1 Já ree̱ 5
5
Ni xi índa Salomoo̱ ko̱jo Iraa̱n
(2Kr 2:1-18)
1Kó Iraa̱n nda̱ re xi chji̱a̱ni na̱xi̱ńdáꞌniú Tiroo̱, ti̱ katsangiyaa̱ xota̱xcha̱à nga kijíchji̱a̱jo Salomoo̱, ngije tsintꞌié nga je re kamá Salomoo̱ ngajoo̱ na̱ꞌmii̱, ngatꞌa̱ Iraa̱n ngatsjéni̱xtjin nga tjó kamaá Ndabii̱. 2Kósꞌe̱ Salomoo̱ katsangiyaa̱ én Iraa̱n nga bi̱ katsoó:
3—Ji jè yé ji nga ta̱ngatꞌanii̱ nga achichí kjo̱a̱xchán kisꞌie nga ngo foaꞌatjiyajoo̱n nínga kisꞌijña na̱ꞌmina Ndabii̱, nga kamájín katsꞌéndaa̱ ngo Ndiꞌa xi tsi̱ꞌe̱ Néná, kui xi Nee̱ kui, ngaskande nga Néná índo kondra̱a̱ ngindie se. 4Ta̱nga ngotꞌe̱ ꞌne̱, Néna jè katsjána kjo̱a̱xió ngayeje ngi̱ndie, kó ngiti̱ jmíjínna kondra̱, ti̱nde ngiti̱ jmíjín ni xi ndajín xi stsakjon an.
5Kó kuíni nga an, jè bo̱a̱ kixian an nga sa̱ꞌinda an ngo Ndiꞌa xi tsi̱ꞌe̱ Néná, xikó katsoó Néná Ndabi̱, na̱ꞌmina, nga bi̱ katsoó: Ndíi̱, kui xi kꞌuijñá ngi̱ndie nínga botíxome ji, kuí boá xi sa̱ꞌínda ngo Ndiꞌa tsi̱ꞌe̱ Jaꞌénna.
6Ngotꞌe̱ ꞌne̱, te̱ꞌékjo̱e̱ ji nga ku̱i̱chá yákón xi tjín nangi Líbanoo̱, kó já moso̱na ki̱a̱ kꞌuíndojo̱ já moso̱ tse̱, kó án kꞌuichjíi̱ já mosòo̱ xikó kjiꞌi sé jí, ngatꞌa̱ jè yé ji nga jmíjín ngi̱jinná ngo xota̱ xi maa̱ bokján yá xikoó xota̱ Sindonioo̱.
7Kó kjiꞌanga tsintꞌié Iraa̱n én xí katsangiya Salomoo̱, achichí tsjá kamaá, kó bi̱ katsó: ¡Nganiꞌántsjaà Néná ngotꞌe̱, ngatꞌa̱ kuí boá xi katsjaá Ndabii̱ ngo ndí xí kjínkón xi ko̱tíxomaa̱ kui na̱xi̱ńdá xí ta̱nisién jeè!
8Kó katsangiyaa̱ Iraa̱n én Salomoo̱, nga bi̱ katsoó:
Jè tsintꞌie an én xí kanangiyení, kó sa̱ꞌinkjatjosón an ngayeje ni xi mejeén kjo̱a̱a̱ yákoón ko̱jo yásipree̱. 9Moso̱na kjo̱jo kui yaá ndeskande nangi Líbano̱ ngaskande ndáchíkoón, kó tjotso yiꞌi kꞌuiñajanya an ngaskande ngi̱ndie xi sení, kó ki̱a̱ kjóchojo̱ an, kó ji ki̱a̱ sa̱ꞌinkꞌasꞌiee̱n kui yaá, kó jí si̱ꞌinkjatjosén ji ni xi mejénna nga si̱ꞌin ji, nga ko̱e̱ꞌée̱ nichinie xota̱ ndiꞌana.
10Kó bo̱a̱ tsꞌén Iraa̱n katsjaá Salomoo̱ ngayeje yákón ko̱jo yásipree̱ xi kamámejeén. 11Kó Salomoo̱ katsjaá Iraa̱n jun miyo̱n kilo̱ to ndso̱ko̱a̱n ṉño̱pan tsi̱ꞌe̱ nga skji̱ni̱e̱ ngayeje xota̱ ndiꞌaa̱, ko̱jo jun mi̱ litro̱ istii̱ toꞌolibo̱ xi kui soboá soboá xki̱ nó xki̱ nó. 12Kó Néná katsjaá kjo̱a̱kjínkón Salomoo̱, xikó má katsoó nga katsóyàtjoón, kó kisꞌiee̱ kjo̱a̱xió Iraa̱n ko̱jo Salomoo̱, kó nga joó índa ngo ni.
Nga ítsꞌi̱yanii̱ nga kamánda Ndiꞌaa̱ Néná
(2Kr 3:1-14)
13Kó nda̱ re Salomoo̱ katsjákjo̱a̱ nga si̱ꞌaa̱n kjo̱a̱ꞌniú ngayeje xota̱ na̱xi̱ńdá Israee̱l nga sa̱ꞌínxá, kó kantié mi̱ kamá jáxíꞌín xi akakoyaá tsi̱ꞌe̱ nga sa̱ꞌín kui xaá. 14Kó tie mi̱ ma jáxíꞌín xi katsangiya xki̱ sá ki̱a̱ nangi Líbanoo̱, kó ngo sá kamaá nga kisꞌińdo ki̱a̱a̱, sꞌe̱ jó sá kamaá nga kisꞌińdo ndiꞌaa̱, kó Andoniraa̱n boá xi kamá ngito̱ko̱o̱ kui xaá. 15Kó Salomoo̱ ti̱ kisꞌiee̱ ichítié ko̱jo kan mi̱ jáxíꞌín xi tsaꞌanijín ni é, ko̱jo ichítié ko̱jo kantié mi̱ jáxíꞌín xi bokján ndi̱jo̱ ki̱a̱ na̱xi̱i̱, 16kó ti̱ kisꞌiee̱ Salomoo̱ já ngito̱ko̱ xi kamábe xá xí katsꞌén xotaa̱, kó ján mi̱ jun úchán kamá xi kisꞌindotjoón xá xí katsꞌén xotaa̱. 17Kó nda̱ ree̱ katsjákjo̱a̱ nga kaꞌnaxié ndi̱jo̱ yiꞌi xi achichí chjí, tsi̱ꞌe̱ nga kui ndi̱jo̱o̱ xi si̱ꞌanchoo̱n nga kꞌuijñaá xó xí ikꞌítjatsꞌennii̱ Ndiꞌaa̱. 18Kó já xí tsꞌénda ndiꞌa xi tsi̱ꞌe̱ Salomoo̱, ko̱jo já xí tsꞌénda ndiꞌaa̱, xi chji̱a̱ni Iraa̱n, ko̱jo xi chji̱a̱ni nangi Ngebaa̱l, índonda yaá, ko̱jo katsꞌénchoo̱n ndi̱jo̱ xi kiniꞌándajo̱ni kui Ndiꞌaa̱.
Currently Selected:
1 Já ree̱ 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
