1 Samuee̱ 11
11
Sauu̱l katsꞌeén nga askjanjo̱ xota̱ amonitaa̱
1Jaskan Najaa̱, nda̱ xi chji̱a̱ni xota̱ amonitaa̱, kijínijíngí kó ki̱a̱ kisꞌijña ki̱a̱ na̱xi̱ńdáꞌniú Jabee̱, ki̱a̱ nangi Ngalaa̱nd. Kó ngayeje xota̱ xi chji̱a̱ni na̱xi̱ńdáꞌniú Jabee̱, bi̱ katsoó Najaa̱: —¡Tꞌíndeje̱jne̱ ji̱n ngo ni, kó ji̱n si̱ꞌanxátꞌajne̱ ji!
2Ta̱nga nda̱ xi ꞌmí Najaa̱, bi̱ katsó:
—Ka̱má, ta̱nga ngo ni kuíꞌájnúꞌun jún, nga ngo nga ngojnú ꞌna̱xiéjnú ndyikon kixi̱jnú, tsi̱ꞌe̱ nga bo̱a̱ tsꞌén kꞌuieé kjo̱a̱soboá ngayeje xota̱ Israee̱l.
3Kó xota̱ xi xchaá na̱xi̱ńdáꞌniú Jabee̱, bi̱ katsoó:
—Yito ni̱xtjin te̱ꞌéjne̱, tsi̱ꞌe̱ nga ka̱ma ko̱na̱ngíyájne̱ xota̱ chji̱ni̱e̱ꞌén ngayeje nangi Israee̱l, kó tsi jmíjín xi kꞌo̱xiéꞌájne̱, ja̱ kjo̱tjojne̱ kui ngi̱ndiee̱.
4Kó kjiꞌanga jachó xota̱ chji̱ni̱e̱ꞌe̱én ki̱a̱ na̱xi̱ńdáꞌniú Ngabaa̱, nínga tikón ndiꞌaa̱ Sauu̱l, katsóyaà xota̱ na̱xi̱ńdaá kui eén, kó ngayeje xotaa̱ askjandáyà má nga askjandá. 5Kó Sauu̱l nga kjoeꞌeni ngi̱jin kꞌijñá jàn, nga tjítsꞌenxájo̱ cho̱yojo xi bokján tꞌanangii̱, bi̱ katsó:
—Mí xí kjimaa̱ xotaa̱ nga ndyi̱kjandà kón.
Kó kiꞌmíyaà ni xi katsó xota̱ xi chji̱a̱ni na̱xi̱ńdáꞌniú Jabee̱. 6Nga tsintꞌié kuí eén Sauu̱l, A̱si̱énni̱xtjii̱n Néná ꞌniú kjindibánié, kósꞌe̱ achichí katsꞌénxchán, 7kó iskjíbé ngo ꞌniú cho̱yojo xi bokján tꞌanangii̱, kósꞌe̱ tsatieya, kó yojoo̱ kui cho̱o̱ katsangiya ngayeje nangi Israee̱l nga katsꞌénkjíjo̱ já chji̱ni̱e̱ꞌén, xí bi̱ katsoó: ¡Bi̱ si̱ꞌanjo̱ cho̱yojo xi bokján tꞌanangii̱ xota̱ xi ko̱e̱je̱tji̱ngijiín Sauu̱l ko̱jo Samuee̱ nga ko̱e̱je̱ kjo̱a̱xcha̱án.
Kó xota̱ na̱xi̱ńdaá katsakjónní Néná, kó ngayejee̱ nga ta̱ ngo xtín kamá nga jatjoni kui ngi̱ndiee̱.
8Kó Sauu̱l ki̱a̱ na̱xi̱ńdáꞌniú Besee̱k íxki̱ xotaa̱, kó ján úchán mi̱ kamá jáxíꞌín xi chji̱a̱ni xota̱ Israee̱l, ko̱jo kantié mi̱ kamá jáxíꞌín xi chji̱a̱ni xota̱ tji̱e̱e̱ Jundáa̱. 9Kó bi̱ kiꞌmií jáchji̱ni̱e̱ꞌén xí jachó ki̱a̱a̱: Bi̱ tꞌínjnúu̱ xota̱ na̱xi̱ńdáꞌniú Jabee̱, nangi xi chji̱a̱ni Ngalaa̱nd: Ndyiojón nga kjo̱tjo tsꞌueé, ka̱mandéjnú.
Kó kui jáchji̱ni̱e̱ꞌe̱én kijítsóyaà kui nii̱ xota̱ na̱xi̱ńdáꞌniú Jabee̱, kó achichí tsjá kamaá. 10Kó xota̱ xi chji̱a̱ni na̱xi̱ńdáꞌniú Jabee̱, bi̱ katsoó kondra̱a̱:
—Ndyiojón kongín kixkánjo̱jne̱ jún, kó ta̱ ni xi mejénjnú ti̱ꞌanjo̱jnú ji̱n.
11Kó nga ndibáꞌásie̱én nga kamángindyiojón, Sauu̱l ján tjín katsꞌén jájuún, kó ngindiee̱ nga si̱si̱én tsꞌasꞌien nínga síndo ndiꞌańjñoo̱ xota̱ amonitaa̱, kó askjanjo̱ ngaskande nga kamáꞌniú ndoboaá. Kó xota̱ xi tsꞌangii̱ yojoo̱ kastsojoboa, kó ngaskande nde jó kamájín xi nijan kisꞌińdo ngase.
12Kósꞌe̱ xota̱ na̱xi̱ńdaá, bi̱ katsoó Samuee̱:
—ꞌYá xi bi̱ katsó: ¡A Sauu̱l boá xí ko̱tíxománá! ¡Ja̱ ngatjandibá kuí xí bo̱a̱ katsoó, tsi̱ꞌe̱ nga si̱ꞌankꞌienjne̱!
13Ta̱nga Sauu̱l, bi̱ katsó:
—Ngojín xi si̱ꞌankꞌien kui ni̱xtjii̱n, ngatꞌa̱ Néná boá xi je katsjáná nga ñá xí xota̱ Israee̱l xi kiniꞌán ngotꞌe̱.
14Kó Samuee̱, bi̱ katsoó xota̱ na̱xi̱ńdaá:
—¡Ndibájnú, kó tjiàn xtji̱e̱e̱n Ngilngaa̱l, tsi̱ꞌe̱ nga ki̱a̱ ku̱i̱ꞌítsꞌi̱yanii̱ nga ko̱tíxoma Sauu̱l!
15Kó ngayeje xota̱ na̱xi̱ńdaá kijí xtji̱e̱e̱n Ngilngaa̱l, kó ki̱a̱ katsꞌén re Sauu̱l ngindyi̱ko̱n Néná, kó katsꞌénkꞌasꞌiee̱n kjo̱a̱tjó tsi̱ꞌe̱ nga kjóndajo̱ Néná, kó Sauu̱l ko̱jo ngayeje jáxíꞌín xi chji̱a̱ni Israee̱l, achichí tsjá kamaá nga kisꞌińdo ki̱a̱a̱.
Currently Selected:
1 Samuee̱ 11: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
