1 Já ree̱ 21
21
Akaa̱b ko̱jo ngi̱ndie nínga tjitjieé tostsi̱je̱è Naboo̱t
1Jaskan ngije kamá kui nii̱, ngo nda̱ xi ꞌmí Naboo̱t xi chji̱a̱ni nangi Jesree̱l, kisꞌijñaa̱ ngo ngi̱ndie nínga maxchá tostsi̱jè, ki̱a̱ tꞌa ndiꞌa nínga botixómá Akaa̱b, nda̱ ree̱ nangi Samariaa̱. 2Kó Akaa̱b tsíchji̱a̱jo Naboo̱t, nga bi̱ katsoó:
—Te̱ꞌéní kui ngi̱ndie nínga tjitjíe̱ tostsi̱je̱è, tsi̱ꞌe̱ nga ki̱a̱ kꞌuítji̱e̱ an ni tjié, ngatꞌa̱ ki̱a̱ tikón tiña ndiꞌana, kó kje̱ꞌe ngi̱ndie nínga tjitjíe̱ tostsi̱je̱è, xi nda ngase tsjaa, ko̱jo tsi ndakjiꞌi maa̱, ta̱sá to̱ntiboa kꞌuichjíñaá xikó kjiꞌi chjií kui ngi̱ndiee̱.
3Ta̱nga Naboo̱t, bi̱ katsoó Akaa̱b:
—¡Jmí, Néná nga tsjandièjín, nga ji tsjaa tꞌanangi xi íjñána xota̱ xi xchána!
4Kó Akaa̱b achichí ndasen kamaá nga kijí ndiꞌaa̱, kó achichí katsꞌénxchán kjo̱a̱a̱ ni xi katsoó Naboo̱t, kui nda̱ xi chji̱a̱ni nangi Jesree̱l, nga bi̱ katsoó: Jmí ni tsjajaán ni xi katsjána xota̱ xi xchána. Kó kisꞌiesón nga̱són ṉchaa̱n, yíꞌmá kje̱n, kó ngiti̱ jmí nichinie iskjiniejín. 5Kó jachókoón na̱ Jesabee̱ chjo̱ón, nga bi̱ katsoó:
—Míkjo̱a̱a̱ nga ndasen tikón kon a̱si̱énni̱xtjìi̱n, kó ánní nga jmí ni tichinijín ji.
6Kó bi̱ katsó kui nda̱a̱:
—Ngatꞌa̱ jè tsíchji̱a̱jo an Naboo̱t, nda̱ xi chji̱a̱ni nangi Jesree̱l, kó bi̱ kixiáa̱n: Tatíníní ngi̱ndie nínga tjitjieé tostsi̱je̱è, ko̱jo tsi mejeén, kje̱ꞌe ngi̱ndie nínga tjitjíe̱ tostsi̱je̱è tsjaa. Ta̱nga kui, bi̱ katsóna: Jmí, tsjajaán ngi̱ndie nínga tjitji̱e̱na tostsi̱je̱è.
7Kó na̱ Jesabee̱ chjo̱ón, bi̱ katsoó:
—A jijín xí botíxome ji kꞌi̱e̱ na̱xi̱ńdá Israee̱l ngotꞌe̱. ¡Ti̱sítji̱n ji, kó chi̱ni ji nichinie, kó tsja ngatꞌieé ini̱ma̱a̱! ¡Án boá xí tsjaa ngi̱ndie nínga tjitjieé tostsi̱je̱è Naboo̱t, kui xota̱ xi chji̱a̱ni nangi Jesree̱l!
8Kósꞌe̱ na̱ Jesabee̱ katsꞌénda ngo xo̱jo̱n ngajoo̱ Akaa̱b, sꞌe̱ sti̱ngaroo̱ yeꞌeé kui xo̱jo̱o̱n, xikoó tsi ngo seyo̱, kó katsangiyajo̱ xota̱ xi xchaá ko̱jo xota̱ xi ꞌniú yandikón xi nijan síndo ki̱a̱ na̱xi̱ńdáꞌniuú ko̱jo Naboo̱t. 9Kó bi̱ tsó xo̱jo̱n xi katsangiya:
Ti̱ꞌankjaꞌájnú kjindiá yojojnú, kó ki̱a̱ tꞌíjñájnú Naboo̱t ngindyi̱ko̱n xota̱ na̱xi̱ńdaá, 10kó jó já xí ꞌniú ndajín tꞌíndojnú kje̱n, tsi̱ꞌe̱ nga kui xi ko̱óngítaꞌin, nga bi̱ ka̱tso̱: ¡Jí xí chꞌo kase ji nga kandokjo̱e̱taꞌin ji Néná ko̱jo nda̱ ree̱! Kósꞌe̱ ꞌna̱xiéjnú kui ngi̱ndiee̱, sꞌe̱ ndi̱jo̱ tjayàjnú tsi̱ꞌe̱ nga si̱ꞌankꞌien.
11Kó xota̱ xi chji̱a̱ni na̱xi̱ńdáꞌniuú, kui xi xota̱ xi xchaá, ko̱jo xota̱ xi ꞌniú nkꞌa xaá xi síndo ki̱a̱ na̱xi̱ńdáꞌniuú, katsꞌén ni xi katsó na̱ Jesabee̱, xikó má kjiꞌi kjo̱a̱ xi katsjá, xí ítꞌa kui xo̱jo̱n xi katsangiya kui naa̱. 12Kó katsóyaà xotaa̱ nga kjo̱a̱ꞌa kjindiá, kósꞌe̱ ikꞌíjñá Naboo̱t ngindyi̱ko̱n xota̱ na̱xi̱ńdaá, 13kósꞌe̱ jó já xí ꞌniú ndajín, kisꞌińdo kje̱n kui nda̱a̱, kó kui jaá yíngítaꞌin Naboo̱t ngindyi̱ko̱n xota̱ na̱xi̱ńdaá nga bi̱ katsoó: ¡Naboo̱t chꞌo katsó nga tsíchji̱a̱taꞌin Néná ko̱jo nda̱ ree̱! Kósꞌe̱ tsangínjo̱ Naboo̱t ki̱a̱ ndi̱tsee̱n na̱xi̱ńdáꞌniuú, kó ki̱a̱ akjaya ndi̱jo̱ nga kiniꞌánkꞌién. 14Sꞌe̱ jaskan kanangiyaa̱ én na̱ Jesabee̱ nga bi̱ kiꞌmií: Naboo̱t jè akjaya ndi̱jo̱, kó jè kꞌien.
15Kó nga tsintꞌié na̱ Jesabee̱ nga ndi̱jo̱ je akjaya nga kiniꞌánkꞌién Naboo̱t, bi̱ katsoó Akaa̱b:
—Ti̱sítji̱n ji, kó chjábé jí kui ngi̱ndie nínga tjitjieé tostsi̱je̱è xí tsi̱ꞌe̱ Naboo̱t, kui xota̱ xi nangi Jesree̱l tsíchji̱a̱ni, kui xi kamámejénjiín atíñaá, ngatꞌa̱ Naboo̱t jè kꞌien.
16Kó nga tsintꞌié Akaa̱b nga je kꞌien Naboo̱t, jastjíe̱n, kó kijí nínga tjitjíe̱ tostsi̱je̱è Naboo̱t, kui nda̱ xi chji̱a̱ni nangi Jesree̱l, tsi̱ꞌe̱ nga kui skjíbé kuí ngi̱ndiee̱. 17Kósꞌe̱ Néná tsíchji̱a̱jo Eliyaa̱, nda̱ xi chji̱a̱ni nangi Tisbee̱, kó bi̱ katsoó:
18Ti̱sítji̱n ji, kó tꞌen ji nínga tikón Akaa̱b, nda ree̱ na̱xi̱ńdá Israee̱l, kui xi tikón nangi Samariaa̱, ngotꞌe̱, ki̱a̱ tikón ki̱a̱ nínga tjitjieé tostsi̱je̱è Naboo̱t, nínga je kijíkatsijee̱n tsi̱ꞌe̱ nga kui skjíbé. 19Kó bi̱ tꞌíi̱n: Bi̱ tsó Néná: A xota̱ kiniꞌínkꞌín ji, kó ti̱ a jè kachjeꞌéxíi̱n ni xi tsi̱ꞌe̱ nga. Kó bi̱ tꞌín ngasée̱: Bi̱ tsó nginí Néná: Ti̱ ki̱a̱a̱ ngi̱ndie nínga ńñaá katomájón jiín Naboo̱t, ti̱ ki̱a̱a̱ xto̱májón jín tse̱ nga.
20Kó Akaa̱b, bi̱ katsoó Eliyaa̱:
—A jè kasakoo̱ an nga kondra̱.
Kó bi̱ katsó Eliyaa̱:
—Jo̱o̱n, jè kasakona ji, ngatꞌa̱ akatíñí ji yojòo̱ tsi̱ꞌe̱ nga ni xi ndajín si̱ꞌin ji ngindyi̱ko̱n Néná. 21Ngotꞌe̱ ꞌne̱, án boá xi yaꞌa an ni xi ndajín xi kji̱ndi̱bánieé, kó sa̱ꞌinkjié ndo̱jò ndójo̱ án ngayeje xota̱ tji̱e̱e̱, kó sa̱ꞌinkjié an ngayeje jáxíꞌín xi chji̱a̱ni xota̱ tji̱e̱e̱ Akaa̱b, tsi moso̱ xi kastiñá ko̱jo tsi moso̱ xi tjimándé ki̱a̱ na̱xi̱ńdá Israee̱l. 22Kó án boá xi sa̱ꞌin an nga bo̱a̱ ka̱maa̱ xota̱ ndiꞌàa̱, xikó kamaá ndiꞌaa̱ Jeroboaa̱n ndií Nabaa̱t, ko̱jo xikoó xota̱ ndiꞌaa̱ Baasaa̱ ndií Ayiaa̱, ta̱ngatꞌanii̱ nga an kiniꞌínkjénní, ko̱jo kjo̱a̱a̱ nga ta̱ngatꞌanii̱ ji nga katsꞌénjé xota̱ Israee̱l. 23Kó kjo̱a̱a̱ na̱ Jesabee̱, ti̱ bo̱a̱ ti̱ tsꞌén tsíchji̱a̱ Ndi̱a̱ná nga bi̱ katsó: Ńñaá skji̱ni̱e̱ na̱ Jesabee̱ ki̱a̱ tꞌa xoó nangi Jesree̱l. 24Kui xota̱ tji̱e̱e̱ Akaa̱b xi ki̱a̱ ko̱yà ngi̱jii̱n na̱xi̱ńdáꞌniuú, ńñaá skji̱ni̱e̱, kó xi ki̱a̱ ko̱yà ngi̱jin kꞌijñá jàn, ni̱sie xi tjín nkꞌa jàn skji̱ni̱e̱.
25Nga ja̱koxi̱ nde ngojín xi kisꞌie xi bo̱a̱ katsꞌén xikoó Akaa̱b, kui xi atíñá yojoo̱ nga katsꞌén ni xi ndajín ngindyi̱ko̱n Néná, ngatꞌa̱ na̱ Jesabee̱ chjo̱ón indyiáꞌá, 26kó achichí ni xi ꞌniú chꞌokjiꞌi xi katsꞌén, nga ki̱a̱ kijítji̱ngii̱ a̱sie̱én ne xi tsꞌénda xotaa̱, xikó katsꞌén xota̱ Amoo̱r, kui xota̱ xi Néná tsꞌaxié ngindyi̱ko̱n xota̱ Israee̱l.
27Kó nga tsintꞌié kuí eén Akaa̱b, iskjíndiyájón ńjñoo̱, kó ńjño tokjuie tsajá, ko̱jo katsꞌénkjaꞌa kjindiá yojoo̱, kó kisꞌifé nga ńjño tokjuiee̱ yajá, kó ni̱ma̱kjo̱a̱ kisꞌijña. 28Kó Néná tsíchji̱a̱jo Eliyaa̱, nda̱ xi chji̱a̱ni nangi Tisbee̱, kó bi̱ katsoó: 29A jè kamáyè ji nga Akaa̱b achichí ni̱ma̱kjo̱a̱ tjítsꞌén yojoo̱ ngindyikón Án. Ta̱ngatꞌanii̱ nga ni̱ma̱kjo̱a̱ je katsꞌén yojoo̱ ngindyikón Án, jmí ni xi ndajiín sa̱ꞌinjo̱jín An nga kꞌuijñá nga̱sondie, ta̱sá nga ko̱tíxoma ndií, kji̱ndi̱bájo̱ An kui ni xi ndajiín, tsi̱ꞌe̱ nga kꞌo̱kanieé xota̱ ndiꞌaa̱.
Currently Selected:
1 Já ree̱ 21: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
