1 Já ree̱ 20
20
Nda̱ ree̱ nangi Siriaa̱ askjanjo̱ xota̱ Samariaa̱
1Kósꞌe̱ Bee̱n-Andaa̱nd nda̱ ree̱ nangi Siriaa̱, ítikó ngayeje jájuún, kó kantié jó kamá já re xi nijan kamá xi kisꞌiee̱ ndi̱je̱ ko̱jo karreta̱, xi kijíkjánjo̱ nangi Samaria̱, kó jaꞌatjiyajoo̱n kui ngi̱ndiee̱, sꞌe̱ askjanjo̱.
2Kó katsangiya chji̱ni̱e̱ꞌén ki̱a̱ na̱xi̱ńdáꞌniuú, nínga tikón Akaa̱b, nda̱ ree̱ na̱xi̱ńdá Israee̱l, nga bi̱ katsoó: 3Bi̱ tsꞌén je tsíchji̱a̱ Bee̱n-Andaa̱nd: To̱ntiboàa̱ ko̱jo to̱nsiniée̱ tsa̱ꞌa̱n boá, ko̱jo ínchjíi̱n, ko̱jo ndíi̱ xi achichí tsjákón ngasee̱, tsa̱ꞌa̱n boá nga.
4Kó nda̱ ree̱ na̱xi̱ńdá Israee̱l, bi̱ katsó: Ta̱ xikó sé ji ndi̱a̱, ji xi rena ji, jí chji̱a̱ni an, ko̱jo ngayeje ni xi tjínna. 5Kó já chji̱ni̱e̱ꞌe̱én ingo ndi̱yà jachó nginí nínga tikón Akaa̱b, kó bi̱ katsoó: Bi̱ tsó én xí katsangiyaa Bee̱n-Andaa̱nd: Nga ja̱koxi̱ to̱ntiboàa̱ ko̱jo to̱nsiniée̱, ko̱jo ínchjíi̱n, ko̱jo ndíi̱, chjiéngá án ko̱e̱ꞌéní. 6Ngatꞌa̱ tsi jmí, ndyiojón kui chi̱bo̱a̱a̱, sangiyaa já moso̱na xi ko̱ngase ndiꞌàa̱, ko̱jo ndiꞌaa̱ mosòo̱, kó skjíbé ngayeje ni xi tjiín xi tsjakon maa ji, kó kjo̱jo.
7Kó nda̱ ree̱ na̱xi̱ńdá Israee̱l tsíchji̱a̱a̱ ngayeje xota̱ xi xchaá na̱xi̱ńdaá, kó bi̱ katsoó:
—Ngatamakjínjnú ngotꞌe̱, kó tsitsíjenjnúu̱ nga kui nda̱a̱, nga ni xi ndajín boá xi tsꞌénmongase nga sa̱ꞌínjo̱na, ngatꞌa̱ je katsangiya xota̱ nga tsꞌénmíꞌá chjo̱onna, ko̱jo ndína, ko̱jo to̱ntiboana, ko̱jo to̱nsiniéna, kó jmí tsi jmí kixiáa̱n.
8Kó ngayeje xota̱ xi xchaá, ko̱jo ngayeje xota̱ na̱xi̱ńdaá, bi̱ katsoó:
—Ngata̱ ndaꞌyéꞌínjíi̱n, ti̱nde ngata̱ niꞌínjín ji ni xi tsꞌénmíꞌaá nga si̱ꞌin ji.
9Kósꞌe̱ Akaa̱b, bi̱ katsoó já chji̱ni̱e̱ꞌe̱én Bee̱n-Andaa̱nd:
—Bi̱ tꞌínjnúu̱ ndi̱a̱na nda̱ ree̱: Sa̱ꞌin an ngayeje ni xi tjón kichjiéꞌèe̱ kui mosòo̱, ta̱nga kui ni xi̱ꞌbi̱ ka̱májínna sa̱ꞌin an. Kó kui já chji̱ni̱e̱ꞌe̱én kijí, kó katsóyaà nda̱ ree̱ kui ni xi kiꞌmií.
10Kó Bee̱n-Andaa̱nd, ti̱ katsangiya nginí ingo én xí tsó: Ndajín ngatsꞌénjo̱na nee̱, kó ngaskande ngatásón ngasee̱, nga ngiti̱ jmí xa̱ kꞌuiéjín ngase ki̱a̱ nangi Samaria̱ xi ka̱maa̱ skjíbé ngo tji̱ngo̱ xota̱ na̱xi̱ńdá xí tjimátji̱ngina.
11Ta̱nga nda̱ ree̱ na̱xi̱ńdá Israee̱l, bi̱ katsó nginií: Bi̱ tꞌínjnúu̱: Ngo nda̱jun xi je tikónda nga ko̱e̱je̱kján, chjiénjín nga bo̱a̱ ka̱tso̱ nga je katsꞌén.
12Kó nga tsintꞌié kuí eén, kui nda̱ ree̱, ko̱jo já re xi ki̱a̱ síndo ndiꞌaa̱ nínga ndyi̱ꞌbi, bi̱ katsoó já mosoo̱: Ti̱ndyiondajnú.
Kó kui jaá kisꞌińdonda nga skjánjo̱ xotaa̱ na̱xi̱ńdáꞌniuú.
Akaa̱b katsꞌeén nga askjanjo̱ Bee̱n-Andaa̱nd
13Kó ngo nda̱chji̱ni̱e̱ꞌe̱én Néná jachókoón Akaa̱b, nda̱ ree̱ na̱xi̱ńdá Israee̱l, kó bi̱ katsoó:
Bi̱ tsó Néná: A je kamáyè ji kui jájún xi kjín maá. Ngotꞌe̱ ꞌne̱, Án boá xi tjítsꞌenkꞌasꞌien An ngi̱ya ndse̱ ji, tsi̱ꞌe̱ nga xche̱ ji nga Án boá xi Néná Án.
14Kó Akaa̱b, bi̱ katsó:
—Kó ꞌyá xí ko̱síko̱jona kui kjo̱a̱xcha̱án.
Kó bi̱ katsó kui nda̱ chji̱ni̱e̱ꞌe̱én:
—Bi̱ tsó Néná: Já mosoo̱ já ngito̱ko̱o̱ nangi xi̱xi̱i̱ boá xi sa̱ꞌínkjién.
Kó Akaa̱b, bi̱ katsó nginí:
—Kó ꞌyá xí ku̱i̱ꞌítsꞌi̱yanii̱ kui kjo̱a̱xcha̱án.
Kó bi̱ katsó kui nda̱chji̱ni̱e̱ꞌe̱én:
—Jí boá.
15Kósꞌe̱ nda̱ ree̱ íxki̱ ngayeje já xí bosikójo já ngito̱ko̱o̱ nangi xi̱xi̱i̱, kó jó úchán ko̱jo kantié jó kamá. Sꞌe̱ jaskan ngije íxki̱ ngayeje xota̱ na̱xi̱ńdaá, ngayeje xota̱ Israee̱l, yito mi̱ kamá.
16Kó nga kamándisꞌueé jatjoni kui ngi̱ndiee̱, tji̱e̱nga Bee̱n-Andaa̱nd to̱kó tsꞌénꞌbi tsjé ngaskande nga kamáchꞌi̱ ki̱a̱ ndiꞌańjñoo̱, ko̱jo já ree̱, kui xi kantié jó kamá xi jachó tsi̱ꞌe̱ nga ko̱síko̱jo. 17Kó kui já xí bosikójo já ngito̱ko̱o̱ nangi xi̱xi̱i̱ kui tjón kijí.
Kó Bee̱n-Andaa̱nd katsangiya ngase xota̱, nga bi̱ katsoó nga tsíchji̱a̱jo: Tjín xota̱ xi je jatjoni nangi Samariaa̱. 18Kó bi̱ katsó kuí: Tsi kjo̱a̱xió nga jatjoni kui ngi̱ndiee̱, ndo̱bo̱a̱ tikónjnú, ta̱nga tsi kjo̱a̱xchán nga jatjoni, ti̱ ndo̱bo̱a̱ tikónjnú nga.
19Kó bo̱a̱ tsꞌén jatjoni ngi̱jin na̱xi̱ńdáꞌniuú já xí bosikójo já ngito̱ko̱o̱ nangi xi̱xi̱i̱, kó ki̱a̱ kijítji̱ngii̱ jájún xi ngasee̱. 20Kó ńgó ńgó katsꞌénkꞌién xota̱ xi kondra̱a̱, kó xota̱ Siriaa̱ tsanga, kó ki̱a̱ tsangatji̱ngii̱ xota̱ Israee̱l. Ta̱nga Bee̱n-Andaa̱nd nda̱ ree̱ nangi Siriaa̱, tsanga nga kisꞌijñasoón ngo ndi̱je̱, kó nijan kijíjo̱ chiboa jájún ndi̱je̱e̱.
21Kó nda̱ ree̱ na̱xi̱ńdá Israee̱l jataxie, kó katsꞌénkꞌién xota̱ xi síndosoón ndi̱je̱e̱, ko̱jo xota̱ xi ndyi̱a̱ karro̱ xi fíjo̱ kjo̱a̱xcha̱án, kó katsꞌeén nga askjanjo̱ xota̱ Siriaa̱.
22Kósꞌe̱ kui nda̱chji̱ni̱e̱ꞌe̱én Néná jachókoón nda̱ ree̱ na̱xi̱ńdá Israee̱l, kó bi̱ katsoó:
—Tꞌen ji, kó te̱ꞌéngaꞌníi̱ yojòo̱, nda ti̱ꞌinkjé jí ni xi si̱ꞌin ji, kó tsitsíjìi̱n, ngatꞌa̱ ngije kjo̱chó ngo nó, nda̱ ree̱ nangi Siriaa̱ kjo̱e̱ꞌekjánjo̱ nginií nga ka̱ma ni̱xtjii̱n cha̱ndoboaá.
23Kó já mosoo̱ nda̱ ree̱ nangi Siriaa̱, bi̱ katsoó:
—Ne xi ne ndyi̱tsoó kui xotaa̱, nee̱ ngi̱jin kꞌijñaá boá, kuíni nga kui, ꞌniú ngase kamá ta̱bo̱a̱jiín ñá, ta̱nga tsi ki̱a̱ ku̱i̱xkánjo̱ ki̱a̱ nangi nínga soón, nga ja̱koxi̱ ꞌniú ngase ka̱má ñá. 24Ja̱ ta̱sá kuí nii̱ xi ti̱ꞌin ji: Chje̱ꞌéxíi̱n xá xí tjiín kui já ree̱, kó ngi̱ndiee̱ kui, tꞌínde ji já ngito̱ko̱o̱ jájuún. 25Kó tꞌíjñinde ji ingo xtín jájún, xikoó kui jájún xi je kiniꞌíncheje ji, xki̱ ndi̱je̱, ko̱jo xki̱ karro̱, kósꞌe̱ ki̱a̱ ku̱i̱xkánjo̱ kuí xotaa̱ ki̱a̱ nangi soón, kó nga ja̱koxi̱, ꞌniú ngase ka̱má ñá ta̱bo̱a̱jiín kuí.
Kó kuí nda̱a̱ tsintꞌié ni xi kiꞌmií, kó bo̱a̱ katsꞌén.
26Ngije jaꞌa ngo nó, Bee̱n-Andaa̱nd íxki̱ jájuún xota̱ Siriaa̱, kó jachó na̱xi̱ńdáꞌniú Afee̱k nga kijíkjánjo̱ xota̱ Israee̱l. 27Kó xota̱ Israee̱l ti̱ ikꞌítikó nga, kó katseꞌeé nichinie, kósꞌe̱ kijíkoón kui xotaa̱, kó xota̱ Israee̱l ki̱a̱ katsꞌénkjaꞌyá kje̱n nínga síndo kui xotaa̱, xikó maá tsi jó xtín tindso̱ ínchjín kamá, tji̱e̱nga xota̱ Siriaa̱ kisꞌikitsieni kui ngi̱ndiee̱.
28Kósꞌe̱ ngo nda̱ xi chji̱a̱ni Néná jachókoón nda̱ ree̱ na̱xi̱ńdá Israee̱l, kó bi̱ katsoó: Bi̱ tsó Néná: Ngatꞌa̱ xota̱ Siriaa̱, bi̱ katsó: Néná, Nee̱ ngi̱jin kꞌijñaá boá, jmí tsi Nee̱ nangi nínga soón, kuíni nga ngi̱ya ndse̱ ji katsꞌenkꞌasꞌien An ngayeje kui xota̱ kjiín, tsi̱ꞌe̱ nga sku̱i̱e̱ nga Án boá xi Néná Án.
29Kó yito ni̱xtjin kisꞌińdo kui jaá xtji̱e̱e̱n kje̱n ndiꞌańjñoo̱, kó xi ma yito ni̱xtjii̱n, ítsꞌi̱yanii̱ nga askjan, kó xota̱ Israee̱l nga ta̱ ngo tsí ni̱xtjin úchán mi̱ jáxíꞌín xi fí ndsa̱ko xi chji̱a̱ni nangi Siriaa̱ katsꞌénkjiesón. 30Kó xota̱ xi ngasee̱ ki̱a̱ tsanga na̱xi̱ńdáꞌniú Afee̱k, ta̱nga xoó kui na̱xi̱ńdáꞌniuú ixóndónieé kan jó mi̱ jáxíꞌín xi kisꞌińdoo̱ ki̱a̱a̱.
Kó Bee̱n-Andaa̱nd tsanga nga kijí na̱xi̱ńdáꞌniuú, kó xki̱ ndiꞌa kisꞌijñaꞌma. 31Kósꞌe̱ já mosoo̱, bi̱ katsoó:
—Jè kandaꞌyájne̱ ni xi katsó já re xi chji̱a̱ni na̱xi̱ńdá Israee̱l, nga re xi ta̱nisién ndaxota̱ boá. Ja̱ kuíni nga ꞌniú chjiáꞌájne̱ nga ko̱e̱ꞌéndièjne̱ nga ńjño tokjuie xcha̱jajne̱, ko̱jo nga ngo ńꞌniú kuítꞌajne̱ kjasénjne̱, kó nga kongínjne̱ nínga tikón nda̱ ree̱ na̱xi̱ńdá Israee̱l, tsi ta̱ nda ni̱xtjin sa̱ꞌínjetakónjne̱.
32Kó bo̱a̱ tsꞌén kui jaá tsajá ńjño tokjuie, ko̱jo ítꞌa ńꞌniú kjásén, sꞌe̱ kijíkoón nda̱ ree̱ na̱xi̱ńdá Israee̱l, kó bi̱ katsoó:
Mosòo̱ xi ꞌmí Bee̱n-Andaa̱nd, bi̱ tsó: ꞌNiú míꞌaá nga te̱ꞌéndiè ji nga kꞌuijñára ini̱ma̱na.
Kó Akaa̱b, bi̱ katsó:
A to̱kó tikón kuí nda̱a̱, ntsꞌié án boá.
33Kó kui jaá nda tsꞌén katsꞌénkjó kjo̱a̱a̱ kui nii̱, kó xi tsá xi boaꞌa tsíchji̱a̱ nga bi̱ katsó:
—¡Tikón ntsꞌie ji Bee̱n-Andaa̱nd!
Kó bi̱ katsó Akaa̱b:
—Tangínchonjnúu̱, kó ndibájo̱jnú kꞌi̱e̱e̱.
Kósꞌe̱ Bee̱n-Andaa̱nd kijí ngindyi̱ko̱n Akaa̱b, kó Akaa̱b katsꞌénkꞌíjñaya karroo̱. 34Kó Bee̱n-Andaa̱nd, bi̱ katsoó:
—Kui na̱xi̱ńdáꞌniú xí na̱ꞌmina jaꞌáxiín na̱ꞌmíi̱, an tsjaꞌoyá ngiñaá, kó ka̱ma si̱ꞌindèe̱ ndi̱tse̱n na̱xi̱ńdáꞌniú Ndamasko̱, xikó katsꞌén na̱ꞌmina ki̱a̱ nangi Samariaa̱. Kó án ka̱ma tsjandiè an nga kꞌuin jí ngije ikꞌínda kuí nii̱. Kó Akaa̱b índajo̱ ngo ni kui nda̱a̱, kósꞌe̱ katsꞌénkjí kjo̱a̱nda ngijee̱.
Ngo nda̱chji̱ni̱e̱ꞌe̱én katsꞌénxchánjo̱ Akaa̱b
35Kósꞌe̱ ngo nda̱ xi chji̱a̱ni jáchji̱ni̱e̱ꞌe̱én Néná, bi̱ katsoó nda̱ xi ingoo̱, kjo̱a̱a̱ én xí tsíchji̱a̱jo Néná:
Tꞌiéní ngotꞌe̱.
Ta̱nga kui nda̱a̱ kamámejénjiín katsꞌénꞌoón. 36Kósꞌe̱ bi̱ katsó kui nda̱chji̱ni̱e̱ꞌe̱én:
—Ta̱ngatꞌanii̱ nga kandaꞌyéꞌínjíi̱n én xi tsíchji̱a̱ Néná, kuíni nga ngije xín kꞌuín jí, ngo xandi̱je̱ sa̱ꞌínkꞌieén.
Kó sꞌe̱ tsí xín kijíboaꞌá chií nínga tikón kui nda̱a̱, nga kasakoo̱ ngo xandi̱je̱, kó katsꞌénkꞌién.
37Jaskan kasakoo̱ ingo nda̱, kó bi̱ katsoó:
—Tꞌiéní ngotꞌe̱.
Kó kui nda̱a̱ yeꞌeé ngo tji̱ngo̱, kó katsꞌénꞌón. 38Kó kui nda̱chji̱ni̱e̱ꞌe̱én Néná kijí, kó ki̱a̱ kasasien xtji̱e̱e̱n kje̱n nda̱ ree̱, ki̱a̱ ngi̱ya ndi̱ya̱à, kó kje̱ꞌe katsꞌénkꞌié yojoo̱, ngo ńjño yíꞌmá ndyi̱ko̱n. 39Kó kjiꞌanga jaꞌa nda̱ ree̱, kui nda̱a̱ askjandáyá má nga tsíchji̱a̱jo nda̱ ree̱, nga bi̱ katsoó:
—Mosòo̱ ki̱a̱ kisꞌijña ngi̱jii̱n kjo̱a̱xcha̱án, kó ngotꞌe̱ ꞌne̱, ngo nda̱jun jachókón tiñana, kó ngo nda̱ jachójo̱na xi bi̱ katsóna: Chíi̱n kui nda̱a̱, ngatꞌa̱ tsi ko̱ngaꞌma, ji si̱ꞌankꞌiee̱n ta̱ngatꞌanii̱ kui, ko̱jo tsi ján mi̱ to̱ntiboa ku̱i̱ꞌíchjí jí. 40Kó tji̱e̱nga kui mosòo̱ ja̱kꞌi̱e̱ ja̱ngaján ni katsꞌén, ta̱ bejín an ñá kijí kui nda̱a̱.
Kósꞌe̱ nda̱ ree̱ na̱xi̱ńdá Israee̱l, bi̱ katsoó:
—Bo̱a̱ kjiꞌi ni xi ka̱majénií, ti̱ jíní xi bo̱a̱ kase ji.
41Kó kui nda̱a̱ tji̱e̱nmá jaꞌáxín ńjño xi íꞌmáni ndyi̱ko̱n, kó kjiꞌá boá nga nda̱ ree̱ kamábe nga kui nda̱a̱ ki̱a̱ chji̱a̱ni jáchji̱ni̱e̱ꞌe̱én Néná. 42Kó bi̱ katsoó:
—Bi̱ tsó Néná: Kó nga jí boá xi katseꞌéndiè ji nga jatjongii̱ yojoo̱ kui nda̱ xi An atíxoma An nga je si̱ꞌankjiee, kuíni nga kjo̱a̱mindyiòo̱n ku̱i̱ꞌíchjíní ji kjo̱a̱a̱ kjo̱a̱mindyioo̱n kui, kó xota̱ na̱xi̱ńdáa̱ ku̱i̱ꞌíchjí ta̱ngatꞌanii̱ xota̱ na̱xi̱ńdaá kui.
43Kó nda̱ ree̱ na̱xi̱ńdá Israee̱l achichí ndasen kamaá ko̱jo katsꞌénxchán nga kijí ndiꞌaa̱, kósꞌe̱ jachó nangi Samaria̱.
Currently Selected:
1 Já ree̱ 20: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
