjo̱a̱a̱ ji̱n xi moso̱ tse̱ ji, tsi̱ꞌe̱ nga ko̱yàjínjne̱. Ngatꞌa̱ ngayeje jé xí je kiniꞌánjne̱, ingo jè akjasón ngasejne̱ nga ngo nda̱ re kichjiáꞌájne̱.
20Kó Samuee̱, bi̱ katsoó xota̱ na̱xi̱ńdaá:
—Ngata̱ ndakonjínmájnú, nga ja̱koxi̱ jún boá xi kiniꞌánjnú ngayeje kui ni xi ndajiín, ta̱nga ngata̱ ꞌbíjñámasiénjínjnú Néná, ta̱sá ngayeje ini̱ma̱jnú nga ti̱ꞌanxátꞌajnúu̱. 21Ngata̱ xínjín mongínjnú, tsi̱ꞌe̱ nga ki̱a̱ si̱ꞌandikónjnú ne xi jmí ni chjíjiín, ngatꞌa̱ ta̱kjo̱a̱ndaní bo̱a̱ kui nii̱, kó ka̱májiín kꞌo̱xiéꞌájnú.
22Ngatꞌa̱ Néná ku̱i̱ꞌíjñámasienjín xota̱ na̱xi̱ńdaá, ta̱ngatꞌanii̱ ngaꞌniú xí tjiín, nga jún boá xi ka̱majnú xota̱ na̱xi̱ńdaá Néná.
23Kó kuíni nga ngotꞌe̱ ꞌne̱, nga jmíni̱xtjin sa̱ꞌinjé án kondraa̱ Néná nga ngiti̱ kuichjiátjéjínjnúꞌun. Ta̱sá án boá xi kokoyájnúꞌun kótsꞌèn nga ndi̱yà xí nda ko̱jo xi kixi̱i̱ ku̱i̱ṉtsomajnú.
24Ta̱sá cha̱ndikónjnú Néná, kó ngayejee̱ ini̱ma̱jnú nga ti̱ꞌanxátꞌajnúu̱ nga ja̱koxi̱, ti̱ꞌankjójnú ni je xi katsꞌén nganda tsa̱jún. 25Ta̱nga tsi ta̱kó si̱ꞌánjnú ni xi ndajiín, chjiéngá ko̱yàjnú jún ko̱jo nda̱ rejnú.
Currently Selected:
1 Samuee̱ 12: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
