1 Já ree̱ 4
4
Xota̱ xi katsꞌénxátꞌaa̱ nda̱ re Salomoo̱
1Kó bo̱a̱ tsꞌén nda̱ re Salomoo̱ atíxomaa̱ ngayeje na̱xi̱ńdá Israee̱l.
2Kó kuí bí xi̱ꞌbi̱ xi já ngito̱ko̱ xi kisꞌiee̱: Asariyaa̱ ndií chináꞌmi Sandoo̱k, 3ko̱jo Elioree̱f, ko̱jo Ayiaa̱ ndií Sisaa̱, kui xi já chji̱ni̱e̱kjo̱a̱kiti kamá, ko̱jo Josafaa̱t ndií Ailuu̱nd, kui nda̱ xi chji̱ni̱e̱xo̱jo̱o̱n nda ree̱ kamá, 4ko̱jo Benaiyaa̱ ndií Joyandaa̱, kui xi kamá nda̱jun ngito̱ko̱o̱ jájuún, ko̱jo Sandoo̱k, ko̱jo Abiataa̱r xi kamá já chináꞌmii̱, 5ko̱jo Asariyaa̱ ndií Nataa̱n, kui xi ngito̱ko̱o̱ xtitjón kamá, ko̱jo Sabuu̱nd ndií Nataa̱n, kui xi nda̱ xi ꞌniú nkꞌa kamá xaá, ko̱jo xi katsjaá kjo̱a̱botíxoma nda̱ ree̱, 6ko̱jo Aisaa̱r, kui nda̱ xi ngito̱ko̱o̱ ndiꞌaa̱ kamá, ko̱jo Andoniraa̱n ndií Abndaa̱, kui xi kamá ngito̱ko̱o̱ já xí foaꞌáꞌyá to̱n xi machjítjé nii̱.
7Tiejó xtitjón kisꞌiee̱ re Salomoo̱ ngayeje na̱xi̱ńdá Israee̱l, kó kui jaá xi katsꞌénkꞌasꞌiee̱n ni xi tsꞌénkjién nda̱ ree̱ ko̱jo ni xi machjién ndiꞌaa̱, ngo katsoboá kjo̱a̱ꞌniuú xki̱ ngo sá nga ngo noó. 8Kó kuí bí xi̱ꞌbi̱ jaꞌeén kui jaá:
Bee̱n-Uu̱r, xi chji̱a̱ni ki̱a̱ na̱xi̱i̱ xota̱ tji̱e̱e̱ Efraii̱n, 9ko̱jo Bee̱n-Ndekaa̱r ki̱a̱ na̱xi̱ńdáꞌniú Maakaa̱, ko̱jo Saalbii̱n, ko̱jo Bee̱t-Semee̱, ko̱jo Eloo̱n, ko̱jo na̱xi̱ńdáꞌniú Eloo̱n-Bee̱t-Anaa̱n, 10ko̱jo Bee̱n-Jesee̱nd ki̱a̱ na̱xi̱ńdáꞌniú Aruboo̱t, ko̱jo na̱xi̱ńdáꞌniú Sokoo̱, ko̱jo ngayeje nangi Efee̱r.
11Ko̱jo Bee̱n-Abinandaa̱b, ki̱a̱ ngayeje nangi Ndoo̱r, kui nda̱a̱ chjo̱ón kamá na̱ Tafaa̱t, tsa̱kji̱ín Salomoo̱.
12Ko̱jo Baanaa̱ ndií Ailuu̱nd ki̱a̱ nangi Taanaa̱k, ko̱jo nangi Mengindoo̱, ko̱jo ngayeje na̱xi̱ńdáꞌniú Bee̱t-Seaa̱n, kui xi tikón tiñaa̱ na̱xi̱ńdáꞌniú Saretaa̱n, xtji̱e̱e̱n na̱ngii̱ Jesree̱l, kó ndeskande na̱xi̱ńdáꞌniú Bee̱t-Seaa̱n yaꞌanii̱, ngaskande Abee̱-Meolaa̱, ko̱jo ngaskande xi ingoboaá nangi Jokmeaa̱n.
13Ko̱jo Bee̱n-Ngébee̱r, ki̱a̱ na̱xi̱ńdáꞌniú Ramoo̱t, ngi̱ndie xi chji̱a̱ni nangi Ngalaa̱nd, kuí boá kui ngi̱ndiee̱ xi kisꞌijña ki̱a̱ ndí nangi Jaii̱r, ngi̱ndie xi tsi̱ꞌe̱ ndií Manasee̱ kamá, kui xi síndo nangi Ngalaa̱nd, kó ti̱ ki̱a̱ tsíchji̱a̱ni nangi Arngoo̱b, kui xi tikón nangi Basaa̱n, kó ichítié ko̱jo tie na̱xi̱ńdáꞌniú xi tjíchjáꞌyáni, ko̱jo xi ki̱cha̱ bronse̱ ikꞌíchjáni kisꞌiee̱ nga.
14Ko̱jo Ainandaa̱b ndií Indoo̱, ki̱a̱ nangi Maanaii̱n.
15Ko̱jo Aimaa̱ ki̱a̱ nangii̱ xota̱ tji̱e̱e̱ Neftalii̱, kui nda̱ xi chjo̱ón katsꞌén na̱ Basemaa̱t, tsa̱kji̱ín Salomoo̱ nga.
16Ko̱jo Baanaa̱ ndií Usaai̱, ki̱a̱ nangi Asee̱r, ko̱jo nangi Aloo̱t.
17Ko̱jo Josafaa̱t ndií Parúaa̱, ki̱a̱ nangi Isakaa̱r.
18Ko̱jo Simeii̱ ndií Elaa̱, ki̱a̱ nangii̱ xota̱ tji̱e̱e̱ Benjaa̱.
19Ko̱jo Ngébee̱r ndií Urii̱, kui xi ki̱a̱ nangi Ngalaa̱nd, ta̱kuítsí xi kamá xtitjón, ki̱a̱ nangii̱ Sióo̱n, nda̱ ree̱ xota̱ Amoo̱r, ko̱jo Oo̱j, nda̱ ree̱ nangi Basaa̱n.
Kjo̱a̱kjínkón ko̱jo kjo̱a̱cho̱n xi kisꞌiee̱ Salomoo̱
20Xota̱a̱ nangi Jundáa̱ ko̱jo xota̱ na̱xi̱ńdá Israee̱l achichí kjín kamá, xikó maá tsomí xí tjín tꞌa ndáchíkoón, kó iskjinie, ko̱jo katsꞌe, ko̱jo tsjá kisꞌiee̱. 21Kó Salomoo̱ atíxomaa̱ ngayeje ngi̱ndie nínga botíxoma xi síndo ndeskande ndejèꞌ Éufratee̱, ngaskande nangii̱ xota̱ Filisteaa̱, ko̱jo ngaskande tsindioó nangi Ejipto̱, kó kui xotaa̱ katsꞌénkꞌasꞌiee̱n ni xi machjítjé ni, ko̱jo katsꞌénxátꞌaa̱ Salomoo̱ ngayeje ni̱xtjin nga kisꞌijña nga̱sondie.
22Kó ni xi kamáchjién nda̱ re Salomoo̱ xki̱ ni̱xtjin, kui bí xi̱ꞌbi̱: Nijan mi̱ kilo̱ ndso̱ko̱a̱n ṉño̱pan xi ꞌniú kixꞌii̱, ko̱jo tjiꞌún ján mi̱ kilo̱ ndso̱ko̱a̱n ṉño̱pan xi ta̱xkiya, 23ko̱jo tie cho̱yojo xi̱ꞌin xi yiꞌi, ko̱jo kan cho̱yojo xi̱ꞌin xi ndi̱xcho̱ kiniꞌányiꞌini, ko̱jo úchán cho̱tsa̱nga̱, ta̱nga kichꞌiáxki̱jín kótjín ndi̱kꞌijñá xi̱ꞌin ko̱jo ndi̱kꞌijñá chjo̱on, ko̱jo cho̱ korso̱, ko̱jo ni̱sie xi yiꞌi.
24Ngatꞌa̱ Salomoo̱ boá xi atíxomaa̱ ngayeje nangi xi tikón xtji̱e̱e̱n nínga ꞌbosꞌien tsꞌueé ndejèꞌ Éufratee̱, xi yaꞌanii̱ ndeskande na̱xi̱ńdáꞌniú Tifsaa̱ ngaskande na̱xi̱ńdáꞌniú Ngasa̱, ko̱jo ngayeje já ree̱ xi síndo xtji̱e̱e̱n nínga ꞌbosꞌien tsꞌueé ndejèꞌ Éufratee̱, kó kisꞌiee̱ kjo̱a̱xió ngayeje ngi̱ndie xi jaꞌatjiyajoo̱n.
25Kó bo̱a̱ tsꞌén xota̱ xi chji̱a̱ni nangi Jundáa̱ ko̱jo xota̱ xi chji̱a̱ni na̱xi̱ńdáꞌniú Israee̱l nda kisꞌińdo ngayeje ni̱xtjin nga atíxoma nda̱ re Salomoo̱, nga ngo nga ngo ki̱a̱ kisꞌińdo ngindie nínga tjitjieé tostsi̱je̱è, ko̱jo ngindie nínga tjitjieé toꞌingo̱, ndeskande nangi Ndaa̱n, ngaskande nangi Beersebaa̱. 26Kó Salomoo̱ ki̱a̱ nchꞌoaá kisꞌiee̱ yichán mi̱ ndi̱je̱ xi iskjien karro̱ kjo̱a̱xcha̱án, ko̱jo tiejó mi̱ já xí ꞌbíndosoón ndi̱je̱.
27Kó já xtitjoón ngo sá ndo̱jò ndójo̱ kamaá nga katsꞌénkꞌasꞌiee̱n ni xi kamáchjieén nda̱ re Salomoo̱, ko̱jo ngayeje xota̱ xi ki̱a̱ kisꞌindotꞌa yámíxa̱a̱, kó nde ngojín ni xi kichajaá. 28Kó ti̱ jachójoo̱ sebanda̱ ko̱jo xka̱ xi kjinie ndi̱je̱e̱, ko̱jo cho̱ xi bonkꞌá chꞌiaà, ki̱a̱ nínga kisꞌijña, xi kótsꞌèn katsoboaá nga katsꞌén nga ngo nga ngo.
29Kó Néná katsjaá Salomoo̱ kjo̱a̱kjínkón ko̱jo kjo̱a̱kjíntakón xi ꞌniú tsie, kó ti̱ katsjaá ngo ini̱ma̱ xi ꞌniú je, xikó má tsꞌén je tꞌa ndáchíkoón nínga tjín tsomií. 30Kó kjo̱a̱kjínkón xi kisꞌiee̱ nda̱ re Salomoo̱ jaꞌatjoón kjo̱a̱kjínkón xi kisꞌiee̱ ngayeje xota̱ xi chji̱a̱ni xtji̱e̱e̱n nínga fotjo tsꞌueé, ko̱jo ngayeje kjo̱a̱kjínkón xi kisꞌiee̱ xota̱ xi chji̱a̱ni nangi Ejiptoo̱. 31Kuí boá xí tsie ngase kjo̱a̱kjínkón kisꞌiee̱ ta̱bo̱a̱jiín ngayeje xota̱ xi tjín nga̱sondiee̱. Tsie ngase ta̱bo̱a̱jiín xi kisꞌiee̱ Etaa̱n nda̱ Esraitaa̱, ko̱jo ta̱bo̱a̱jiín xi kisꞌiee̱ Emaa̱n, ko̱jo Kalkoo̱l, ko̱jo Ndaraa̱, kui xi ndií Maoo̱l kamá, kó achichí ꞌniú kamáyàndikón jaꞌeén ngi̱jii̱n ngayeje xota̱ na̱xi̱ńdá xí kisꞌińdo nga ngo foaꞌatjiyajoo̱n. 32Kó ján mi̱ énkjínkón katsꞌénda, ko̱jo ngo mi̱ ko̱jo ún só xi nda. 33Kó ti̱ tsíchji̱a̱ kjo̱a̱a̱ yá xí tjiín, xi yaꞌanii̱ ndeskande yákón xi tjín nangi Líbano̱, ngaskande xka̱ isopo̱ xi fotjoo̱ xoó ndiꞌaa̱. Kó ti̱ tsíchji̱a̱ kjo̱a̱a̱ cho̱ xi tjín nijón seé nga, ko̱jo kjo̱a̱a̱ cho̱ xi tjiín tsja̱nga̱, ko̱jo kjo̱a̱a̱ cho̱ xi ꞌbifé yojoo̱, ko̱jo kjo̱a̱a̱ tji̱o̱ xi tjín ngi̱jin ndáfoaa̱. 34Kó ngayeje na̱xi̱ńdaá kjindibáni xota̱ xi kijíntꞌieé kjo̱a̱kjínkoón nda̱ re Salomoo̱, ko̱jo ngayeje já re xi chji̱a̱ni tꞌanangii̱ jachókoón nga, tsi̱ꞌe̱ nga tsintꞌieé kjo̱a̱kjínkoón.
Currently Selected:
1 Já ree̱ 4: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
