1 Já ree̱ 3
3
Salomoo̱ ixánjo̱ tsa̱kji̱ín nda̱ faraoo̱n nangi Ejiptoo̱
1Kó Salomoo̱ xkjín katsꞌén nda̱ faraoo̱n nangi Ejiptoo̱, ngatꞌa̱ ngo tsa̱kji̱ín nda̱ faraoo̱n ixánjo̱, kó ki̱a̱ jachójo̱ ki̱a̱ na̱xi̱ńdáꞌniuú Ndabii̱, ngaskande nga kamándo̱jo̱ó ndiꞌaa̱, ko̱jo Ndiꞌaa̱ Néná, ko̱jo xó xí tjichjáꞌyáni na̱xi̱ńdáꞌniú Jerusalee̱n.
2Ta̱nga xota̱ na̱xi̱ńdaá ki̱a̱ katsꞌénkꞌasꞌien kjo̱a̱tjó ki̱a̱ ngi̱ndie nínga nkꞌaa̱, ngatꞌa̱ kui ni̱xtjinján kji̱e̱ mandajín ngo Ndiꞌa xi tsi̱ꞌe̱ Néná.
Salomoo̱ tsíꞌaá kjo̱a̱kjínkón Néná
(2Kr 1:1-13)
3Kó Salomoo̱ achichí tjó kamaá Néná, kó bo̱a̱ tsꞌén kistsoꞌbá ndi̱yà nínga kistsoꞌbá Ndabi̱ na̱ꞌmii̱, kó nga katsꞌénkꞌieén cho̱, ko̱jo nga ítií nisije̱n Néná ki̱a̱ kijí ngi̱ndie nínga nkꞌaa̱. 4Kó nda̱ ree̱ ti̱ kijí na̱xi̱ńdáꞌniú Ngabaóo̱n, ngatꞌa̱ ki̱a̱ boá ngo ngi̱ndie xi ꞌniú ngase kamáyàndikón. Salomoo̱ ngaskande ngo mi̱ cho̱ ítí ki̱a̱ nínga tikón kui ṉchandikoón. 5Kó Néná jatjokjaà Salomoo̱ ki̱a̱ na̱xi̱ńdáꞌniú Ngabaóo̱n ngo ni̱xtji̱e̱n ngi̱jin ńjñaá, kó bi̱ katsoó:
—Ta̱ ni xi mejeénri chji̱e̱ꞌéní kó an tsjaa.
6Kó Salomoo̱, bi̱ katsó:
—Jí boá xi achichí kjo̱a̱ni̱ma̱takón kisꞌiee̱ kjo̱a̱a̱ mosòo̱ Ndabii̱, kui xi na̱ꞌmina kamá, ngatꞌa̱ kui achichí kamáꞌniátakoón nga kistsoꞌbá ngindyikin ji, kó kisꞌiee̱ kjo̱a̱kixi̱, ko̱jo kixi̱ kamá ngayejeni ini̱ma̱a̱, kuíni nga ta̱kó tiboeꞌée̱ kui kjo̱a̱ni̱ma̱takoón, ngatꞌa̱ katseꞌée̱ ngo ndí xí ko̱tíxoma ngajoo̱ kui, xikó kjima kui ni̱xtjin xi̱ꞌbi̱. 7Kó ngotꞌe̱ ꞌne̱ ji Ne xi tsa̱ꞌa̱n, jí boá xi kiniꞌínní nga an, xi mosòo̱ ma an, ka̱ma an re ngajoo̱ na̱ꞌmina Ndabii̱, ndatsi nga ja̱koxi̱ achichí kjindí án, kó nde bejín an kótsꞌèn kjo̱tjo an, ko̱jo tsi kótsꞌèn kꞌosꞌi̱e̱n an. 8Kó kui mosòo̱ ki̱a̱ tikónjin ngi̱jii̱n xota̱ na̱xi̱ńdá xí jí kachjeꞌéjin ji, ngo xtín xota̱ na̱xi̱ńdá xí achichí kjín má, xi nde jmíjín xi ka̱maxki̱i̱. 9Ja̱ míꞌaá nga ko̱e̱ꞌée̱ ngaꞌniú ini̱ma̱a̱ kui mosòo̱ tsi̱ꞌe̱ nga ka̱maa̱ ku̱i̱ntꞌiè, ko̱jo tsi̱ꞌe̱ nga ka̱maa̱ ko̱tíxomaa̱ na̱xi̱ńdáa̱, ko̱jo tsi̱ꞌe̱ nga ka̱maa̱ sku̱i̱e̱ cha̱n cha̱n ni xi ndaa̱ ko̱jo ni xi ndajiín, ngatꞌa̱, ꞌyá xí ka̱maa̱ ko̱tíxomaa̱ kui xota̱ na̱xi̱ńdá xí ꞌniú kjiín.
10Kó tsja kamaá Néná nga bo̱a̱ kjiꞌi ni xi tsíꞌá Salomoo̱. 11Kósꞌe̱ Néná, bi̱ katsoó:
—Kjo̱a̱a̱ nga kui nii̱ xi kichjiéꞌéní, kó nga jmí tsi kjín ni̱xtjin kichjiéꞌéní nga ku̱i̱ndyin ji, ti̱nde jmí kjo̱a̱cho̱n kichjiéꞌéjín ji, ti̱nde kichjiéꞌéjín ji nga si̱ꞌankꞌien xota̱ xi kondràa̱, kó nga ta̱sá kjo̱a̱kjínkón kichjiéꞌé ji tsi̱ꞌe̱ nga kixi̱ tsꞌén si̱ꞌindajin ji kjo̱a̱a̱ xotaa̱, 12ngotꞌe̱ ꞌne̱, sa̱ꞌinkjatjosón an ni xi kichjiéꞌéní, kó ngo ini̱ma̱ xi kjínkón ko̱jo xi makjiín tsjaa, kó nde kji̱e̱ ngojín xi je kisꞌie kui nii̱ xikoó ji, ti̱nde jmíjín xi kꞌuieé jaskan ji. 13Kó ti̱ tsjaa ni xi kichjiéꞌéjínní jí, tsjaa kjo̱a̱cho̱n ko̱jo kjo̱a̱yandikón, kó nde ngojín já ree̱ xi kꞌuié xikoó ji, ngayeje ni̱xtjin nga ku̱i̱ndyin ji. 14Kó tsi ki̱a̱ kꞌuíntjíngí ji ndi̱yàna, tsi̱ꞌe̱ nga si̱ꞌinkjatjosén ji kjo̱a̱kitina, ko̱jo kjo̱a̱botíxomana, xikó katsꞌén Ndabi̱ na̱ꞌmíi̱, kjín ngase ni̱xtjin tsjaa nga ku̱i̱ndyin ji.
15Kó nga jaꞌaá Salomoo̱, kamábe nga chi̱ni boá kui nii̱. Kó ngije kijí nginí na̱xi̱ńdáꞌniú Jerusale̱n, ki̱a̱ xió kasasien kje̱n nínga tikón koxa̱a̱ kjo̱a̱ꞌbíndaa̱ Néná, kó katsꞌénkꞌasꞌien kjo̱a̱tjó xi ꞌbítí, ko̱jo katsꞌénkꞌasꞌien kjo̱a̱tjó kjo̱a̱a̱ kjo̱a̱xioó, kó ti̱ tsie nichinie katsjaá ngayeje já mosoo̱ nga.
Salomoo̱ ítsꞌi̱yanii̱ nga atíxoma
16Kui ni̱xtjin jàn jachókoón nda̱ ree̱ jó ínchjínmasién, kó ki̱a̱ kixindyia ngindyi̱ko̱n kui. 17Kó ngo kui ínchjiín xi bi̱ katsó:
—¡Ji ndi̱a̱! Ti̱ꞌinjetakín ji, ta̱nga kui naa̱ ko̱jo an, ta̱ ngo ndiꞌa tindyionjne̱, kó ngo ndí kisꞌiena tji̱e̱nga ki̱a̱ kisꞌijña an ndiꞌaa̱ kui naa̱. 18Kó xi ma ján ni̱xtjin ngije katsenna kui ndií, kui naa̱ ti̱ katsen ndií kuí nga, nijan kixindyionjne̱ ngi̱ya ndiꞌaa̱, nde ngojín xota̱ xi kje̱ꞌe xí nijan kisꞌijñajo̱ ngasejne̱ ngi̱ya kui ndiꞌaa̱, ta̱ jó tsí kamájne̱ xi nijan kixindyionjne̱.
19Kó ngo ni̱xtji̱e̱n kꞌien ndií kui xota̱chjo̱on, ngatꞌa̱ ki̱a̱ kisꞌienié. 20Kó nga kamá masien ni̱xtji̱e̱n jastjíe̱n, kó iskjíbé ndína nga kjiꞌijñatꞌana tji̱e̱nga kjiꞌifé an, kó ki̱a̱ íjñá ndína nínga kjiꞌijña kui, kó ndí xí kꞌiee̱n kui, ki̱a̱ yíjñá nínga kjiꞌijña an. 21Kó nga jastjíe̱n an nga ta̱jño̱ó tsi̱ꞌe̱ nga tsjàa̱ chiki ndína katsaki, je kꞌien kui ndií, ta̱nga nga ta̱jño̱ó askotsijen cha̱n cha̱a̱n, kó kamábe an nga kuijín bo̱a̱ kui ndí xí án yeꞌe an.
22Kósꞌe̱ na̱ xi ingoo̱, bi̱ katsó:
—Jmí, ndína boá xi tikoón, kó ndí xí kꞌiee̱n kuí boá xi tse̱ ji.
Kó na̱ xi ingoo̱, bi̱ katsó nginí:
—Jmí, ndí tse̱ boá xi kꞌiee̱n, kó ndína boá xi tikoón.
Kó bo̱a̱ tsꞌén askjotí kui ínchjiín ngindyi̱ko̱n nda̱ ree̱. 23Kó nda̱ ree̱, bi̱ katsó:
—Kui xi̱ꞌbi̱: Ndína boá xi tikoón, kó ndíi̱ boá xi kꞌiee̱n, tsó, kó xi ingoo̱: Jmí, ndíi̱ boá xi kꞌiee̱n, kó ndína boá xi tikoón tsó.
24Kósꞌe̱ nda̱ ree̱, bi̱ katsó nginí:
—Ndibájo̱jnúꞌun ngo ki̱cha̱ndojó. Kó ngije tsangínjoo̱ nda̱ ree̱ ngo ki̱cha̱ndojó. 25Nda̱ ree̱, bi̱ katsó:
—Ndí xí tikoón jó tjín ti̱cháyájnú, kó masien te̱ꞌéjnúu̱ ngo kui xota̱chjo̱on, kó xi ngi masiee̱n te̱ꞌéjnúu̱ xota̱chjo̱on xí ingoo̱.
26Kósꞌe̱ kui xota̱chjo̱on xí tsi̱ꞌe̱ kui ndí xí tikoón, tsíchji̱a̱jo nda̱ ree̱ ngatꞌa̱ achichí ni̱ma̱ kamaá ini̱ma̱a̱ kjo̱a̱a̱ kui ndií, kó bi̱ katsó:
—¡Ji ndi̱a̱! Ta̱sá te̱ꞌéjnúu̱ kui naa̱ kui ndí xí tikoón, ta̱nga ngata̱ niꞌánkꞌiénjínjnú.
Ta̱nga na̱ xi ingoo̱, bi̱ katsó:
—Ti̱nde nga ánjín tsa̱ꞌa̱n, ti̱nde ngata̱ tse̱jín ngatama, ta̱sá ti̱cháyájnú.
27Kósꞌe̱ nda̱ ree̱, bi̱ katsó:
—Te̱ꞌéjnúu̱ kui naa̱ kui ndí xí tikoón, kó ngata̱ niꞌánkꞌiénjínjnú, kuí boá xi̱ꞌba̱ xi na̱aa̱n kui ndií.
28Kó ngayeje xota̱ Israee̱l tsintꞌié kjo̱a̱a̱ xikótsꞌèn katsꞌéndajin nda̱ ree̱ kui kjo̱a̱a̱, kó achichí katsakjónnií nda̱ ree̱, ngatꞌa̱ kamábe nga Néná boá xi katsjaá kjo̱a̱kjínkón xi je tikónjin ini̱ma̱a̱, tsi̱ꞌe̱ nga ka̱maa̱ nda̱ sa̱ꞌíndajin ngo kjo̱a̱.
Currently Selected:
1 Já ree̱ 3: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
