1 Já ree̱ 10
10
Kó na̱ ree̱ nangi Sabaa̱ kijíkoón Salomoo̱
(2Kr 9:1-12)
1Kó na̱ ree̱ nangi Sabaa̱ tsintꞌié kjo̱a̱a̱ nga ꞌniú kamáyàndikón Salomoo̱, ngatꞌa̱ kamábendikón jaꞌeén Néná, kó jachókoón tsi̱ꞌe̱ nga askotꞌayákón nda̱ ree̱ nga asíyaꞌa ni xi niꞌin. 2Kó jachó ki̱a̱ na̱xi̱ńdáꞌniú Jerusale̱n nga achichí kjín xota̱ yajátji̱ngii̱, ko̱jo jachójo̱ cho̱toꞌoyitsꞌe̱n xi ndyi̱yaꞌanijín nisije̱n, ko̱jo achichí to̱nsinié, ko̱jo ndi̱jo̱ tsjakon.
Kó nga jachókoón Salomoo̱, tsíchji̱a̱jo kjo̱a̱a̱ ngayeje ni xi tjíjin kon. 3Kó Salomoo̱ katsóyaà ngayeje ni xi asíyaá, kó nde niꞌínjín kamaá nda̱ ree̱ nga tsíchji̱a̱jo.
4Kó na̱ ree̱ nangi Sabaa̱ nga kamábe ngayeje kjo̱a̱kjínkoón Salomoo̱, ko̱jo kui ndo̱bo̱a̱xá xí katsꞌénda, 5ko̱jo nichinie xi kisꞌiee̱ nga̱són yámíxa̱a̱, ko̱jo ngi̱ndie nínga kisꞌińdo já mosoo̱, ko̱jo xikó kón ńjño xi tsajá já mosoo̱ ko̱jo xota̱ xi tjón kotꞌa ni xi ꞌbi nda̱ ree̱, ko̱jo kjo̱a̱tjó xi ꞌbítí xi katsꞌénkꞌasꞌien ki̱a̱ ndiꞌaa̱ Néná, achichí kijíndikoón. 6Kó na̱ ree̱ nangi Sabaa̱, bi̱ katsoó nda̱ re Salomoo̱:
Ja̱koxi̱ boá ni xi tsintꞌie an ki̱a̱ nangina kjo̱a̱a̱ ni xi kiniꞌín ji ko̱jo kjo̱a̱kjínkón xi tjiín, 7ta̱nga kisꞌijinjínna ngaskande nga jéꞌe̱ an, kó nga ndyikón án má xi kamábe, kó ngotꞌe̱ ꞌne̱ be an nga nde masien kui nii̱ kiꞌmíyàjínna, kjo̱a̱a̱ kjo̱a̱kjínkón ko̱jo kjo̱a̱yandikón xí tjiín jí, jaꞌatjónrií ni xi je tsintꞌie an. 8Achichíra̱ tsjaa̱ xota̱ xi̱ꞌin xí tjiín, achichíra̱ tsjaa̱ kui mosoo̱, kui xi ngatsjéni̱xtjin síndo ngindyikin ji, kó ntꞌié kjo̱a̱kjínkón xi tjiín. 9Nganiꞌántsjaà Néná xí tse̱, kui xi tsja kamaá nga katsjaá xá nga ji xi ko̱ti̱xomée̱ na̱xi̱ńdá Israee̱l, ta̱ngatꞌanii̱ nga Néná ngatsjéni̱xtjin nga tjoó xota̱ Israee̱l, kuíni nga katsjáxaá nga ji xi re ka̱ma ji, tsi̱ꞌe̱ nga ni xi kixi̱ ko̱jo ni xi tjiín kjo̱a̱kixi̱ si̱ꞌin ji.
10Kó kui na̱ ree̱ katsjaá nda̱ re Salomoo̱ ján mi̱ nijan úchán kilo̱ to̱nsinié, ko̱jo achichí kjín kilo̱ nisije̱n, ko̱jo ndi̱jo̱ tsjakon. Jmí ni̱xtjin jachóchiní ngasee̱ bo̱a̱ kjiꞌi nisije̱n xikoó xi katsjaá na̱ re xi chji̱a̱ni nangi Sabaa̱ nda̱ re Salomoo̱. 11Kó kui tjotso yiꞌi xi tsi̱ꞌe̱ Iraa̱n xi jachójo̱ to̱nsinié xi chji̱a̱ni nangi Ofii̱r, ti̱ jachójo̱ kjín yásándalo̱, ko̱jo ndi̱jo̱ tsjakon xi chji̱a̱ni nangi Ofii̱r nga. 12Kó kui yásándaloo̱, nda̱ ree̱ katsꞌéndani yásé tsi̱ꞌe̱ ndiꞌaa̱ Néná, ko̱jo ndiꞌaa̱ nda̱ ree̱, ko̱jo katsꞌéndani arpa̱, ko̱jo salterio̱ tsi̱ꞌe̱ já xí tsꞌénkjánieé. Kji̱e̱ ngo ndi̱yà fóchó bo̱a̱ kjiꞌi yásándalo̱ xikoó xi̱ꞌba̱, ti̱nde kji̱e̱ ngo ndi̱yà yà bo̱a̱ kjiꞌi yá, ngaskande ngotꞌe̱.
13Kó nda̱ re Salomoo̱ katsjaá na̱ re xi chji̱a̱ni nangi Sabaa̱ ngayeje ni xi kamámejeén, ko̱jo ngayeje ni xi tsíꞌaá, kó tsie ngase ni katsjaá Salomoo̱. Kósꞌe̱ kui naa̱ ko̱jo já mosoo̱ kijí nginí nangii̱.
Kjo̱a̱kjínkón ko̱jo kjo̱a̱cho̱n xi kisꞌiee̱ Salomoo̱
(2Kr 9:13-24)
14Kan jó mi̱ kilo̱ kamá to̱nsinié xi jachóchinií Salomoo̱ xki̱ nó, 15kje̱ꞌení ni xi jachójo̱ já xí botiñá nii̱, ko̱jo xi katsꞌénkꞌasꞌien xota̱ xi tjiín tindaa̱, ko̱jo ngayeje já ree̱ xi chji̱a̱ni nangi Arabia̱, ko̱jo xtitjón xi chji̱a̱ni na̱xi̱ńdaá.
16Kó nda̱ re Salomoo̱, ti̱ katsꞌénda jó úchán ni xi ꞌbíchjaá ni xi ndajín xi to̱nsinié akjajonni nga kiniꞌánda, kó nga ngo nga ngo kui ni xi ꞌbíchjaá ni xi ndajiín, jun kilo̱ to̱nsinié kijíjo̱. 17Kó ti̱ katsꞌénda ngi ján úchán ni xi ꞌbíchjaá ni xi ndajín xi to̱nsinié akjajonni, kó nga ngo nga ngo kui nii̱ ngo kilo̱ masien to̱nsinié kijíjo̱, kó nda̱ ree̱ ki̱a̱ índo ngi̱ya ndiꞌa xi tikón ki̱a̱ kꞌijñá Líbano̱.
18Kó nda̱ ree̱ ti̱ katsꞌénda ngo yáxíríe̱ nínga botíxoma xi je, xi ndi̱ja̱a̱ ki̱ña̱ kamáni, kó to̱nsinié xi kui soboá soboá yíjón. 19Jun ki̱jo̱n kisꞌijñaa̱ kui yáxíríee̱, kó nkꞌaa̱ ki̱a̱ nínga sitꞌa nga̱xtoo̱n, ngo to̱ko̱ ndií cho̱yojo akjatꞌaa̱, nga jó nga̱ndee̱ kui yáxíríee̱ ikꞌíndoo̱ nínga fosón ndsa̱, kó ki̱a̱ xtji̱e̱e̱n nínga fosón ndsa̱a̱ jó xandi̱je̱ ikꞌíndoo̱. 20Kó ti̱ tiejó xandi̱je̱ xi ndyi̱a̱kixi̱ kisꞌińdoo̱ ngindiee̱, nga ngo nga ngoo̱ nga jun kui ki̱jo̱o̱n, jmíni̱xtjin kamánda ngo ngi̱ndie nínga botixómá xikoó xi̱ꞌbi̱.
21Kó ngayeje ni xi boso̱ xi ꞌbiyá ndáfoaa̱ nda̱ re Salomoo̱ to̱nsinié xi kui soboá soboá kamándani, kó ngayeje ni xi kiniꞌánkjién ki̱a̱ ndiꞌa xi tikón ki̱a̱ kꞌijñá Líbano̱, to̱nsinié xi kui soboá soboá kamándani nga, nde kamáchjíjínnii̱ to̱ntiboaa̱, ngatꞌa̱ ni̱xtjin nga kisꞌijña Salomoo̱, nde chií kamáchjíjiín to̱ntiboaa̱, 22ngatꞌa̱ nda̱ ree̱ achichí kjín tjotso yiꞌi xi chji̱a̱ni nangi Tarsii̱ kisꞌiee̱ ki̱a̱ ndáchíkoón, ko̱jo tjotso yiꞌi xi chji̱a̱ni nda̱ xi ꞌmí Iraa̱n, kó ngo ndi̱yà nga xki̱ ján nó jachó kui tjotso yiꞌii̱ xi kjindibáni nangi Tarsii̱, kó jachójo̱ to̱nsinié, ko̱jo to̱ntiboa, ko̱jo ndi̱ja̱a̱ ki̱ña̱, ko̱jo koni, ko̱jo cho̱ ngándá.
23Kó bo̱a̱ tsꞌén nga nda̱ re Salomoo̱ tsie kjo̱a̱cho̱n ko̱jo kjo̱a̱kjínkón kisꞌiee̱, ta̱bo̱a̱jiín ngayeje já re xi tjín kuí tꞌanangii̱. 24Kó ngayeje xota̱ xi tjín nga̱sondiee̱ xi kamámejeén jachókoón Salomoo̱, tsi̱ꞌe̱ nga tsintꞌieé kjo̱a̱kjínkón xi Néná íjñá ngi̱jin ini̱ma̱a̱. 25Kó ngayeje kui xotaa̱, xki̱ nó xki̱ nó jachójoo̱ ni nda̱ ree̱ xikoó: Ni xi to̱ntiboa, ko̱jo ni to̱nsinié, ko̱jo ńjño, ko̱jo ni xi niꞌánkjién nga bixkán, ko̱jo ndásíje̱n, ko̱jo ndi̱je̱, ko̱jo ndi̱je̱tajá.
Salomoo̱ atíñá ko̱jo tsꞌatsie ndi̱je̱ ko̱jo karro̱
(2Kr 1:14-17; 9:25-28)
26Kó Salomoo̱ ítikó karroo̱ kjo̱a̱xchán, ko̱jo xota̱ xi ꞌbíndosoón ndi̱je̱, kó ngo mi̱ nijón úchán kamá karroo̱, ko̱jo tiejó mi̱ kamá já xí ꞌbítso̱mayisee̱, kui xi índo ki̱a̱ na̱xi̱ńdáꞌniú nínga síndo karroo̱, ko̱jo ki̱a̱ na̱xi̱ńdáꞌniú Jerusalee̱n, tiña nínga tikón nda̱ ree̱. 27Kó nda̱ ree̱ katsꞌén nga ki̱a̱ na̱xi̱ńdáꞌniú Jerusalee̱n to̱ntiboaa̱ kamá xikó maá ndi̱jo̱o̱, kó yákoón achichí kamá xikó maá yásikómoro̱ xi chji̱a̱ni nangi Sefela̱. 28Ndi̱je̱e̱ nda̱ re Salomoo̱, nangi Ejipto̱ kjindibáni ko̱jo nangi Koa̱, ngatꞌa̱ xtín xota̱ xi botiñá nii̱ xi tsi̱ꞌe̱ nda̱ ree̱, ki̱a̱ tsꞌatsie nga íchjí kjiꞌá má ki̱a̱ nangi Koa̱. 29Kó nga ngo nga ngo karro̱ xi tsꞌasꞌien ki̱a̱ nangi Ejiptoo̱, jun úchán to̱ntiboa kamáchjií, kó nga ngo nga ngo ndi̱je̱e̱ úchán ichítié kamáchjií.
Kó bo̱a̱ tsꞌén nga ngayeje já ree̱ nangi ititaa̱, ko̱jo nangi Siria̱ tsꞌatsie kui nii̱ nga.
Currently Selected:
1 Já ree̱ 10: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
