1 Já ree̱ 9
9
Ni xi Néná índajo̱ Salomoo̱
(2Kr 7:11-22)
1Ngije kamándo̱jo̱ó Salomoo̱ nga katsꞌénda Ndiꞌaa̱ Néná, ko̱jo ndiꞌa nínga botixómá nda̱ ree̱, ko̱jo ngayeje ni xi kamámejeén nga katsꞌénda, 2Néná jatjokjaà Salomoo̱ xi ma joó ndi̱yà, xikótsꞌèn jatjokjaà ki̱a̱ nangi Ngabaóo̱n. 3Kó Néná, bi̱ katsoó Salomoo̱:
—Jè tsintꞌie an nga tindokjo̱e̱ní ko̱jo nga ꞌniú tichjiéꞌé ji ngo ni ngindyikón án. An jè katsꞌentsjie an kui ndiꞌa xi kiniꞌínde ji, tsi̱ꞌe̱ nga ki̱a̱ si̱ꞌandikón Jaꞌénna ngatsjéni̱xtjin, kó xikoó tsi ki̱a̱ kꞌuíndo ndyikón án ko̱jo ini̱ma̱na ngatsjéni̱xtjin.
4Kó kjo̱a̱a̱ ji, tsi bo̱a̱ tsꞌén ku̱i̱ńtje̱ ji ngindyikón án xikó tsꞌén kistsoꞌbá Ndabi̱ na̱ꞌmíi̱, nga nda kamá ini̱ma̱a̱ ko̱jo nga kixi̱ kamá, ko̱jo tsi si̱ꞌin ji ngayeje ni xi je atixomaa, kó tsi si̱ꞌinkjatjosén ji kjo̱a̱botíxomana ko̱jo kjo̱a̱kitina, 5Án boá xi sa̱ꞌin an nga ji xi ko̱ti̱xome ji ki̱a̱ na̱xi̱ńdá Israee̱l ngatsjéni̱xtjin, xikó má kixiáa̱n Ndabi̱ na̱ꞌmíi̱, nga bi̱ kixiáa̱n: Ngatsjéni̱xtjin nga kꞌuié ngo nda̱ xi xota̱ tji̱e̱e̱ xi ko̱tíxomaa̱ na̱xi̱ńdá Israee̱l. 6Ta̱nga tsi jún, ko̱jo tsi ndíjnú si̱ꞌankjinjnú yojojnú nínga tikón an, kó tsi si̱ꞌankjatjosónjínjnú kjo̱a̱botíxomana, ko̱jo kjo̱a̱kitina kui xi je íjñá an ngindyikónjnú, kó tsi ki̱a̱ kongintjíngíjnú ko̱jo tsi ki̱a̱ si̱ꞌanxátꞌajnúu̱ kje̱ꞌe ne, kó tsi kui xi ko̱si̱e̱ntꞌajnúu̱ tikójnú, 7kjiꞌá boá nga an sa̱ꞌinkjié an xota̱ Israee̱l kꞌi̱e̱ kui tꞌanangi xi je katsꞌenkꞌasꞌièe̱n, kó ngiti̱ ki̱a̱jín kotíjña̱ an kui Ndiꞌa xi je katsꞌentsjie an tsi̱ꞌe̱ nga ki̱a̱ xcha̱ndikón Jaꞌénna, kó xota̱ Israee̱l si̱ꞌandaa̱ énkjín ko̱jo ko̱jno̱cha ngi̱jii̱n ngayeje xota̱ na̱xi̱ńdaá, 8kó ngayeje xota̱ xi kjo̱a̱ꞌa kui Ndiꞌa xi achichí kamáyandikoón, ko̱e̱je̱ndikoón, kó ko̱jno̱kie, ko̱jo ko̱síyá nga bi̱ ka̱tso̱: Ánní nga bo̱a̱ kjiꞌi ni xi katsꞌénjo̱ Néná kui tꞌanangii̱ ko̱jo kui ndiꞌaa̱. 9Kó bi̱ ka̱tso̱ xi ku̱i̱chji̱a̱jo: Ngatꞌa̱ índomasien Néná kui xi Nee̱, kui xi tsꞌaxié xota̱ tji̱e̱ xchaá ki̱a̱ nangi Ejiptoo̱, kó ta̱sá ꞌniú kijítji̱ngi ne xi kuijín, kó ki̱a̱ katsꞌénxátꞌaa̱, kuíni nga Néná jeꞌejoo̱ kui xotaa̱ ngayeje kui ni xi ndajiín.
Kje̱ꞌe ngase ni xi katsꞌén Salomoo̱
(2Kr 8:1-18)
10Kó ngije jaꞌa kan nó, ngije Salomoo̱ katsꞌénda nga jó ndiꞌa: Kui ndiꞌa xi tsi̱ꞌe̱ Néná, ko̱jo ndiꞌa xi tsi̱ꞌe̱ nda̱ ree̱. 11Kui xi Iraa̱n, nda̱ ree̱ na̱xi̱ńdáꞌniú Tiroo̱, katsjaá Salomoo̱ yákón, ko̱jo yásipree̱, ko̱jo to̱nsinié xikó kjiꞌi xi kamámejeén, kó nda̱ re Salomoo̱ katsjaá Iraa̱n kan na̱xi̱ńdáꞌniú xi síndo nangi Ngalilea̱. 12Ta̱nga Iraa̱n jatjoni na̱xi̱ńdáꞌniú Tiroo̱ nga kijíkatsijee̱n kui na̱xi̱ńdáꞌniú xí katsjaá Salomoo̱, kó tsjajín kamaá, 13kó bi̱ katsó:
—Mí na̱xi̱ńdáꞌniuú bo̱a̱ xi katseꞌéní jí ntsꞌie. Kó ngo kui ngi̱ndiee̱ nangi Kabuu̱l ítꞌajaꞌén, xikó ꞌmí ngaskande ngotꞌe̱. 14Iraa̱n katsangiyaa̱ nda̱ ree̱ ján mi̱ nijan úchán ichítié ko̱jo kan kilo̱ to̱nsinié.
15Ta̱ngatꞌanií kui kjo̱a̱a̱ nga nda̱ re Salomoo̱ ínieé xá xotaa̱: Kjo̱a̱a̱ nga katsꞌénda Ndiꞌaa̱ Néná, ko̱jo ndiꞌa xi tsi̱ꞌe̱, ko̱jo ngi̱ndie nínga ma niꞌánkjaꞌyaá, ko̱jo xoó na̱xi̱ńdáꞌniú Jerusalee̱n, ko̱jo na̱xi̱ńdáꞌniú Asoo̱r, ko̱jo na̱xi̱ńdáꞌniú Mengindoo̱, ko̱jo na̱xi̱ńdáꞌniú Ngésee̱r, 16ngatꞌa̱ nda̱ faraoo̱n nangi Ejiptoo̱ kijínijíngí, kó katsꞌéntsi̱ꞌe̱ na̱xi̱ńdáꞌniú Ngésee̱r, kó ítí, ko̱jo katsꞌénkꞌién xota̱ Kanaa̱n xi kisꞌińdo kui na̱xi̱ńdáꞌniuú, kó tsa̱kji̱ín nda̱ ree̱, kui xi chjo̱ón Salomoo̱ kamá katsjaá kui na̱xi̱ńdáꞌniuú. 17Salomoo̱ iskjininkꞌa nginí na̱xi̱ńdáꞌniú Ngésee̱r, ko̱jo na̱xi̱ńdáꞌniú Bee̱t-Oroo̱n xi tikón xtji̱e̱e̱n na̱ngi, 18ko̱jo na̱xi̱ńdáꞌniú Baalaa̱t, ko̱jo na̱xi̱ńdáꞌniú Tandmoo̱r xi síndo ki̱a̱ nangi kixií, 19ko̱jo ngayeje na̱xi̱ńdáꞌniú nínga jaꞌátjó nichinie Salomoo̱, ko̱jo na̱xi̱ńdáꞌniú nínga kisꞌińdo karro̱ kjo̱a̱xcha̱án, ko̱jo na̱xi̱ńdáꞌniú nínga kisꞌińdo já ndi̱je̱e̱, ko̱jo ngayeje ni xi kamámejeén katsꞌénda Salomoo̱ ki̱a̱ na̱xi̱ńdáꞌniú Jerusale̱n, ko̱jo nangi Líbano̱, ko̱jo ngayeje nangi xi atíxoma.
20Ngayeje xota̱ na̱xi̱ńdá xí kisꞌińdo ngase xi tsi̱ꞌe̱ xota̱ Amoo̱r kamá, ko̱jo xota̱ Ee̱t, ko̱jo xota̱ Feree̱, ko̱jo xota̱ Ee̱b, ko̱jo xota̱ Jebuu̱, kui xi ki̱a̱jín chji̱a̱ni xota̱ Israee̱l, 21ndií kui xi kisꞌińdo ngase kui tꞌanangii̱ ngije kꞌien kui jaá, kui xi kamájiín katsꞌénkjié xota̱ Israee̱l, Salomoo̱ katsꞌeén kjo̱a̱ꞌniú nga katsꞌénxá ngaskande ngotꞌe̱. 22Ta̱nga nde ngojín xota̱ Israee̱l xi katsꞌeén kjo̱a̱ꞌniú nga katsꞌénxá, ngatꞌa̱ kui jaá, jájún kamá, ko̱jo moso̱, ko̱jo xtitjón, ko̱jo ngito̱ko̱o̱ jájún, ko̱jo ngito̱ko̱ xi ꞌbítso̱majo̱ karroo̱, ko̱jo jájún ndi̱je̱. 23Ún úchán ichítié jáxíꞌín xi Salomoo̱ katsjáxaá nga ngito̱ko̱ kamá, kui xi askoo̱n xá xí katsꞌén xotaa̱.
24Kó tsa̱kji̱ín faraoo̱n jatjoni na̱xi̱ńdáꞌniú Ndabii̱, nga kijí ndiꞌa xi kiniꞌándaa̱, kósꞌe̱ Salomoo̱ katsꞌénda ngo ngi̱ndie nínga ma bitja.
25Kó Salomoo̱ ján ndi̱yà nga ngo nó katsꞌénkꞌasꞌien kjo̱a̱tjó xi ꞌbítí ko̱jo kjo̱a̱tjó tsi̱ꞌe̱ kjo̱a̱xioó, ki̱a̱ ṉchandikón xi katsꞌénda tsi̱ꞌe̱ Néná, kó ngije kamá Ndiꞌaa̱, ítí nisijee̱n ki̱a̱ ngindyi̱ko̱n Néná.
26Kó nda̱ re Salomoo̱ ti̱ katsꞌénda ngo xtín tjotso yiꞌi ki̱a̱ na̱xi̱ńdáꞌniú Esioo̱n-Ngébee̱r, kui xi tikón tiñaa̱ na̱xi̱ńdáꞌniú Eloo̱t nga̱ndee̱ Ndáchíkón Inií, ki̱a̱ nangii̱ Endoo̱n. 27Kó Iraa̱n katsangiyaa̱ ki̱a̱a̱ já mosoo̱ xi tsꞌenxá ngi̱jin ndáchíkoón xi be ndáchíkoón, tsi̱ꞌe̱ nga nijan sa̱ꞌínxájo̱ mosoo̱ Salomoo̱, 28kui xi kijí ki̱a̱ nangi Ofii̱r, kó ki̱a̱ iskjíbéní, tie nijón mi̱ kilo̱ to̱nsinié xi kijíjoo̱ nda̱ re Salomoo̱.
Currently Selected:
1 Já ree̱ 9: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
