1 Já ree̱ 2
2
Kjo̱a̱botíxoma xi fetꞌani xi Ndabii̱ katsjaá nda̱ re Salomoo̱
1Ngije ma kjachó ni̱xtjin nga ko̱yà Ndabii̱, bi̱ katsoó nga atíxomaa̱ Salomo̱ ndií:
2Án, jè ki̱a̱ tsꞌénfí an ndi̱yà nínga fí ngayeje xota̱ xi tjín kuí nga̱sondiee̱. Ta̱nga ji, ti̱ꞌingaꞌní jí, kó xikó tsꞌén ngo xota̱ xi xchá, bo̱a̱ ti̱ꞌin ji. 3Ndaꞌyéꞌíi̱n kjo̱a̱botíxomaa̱ Néná, kui xi Ne tse̱, tsi̱ꞌe̱ nga ki̱a̱ ku̱i̱ńtje̱ ji ndi̱yà xí tsi̱ꞌe̱, kó ti̱ꞌinkjatjosén ji kjo̱a̱kitii̱, ko̱jo kjo̱a̱botíxomaa̱, ko̱jo kjo̱a̱kixi̱i̱, xikótsꞌèn kjitꞌa xo̱jo̱n kjo̱a̱kitii̱ Moisee̱, tsi̱ꞌe̱ nga kꞌuieé kjo̱a̱kjínkón ngayeje ni xi si̱ꞌin ji, ko̱jo ngayeje nínga kꞌuín jí, 4tsi̱ꞌe̱ nga Néná sa̱ꞌínkjatjosón én xí tsíchji̱a̱ kjo̱a̱a̱ an nga bi̱ katsó: Tsi ndíi̱ ki̱a̱ ko̱e̱je̱ ndi̱yàna, kó tsi kixi̱ ka̱ma ngindyikón án, nga ngayeje ini̱ma̱a̱ ko̱jo ngayeje yojoo̱ nga bo̱a̱ sa̱ꞌín, ja̱koxi̱ boá nga jmíni̱xtjin xcha̱jaa̱ ji xota̱ tji̱e̱ xi ko̱tíxomaa̱ na̱xi̱ńdá Israee̱l.
5Jè yé ji ni xi katsꞌénjo̱na Joaa̱b ndií Sarbiaa̱, ni xi katsꞌénjo̱ jó jájún ngito̱ko̱o̱ na̱xi̱ńdá Israee̱l, kui xi: Abnee̱r ndií Nee̱r, ko̱jo Amasaa̱ ndií Jetee̱r, nga katsꞌénkjiesón nga iskjitjón jiín ni̱xtjin nga xió kjiꞌi, ko̱jo nga jín xí tjon nga ma kjo̱a̱xchán indyiaá tji̱xin xí ꞌbíkjá nga̱xto̱n, ko̱jo tji̱xíndié xí yíyá. 6Bo̱a̱ ti̱ꞌin ji xikó kjiꞌi kjo̱a̱kjínkóo̱n, ta̱nga ngata̱ boeꞌéndièjín ji nga je xchá nga kju̱i̱e̱són, ti̱nde nga boeꞌéndièjín ji nga xió tsꞌén kju̱i̱e̱són.
7Ta̱nga ndií Barsilai̱, nda̱ xi chji̱a̱ni nangi Ngalaa̱nd nda ti̱ꞌinje̱ ji, kó te̱ꞌéndiè ji nga ki̱a̱ nijan kꞌuíndo ngi̱jii̱n xota̱ xi kjinie nichinie ki̱a̱ yámíxàa̱, ngatꞌa̱ kuí boá xi ki̱a̱ nijan kamájo̱na, kjiꞌanga tsꞌénmogàa̱ Absalo̱n ntsꞌie ji.
8Kó ti̱ ki̱a̱ tikónjoo̱ Simeii̱ ndií Jeraa̱, ndíndeè Benjaa̱, nda̱ xi chji̱a̱ni nangi Baurii̱n, kui xi achichí chꞌo katsóna ni̱xtjin nga kijí an nangi Maanaii̱n, ta̱nga ti̱kuíní bo̱a̱ xi jatjajen nga kijíkjaꞌáyíndi̱yàna ki̱a̱ ndejèꞌ Jorndaa̱n, kó án katsjáa̱ ndso̱ꞌba án nga bi̱ kixiáa̱n: Ki̱cha̱jín sa̱ꞌinkꞌién ñaa̱ ji. 9Ta̱nga ngotꞌe̱ ꞌne̱ ngata̱ niꞌínjetakínjíi̱n, ngatꞌa̱ nda̱ xi kjínkón boá ji, kó jè ye ji kótsꞌen ko̱ndókjo̱e̱je ji kui, kó ndatsi je xchá, chꞌotsꞌèn nga niꞌánkꞌién.
Nga kꞌien Ndabii̱,
(1Kr 29:26-30)
10Kó kꞌien Ndabii̱, kó ki̱a̱ nijan akjanijín nínga kisꞌinijín xi xchaá, ki̱a̱ na̱xi̱ńdáꞌniú xí tsi̱ꞌe̱. 11Yichán nó kamaá nga atíxoma Ndabii̱ ki̱a̱ na̱xi̱ńdá Israee̱l, yito nó kamaá nga atíxoma ki̱a̱ nangi Ebroo̱n, kó kantié ján nó kamaá nga atíxoma ki̱a̱ na̱xi̱ńdáꞌniú Jerusale̱n. 12Kó Salomoo̱ kisꞌijñasón yáxíríe̱ nínga atíxoma Ndabi̱ na̱ꞌmii̱, kó ꞌniú kisꞌijña ngi̱ndie nínga atíxoma.
Nga kꞌien Andoniyaa̱
13Kósꞌe̱ Andoniyaa̱, kui xi ndií Angii̱t kamá, kijíkoón na̱ Betsabee̱, na̱aa̱n Salomoo̱, kó bi̱ katsó kui xota̱chjo̱on:
—A kjo̱a̱xió boá nga kjoéꞌe̱ ji.
Kó kui nda̱a̱, bi̱ katsó:
—Jo̱o̱n, kjo̱a̱xió boá nga kjoéꞌe̱ an.
14Kósꞌe̱ bi̱ katsó ngase:
—Ngo ni tikónna xi xiyaá ji.
Kó bi̱ katsó na̱ Betsabee̱:
—Ndókjo̱e̱ ji.
15Kó bi̱ katsó kui nda̱a̱:
—Jè yé ji nga án xi kotixoma an kui ngindiee̱ katsaki, kó nga ngayeje xota̱ Israee̱l je ndyi̱koyaa̱ nga an xi kotixoma an, ta̱nga kasasikjo kui nii̱, kó ta̱sá ntsꞌié án atíxoma, ngatꞌa̱ Néná boá xi katsjaá kui ngi̱ndiee̱. 16Ngotꞌe̱ ꞌne̱, ngo ni ꞌniú tsꞌénmíꞌaá jí, kó jmí ngata̱ séjínní.
Kó na̱ Betsabee̱, bi̱ katsó:
—Ndókjo̱e̱je ji.
17Kósꞌe̱ bi̱ katsó Andoniyaa̱:
—ꞌNiú míꞌaá, nga ndókjo̱e̱je ji nda̱ re Salomoo̱, ngatꞌa̱ be án nga jo̱o̱n ka̱tso̱o̱ ni xi chji̱e̱ꞌèe̱, tsi̱ꞌe̱ nga tsja̱ana nga chjo̱onna ka̱ma na̱ Abisaa̱j, na̱ xi chji̱a̱ni nangi Sunee̱n.
18Kó na̱ Betsabee̱ bi̱ katsó:
—Ndakjiꞌi, an kuichjiájo an ree̱ kjo̱a̱a̱ ji.
19Kósꞌe̱ na̱ Betsabee̱ kijíkoón nda̱ re Salomoo̱ tsi̱ꞌe̱ nga ku̱i̱chji̱a̱jo kjo̱a̱a̱ Andoniyaa̱. Kó nda̱ ree̱ jastjíe̱n nga kijíkjaꞌáyíndi̱yà, kó kasasienxtien ngindyi̱ko̱n na̱ Betsabee̱, sꞌe̱ kisꞌijñasón nginí ngi̱ndie nínga botixómá, kó íjñaá ngo yáxíríe̱ na̱aa̱n, kó ki̱a̱ kisꞌijñatꞌaa̱ xtji̱e̱e̱n tsja fojní. 20Kó bi̱ katsó kui naa̱:
—Ngo ni chichí míꞌaá ji xi̱ꞌin, kó jmí ngata̱ séjínní.
Kó nda̱ ree̱ bi̱ katsó:
—Chji̱e̱ꞌe ji na̱an, ngatꞌa̱ sa̱ꞌinkjatjosón án ni xi chji̱e̱ꞌéní jí.
21Kó bi̱ katsó kui naa̱:
—Te̱ꞌéndiè ji nga ntsꞌie Andoniyaa̱ ngatꞌíjñajo̱ na̱ Abisaa̱j xi chji̱a̱ni nangi Sunee̱n.
22Kó nda̱ re Salomoo̱, bi̱ katsoó na̱aa̱n:
—Ánní nga na̱ Abisaa̱j kui xi chji̱a̱ni nangi Sunee̱n tichjiéꞌé ji tsi̱ꞌe̱ nga chjo̱on Andoniyaa̱ ka̱ma. Ti̱ chji̱e̱ꞌe ji tsi̱ꞌe̱ nga kui ko̱tíxoma nga, ngatꞌa̱ kuí boá xi ntsꞌié án xi xchaá, kó ki̱a̱ nijan ma chináꞌmi Abiataa̱r, ko̱jo Joaa̱b kui xi ndií na̱ Sarbiaa̱.
23Kósꞌe̱ nda̱ re Salomoo̱ katsjá tsꞌoa nga katsꞌénkjién jaꞌeén Néná, nga bi̱ katsó: Néná ngatsꞌénjéna, kó ngatásón ngasee̱ ni xi ndajín, tsi Andoniyaa̱ tsíꞌájín kui nii̱ tsi̱ꞌe̱ nga ni xi ndajín ka̱maa̱ kui. 24Kó ngotꞌe̱ ꞌne̱, ja̱koxi̱ boá nga tikón Ndi̱a̱ná, kó nga kuí boá xi katsjána ngaꞌniú, kó katsjána ngi̱ndie nínga atíxoma Ndabi̱ na̱ꞌmina, kó katsjána ngo xota̱ tji̱e̱, xikó má katsó nga ka̱ma, nga tsꞌénxiya an nga Andoniyaa̱ ngotꞌe̱ má ko̱yà.
25Kósꞌe̱ nda̱ re Salomoo̱ katsangiya Benaiyaa̱ ndií Joyandaa̱, kó kijí sꞌe̱ katsꞌénkꞌién Andoniyaa̱.
Nga ikiyotji̱ngii̱ chináꞌmi Abiataa̱r
26Kó nda̱ ree̱, bi̱ katsoó chináꞌmi Abiataa̱r: Tꞌen ji nangi Anatoo̱t, nínga tikón tꞌanangìi̱, ngatꞌa̱ chjiéngá si̱ꞌankꞌiee̱n katsaki, ta̱nga ngotꞌe̱jín bo̱a̱ nga si̱ꞌankꞌieen, ngatꞌa̱ jí boá xi kichꞌié ji koxa̱a̱ kjo̱a̱ꞌbíndaa̱ Néná ngindyi̱ko̱n Ndabii̱, kui xi na̱ꞌmina, kó achichí kjo̱a̱ni̱ma̱ nijan ikitjatíje̱ ji na̱ꞌmina.
27Kó bo̱a̱ tsꞌén Salomoo̱ jaꞌáxiín xaá Abiataa̱r nga kui xi ka̱ma chináꞌmii̱ Néná, tsi̱ꞌe̱ nga jatjosón ni xi katsó Néná, kjo̱a̱a̱ xota̱ ndiꞌaa̱ Elii̱ ki̱a̱ na̱xi̱ńdáꞌniú Siloo̱.
Nga kꞌien Joaa̱b
28Kó kui eén jachótꞌaa̱ Joaa̱b, kó nga ko̱jo Joaa̱b jè nijan kamá Andoniyaa̱, ndatsi jmí tsi nijan kamá Absaloo̱n, Joaa̱b tsangani ki̱a̱ ndiꞌandikoón Néná, kó ki̱a̱ kisꞌijñatꞌa nínga síndo kui ni xi ja̱kon ndi̱ja̱ koo̱n ki̱a̱ ṉchandikoón. 29Kó kiꞌmíyaà nda̱ re Salomoo̱ nga Joaa̱b ki̱a̱ tsangani nínga tikón ndiꞌandikoón Néná, kó nga ki̱a̱ je tikón ki̱a̱ tꞌa ṉchandikoón. Kósꞌe̱ Salomoo̱ katsangiyaa̱ Benaiyaa̱ ndií Joyandaa̱, nga bi̱ katsoó: Tꞌen ji, kó ti̱ꞌinkꞌin ji kui nda̱a̱.
30Kósꞌe̱ Benaiyaa̱ tsꞌasꞌien ki̱a̱ ndiꞌandikoón Néná, kó bi̱ katsoó Joaa̱b:
—Bi̱ tsó nda̱ ree̱, tja̱tje xò jí.
Kó bi̱ katsó kui nda̱a̱:
—Jmí, ta̱sá kꞌi̱e̱ ngatꞌien an.
Kósꞌe̱ Benaiyaa̱ kijíjoo̱ kui eén nda̱ ree̱, nga bi̱ katsoó:
—Bi̱ tsꞌén tsíchji̱a̱ Joaa̱b, kó bi̱ katsóna. 31Kó nda̱ ree̱, bi̱ katsoó:
—Bo̱a̱ ti̱ꞌin ji xikó katsó kuí. Ti̱ꞌinkꞌin ji, kó tjanijín ji. Ngatꞌa̱ bo̱a̱ tsꞌén chje̱ꞌéxínní án ko̱jo ndiꞌaa̱ na̱ꞌmina kui jín xí iskjitjón kjo̱a̱nda Joaa̱b.
32Néná ti̱kuíní xi sa̱ꞌínkꞌíchjí jín xí iskjitjón, ngatꞌa̱ nde kamábejín na̱ꞌmina nga kuí boá xi ki̱cha̱ katsꞌénkjiesónni já xí kixi̱ ngasee̱, ko̱jo xi nda ngase ta̱bo̱a̱jiín kuí, kui xi Abnee̱r ndií Nee̱r, nda̱ ngito̱ko̱o̱ jájuún Israee̱l, ko̱jo Amasaa̱ ndií Jetee̱r, nda̱ ngito̱ko̱o̱ jájuún nangi Jundáa̱. 33Jiín kui jaá, ngatamajénií ti̱kuii Joaa̱b, ko̱jo ngayeje xota̱ tji̱e̱e̱ ngatsjéni̱xtjin, ta̱nga kjo̱a̱a̱ Ndabii̱, ko̱jo xota̱ tji̱e̱e̱, ko̱jo xota̱ ndiꞌaa̱, ko̱jo ngi̱ndie nínga atíxoma kui, ngatsjéni̱xtjin nga kꞌuieé kjo̱a̱xió xi tsjá Néná.
34Kósꞌe̱ Benaiyaa̱, ndií Joyandaa̱ kijínijíngí, kó katsꞌénkꞌién Joaa̱b, kósꞌe̱ ki̱a̱ yínijín ti̱ ki̱a̱ ndiꞌaa̱ Joaa̱b ki̱a̱ nangi kixií. 35Kó nda̱ ree̱ katsjaá xaá Benaiyaa̱ nga kui kꞌuijñá ngajoo̱, kui xi ndií Joyandaa̱ kamá, kó chináꞌmi Sandoo̱k katsjáxaá nda̱ ree̱ tsi̱ꞌe̱ nga kui xi ka̱ma chináꞌmi, ngajoo̱ Abiataa̱r.
Nga kꞌien Simeii̱
36Jaskan nda̱ ree̱ katsangiyakjaꞌá Simeii̱, kó bi̱ katsoó:
—Ti̱ꞌinde ji ngo ndiꞌa ki̱a̱ na̱xi̱ńdáꞌniú Jerusale̱n, kó ki̱a̱ ti̱ndyin ji, kó ngata̱ ta̱jñájín fotje ji, 37ngatꞌa̱ jè yé cha̱n cha̱n ji nga ni̱xtjin nga kjo̱tje ji, kó nga ku̱i̱tja̱tí ji xo̱ngàndántꞌié Sendroo̱n, ngatamaye ji nga ja̱koxi̱ boá nga ko̱yè jí, kó jíi̱n ti̱ jíní bo̱a̱ xi sꞌi̱nié ji.
38Kó Simeii̱, bi̱ katsoó nda̱ ree̱:
—Ndakjiꞌi ni xi kase ji, xikó katsó ndi̱a̱na kui xi nda̱ ree̱, bo̱a̱ má sa̱ꞌín kui mosòo̱.
Kó Simeii̱ achichí tsie kamaá nga kisꞌijña ki̱a̱ na̱xi̱ńdáꞌniú Jerusale̱n. 39Ngije jaꞌa ján nó, jó já mosoo̱ Simeii̱ tsangaꞌma nga kijí xtji̱e̱e̱n na̱xi̱ńdáꞌniú Ngaa̱t, nínga tikón nda̱ re Akii̱, kui xi ndií Maakaa̱ kamá, kó bi̱ kiꞌmií Simeii̱: Jéꞌe̱n ki̱a̱ na̱xi̱ńdáꞌniú Ngaa̱t síndo já mosòo̱. 40Kó Simeii̱ jastjíe̱n, ísoón xiri̱e̱e̱ bórroó, kó kijí na̱xi̱ńdáꞌniú Ngaa̱t, ngindyi̱ko̱n Akii̱ nga kijíngase mosoo̱. Kó bo̱a̱ tsꞌén kijí Simeii̱ nga kijíkjaꞌá já mosoo̱ ki̱a̱ na̱xi̱ńdáꞌniú Ngaa̱t. 41Kósꞌe̱ kiꞌmíyaà Salomoo̱ nga Simeii̱ jatjoni na̱xi̱ńdáꞌniú Jerusale̱n, kó nga kijí ngaskande na̱xi̱ńdáꞌniú Ngaa̱t, kó nga je jeꞌe nginí. 42Kósꞌe̱ nda̱ ree̱ katsangiyakjaꞌá Simeii̱, kó bi̱ katsoó:
—A mí tsí án boá xi bo̱a̱kixiaan nga ko̱e̱ꞌé ji ndso̱ꞌbe ngindyi̱ko̱n Néná, nga kjiꞌanga ni̱xtjin nga kjo̱tje ji, kó nga xín ngindie kꞌuín jí, ja̱koxi̱ boá nga ko̱yè jí. Kó jí bi̱ kase ji: Nda kjíꞌí kui én xí tsintꞌie an 43Kó ánní nga kiniꞌínkjatjosénjín ji ni xi je kasée̱ Néná, ko̱jo kui kjo̱a̱botíxoma xi an katsjaa. 44Kó nda̱ ree̱, bi̱ katsó ngasee̱ Simeii̱:
—Ji jè yé ji ngayeje ni xi ndajín xi kiniꞌínje̱ ji na̱ꞌmina Ndabii̱, kó ti̱kuíní ini̱màa̱ xi be kui nii̱. Ngotꞌe̱ ꞌne̱, Néná boá kꞌo̱jminieé ni xi ndajín xi kiniꞌín ji, 45ta̱nga nda̱ re Salomoo̱ ka̱machikonñé, kó nínga atíxoma Ndabii̱ ngatsjéni̱xtjin nga ꞌniú kꞌuijñá ngindyi̱ko̱n Néná.
46Kósꞌe̱ nda̱ ree̱ katsangiya Benaiyaa̱ ndií Joyandaa̱, kó kui nda̱a̱ kijí, kó katsꞌénkꞌién Simeii̱. Kó bo̱a̱ tsꞌén nga ꞌniú kisꞌijña ngase ngi̱ndie nínga botixómá Salomoo̱.
Currently Selected:
1 Já ree̱ 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
