1 Já ree̱ 19
19
Eliyaa̱ tsangaꞌmaa̱ na̱ Jesabee̱
1Kó Akaa̱b katsóyaà na̱ Jesabee̱ ngayeje ni xi katsꞌén Eliyaa̱, ko̱jo kótsꞌèn nga ki̱cha̱ katsꞌénkꞌiénni ngayeje jáchji̱ni̱e̱ꞌe̱én ne Baa̱l. 2Kósꞌe̱ na̱ Jesabee̱ katsangiyaa̱ ngo chji̱ni̱e̱ꞌén Eliyaa̱, xi bi̱ katsoó: Bo̱a̱ kjiꞌi ni xi ngatsꞌénjo̱na nee̱, kó tsie ngase ngatásoón, tsi ndyiojón kui chi̱bo̱a̱a̱ bo̱a̱jín sa̱ꞌinjoo̱, xikó kiniꞌínje̱ ji ngo kui xotaa̱.
3Kó Eliyaa̱ katsakjónní, jastjíe̱n sꞌe̱ tsanga, tsi̱ꞌe̱ jatjoꞌaa̱ yojoo̱, kó nangi Beersebaa̱ jachó, kui ngi̱ndie xi tikón nangi Jundáa̱, kó ki̱a̱ íjñá nda̱ mosoo̱ xi tsoꞌbájo̱. 4Kó kuí kijí soboá ki̱a̱ nangi kixií, nínga kistsoꞌbá nga ngo ni̱xtjii̱n, kó ngije jachó ki̱a̱a̱, kisꞌijñando ngindiee̱ ngo yáꞌenebro̱, kó kamámejeén nga ko̱yà, sꞌe̱ bi̱ katsó: ¡Jè ndakjiꞌi ꞌne̱ Ndi̱a̱! Ti̱ꞌinkꞌinní ngotꞌe̱ ꞌne̱, ngatꞌa̱ jmí tsi an xi nda ngase an ta̱bo̱a̱jiín xota̱ xi xchána.
5Sꞌe̱ ki̱a̱ kisꞌie ngindiee̱ kui yáꞌenebroo̱, kó ngije kisꞌifé, ngo ndítsjie katsꞌénjo̱, kó bi̱ katsoó: ¡Ti̱sítji̱n ji, kó chi̱ni ji nichinie!
6Kósꞌe̱ askotsijen ndá ndaá, kó kamábe nga xtji̱e̱e̱n to̱ko̱ kisꞌijña ngo pan kjikjojó xi ngi̱jin xꞌueé kiniꞌánchjánni, ko̱jo ngo nisa ndáfoa, kó iskjinie ko̱jo katsꞌe, sꞌe̱ kisꞌifé nginí.
7Kó kui ndítsjiee̱ Néná, ti̱ jachó nginí xi ma joó ndi̱yà, kó ti̱ katsꞌénjo̱ nginí nga bi̱ katsoó: Ti̱sítji̱n, kó chi̱ni ji, ngatꞌa̱ tsie boá ndi̱yà xí tikón ngase nínga kꞌuin jí.
8Kó jastjíe̱n Eliyaa̱, sꞌe̱ iskjinie ko̱jo katsꞌe, kó nga kasakongaꞌniuú kjo̱a̱a̱ kui nichiniee̱, yichán ni̱xtjin ko̱jo yichán ni̱xtji̱e̱n kamaá nga kijí, ngaskande nínga tikón na̱xi̱ Oree̱b, ki̱a̱ na̱xi̱i̱ Néná. 9Kó ki̱a̱ tsꞌasꞌien ngo ti̱xa̱na̱xi̱ nínga jaꞌaa̱ ni̱xtji̱e̱n. Kó Néná tsíchji̱a̱jo, nga bi̱ katsoó:
—Mí xí tiniꞌín ji kꞌi̱e̱e̱ Eliyaa̱.
10Kó bi̱ katsó kui nda̱a̱:
—Achichí kamáchi̱ni̱ an kjo̱a̱a̱ Néná xí tsi̱ꞌe̱ jájuún, ngatꞌa̱ xota̱ Israee̱l jè íjñámasien ni xi índajoo̱ Ji, kó jè katsꞌénkjatsón ṉchandikóo̱n, kó ki̱cha̱ katsꞌénkꞌiénni jáchji̱ni̱e̱ꞌée̱n, kó ta̱ an tsí xi tikón ngase an, kó án ndyi̱mongasena tsi̱ꞌe̱ nga sa̱ꞌínkꞌiénna nga.
11Kósꞌe̱ Néná, bi̱ katsoó:
—Tja̱tje ji, kó ki̱a̱ ta̱si̱nkixi̱ ji ki̱a̱ na̱xi̱i̱, ngindyi̱ko̱n Án.
Kó ki̱a̱ jaꞌa Néná, kó ngo tjo̱ xi ta̱nisién ꞌniú kamá xi katsꞌénkjatsón na̱xi̱i̱, ko̱jo akján ndi̱jo̱ yiꞌii̱ ngindyi̱ko̱n Néná, ta̱nga Néná ki̱a̱jín tikónjin kui tjo̱o̱. Jaskan ngije jaꞌa kui tjo̱o̱, kjindibá ngo kjo̱a̱ndi̱ko̱n xí ꞌniú, ta̱nga ki̱a̱jín kisꞌijña Néná ngi̱jii̱n kui kjo̱a̱ndi̱ko̱ón. 12Jaskan ngije kamá kui kjo̱a̱ndi̱ko̱ón kisꞌie ndiꞌí, ta̱nga Néná ki̱a̱jín kisꞌijñajin kui ndiꞌií. Kó ngije jaꞌa kui ndiꞌií, si̱e̱n si̱e̱n kandaꞌyaá ngo nda̱ xi inda inda tsíchji̱a̱. 13Kó nga kandaꞌyá kui nda̱a̱, Eliyaa̱ ngo ńjñobichitjé íꞌmáni kje̱n, sꞌe̱ jataxie, kó ki̱a̱ kisꞌijña nga̱ntjo̱a̱a̱ ti̱xa̱na̱xi̱i̱. Kó ngo nda̱ kandaꞌyaá xi bi̱ katsó:
—Mí xí tiniꞌín ji kꞌi̱e̱e̱ Eliyaa̱.
14Kó bi̱ katsó Eliyaa̱:
—Achichí kamáchi̱ni̱ an kjo̱a̱a̱ Néná, kui Néná xí tsi̱ꞌe̱ jájuún, ngatꞌa̱ xota̱ Israee̱l jè íjñámasien ni xi índajoo̱ Ji, kó jè katsꞌénkjatsón ṉchandikóo̱n, kó ki̱cha̱ katsꞌénkꞌiénni jáchji̱ni̱e̱ꞌée̱n, kó ta̱ án tsí xi tikón ngase an, kó án ndyi̱mongasena tsi̱ꞌe̱ nga sa̱ꞌínkꞌiénna nga.
15Kó Néná, bi̱ katsoó:
—Tꞌen nginí ji ndi̱yà xí chji̱a̱ni nangi kixií na̱xi̱ńdáꞌniú Ndamasko̱, kó nga kjóchí ji, nangínjìn ji isti̱ Asaee̱l, tsi̱ꞌe̱ nga kui xi ka̱ma ree̱ nangi Siria̱. 16Kó ti̱ nangínjìn ji isti̱ Jeuu̱ ndií Nimsii̱, tsi̱ꞌe̱ nga kui xi ka̱ma ree̱ na̱xi̱ńdá Israee̱l, ko̱jo Eliseoo̱ ndií Safaa̱t xi chji̱a̱ni Abee̱-Meolaa̱, tsi̱ꞌe̱ nga kui xi ka̱ma nda̱chji̱ni̱e̱ꞌe̱én Néná ngajo tse̱. 17Kó xi kjo̱tjoꞌaa̱ yojoo̱ ki̱cha̱ndojóo̱ Asaee̱l, Jeuu̱ sa̱ꞌínkꞌién, kó xi kjo̱tjoꞌaa̱ ki̱cha̱ndojóo̱ Jeuu̱, Eliseoo̱ sa̱ꞌínkꞌién. 18Kó án boá xi bo̱a̱ kixian an nga yito mi̱ xota̱ ngatꞌíndo na̱xi̱ńdá Israee̱l, kui xi kji̱e̱ bosiéntꞌajiíntikoó ne Baa̱l, ti̱nde kji̱e̱ tsjájiín ngo ndsó tꞌanijon.
Nga katseꞌéxaá nda̱ xi ꞌmí Eliseoo̱
19Kó ngije jatjoni ki̱a̱a̱, kamábe Eliseoo̱ ndií Safaa̱t nga tjitsꞌénxá, kó tiejó ꞌniú cho̱yojo xi bokján tꞌanangi tjimátjoón, kó kuí boá xi tjítsꞌénxájo̱ xi fetꞌanii̱. Kó nga jaꞌa Eliyaa̱ xtji̱e̱e̱n nínga tikón kuí, tsꞌajminieé ńjñoo̱ kui nda̱a̱.
20Kósꞌe̱ Eliseoo̱ íjñámasien cho̱yojo xi bokján tꞌanangii̱, kó tsanga má nga kijítji̱ngii̱ Eliyaa̱, sꞌe̱ bi̱ katsoó:
—ꞌNiú míꞌaá nga te̱ꞌéndièní, nga tsjá máráa̱ ngo ndsó na̱ꞌmina ko̱jo na̱ana, sꞌe̱ kjuíntjíngií jí ngijee̱.
Ta̱nga Eliyaa̱, bi̱ katsoó:
—Tꞌen nginí ji, ngatꞌa̱, mí ni xí katsꞌenjoo̱ ji.
21Sꞌe̱ kijíꞌoyá nginí, kó iskjíbé ngo ꞌniú cho̱yojo xi bokján tꞌanangi, sꞌe̱ katsꞌénkꞌién, kó ki̱cha̱ xi bokján tꞌanangii̱ katsꞌénchjánni kui cho̱o̱, kósꞌe̱ katsjaá xota̱ na̱xi̱ńdaá, tsi̱ꞌe̱ nga iskjinie. Jaskan jastjíe̱n Eliseoo̱, kó kijítji̱ngii̱ Eliyaa̱, kó ki̱a̱ katsꞌénxátꞌaa̱.
Currently Selected:
1 Já ree̱ 19: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
