1 Já ree̱ 8
8
Koxa̱a̱ kjo̱a̱ꞌbíndaa̱ Néná ikꞌíjñá ki̱a̱ na̱ngo̱xi̱i̱
(2Kr 5:2-14)
1Jaskan Salomoo̱ ítikó xota̱ xi xchaá na̱xi̱ńdá Israee̱l, ki̱a̱ na̱xi̱ńdáꞌniú Jerusale̱n, ko̱jo ngayeje ngito̱ko̱o̱ xota̱ tji̱e̱e̱, ko̱jo ngito̱ko̱o̱ xtín xota̱ xi chji̱a̱ni xota̱ Israee̱l, tsi̱ꞌe̱ nga kji̱ndi̱bájo̱ koxa̱a̱ kjo̱a̱ꞌbíndaa̱ Néná, ndeskande ki̱a̱ na̱xi̱ńdáꞌniú Sioo̱n, ngaskande na̱xi̱ńdáꞌniuú Ndabii̱. 2Kó ngayeje jáxíꞌín xi chji̱a̱ni Israee̱l, ki̱a̱ kamátikó ngindyi̱ko̱n nda̱ re Salomoo̱, sá xí ꞌmí Etanii̱n, kui xi sá xi ma yitoo̱, kjiꞌanga katsꞌén ngo sꞌué xí ꞌniú.
3Kó nga jachó ngayeje xota̱ xi xchaá na̱xi̱ńdá Israee̱l, já chináꞌmii̱ iskjininkꞌa koxa̱a̱ kjo̱a̱ꞌbíndaa̱ Néná. 4Kó kijíjo̱ koxa̱a̱ kjo̱a̱ꞌbíndaa̱ Néná, ko̱jo ndiꞌańjño nínga matikó xotaa̱, ko̱jo ngayeje ni ndikoón Néná xí síndo ki̱a̱ ndiꞌandikoón, já chináꞌmii̱, ko̱jo já lebitaa̱ tsaꞌanijín.
5Kó nda̱ re Salomoo̱, ko̱jo ngayeje xota̱ na̱xi̱ńdá xí chji̱a̱ni Israee̱l kamátikó ki̱a̱ kje̱n nínga tikón koxa̱a̱ kjo̱a̱ꞌbíndaa̱ Néná, kó katsꞌénkꞌién cho̱tsa̱nga̱, ko̱jo cho̱yojo xi bokján tꞌanangi, nga katsꞌénkꞌasꞌien, kui cho̱o̱ nde jmíjín xi kamaá tsaꞌa xki̱, ngatꞌa̱ achichí kamá.
6Kósꞌe̱ já chináꞌmii̱ íjñá kui koxa̱a̱ kjo̱a̱ꞌbíndaa̱ Néná ngi̱ndiee̱, ki̱a̱ ngi̱ya ndiꞌandikoón Néná, ki̱a̱ ngi̱ndie nínga ꞌniú ndikoón, ngindie nga̱a̱ keruu̱b. 7Ngatꞌa̱ kui keruu̱b yejéntie nga̱a̱ ki̱a̱ nga̱soón kui koxa̱a̱, kó bo̱a̱ tsꞌén nga kui keruu̱b yíꞌmáni kui koxa̱a̱ ko̱jo yá xí foxtikjaá ki̱a̱ nkꞌaa̱. 8Ndojó kamá kui yaá, kó ndeskande ki̱a̱ ngi̱ndie ndikoón kamáyàni, kui xi tikón kje̱n ngi̱yaa̱ kui ngi̱ndie xi ꞌniú ndikoón, ta̱nga kamáyàjín xtji̱e̱e̱n ndi̱tsee̱n, kó bo̱a̱ tsꞌén síndo ngaskande ngotꞌe̱.
9Ngi̱yaa̱ kui koxa̱a̱ jmí ni kisꞌiejín ngase, ta̱kuítsí nga jó tie ndi̱jo̱ xi íyá Moisee̱ ki̱a̱ na̱xi̱ Oree̱b, nínga Néná katsꞌénjo̱ ngo kjo̱a̱ꞌbínda kui ko̱jo xota̱ Israee̱l, kjiꞌanga jatjoni nangi Ejipto̱.
Néná kisꞌijña Ndiꞌaa̱
(2Kr 6:1-2)
10Kó ngije jatjoxie chináꞌmii̱ ki̱a̱ ndiꞌandikoón, ngo ṉdi̱i̱ kisꞌikitsieni Ndiꞌaa̱ Néná. 11Kó já chináꞌmii̱ ngiti̱ kamájín kisꞌińdo nga katsꞌén xaá ta̱ngatꞌanii̱ kui ṉdi̱i̱, ngatꞌa̱ kjo̱a̱jee̱ Néná kisꞌikitsieni ki̱a̱ ndiꞌandikoón Néná.
12Kósꞌe̱ Salomoo̱ bi̱ katsó:
Ji Ne, jí boá xi je bi̱ kase ji, nga kui ki̱a̱ ku̱i̱ndyin ji ngi̱jii̱n nínga ꞌniú jñoó.
13Achichí tsja kisꞌiena an nga katsꞌendaa kui Ndiꞌaa̱, nínga ku̱i̱ndyin ji,
ngo ngi̱ndie xi nda tikón, nínga ku̱i̱ndyin ji ngatsjéni̱xtjin.
Salomoo̱ tsíchji̱a̱jo xota̱ na̱xi̱ńdaá
(2Kr 6:3-11)
14Kó nda̱ ree̱ katsꞌénkꞌafóyá kje̱n, kó katsꞌénchikonñé ngayeje xota̱ na̱xi̱ńdá Israee̱l, tji̱e̱nga ngayeje xota̱ na̱xi̱ńdá Israee̱l kixindyia kixi̱. 15Kó bi̱ katsó:
¡Ngatamachikonñé Néná, kui xi Nee̱ xota̱ Israee̱l! Kui xi katsꞌénkjatjosón ni xi tsíchji̱a̱jo Ndabi̱ na̱ꞌmina, nga bi̱ katsoó: 16Ndeskande koó ni̱xtjin nga tsꞌaxié an nangi Ejipto̱ xota̱ na̱xi̱ńdána, nde ngojín na̱xi̱ńdáꞌniú xi je jaꞌajin an ngi̱jii̱n ngayeje na̱xi̱ńdáꞌniuú xota̱ tji̱e̱e̱ xota̱ Israee̱l, tsi̱ꞌe̱ nga si̱ꞌanda ngo ndiꞌa nínga kꞌuijñá jaꞌénna, ta̱nga án boá xi jaꞌajin an Ndabii̱ tsi̱ꞌe̱ nga kui kꞌuijñátjoón xota̱ na̱xi̱ńdána.
17Kó bi̱ katsó ngase Salomoo̱: Ndabi̱ na̱ꞌmina kamámejeén ngi̱jin ini̱ma̱a̱ nga sa̱ꞌínda ngo Ndiꞌa xi tsi̱ꞌe̱ Néná, kui xi Nee̱ xota̱ Israee̱l. 18Ta̱nga Néná, bi̱ katsoó Ndabi̱ na̱ꞌmina: Ta̱ngatꞌanii̱ nga ngi̱jii̱n ini̱màa̱ kamámejeén nga si̱ꞌinde ji ngo ndiꞌa nínga kꞌuijñá Jaꞌénna, ndakjíꞌí ni xi ikꞌíjin ji ini̱màa̱. 19Ta̱nga jmí tsi ji xi si̱ꞌinde ji kui Ndiꞌaa̱, kuí boá xi sa̱ꞌínda ngo ndí xí kjo̱tjojinni tji̱e̱e̱, kó kuí boá xi sa̱ꞌínda ngo Ndiꞌa tsi̱ꞌe̱ Jaꞌénna.
20Kó Néná katsꞌénkjatjosón ni xi katsó, ngatꞌa̱ an je jaꞌájinna ngajoo̱ Ndabii̱, kui xi na̱ꞌmina, kó kꞌi̱e̱ tikòn an nga kotixomáa̱ na̱xi̱ńdá Israee̱l, xikó katsó Néná, kó jè katsꞌenda an ngo Ndiꞌa xi tsi̱ꞌe̱ Néná, kui xi Nee̱ xota̱ Israee̱l. 21Kó ki̱a̱ je íjñanda an ngo ngi̱ndie nínga kꞌuijñá koxa̱a̱ kjo̱a̱ꞌbíndaa̱ Néná, kui kjo̱a̱ꞌbínda xi Néná índajo̱ xota̱ tji̱e̱ xcháná kjiꞌanga tsꞌaxiéni nangi Ejipto̱.
Salomoo̱ tsíchji̱a̱tjé Ndiꞌaa̱ Néná
(2Kr 6:12-42)
22Kósꞌe̱ Salomoo̱ ki̱a̱ kisꞌijña kje̱n nínga tikón ṉchandikoón Néná, ngindyi̱ko̱n ngayeje xota̱ na̱xi̱ńdá Israee̱l, kó yejéntie tsja xtji̱e̱e̱n nkꞌa jàn, 23kó bi̱ katsó:
—¡Ji Ndi̱a̱a̱, ji xi Nee̱ xota̱ Israee̱l! Jmíjín ingo Ne xi xikoó ji, ti̱nde nkꞌaa̱ nkꞌajmii̱, ti̱nde ngindie tꞌanangii̱. Jí boá xi niꞌínkjatjosén ji kjo̱a̱ꞌbíndaa̱ ko̱jo tjiín kjo̱a̱ni̱ma̱takón kjo̱a̱a̱ mosòo̱, kui xi ngayeje ini̱ma̱a̱ nga ji ndyi̱fítji̱ngii̱.
24Jí boá xi je kiniꞌínkjatjosée̱n mosòo̱ Ndabi̱ na̱ꞌmina, ndso̱ꞌbe má boá xi tsíchji̱a̱, kó ndse̱ má boá xi katsꞌénkjatjosón, xikó kjima kui ni̱xtjin xi̱ꞌbi̱. 25Ngotꞌe̱ ꞌne̱, ji Ndi̱a̱, ji xi Nee̱ xota̱ Israee̱l ji, ti̱ꞌinkjatjosée̱n ni xi kaseyetjée̱n mosòo̱ Ndabii̱, kui xi na̱ꞌmina, nga bi̱ kasée̱: Ngatsjéni̱xtjin nga kꞌuieé ndí xíꞌín xi ko̱tíxoma ngindyikón án, kui xi ko̱tíxomaa̱ na̱xi̱ńdá Israee̱l, ta̱nga tsi ndíi̱ kꞌuimá ndi̱yàna, kó nga ki̱a̱ ko̱e̱je̱ ngindyikón án xikótsꞌèn tińtje̱ ji. 26Kó ngotꞌe̱ ꞌne̱, ji Ne, ji xi Nee̱ xota̱ Israee̱l, ꞌniú míꞌaá nga ti̱ꞌinkjatjosén ji ni xi kasée̱ mosòo̱ Ndabii̱, kui xi na̱ꞌmina.
27Ndatsi nga ja̱koxi̱, Néná a kꞌi̱e̱ kꞌuijñá kui tꞌanangii̱. Ngatꞌa̱ ti̱nde ndiꞌakꞌajmii̱, ko̱jo ndiꞌakꞌajmi xi tjiín, ka̱májiín ku̱i̱ꞌíjñáꞌniuú jí, akja̱ꞌmíra̱ kui Ndiꞌa xi katsꞌenda an. 28Ta̱nga ji Ne, ji Ne xi tsa̱ꞌa̱n, jí boá xi ko̱nda̱ꞌyée̱ nga ku̱i̱chji̱a̱a̱ ko̱jo nga ni̱ma̱ ka̱tso̱ kui mosòo̱, ko̱jo nga tsꞌénchji̱a̱ ngotꞌe̱ kui mosòo̱ ngindyikin ji, 29tsi̱ꞌe̱ nga ni̱xtjin ko̱jo nga ni̱xtji̱e̱n chjáxꞌé ji ndyikin xtji̱e̱e̱n kui Ndiꞌaa̱, ki̱a̱ kui ngi̱ndie xi je bo̱a̱ kase ji: Ki̱a̱ boá nínga kꞌuijñá Jaꞌénna, tsi̱ꞌe̱ nga ko̱nda̱ꞌyé ji nga ku̱i̱chji̱a̱ kui mosòo̱ xtji̱e̱e̱n kui ngi̱ndiee̱. 30Kó jí ko̱nda̱ꞌyée̱ nga ku̱i̱chji̱a̱ kui xi mosòo̱ ko̱jo xota̱ na̱xi̱ńdáa̱ Israee̱l, kjiꞌanga ku̱i̱chji̱a̱a̱ ji xtji̱e̱e̱n kui ngi̱ndiee̱. Jo̱o̱n, ndaꞌyé ji ndeskande ki̱a̱ ngi̱ndie nínga tindyin ji, ki̱a̱ ndiꞌakꞌajmii̱, kó ngije kandaꞌyé ji, ti̱ꞌinjetakíi̱n jeé.
31Kjiꞌanga ngo nda̱ sa̱ꞌínjé kondraa̱ kje̱ꞌe nda̱, kó tsi tsja̱a tsꞌoa nga sa̱ꞌínkjatjosón ngo ni, kó tsi ki̱a̱ kꞌo̱sꞌien kui Ndiꞌaa̱, tsi̱ꞌe̱ nga ki̱a̱ tsja̱a tsꞌoa nga sa̱ꞌínkjatjosón ki̱a̱ kje̱n ṉchaa̱n, 32ndaꞌyée̱ ji ndeskande ki̱a̱ ndiꞌakꞌajmii̱, kó kixi̱ ti̱ꞌinsèe̱n mosòo̱ tsi̱ꞌe̱ nga si̱ꞌinjée̱ kui xota̱ xi ndajín katsꞌeén, kó nga kixi̱ si̱ꞌinje̱ ji xota̱ xi kixi̱i̱, xikó kjiꞌi kjo̱a̱kixi̱ xi tjiín jí.
33Kjiꞌanga xota̱ na̱xi̱ńdáa̱ Israee̱l si̱ꞌanchaja ngindyi̱ko̱n kondra̱a̱, ta̱ngatꞌanii̱ nga katsꞌénjé kondra̱ tse̱, tsi sa̱ꞌínkꞌoyà yojoo̱, kó tsi sa̱ꞌínkie yojoo̱ kjo̱a̱a̱ Jaꞌée̱n, kó tsi ku̱i̱chji̱a̱a̱, ko̱jo tsi ꞌniú ni̱ma̱ ka̱tso̱ nga ku̱i̱chji̱a̱a̱ kꞌi̱e̱ kui ndiꞌaa̱, 34kósꞌe̱ ji ko̱nda̱ꞌyée̱ ndeskande ki̱a̱ ndiꞌakꞌajmii̱, kó ti̱ꞌinjetakíi̱n jeé xota̱ na̱xi̱ńdáa̱ Israee̱l, kó ti̱ꞌinkjíndibeꞌóyé nginí ji kꞌi̱e̱ kui tꞌanangi xi katseꞌée̱ xota̱ xi xchaá.
35Kó kjiꞌanga si̱chjá ndiꞌakꞌajmii̱, kjiꞌanga ngiti̱ jmí stsé ko̱a̱ꞌájín, ngatꞌa̱ nga kui xotaa̱ je katsꞌénjé kondra̱ tse̱, kó tsi ku̱i̱chji̱a̱a̱ ji kui ngi̱ndiee̱, kó tsi sa̱ꞌínkie yojoo̱ kjo̱a̱a̱ Jaꞌée̱n, kó tsi ngiti̱ sa̱ꞌínjéjín kjo̱a̱a̱ kui jé xí kiniꞌínkjeꞌeni ji kjo̱a̱ni̱ma̱, 36ja̱ ndaꞌyée̱ ji ndeskande ki̱a̱ ndiꞌakꞌajmii̱, kó ti̱ꞌinjetakíi̱n jeé mosòo̱, ko̱jo xota̱ na̱xi̱ńdáa̱ Israee̱l. Jo̱o̱n, kó ko̱ko̱yée̱ ndi̱yà xí nda nínga chjiéngá ko̱e̱je̱, kó te̱ꞌée̱ stsé ki̱a̱ tꞌanangi xi katseꞌée̱ xota̱ na̱xi̱ńdáa̱ nga tsi̱ꞌe̱ ka̱ma.
37Kjiꞌanga kꞌuié kjindiá kuí tꞌanangii̱, ko̱jo tsi chiꞌin kꞌuié, ko̱jo tsi ni xi ndajín tsꞌeén kꞌuié, ko̱jo tsi xi̱ xka̱ xi tjiín, ko̱jo tsi chjo̱bo̱a̱ kꞌuié, ko̱jo tsi kꞌuieé chi̱ndo, ko̱jo tsi kjiꞌanga kondra̱a̱ ku̱i̱ꞌíchjáꞌyá nga̱ntjo̱a̱a̱ na̱xi̱ńdaá, ko̱jo tsi ta̱jñà chiꞌinní, ko̱jo tsi ni xi ndajín tsꞌeén, 38ngayeje kjo̱a̱ndokjo̱a̱a̱, ko̱jo ngayeje ni xi ni̱ma̱ ka̱tso̱ nga ku̱i̱chji̱a̱ ta̱ꞌya xota̱ní, ko̱jo tsi ngayeje xota̱ na̱xi̱ńdáa̱ Israee̱l, kjiꞌanga sa̱ꞌínkie yojoo̱ nga ngo ni xi ndajín xi tikónjin ini̱ma̱a̱, kó tsi skjinínkꞌá tsja xtji̱e̱e̱n kui Ndiꞌaa̱, 39kósꞌe̱ ndeskande ndiꞌakꞌajmii̱ ndaꞌyée̱ ji, ki̱a̱ ngi̱ndie nínga tindyin ji, kó ti̱ꞌinjetakíi̱n, kó te̱ꞌée̱ ni xi tsoboaá nga ngo nga ngo xotaa̱ xikó kjiꞌi ndi̱yà xí kijí, ngatꞌa̱ ji jè yé ji ini̱ma̱a̱, ngatꞌa̱ ta̱ jí bo̱a̱ xi ye ji kókón ini̱ma̱a̱ ngayeje xota̱ nga̱sondiee̱, 40tsi̱ꞌe̱ nga sku̱i̱e̱ndikoón ji ngayeje ni̱xtjin nga kꞌuíndo nga̱són tꞌanangi xi katseꞌée̱ xota̱ tji̱e̱ xcháná.
41Ti̱ bo̱a̱ ti̱ tsꞌén kjiꞌanga xota̱ xi xín nangi chji̱a̱nii̱, kui xi ki̱a̱jín chji̱a̱ni xota̱ na̱xi̱ńdáa̱ Israee̱l, tsi ta̱ngatꞌanii̱ jaꞌée̱n nga kji̱ndi̱báni nangi xi kjin, 42ngatꞌa̱ ku̱i̱ntꞌiè kjo̱a̱a̱ nga Jaꞌée̱n tjiín kjo̱a̱jee̱, ko̱jo kjo̱a̱a̱ ngaꞌniúu̱, ko̱jo ngaꞌniú xi tjiín ji, kó tsi kji̱ndi̱bá nga ku̱i̱chji̱a̱a̱ ji kꞌi̱e̱ kui ndiꞌaa̱, 43ja̱ ndaꞌyée̱ ji ndeskande ki̱a̱ ndiꞌakꞌajmii̱, ki̱a̱ ngi̱ndie nínga tindyin ji, kó te̱ꞌée̱ ngayeje ni xi ku̱i̱ꞌaa̱ kui xota̱ xi xín nangi chji̱a̱nii̱, tsi̱ꞌe̱ nga sku̱i̱e̱ndikoón xikoó ngayeje xota̱ na̱xi̱ńdáa̱ Israee̱l, kó ngatamakjiín nga kui Ndiꞌa xi katsꞌenda an, Jaꞌée̱n boá xi ndokjo̱a̱ kꞌi̱e̱e̱.
44Kjiꞌanga xota̱ na̱xi̱ńdáa̱ ko̱e̱je̱kjánjo̱ kondra̱a̱, ta̱jñà ndi̱yàní nínga ko̱na̱ngíyé ji, kó tsi ku̱i̱chji̱a̱a̱ ji nga ko̱e̱je̱ xtji̱e̱e̱n ngi̱ndie xi ji kachjeꞌéjin ji, ko̱jo xtji̱e̱e̱n nínga tikón kui Ndiꞌa xi je katsꞌenda an tsi̱ꞌe̱ Jaꞌée̱n, 45ja̱ ko̱nda̱ꞌyé ji ndeskande ki̱a̱ ndiꞌakꞌajmii̱ nga ku̱i̱chji̱a̱a̱ ko̱jo nga ni̱ma̱ ka̱tso̱o̱, kó tasíke̱je ji kjo̱a̱a̱.
46Kjiꞌanga tjín xí sa̱ꞌínjé kondra̱ tse̱, ngatꞌa̱ jmíjín xota̱ xi tsꞌénjéjín, kó tsi kiniꞌínxchínje̱ ji nga si̱ꞌinkꞌasꞌíi̱n kondra̱a̱, tsi̱ꞌe̱ nga ko̱e̱je̱jo ꞌniú ki̱a̱ nangii̱ kondra̱a̱, tsi kjin, ko̱jo tsi tiña, 47kó tsi ki̱a̱ nangi nínga tsangínjo̱ꞌniú kꞌuijñámasien ni xi ndajínkjiꞌi xi katsꞌén, kó tsi sa̱ꞌínkꞌoyà yojoo̱ ki̱a̱ nangi nínga síndoꞌniú, kó tsi ki̱a̱ ku̱i̱chji̱a̱a̱ nga ni̱ma̱ ka̱tso̱, nga bi̱ ka̱tso̱: Kiniꞌánjéjne̱, ndajínkjiꞌi ni xi kiniꞌánjne̱, ni xi tsjiejín xí kiniꞌánjne̱. 48Kó tsi ki̱a̱ nangi nínga síndo kondra̱a̱ ki̱a̱ ngi̱ndie nínga síndoꞌniuú, ngayejeni ini̱ma̱a̱ ko̱jo ngayeje kjo̱a̱mindyioo̱n nga sa̱ꞌínkꞌoyà yojoo̱, kó tsi ku̱i̱chji̱a̱a̱ ji ki̱a̱ xtji̱e̱e̱n tꞌanangi xi katseꞌée̱ xota̱ xi xchaá, xtji̱e̱e̱n kui na̱xi̱ńdáꞌniú xi ji kachjeꞌéjin ji, ko̱jo xtji̱e̱e̱n kui ndiꞌa xi katsꞌenda an tsi̱ꞌe̱ -jaꞌée̱n, 49ja̱ ndaꞌyée̱ nga ku̱i̱chji̱a̱a̱ ko̱jo nga ni̱ma̱ ka̱tso̱, ndeskande ki̱a̱ ndiꞌakꞌajmii̱, ki̱a̱ ngi̱ndie nínga tindyin ji, ꞌnaxiéꞌé ji kjo̱a̱ xi tsi̱ꞌe̱, 50kó ti̱ꞌinjetakíi̱n xota̱ na̱xi̱ńdáa̱ xi katsꞌénjé kondra̱ tse̱, ko̱jo ngayeje ni xi ndajínkjiꞌi xi katsꞌén kondra̱ tse̱, kó ngatꞌieé kjo̱a̱ni̱ma̱takón tsi̱ꞌe̱ nga sku̱i̱e̱ xota̱ xi kijíjo̱ꞌniú, tsi̱ꞌe̱ nga ni̱ma̱ ka̱maa̱, 51ngatꞌa̱ kuí boá xi xota̱ na̱xi̱ńdáa̱, ko̱jo nga tse̱ boá kui xotaa̱, kui xi kaꞌnaxiéni ji ki̱a̱ nangi Ejiptoo̱, ki̱a̱ ngi̱jii̱n ngo orjno̱ xi ki̱cha̱.
52Nda má tsitsíjìi̱n nga ni̱ma̱ ka̱tso̱ mosòo̱ nga ku̱i̱chji̱a̱a̱ ji, ko̱jo nga ku̱i̱chji̱a̱a̱ xota̱ na̱xi̱ńdáa̱ Israee̱l, tsi̱ꞌe̱ nga ko̱nda̱ꞌyé ji ngayeje ni xi ku̱i̱chji̱a̱a̱ ji, 53ngatꞌa̱ jí boá xi ikꞌíjñítꞌaxín ji, tsi̱ꞌe̱ nga kui xi tse̱ ka̱ma, ngi̱jii̱n ngayeje xota̱ na̱xi̱ńdá xí tjín tꞌanangii̱, xikó má tsꞌen kandokjo̱e̱ ji nga kiniꞌínkjìn jí Moisee̱, kui xi mosòo̱ kamá, kjiꞌanga kaꞌnaxié ji xota̱ tji̱e̱ xcháná ki̱a̱ nangi Ejipto̱, ji Ndi̱a̱, ji xi Néná.
Salomoo̱ tsíchji̱a̱tjé xota̱ na̱xi̱ńdaá
54Kó ngije kamaá Salomoo̱ nga tsíchji̱a̱a̱ Néná ko̱jo nga ni̱ma̱ katsoó, jastjíe̱n ngije asiéntikoó, kó iskjininkꞌa tsja xtji̱e̱e̱n nkꞌa jàn, ki̱a̱ kje̱n nínga tikón ṉchandikoón Néná, 55kó ngije kasasienkixi̱, ꞌniú tsíchji̱a̱ nga katsꞌénchikonñé ngayeje xota̱ na̱xi̱ńdá Israee̱l xi kamátikó, nga bi̱ katsó:
56Ngatamachikonñé Néná, kui xi je katsjaá kjo̱a̱xió xota̱ na̱xi̱ńdá xí chji̱a̱ni Israee̱l, xikó má katsoó nga sa̱ꞌín, katsꞌénkjatjosón ngayeje én nda xi tsíchji̱a̱ nga tsíchji̱a̱jo Moisee̱, nda̱ mosoo̱.
57Kó xikótsꞌèn kisꞌijñajo̱ xota̱ tji̱e̱ xcháná, ti̱ bo̱a̱ ti̱ tsꞌén Néná ki̱a̱ ngatꞌíjñajo̱ná nga, kó ngata̱ ꞌbijñámasiénjínná, 58kó nga Néná ngatsꞌén nga ini̱ma̱ná ki̱a̱ ku̱i̱chji̱a̱ni kui, tsi̱ꞌe̱ nga ki̱a̱ ku̱i̱ṉtsomá ndi̱yà xí tsi̱ꞌe̱, ko̱jo tsi̱ꞌe̱ nga si̱ꞌankjatjosón kjo̱a̱botíxomaa̱, ko̱jo kjo̱a̱kitii̱, ko̱jo ni xi atíxoma, kui ni xi katsangiyaa̱ xota̱ tji̱e̱ xcháná. 59Kó nga kui eén, kui xi tsꞌénchji̱a̱ an nga ni̱ma̱ tꞌíxiáa̱n Néná nga tsꞌénchji̱a̱a̱ ngindyi̱ko̱n kui, nga ki̱a̱ ngatꞌíjñatꞌaa̱ Néná nga ni̱xtjin ko̱jo nga ni̱xtji̱e̱n, tsi̱ꞌe̱ nga kui ko̱síko̱jo ni xi tsꞌénchji̱a̱ kui mosoo̱, ko̱jo xota̱ na̱xi̱ńdá Israee̱l, ta̱ xikó tsꞌén ka̱machjiénrií xki̱ ni̱xtjin, 60tsi̱ꞌe̱ nga ngayeje xota̱ na̱xi̱ńdá xí tjín nga̱sondiee̱ sku̱i̱e̱ nga Ndi̱a̱ná boá xi Néná, kó jmíjín kje̱ꞌe ngase.
61Ja̱ bo̱a̱ tsꞌén kixi̱ ngatama ini̱ma̱jnú kjo̱a̱a̱ Néná, tsi̱ꞌe̱ nga si̱ꞌankjatjosónjnú kjo̱a̱kitii̱, ko̱jo nga si̱ꞌankjatjosónjnú kjo̱a̱botíxomaa̱, xikó ndyi̱niꞌánjnú ngotꞌe̱.
Salomoo̱ katsꞌénkꞌasꞌien Ndiꞌaa̱ Néná
(2Kr 7:4-10)
62Kósꞌe̱ nda̱ ree̱ ko̱jo ngayeje xota̱ Israee̱l, katsꞌénkꞌasꞌien kjo̱a̱tjó ngindyi̱ko̱n Néná. 63Kó Salomoo̱ katsꞌénkꞌasꞌiee̱n kjo̱a̱tjó kjo̱a̱a̱ kjo̱a̱xioó Néná, kó kui nii̱ xi katsꞌénkꞌasꞌien: Kan jó mi̱ cho̱yojo xi bokján tꞌanangi, ko̱jo úchán ko̱jo kan mi̱ cho̱tsa̱nga̱.
Kó bo̱a̱ tsꞌén nga nda̱ ree̱, ko̱jo ngayeje xota̱ Israee̱l katsꞌénkꞌasꞌiee̱n Néná Ndiꞌaa̱. 64Ti̱kuii ni̱xtjin, nda̱ ree̱ katsꞌéntsjie ngamasiee̱n ndi̱tsen xi tikón kje̱n Ndiꞌaa̱ Néná, ngatꞌa̱ ki̱a̱ boá nínga katsꞌénkꞌasꞌien cho̱ xi ꞌbítií, ko̱jo kjo̱a̱tjó xi ni maxchaá, ko̱jo xinieé kjo̱a̱tjó tsi̱ꞌe̱ kjo̱a̱xioó, ngatꞌa̱ kui ṉchandikón xi tikón ngindyi̱ko̱n Néná xi ki̱cha̱ bronsee̱ chichí kamá, kó kisꞌiénjín ngayeje cho̱ xi ikꞌítií, ko̱jo kjo̱a̱tjó xi ni xi kamáxchaá, ko̱jo xinieé kjo̱a̱tjó xi ꞌbítí kjo̱a̱a̱ kjo̱a̱xioó.
65Kui ni̱xtjin jàn. Salomoo̱ ko̱jo ngayeje xota̱ Israee̱l kamátikó, kó achichí kjín kamá, kó jachó xota̱ xi kjindibáni ndeskande nangi Amaa̱t ngaskande xo̱ngàndántꞌié xi tikón nangi Ejipto̱, kó katsꞌén ngo sꞌué ꞌniú ki̱a̱ ngindyi̱ko̱n Néná, kó yito ni̱xtjin mára kamá, sꞌe̱ ngi yito ni̱xtjin ngase akjasoón, nga fetꞌani tienijón ni̱xtjin kamá kui sꞌueé. 66Kó xi ma jii̱n ni̱xtjin kiniꞌánkixotꞌa xota̱ na̱xi̱ńdaá, kó kui xotaa̱ katsꞌénchikonñé nda̱ ree̱, sꞌe̱ kijí nínga síndo ndiꞌaa̱, kó tsja kisꞌiee̱ ko̱jo tsja kamaá ini̱ma̱a̱ kjo̱a̱a̱ ngayeje ni nda xi Néná katsꞌénjo̱ Ndabii̱, nda̱ mosoo̱, ko̱jo xota̱ na̱xi̱ńdá Israee̱l.
Currently Selected:
1 Já ree̱ 8: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
