1 Já ree̱ 7
7
Kje̱ꞌe ngase ndiꞌa xi katsꞌénda Salomoo̱
1Jaskan Salomoo̱ tie ján nó kamaá nga katsꞌénda ndiꞌa xi tsi̱ꞌe̱, kó kamándo̱jo̱ó ngayeje ndiꞌaa̱.
2Ti̱ katsꞌénda ngo ndiꞌa ki̱a̱ kꞌijñá xí tikón nangi Líbanoo̱ nga, kó yichán ún metro̱ nga ndojó, ko̱jo kan jó metro̱ nga tiyá, ko̱jo tie nijón metro̱ nga nkꞌa kamá, kó kui ndiꞌaa̱, nga̱soón nijón yásé ko̱jo yándojó xi yákón kisꞌijña. 3Kó yátiee̱ yákón akjajonni yándojó xi kisꞌińdosón nga yichán ún yásé xi kisꞌińdoo̱ kui nga̱ndee̱, nga ngo nga ngo kui ndi̱ya̱à tjiꞌún yásé kisꞌiee̱.
4Kó ján ndi̱yà nga̱ntjo̱a̱masienkjá kisꞌińdoo̱, ngo nga̱ntjo̱a̱masienkjá kisꞌijña xtji̱e̱e̱n kje̱n nínga kisꞌijña xi ingoo̱, xki̱ ján ján kisꞌińdo. 5Ngayeje nga̱ntjo̱a̱a̱ ko̱jo nga̱ntjo̱a̱masienkjaá kisꞌińdoo̱ nga̱nde xi ngo ndse̱je̱n kamá nga tiyaá ko̱jo nga ndojó, kó ngo nga̱ntjo̱a̱masienkjá kisꞌijña xtji̱e̱e̱n kje̱n nínga kisꞌijña xi ingoo̱, xki̱ ján ján.
6Ti̱ katsꞌénda ngo koredó xi índoo̱ yásé, xi kan jó metro̱ nga ndojó, kó tienijón metro̱ nga tiyá kamá, kó kje̱n kui koredoó kisꞌiee̱ yásé xi yá akjajonni nga.
7Kó ti̱ katsꞌénda ngo koredó nínga tikón ngi̱ndie nínga botíxomaa̱, ki̱a̱ nínga niꞌánjeé xotaa̱, kó kui nga̱ntjo̱a̱ nínga niꞌándajin kjo̱a̱a̱, yákón yíjón ndeskande ngindiee̱ ngaskande yándojoó.
8Kó ki̱a̱ ndiꞌa nínga kisꞌijña kui, kisꞌijñaa̱ ngo ndi̱tsen xtji̱e̱e̱n ngi̱yaa̱ ki̱a̱ nínga tikón koredoó, xi ti̱ bo̱a̱ ti̱ kjiꞌi xikoó kui ndiꞌaa̱. Ti̱ bo̱a̱ ti̱ tsꞌén Salomoo̱ katsꞌénda ngo ndiꞌa xi xikó maá kui koredoó, xi̱ tsi̱ꞌe̱ tsa̱kji̱ín faraoo̱n, kui na̱ xi chjo̱ón kamá.
9Ngayeje kui ni xi katsꞌéndaa̱, ndi̱jo̱ xi achichí chjí kiniꞌándani, xi kiti chji̱ni̱e̱ chji̱ni̱e̱ nga ngo nga ngo, kó ki̱cha̱ṉꞌni̱u̱ ikicháni xtji̱e̱e̱n ngi̱yaa̱ ko̱jo xtji̱e̱e̱n ndi̱tsee̱n. 10Xoó kui ndiꞌaa̱ ndi̱jo̱ xi ꞌniú chjií kamándani, kó ndi̱jo̱ xi yiꞌi boá, xi nijón metro̱ masien nga nkꞌa kamá, kó kje̱ꞌe xí ján metro̱ masien kamá nga.
11Kó ki̱a̱ ngaskande nínga nkꞌaa̱, ti̱ ndi̱jo̱ xi chjí kamándani nga, xi kiti chji̱ni̱e̱ chji̱ni̱e̱, ko̱jo yákón ikꞌíndoo̱.
12Kó nga ngo foaꞌatjiyajoo̱n ndi̱tsee̱n kui ngi̱ndiee̱ ján ndi̱yà kisꞌińdoo̱ xi ndi̱jo̱ xi kiniꞌánchoo̱n ikꞌíndonii̱, ko̱jo ngo ndi̱yà xí yándojó xi yákón ikꞌíndoo̱ nga, xikó má kjiꞌi ngi̱ya kjii̱n Ndiꞌaa̱ Néná ko̱jo koredoó.
Iraa̱n katsꞌénxájo̱ ki̱cha̱ bronsee̱
(2Kr 2:13-14; 3:15-17)
13Kó nda̱ re Salomoo̱ katsangiyakjaꞌá Iraa̱n ndeskande na̱xi̱ńdáꞌniú Tiroo̱. 14Iraa̱n kuí boá xi kamá ndií ngo xota̱chjo̱on kꞌán xi je kꞌien xi̱ꞌii̱n xi chji̱a̱ni xota̱ tji̱e̱e̱ Neftali̱. Na̱ꞌmii̱ kui nda̱a̱, nda̱ xi katsꞌénxájo̱ ki̱cha̱ bronse̱ kamá, xi chji̱a̱ni na̱xi̱ńdáꞌniú Tiro̱, kó Iraa̱n achichí kjo̱a̱kjínkón ko̱jo kjo̱a̱kjíntakón kisꞌiee̱, ko̱jo nda kamákjiín nga katsꞌén ngayeje to̱ko̱ya xá xí niꞌánxájo̱ni ki̱cha̱ bronse̱.
Kó Iraa̱n jachókoón nda̱ re Salomoo̱, kó katsꞌén ngayeje xá xí kiꞌmií nga sa̱ꞌín. 15Kó Iraa̱n katsꞌenda jó yásé xi ki̱cha̱ bronse̱ katsꞌénńdání, nga ngo nga ngo kui yáseé jin metro̱ nga nkꞌa kamá, kó ún metro̱ masien kamá nga ngo foaꞌatjiyajoo̱n. 16Kó ti̱ katsꞌénda jó nkꞌaa̱ yásé xi ki̱cha̱ bronse̱ katsꞌénńdání xi ikꞌíndoo̱ to̱ko̱ yáseé. Nga jó kui yáseé xí jó metro̱ ko̱jo kan ún sentímetro̱ nga nkꞌa kamá. 17Ti̱ kisꞌie ni xo̱ꞌba̱ ko̱jo ni xi ja̱kon tsja̱ni̱je̱n má kón, ko̱jo ni xi ja̱kon ńꞌniúki̱cha̱ má kón xi kisꞌińdo nkꞌaa̱ to̱ko̱ yáseé, yito kamá nga ngo nga ngo to̱ko̱ kui yáseé. 18Kó ti̱ katsꞌénda jó ndi̱yà xí to ngrananda̱ índoo̱ nga ngo foaꞌatjiyajoo̱n kui ni xo̱ꞌba̱a̱ tsi̱ꞌe̱ nga akjaꞌmani to̱ko̱ kui yásé xí síndoo̱ to ngranandaa̱, kó ti̱ bo̱a̱ ti̱ tsꞌén katsꞌénda xi ingo nkꞌaa̱ kui yáseé nga. 19Kó to̱ko̱ kui yáseé xi ikꞌíndo nga̱soón kui yáseé ki̱a̱ nínga tikón koredoó, ja̱kon naxó ndáfoa má kón kamá ni xi ikꞌíndoo̱, kó mejeén jó metro̱ kamá nga ndojó. 20Kó nkꞌaa̱ kui yáseé, jó úchán to ngrananda̱ kisꞌińdoo̱ xi jó ndi̱yà kamá, ki̱a̱ xtji̱e̱e̱n nínga jee̱ nkꞌaa̱ kui yásé xi tikón ki̱a̱ nga̱soón ńꞌniú ki̱cha̱ xi tsja̱ni̱je̱e̱n, kó ti̱ bo̱a̱ ti̱ kisꞌie xi ingoo̱ nga. 21Kui yáseé ki̱a̱ katsꞌénda nínga tikón nga̱ntjo̱a̱a̱ na̱ngo̱xi̱i̱, kó kjiꞌanga iskjininkꞌa yásé xi tikón xtji̱e̱e̱n nga kixi̱i̱, Jakii̱n ítꞌajaꞌén, kó nga iskjininkꞌa yásé xi tikón xtji̱e̱e̱n nga skoón, Boo̱ ítꞌajaꞌén. 22Kó nga̱soón to̱ko̱ kui yáseé íjñaá ngo ni xi ja̱kjiꞌi naxó kjiꞌi, xikó maá tsi naxó xí tjín ngi̱jin ndáfoaa̱, kó bo̱a̱ tsꞌén kamándo̱jo̱ó kui yáseé.
Ni je xi kixindyia ndáfoaa̱
(2Kr 4:1—5:1)
23Kó ti̱ katsꞌénda ngo ngi̱ndiò xí ńtsó xi achichí je, xi nijón metro̱ masien nga ndojó, ko̱jo jó metro̱ ko̱jo kan ún sentímetro̱ nga nkꞌa kamá, kó tie ján metro̱ masien kamá nga ngo foaꞌatjiyajoo̱n. 24Kó nga ngo foaꞌatjiyajoo̱n ko̱jo ngindiee̱ kui ngi̱ndi̱o̱ò kisꞌińdotꞌaa̱ ni xi ja̱kon ṉcho̱ kon, xi xki̱ masien metro̱, tie kui too̱ ikꞌíndoo̱, kó jó ndi̱yà kisꞌijñaa̱ nga ngo foaꞌatjiyajoo̱n kui ngi̱ndi̱o̱ò, kui ni xi ta̱ ngo ndi̱yà kiniꞌánńdá nga kamánda kui ngi̱ndi̱o̱ò.
25Kó kui ngi̱ndi̱o̱ò, tiejó cho̱yojo xi bokján tꞌanangii̱ kisꞌijñasón, ján kui cho̱o̱ xi askotsijen xtji̱e̱e̱n ta̱ꞌin, ján xi askotsijen xtji̱e̱e̱n nínga ꞌbosꞌien tsꞌueé, ján xi askotsijen xtji̱e̱e̱n na̱ngi, ko̱jo ján xi askotsijen xtji̱e̱e̱n nínga fotjo tsꞌueé, kó nga̱xto̱n kui cho̱yojoo̱ ki̱a̱ askotsijen xtji̱e̱e̱n ngi̱yaa̱ kui ngi̱ndi̱o̱ò. 26Kui ngi̱ndiò xí ndyi̱a̱ ndáfoaa̱ yito sentímetro̱ kamá nga tjen xoó, kó nga̱ndee̱ kui ngi̱ndi̱o̱ò bo̱a̱ má kjiꞌi xikoó ngo chi̱tse̱én xí naxó ndáfoa, kó yichán mi̱ litro̱ ndáfoa kisꞌien ngi̱yaa̱.
Nga tie ngindiee̱ yáseé
(2Kr 4:6)
27Kó ti̱ katsꞌénda tie ngindiee̱ kui yáseé xi ki̱cha̱ bronse̱ katsꞌén, kó nga ngo nga ngo kui ngindiee̱ ngo metro̱ ko̱jo ichítié ko̱jo kantié sentímetro̱ kamá nga ngo nga ngo nga̱ndee̱, kó ngo metro̱ ko̱jo kantjiꞌún sentímetro̱ kamá nga nkꞌa.
28Bi̱ kon kamá ngindiee̱: Yátie kisꞌińdoo̱ nga nijón nga̱ndee̱, kó kui nga̱ndee̱ kisꞌińdoo̱ ingo nga̱nde, 29kó nga̱soón kui yátie xi kisꞌińdo nga̱ndee̱, a̱sie̱én xandi̱je̱, ko̱jo cho̱yojo xi bokján tꞌanangi, ko̱jo keruu̱b kisꞌiee̱, kó nga̱soón kui yátie xi kisꞌijña kui nga̱ndee̱, ko̱jo ngindiee̱ nínga síndo xandi̱je̱e̱, ko̱jo cho̱yojo xi bokján tꞌanangii̱, kisꞌińdo yátie xi ja̱kon naxó kón ni xi akjatꞌaa̱. 30Nga ngo nga ngo kui ngindiee̱ kisꞌijñaa̱ nijón ni ńtsó xí ki̱cha̱ bronse̱, kó nga nijón sé kui ngindiee̱ kisꞌińdoo̱ ngo ni nínga kisꞌińdo ki̱a̱ nínga tjon ndáfoaa̱, kui xi ki̱cha̱ bronse̱ kamándani, kó kisꞌiee̱ nga̱nde nga ngo nga ngo nínga síndo tꞌieén 31Tsꞌoa kui ndáńchꞌií masien metro̱ kamá nga tiyá xtji̱e̱e̱n ngi̱yaa̱, xikoó tsi ngo nga̱nde. Kó ńtsó kamá, kó ikꞌíjñaá ngo ngindie xi ichítié ko̱jo kan ún sentímetro̱ nga nkꞌa kamá, kó akjatꞌaa̱ a̱sie̱én, kó nijón nga̱nde xi kixi̱ kisꞌiee̱, jmí tsi ńtsó kamá. 32Nga nijón kui ni ńtsoó ki̱a̱ kisꞌińdo ngindiee̱ nínga síndo kui yátie nga̱ndee̱, kó ki̱cha̱ nínga mongaya ni ńtsoó, jatjoxie chií ki̱a̱ ngindiee̱, kó nga ngo nga ngo kui ni ńtsoó ichítié ko̱jo kan ún sentímetro̱ kamá nga nkꞌaa̱. 33Kó xikó kón kui ni ńtsoó bo̱a̱ má kón xikoó ni ńtsoó ngo karreta̱, kó ki̱cha̱ nínga mongaya, ko̱jo ki̱cha̱ńtsoó, ko̱jo ki̱cha̱ nínga boaꞌajo̱ni, ko̱jo ni xi tjiín jun kje̱e̱n, ngayejee̱ nga ki̱cha̱ xi kiniꞌánńdá boá xi kamándani. 34Kó nga nijón kui ni xi bóꞌniú nga nijón nijoo̱n, ta̱ ngo ndo̱jò kamá. 35Kó nga̱soón nga ngo nga ngo kui ngindiee̱, kisꞌiee̱ ngo ni xi nínga tikónsón xi ńtsó kamá, xi kan sentímetro̱ masien kamá nga nkꞌa, kó nga̱soón kui ngindiee̱, kisꞌiee̱ nga̱nde xi ti̱ ki̱a̱a̱ jatjo. 36Kó nga̱soón kui yátie xi kiniꞌándani kui nga̱ndee̱, akjatꞌaa̱ a̱sie̱én keruu̱b, ko̱jo xandi̱je̱, ko̱jo yá xka̱jèn, xikó kjiꞌi ngi̱ndie xi síndoo̱ nga ngo nga ngo, kó kisꞌiee̱ nga̱nde nga ngo foaꞌatjiyajoo̱n. 37Bo̱a̱ tsꞌén kiniꞌánda nga tie kui ngindiee̱, kó ta̱ ngo ndo̱jò kamá nga kiniꞌánńdá, kó ti̱kuii chi̱bo̱a̱ ka̱ma, ko̱jo ti̱ bo̱a̱ ti̱ kisꞌieni.
38Kó ti̱ katsꞌénda tie nínga monié ndsa̱ xi ki̱cha̱ bronse̱, kó nga ngo nga ngo kui nii̱, jin úchán litro̱ ndáfoa kisꞌien, nga ngo nga ngo kui ni nínga monié ndsa̱a̱, ngo metro̱ ko̱jo ichítié ko̱jo kantié sentímetro̱ nga ndojó kamá, kó nga ngo nga ngo tie ngi̱ndie nínga kisꞌińdosón kisꞌiee̱. 39Ún kui yáseé xi índo xtji̱e̱e̱n nínga kixi̱i̱ Ndiꞌaa̱, kó xi ngi uún ki̱a̱ índo xtji̱e̱e̱n ta̱ꞌii̱n Ndiꞌaa̱, kó kui ngi̱ndi̱o̱ò ki̱a̱ íjñá xtji̱e̱e̱n ngamasien na̱ngi ko̱jo xtji̱e̱e̱n nínga fotjo tsꞌueé.
Iraa̱n kamándo̱jo̱ó xaá
(2Kr 4:7-18)
40Kó Iraa̱n ti̱ kui katsꞌénda ti̱ji̱ì, ko̱jo ni xi chjábéjo̱ni, ko̱jo ni xi mindyia ndáfoaa̱. Kó bo̱a̱ tsꞌén kamándo̱jo̱ó Iraa̱n ngayeje xá xí katsꞌén Salomoo̱ ki̱a̱ Ndiꞌaa̱ Néná, kó kui nii̱ xi katsꞌénda:
41Jó yásé xi kisꞌińdo kui ngi̱ndiee̱, ko̱jo jó to̱ko̱ya ni ńtsó xi kisꞌińdotꞌa nkꞌaa̱ nga jó kui yáseé, ko̱jo jó nda̱ꞌya xi yíꞌmá nga jó kui ni ńtsó xi kisꞌińdotꞌaa̱ to̱ko̱ kui yáseé, 42ko̱jo nijón úchán to ngrananda̱ xi ikꞌíndoo̱ nga jó nda̱ꞌya̱a̱, jó ndi̱yà to ngrananda̱ akjatꞌaa̱ xki̱ nga ngo nga ngo nda̱ꞌya̱a̱, tsi̱ꞌe̱ nga akjaꞌma kui ni xi mindyia ndáfoaa̱, xi síndotꞌaa̱ kui yáseé, 43ko̱jo nga tie ngindiee̱ kui yáseé, ko̱jo nga tie nínga moniéjón ndsa̱a̱, xi síndosón nga̱soón kui ngindiee̱, 44ko̱jo ngo ngi̱ndiò, xi tiejó cho̱yojo xi bokján tꞌanangi síndoo̱ ngindiee̱, 45ko̱jo ni xi mindyia ndáfoaa̱, ko̱jo ki̱cha̱ xi chjaníyáni, ko̱jo tasa̱ yiꞌii̱.
Ngayeje kui nii̱ xi katsꞌénda Iraa̱n, tsi̱ꞌe̱ nda̱ re Salomoo̱, tsi̱ꞌe̱ Ndiꞌaa̱ Néná, kó ki̱cha̱ bronse̱ xi kiniꞌánꞌna̱ kamándani. 46Kó ngayeje kui nii̱ xi nda̱ ree̱ katsꞌénńdá ki̱a̱ tꞌanangi xi tjiín tsomií, ki̱a̱ xtji̱e̱e̱n nangi soón ndejèꞌ Jorndaa̱n, ki̱a̱ xtji̱e̱e̱n nangi Sukoo̱t ko̱jo nangi Saretaa̱n. 47Kó nda̱ re Salomoo̱ nde tsꞌenchi̱bo̱a̱jín ngayeje kui nii̱, ngatꞌa̱ achichí kjín kamá, kó jmíni̱xtjin kamáyá kótjín kilo̱ ki̱cha̱ bronse̱ kamá.
Ni xi kiniꞌánkjién ngi̱ya Ndiꞌaa̱ Néná
(2Kr 4:19—5:1)
48Kó Salomoo̱ ti̱ kui katsꞌénda ngayeje ni xi kamáchjieén Ndiꞌaa̱ Néná, xikoó:
Ṉchandikón xí to̱nsinieé,
ko̱jo yámíxa̱ xi to̱nsinié nínga kisꞌińdosón pan xi kiniꞌánkꞌasꞌiee̱n Néná,
49ko̱jo nga ún ni xi ꞌbítíyá ndiꞌí xí tsꞌentsíjee̱n, kui xi to̱nsinié xi kui soboá soboá kamándanii̱, xi kisꞌińdo xtji̱e̱e̱n na̱ngi,
ko̱jo ngi ún xi kisꞌińdo xtji̱e̱e̱n ta̱ꞌin, kje̱n ngi̱ndie xi ꞌniú ndikoón,
ko̱jo naxoó,
ko̱jo ndiꞌí xí tsꞌentsíjee̱n,
ko̱jo ni xi chjábéjo̱ni xꞌueé kui xi to̱nsinié kamándanii̱.
50Ti̱ bo̱a̱ ti̱ tsꞌén kui katsꞌénda, chi̱tsen xí to̱nsinieé,
ko̱jo ki̱cha̱chꞌa̱a̱,
ko̱jo ni xi ꞌbítíyá nisijee̱n, ngayejee̱ nga to̱nsinié soboá soboá kamándani.
Ti̱ bo̱a̱ ti̱ tsꞌén katsꞌénda ki̱cha̱ xi tsꞌéntíyaà nga̱ntjo̱a̱a̱ ndiꞌaa̱ xi tikón ngi̱yaa̱, ko̱jo ngi̱ndie nínga ꞌniú ndikoón,
ko̱jo nga̱ntjo̱a̱a̱ ngi̱ndie nínga bitja ki̱a̱ na̱ngo̱xi̱i̱ nga.
51Kó bo̱a̱ tsꞌén kamándo̱jo̱ó ngayeje xá xí katsꞌén nda̱ re Salomoo̱ kjo̱a̱a̱ Ndiꞌaa̱ Néná. Kó Salomoo̱ katsꞌénkꞌasꞌien ki̱a̱ Ndiꞌaa̱, ni xi Ndabi̱ na̱ꞌmii̱, ja̱bo̱a̱ je katsꞌénkꞌasꞌiee̱n Néná, kó to̱ntiboaa̱, ko̱jo to̱nsinieé, ko̱jo ngayeje ni xi kamáchjieén, ki̱a̱ índo ngi̱ya nínga chjaꞌátjó to̱n xi chji̱a̱ni Ndiꞌaa̱ Néná.
Currently Selected:
1 Já ree̱ 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
