1 Já ree̱ 6
6
1Nó nijón úchán ichítié ko̱jo kantié jaskan ngije jatjoni xota̱ Israee̱l ki̱a̱ nangi Ejiptoo̱, nó xí ma nijoón nga atíxoma re Salomoo̱ na̱xi̱ńdá Israee̱l, sá xí ꞌmí Sii̱b, kui xi sá xi ma joó, kjiꞌá boá nga nda̱ re Salomoo̱ ítsꞌi̱yanii̱ nga katsꞌénda ndiꞌaa̱ Néná.
2Ndiꞌa xi katsꞌéndaa̱ Néná nda̱ re Salomoo̱, kan yito metro̱ kamá nga ndojó, kó nijan metro̱ kamá nga tiyá, kó tie ján metro̱ kamá nga nkꞌa. 3Kó koredó xi tikón xtji̱e̱e̱n kje̱n na̱ngo̱xi̱i̱, nijan metro̱ nga ndojó kamá, kó nijón metro̱ masien nga tiyá kamá xtji̱e̱e̱n kje̱n kui Ndiꞌaa̱. 4Kó ti̱ katsꞌéndaa̱ nga̱ntjo̱a̱masienkjá kuí Ndiꞌaa̱, xi tiyá kamá xtji̱e̱e̱n ngi̱yaa̱, kó xkjó kamá xtji̱e̱e̱n nga̱xto̱n. 5Kó ti̱ katsꞌénda ki̱a̱ tꞌa xoó Ndiꞌaa̱, kje̱ꞌe ndiꞌa xi̱xi̱ nga ngo foaꞌatjiyajoo̱n, ko̱jo ki̱a̱ ngi̱ndie ndikoón ko̱jo ngi̱ndie xi ꞌniú ndikoón nga, kó ti̱ katsꞌénda kje̱ꞌe ndiꞌa nga ngo foaꞌatjiyajoo̱n kui ngi̱ndiee̱ nga. 6Kó kui ngi̱yaꞌma xi kisꞌijña xtji̱e̱e̱n ngi̱ndiee̱ jó metro̱ nga tiyá kamá, kó xi tikón ngamasiee̱n jó metro̱ masien nga tiyá kamá, kó xi ma jaán kui ngi̱yaꞌmaa̱ ján metro̱ masien nga tiyá kamá, ngatꞌa̱ katsꞌén xkjó xtji̱e̱e̱n tꞌa ndi̱tsee̱n nga ngo foaꞌatjiyajoo̱n ndiꞌaa̱, tsi̱ꞌe̱ nga ki̱a̱ kjoaꞌá yáxtió xi boaꞌajo̱ni ngi̱yaꞌmaa̱ kui ndiꞌaa̱.
7Kó nga kamánda kui ndiꞌaa̱, ndi̱jo̱ xi je kiniꞌánchoo̱n ikꞌíndoo̱, kó nde kandaꞌyájín martiyo̱, ti̱nde kandaꞌyájín jachaa̱, ti̱nde kandaꞌyájín ngo ni xi ki̱cha̱ ki̱a̱ kui Ndiꞌaa̱ tji̱e̱nga kjimanda.
8Nga̱ntjo̱a̱a̱ ngi̱yaꞌmaa̱ xi tikón ki̱a̱ ngamasiee̱n xtji̱e̱e̱n nínga kixi̱i̱ kui ndiꞌaa̱, ki̱a̱ tsangínnijíngíni ngi̱yaꞌma xi tikón ngamasiee̱n, kósꞌe̱ nínga tikón xi̱ꞌbi̱, ki̱a̱ tsangínnijíngíni ngi̱yaꞌma xi tikón xtji̱e̱e̱n ndi̱tsee̱n, kó ngo ki̱jo̱n xi foaꞌatjiya ikꞌíjñaá.
9Kó bo̱a̱ tsꞌén katsꞌénda Ndiꞌaa̱, kó kamándo̱jo̱ó, kó yándojó ko̱jo yátie xi yákón yíjónni kui Ndiꞌaa̱. 10Kó ti̱ katsꞌénda ngi̱yaꞌma xi índoo̱ nga ngo foaꞌatjiyajoo̱n Ndiꞌaa̱, xi jó metro̱ masien nga nkꞌa kamá, kó ki̱a̱ akjaꞌa yándojó xi yákoón kui ndiꞌaa̱.
11Kósꞌe̱ Néná tsíchji̱a̱jo Salomoo̱, nga bi̱ katsoó: 12Kjo̱a̱a̱ kui Ndiꞌa xi tiniꞌínde ji, tsi si̱ꞌinkjatjosén ji kjo̱a̱kitina, kó tsi si̱ꞌinkjatjosén ji ngayeje kjo̱a̱botíxomana nga bo̱a̱ si̱ꞌin ji xikó tsó, An sa̱ꞌinkjatjosón an ni xi kixiáa̱n Ndabi̱ na̱ꞌmíi̱, 13kó ki̱a̱ kotíjña̱jìi̱n xota̱ Israee̱l, kó kꞌuijñámasiénjín an xota̱ na̱xi̱ńdána.
14Kó bo̱a̱ tsꞌén Salomoo̱ katsꞌenda Ndiꞌaa̱, kó kamándo̱jo̱ó. 15Kó ngayeje xtji̱e̱e̱n ngi̱yaa̱ xoó Ndiꞌaa̱ yátie yákón yíjón, ndeskande ngindiee̱ ngaskande nínga síndo yáxtioó nkꞌaa̱ Ndiꞌaa̱, kó tꞌanangii̱ Ndiꞌaa̱ yátiee̱ yásipree̱ yíjónni. 16Kó ti̱ yátie yákón yíjón nijan metro̱ xtji̱e̱e̱n nga̱xto̱n kui Ndiꞌaa̱, ndeskande ngindie ján ngaskande nkꞌa ján, ki̱a̱ ngi̱yaa̱ kui Ndiꞌaa̱ ko̱jo ngi̱ndie nínga ꞌniú ꞌniú ndikoón. 17Kui na̱ngo̱xi̱i̱, ki̱a̱ kje̱n ngi̱yaꞌma xi tikón kje̱e̱n, tjiꞌún ján metro̱ kamá nga ndojoó. 18Kó xtji̱e̱e̱n ngi̱yaa̱ kui Ndiꞌaa̱ yátiee̱ yákón akjanjonni kó akjatꞌaa̱ ni xi ja̱kon ṉcho̱ kon, ko̱jo ikꞌíndoo̱ naxó xí je katjoxꞌá, ngayeje nga yákón kamándani, kó nde ngojín ndi̱jo̱o̱ xoó xi kisꞌińdo tsijen. 19Kósꞌe̱ íjñanda xtji̱e̱e̱n ngi̱yaa̱ kui ndiꞌandikoón, ngaskande ngi̱ya xi tikón nínga fetꞌanii̱, tsi̱ꞌe̱ nga ki̱a̱ kꞌuijñá koxa̱a̱ kjo̱a̱ꞌbíndaa̱ Néná. 20Ndiꞌandikón xí tikón ngi̱ya nínga fetꞌanii̱ nijan metro̱ masien nga tiyá kamá, kó ti̱ nijan metro̱ nga ndojó kamá nga, kó to̱nsinié xi kui soboá soboá yíjón, kó ṉchaa̱n yátie yákón yíjón. 21Sꞌe̱ jaskan Salomoo̱ to̱nsinié xi kui soboá soboá yíjón ngi̱yaa̱ kui Ndiꞌaa̱, kó ńꞌniúki̱cha̱ xi to̱nsinié índoo̱ xtji̱e̱e̱n kje̱n kui Ndiꞌandikón xí tikón ngaskande ngi̱ya kjin jàn, kó to̱nsinié yíjón ngayejee̱. 22Kó to̱nsinié yíjón ngayeje kui Ndiꞌaa̱, ngaskande nga kamándo̱jo̱ó, kó ti̱ to̱nsinié yíjón ngayeje ṉchan xi kisꞌijña kje̱n ndiꞌandikón xí tikón ngi̱ya kjin jàn nga.
23Kó ti̱ katsꞌénda jó keruu̱b xi yáꞌolibo̱ kamándani ki̱a̱ ndiꞌandikón xí tikón ngi̱ya kjin jàn, kó nga ngo nga ngo nijón metro̱ masien nga nkꞌa kamá. 24Nga ngo nga ngo nga̱a̱ kui keruu̱b jó metro̱ ko̱jo kan ún sentímetro̱ kamá, kó ndeskande ngo nga̱ndee̱, ngaskande xi ingo nga̱ndee̱ nijón metro̱ masien kamá. 25Ti̱ bo̱a̱ ti̱ tsꞌén xi ingo keruu̱b ti̱ nijón metro̱ masien kamá nga, kó nga jó kui keruu̱b nga ta̱ ngo ndse̱je̱n kamá, kó ti̱ bo̱a̱ ti̱ kon kamá. 26Kui Keruu̱b xi tjoón nijón metro̱ ko̱jo kan ún sentímetro̱ kamá nga nkꞌa, kó ti̱ bo̱a̱ ti̱ kjiꞌi kamá xi ingoo̱ nga. 27Kó ki̱a̱ índo kui keruu̱b ki̱a̱ ngamasiee̱n kui Ndiꞌandikón xí tikón ngi̱ya kjii̱n. Kó nga̱a̱ nga jó kui keruu̱b yejéntie, kó ngo nga̱a̱ ngo kui keruu̱b ki̱a̱ kisitꞌaa̱ ngo xoó, kó nga̱a̱ xi ingo kui keruu̱b ki̱a̱ kisitꞌaa̱ xi ingo xoó, kó nga jó nga̱a̱ ki̱a̱ má kisꞌijña ngamasiee̱n kui ndiꞌaa̱, kó kisitꞌaa̱ xkjín. 28Kósꞌe̱ to̱nsinié yíjón nga jó kui keruu̱b.
29Kó ngayeje xoó ndiꞌaa̱ nga ngo foaꞌatjiyajoo̱n nga índoo̱ a̱sie̱én keruu̱b, ko̱jo yáxka̱jèn, ko̱jo naxó xí je katjoxꞌá. 30Kó nga̱són tꞌanangii̱ kui Ndiꞌandikoón xtji̱e̱e̱n ngi̱yaa̱ ko̱jo xtji̱e̱e̱n ndi̱tsee̱n to̱nsinié yíjón.
31Kó ki̱a̱ nínga bitjasꞌi̱e̱nnii̱ ngi̱ya xi ꞌniú ndikoón, katsꞌéndaa̱ nga̱ntjo̱a̱ xi yáꞌolibo̱, kó yáseé nga̱ntjo̱a̱a̱ ún nga̱nde índoo̱, 32kó nga jó kui nga̱ntjo̱a̱a̱ yáꞌolibo̱ katsꞌéndani, kó índoo̱ a̱sie̱én keruu̱b, ko̱jo yáxka̱jèn, ko̱jo naxó xí je katjoxꞌá, kó to̱nsinié yíjón, kó ti̱ to̱nsinié yíjón kui keruu̱b ko̱jo yáxka̱je̱én nga.
33Kó ti̱ bo̱a̱ ti̱ katsꞌénkꞌié ki̱a̱ nínga bitjasꞌi̱e̱nnii̱ ngi̱ndie ndikoón, nínga índoo̱ yásé xi yáꞌolibo̱ xi nijón nga̱nde índoo̱, 34ko̱jo jó nga̱ntjo̱a̱a̱ xi yásipree̱ kamándani, kó nga jó xka̱a̱ kui nga̱ntjo̱a̱a̱ foaꞌatjiya nga kamátíyaá, kó xi ngi jó xka̱a̱ nga̱ntjo̱a̱ xi ingoo̱ ti̱ bo̱a̱ ti̱ tsꞌén foaꞌatjiya nga kamátíyaá nga. 35Kó ti̱ índoo̱ a̱sie̱én keruu̱b, ko̱jo yáxka̱jèn, ko̱jo naxó xí je katjoxꞌá, kósꞌe̱ to̱nsinié yíjón xikó má tsꞌén kamánda kui nii̱.
36Kó ngo ndi̱tsen katsꞌénda xtji̱e̱e̱n ngi̱yaa̱ xi ján ndi̱yà ndi̱jo̱ xi kiniꞌánchoo̱n índoo̱, ko̱jo ngo ndi̱yà xí yáxtió xi yákón índoo̱ nga.
37Nó xí ma nijoón, sá xí ꞌmí Sii̱b má nga ikꞌítjatsꞌennii̱ xoó Ndiꞌaa̱ Néná, 38kó nó xí ma tiengoo̱, kui sá xí ꞌmí Buu̱l, kui xi sá xi ma jii̱n má nga kamándo̱jo̱ó Ndiꞌandikoón Néná, ko̱jo ngayeje ni xi ikꞌíndoo̱, ko̱jo xikó má tsꞌen ikꞌínda nga ka̱manda. Yito tsꞌandíyaá jaꞌa nga kamándani kui ndiꞌaa̱.
Currently Selected:
1 Já ree̱ 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
