1 Já ree̱ 18

Eliyaa̱ ti̱ kijíkón nginií Akaa̱b

1Jaskan ngije jaꞌa ni̱xtjin, Néná tsíchji̱a̱jo nda̱chji̱ni̱e̱ꞌe̱én xi ꞌmí Eliyaa̱, xi ma jaán nó, kó bi̱ katsoó: Tꞌen ji, kó takée̱ yojòo̱ Akaa̱b, kó Án sa̱ꞌinkaꞌa an stsé nga̱són tꞌanangii̱.

2Kó Eliyaa̱ kijíkoón Akaa̱b. Achichí ꞌniú kamá kjindiaá ki̱a̱ nangi Samaria̱. 3Kó Akaa̱b tsíchji̱a̱a̱ nda̱ xi ꞌmí Abndiyaa̱, moso̱ xi askoo̱n ndiꞌaa̱, kui nda̱a̱ achichí ꞌniú kamábendikón Néná. 4Ngatꞌa̱ kjiꞌanga na̱ Jesabee̱ katsꞌénkjié ngayeje jáchji̱ni̱e̱ꞌe̱én Néná, nda̱ xi ꞌmí Abndiyaa̱ iskjíbé úchán jáchji̱ni̱e̱ꞌe̱én Néná, kó xki̱ ichítié ichítié índoꞌmá ngo ti̱xa̱na̱xi̱, kó katsjaá pan ko̱jo ndáfoa. 5Kó Akaa̱b bi̱ katsoó Abndiyaa̱: Tꞌen ji ngayeje kui na̱xi̱ńdá nínga síndo ngayeje ndáńchꞌi̱ ko̱jo xo̱ngàndántꞌié, tsi nda ni̱xtjin ki̱a̱ sa̱kóná ndi̱xcho̱, kó ka̱ma ko̱ꞌna̱xiéꞌá ndi̱je̱e̱ ko̱jo ndi̱je̱tajaá, tsi̱ꞌe̱ nga kju̱i̱e̱sónjín ngayeje cho̱ xi tjínná.

6Kó bi̱ tsꞌén akjángaá xkjín tꞌanangi nínga kijí: Akaa̱b ngo ndiè kijí, kó Abndiyaa̱ xi ingo ndieè kijí kuí. 7Kó kjiꞌanga tsꞌénfí Abndiyaa̱ ngi̱ya ndi̱ya̱à, ki̱a̱ kamábe nda̱ chji̱ni̱e̱ꞌe̱én Néná xi ꞌmí Eliyaa̱, kó nga kamábe nga kui nda̱a̱, asiéntikoó ngaskande nga kisitꞌaa̱ kje̱n tꞌanangii̱, kó bi̱ katsó nga asíyaá:

—A jí boá xi ndi̱a̱na Eliyaa̱.

8Kó bi̱ katsó Eliyaa̱:

—Jo̱o̱n, án boá. Tꞌen ji, kó bi̱ tꞌíi̱n ndi̱a̱ tse̱: Kꞌi̱e̱ tikón Eliyaa̱ kꞌi̱e̱e̱.

9Ta̱nga Abndiyaa̱ bi̱ katsoó:

—Mí jé xí katsꞌen an, nga kui mosòo̱ ki̱a̱ si̱ꞌinkꞌasꞌin ji ngi̱ya tsja Akaa̱b, tsi̱ꞌe̱ nga sa̱ꞌínkꞌiénna. 10Ja̱koxi̱ boá nga tikón Ne xí tse̱, nga nde ngojín na̱xi̱ńdá ko̱jo tsi ngi̱ndie nínga botixómá ngo xota̱ xi katsangiyajín ndi̱a̱na nga ko̱ngasee̱ ji, kó ngayeje xotaa̱ xi bi̱ katsó: Kꞌi̱e̱jín tikón, kó katsꞌén nga katsjátsꞌoá já re ko̱jo na̱xi̱ńdá nga bo̱a̱ katsó nga kasakojiín ji ki̱a̱a̱. 11Kó ngotꞌe̱ ꞌne̱ bi̱ tꞌísení jí: Tꞌen ji, kó bo̱a̱ tꞌíi̱n ndi̱a̱ tse̱ nga kꞌi̱e̱ tikón Eliyaa̱ kꞌi̱e̱e̱. 12Ni xi ka̱ma ngije katsꞌenkjii̱n yojona, nga A̱si̱énni̱xtjii̱n Néná ko̱e̱je̱joo̱ ngo ngi̱ndie xi nde bejín an, kó nga kjóchó an nínga tikón Akaa̱b nga xiyàa̱ kjo̱a̱a̱ ji, kó nga sa̱kójiín ji ki̱a̱a̱, sa̱ꞌínkꞌiénna. Ndatsi kui mosòo̱, ndeskande koó nga kjindí nga bendikón Néná. 13A kji̱e̱ ꞌmíyajiín ndi̱a̱na ni xi katsꞌen an kjiꞌanga na̱ Jesabee̱ katsꞌénkꞌién jáchji̱ni̱e̱ꞌe̱én Néná, kótsꞌèn índoꞌmá an úchán jáchji̱ni̱e̱ꞌe̱én Néná nga xki̱ ichítié ichítié indo an, ngi̱yaa̱ ngo ti̱xa̱na̱xi̱, kó katsjáa̱ pan ko̱jo ndáfoa. 14Kó ngotꞌe̱ ꞌne̱ bi̱ tꞌísé ji nga bi̱ xiáa̱n ndi̱a̱na: Kꞌi̱e̱ tikón Eliyaa̱ kꞌi̱e̱e̱, tsi̱ꞌe̱ nga sa̱ꞌínkꞌiénna.

15Ta̱nga Eliyaa̱, bi̱ katsoó:

—Ja̱koxi̱ boá nga tikón Néná xí tsi̱ꞌe̱ jájuún, kui xi ngindyi̱ko̱n kui tikón an, nga ngotꞌe̱ má kokòo̱ yojona nda̱ ree̱.

16Kósꞌe̱ Abndiyaa̱ kijíkoón nda̱ re Akaa̱b, kó katsóyaà, kó Akaa̱b kijíkoón Eliyaa̱. 17Kó kjiꞌanga Akaa̱b kamábe Eliyaa̱, bi̱ katsoó:

—A jí boá xi tiniꞌíntsobéjìi̱n xota̱ Israee̱l.

18Kó bi̱ katsó Eliyaa̱:

—Jmí tsi an xi tsꞌénmindyiatsobée̱ xota̱ Israee̱l, jí boá xi bo̱a̱ tiniꞌín ji, ko̱jo xota̱ ndiꞌaa̱ na̱ꞌmíi̱, ngatꞌa̱ jún boá xi ikꞌíjñámasienjnú kjo̱a̱botíxomaa̱ Néná, kósꞌe̱ ne Baa̱l tsangíntji̱ngijnúu̱. 19Ngotꞌe̱ ꞌne̱, te̱ꞌékjo̱e̱ ji, kó tꞌítikí jí ngayeje xota̱ Israee̱l ki̱a̱ na̱xi̱ Karmeloo̱, ko̱jo kui xi nijón úchán ichítié jáchji̱ni̱e̱ꞌe̱én ne Baa̱l, ko̱jo kui xi nijón úchán jáchji̱ni̱e̱ꞌe̱én na̱ ne Aseraa̱, kui xi ki̱a̱ nijan ndyi̱kjiniejo̱ nichinie yámíxa̱a̱ na̱ Jesabee̱.

Eliyaa̱ ko̱jo já chji̱ni̱e̱ꞌe̱én ne Baa̱l

20Kósꞌe̱ Akaa̱b ítikó ngayeje xota̱ Israee̱l, ko̱jo jáchji̱ni̱e̱ꞌe̱én ne Baa̱l ko̱jo tsi̱ꞌe̱ na̱ ne Astarteé ki̱a̱ na̱xi̱ Karmeloo̱. 21Kó Eliyaa̱ kijíkóntiñaa̱ ngayeje xota̱ na̱xi̱ńdaá, kó bi̱ katsoó:

—Ngaskande kjiꞌání nga jó ni kjójintakónjnú xi si̱ꞌánjnú. Tsi Ndi̱a̱ná xí Néná, kui tangíntji̱ngíjnúu̱, ta̱nga tsi Baa̱l xi kui, ja̱ kui tangíntji̱ngíjnúu̱.

Ta̱nga xota̱ na̱xi̱ńdaá nde ngo én tsíchji̱a̱jín. 22Kósꞌe̱ Eliyaa̱ ti̱ bi̱ ti̱ katsó nginií xota̱ na̱xi̱ńdaá:

—Ta̱ an tsí xi tikón ngase an xi nda̱chji̱ni̱e̱ꞌe̱én Néná án, ta̱nga jáchji̱ni̱e̱ꞌe̱én ne Baa̱l, nijón úchán ichítié jáxíꞌín má. 23Te̱ꞌéjne̱ jó cho̱yojo xi bokján tꞌanangi, kó chje̱ꞌéjinjnú ngo, kó ti̱cháyájnú, kósꞌe̱ ki̱a̱ tꞌíjñájnú nga̱soón chikiín, ta̱nga nga jmí ndiꞌí ꞌbíjñájínjnúu̱ ngindiee̱, kó an ku̱i̱ꞌíjñanda an xi ingo cho̱yojo xi bokján tꞌanangii̱, kó ki̱a̱ nga̱soón chikín kꞌuijñá an, kó ti̱nde jmí ndiꞌí kꞌuijñájáa̱n ngindiee̱ nga. 24Sꞌe̱ jaskan ndókjo̱a̱jnú jaꞌeén nejnú, kó an sa̱ꞌinkaxoma an Jaꞌeén Néna, kó kui Ne xi sa̱ꞌínkjién ndiꞌií nga ku̱i̱chji̱a̱, kuí boá xi Néná.

Kó ngayeje xota̱ na̱xi̱ńdaá, bi̱ katsó nga tsíchji̱a̱:

—Ndakjiꞌi ni xi kase.

25Kó Eliyaa̱, bi̱ katsoó jáchji̱ni̱e̱ꞌe̱én ne Baa̱l:

—Chje̱ꞌéjinjnú ngo cho̱yojo xi bokján tꞌanangii̱, kó jún tjón tꞌíjñandajnú, ngatꞌa̱ jún boá xi kjín ngase májnú, kó ti̱ꞌankaxomájnú jaꞌeén nejnú, ta̱nga ngata̱ jmí ndiꞌí mindyiajínjnúu̱ ngindiee̱.

26Kó kui xotaa̱ iskjíbé kui cho̱yojo toro̱ xi katseꞌeé, kó íjñanda, sꞌe̱ ítsꞌi̱yanii̱ nga katsꞌénkaxoma jaꞌeén ne Baa̱l ndeskande nga ta̱jño̱ó, ngaskande nga kamá ndisꞌué, nga bi̱ katsó: ¡Ne Baa̱l, ti̱ꞌinsénjne̱! Ta̱nga nde ngo nda̱ kandaꞌyájiín, ti̱nde jmíjín xi tsíchji̱a̱, tji̱e̱nga iskjínkꞌá nga ngo foaꞌatjiyajoo̱n kui ṉchan xi katsꞌénda.

27Kó nga kamándisꞌueé, Eliyaa̱ ítsꞌi̱yanii̱ nga tsajnókie kui jaá, nga bi̱ katsoó: ¡ꞌNiú ngase chaꞌayàjnú! Ngatꞌa̱ tsi Baa̱l xi ne, tjítsꞌénkjó rá, axa̱ tsꞌénfotí rá, axa̱ tjín rá nínga kijí, ko̱jo tsi kjiꞌifé rá, kó chjiéngá si̱ꞌankjaꞌaá.

28Kó kui xotaa̱ achichí ꞌniú askjandáyà, kó xikótsꞌèn ngaá, kichiro̱ ko̱jo yáyojó katsꞌénꞌónnii̱ yojoo̱, ngaskande nga jatjo jiín. 29Kó ngije jaꞌa nga kamá ndisꞌueé, kui xotaa̱ xikoó tsi tsíchji̱a̱ tsobé ngaskande nga jachó chi̱bo̱a̱ nga sa̱ꞌínkꞌasꞌien kjo̱a̱tjoó, ta̱nga nde ngo nda̱ kandaꞌyájiín, ti̱nde jmíjín xi tsíchji̱a̱ nga tsintꞌieé ni xi kiꞌmií.

30Kósꞌe̱ Eliyaa̱, bi̱ katsoó ngayeje xota̱ na̱xi̱ńdaá:

—Ndibáchon tiñajnúꞌun.

Kó ngayeje xota̱ na̱xi̱ńdaá kijíkóntiñaa̱, kó Eliyaa̱ katsꞌéndaya ṉchandikoón Néná xi je kiniꞌánkjatsoón. 31Kó Eliyaa̱ iskjíbé tiejó ndi̱jo̱, xikó kjiꞌi kamá xtín xota̱ tji̱e̱e̱ ndií Jakoo̱b, kui nda̱ xi Néná bi̱ katsoó: Israee̱l kꞌuin jaꞌée̱n. 32Kó kui ndi̱jo̱o̱ ngo ṉchandikón katsꞌéndani nga katsꞌénkjién Jaꞌeén Néná, sꞌe̱ jaskan yején ngo xo̱ngà nga ngo foaꞌatjiyajoo̱n kui ṉchandikoón, nínga jó chi̱bo̱a̱ to ndso̱ko̱a̱n ṉño̱pan kisꞌien. 33Sꞌe̱ íjñanda chikín, kó tsatieya kui cho̱yojoo̱, sꞌe̱ ki̱a̱ íjñasón nga̱soón chikiín. 34Kó bi̱ katsó:

—Tꞌíkitsiejnú nijón ti̱ji̱ì ndáfoa, kó chjatjónjónjnú nga̱soón kjo̱a̱tjoó, ko̱jo nga̱soón kui chikiín.

Kó bi̱ katsó ngase:

—Ingo ndi̱yà ti̱ꞌánnginíjnú kui nii̱.

Kó bo̱a̱ katsꞌén nginí kui jaá.

Kó bi̱ katsó nginí:

—Ti̱ꞌánnginíjnú kui nii̱ xi ma jaán ndi̱yà.

Kó bo̱a̱ katsꞌén xi ma jaán ndi̱yà, 35kó bo̱a̱ tsꞌén ndáfoa tsanga nga ngo foaꞌatjiyajoo̱n ṉchandikoón, kó ti̱ kisꞌikitsie ndáfoa kui xo̱nga̱à nga. 36Kó nga jachó chi̱bo̱a̱ nga si̱ꞌankꞌasꞌien kjo̱a̱tjó xi ni xi kamáxchaá, kijí tiña nda̱chji̱ni̱e̱ꞌe̱én Néná xi ꞌmí Eliyaa̱, kó bi̱ katsó:

¡Ji Ne, Ji xi Nee̱ Abraa̱n Ji, ko̱jo Nee̱ Isaa̱, ko̱jo Nee̱ Israee̱l, ngatamayaa̱ ngotꞌe̱ nga Jí boá xi Nee̱ xota̱ Israee̱l, kó nga án boá xi mosòo̱ ma an, kó nga ta̱ngatꞌanií kui ée̱n nga katsꞌen an kui nii̱! 37Ti̱ꞌinsénní, ji Ne, ti̱ꞌinsénní. Tsi̱ꞌe̱ nga sku̱i̱e̱ kui xota̱ na̱xi̱ńdaá nga Ji, Jí boá xi Néná, kó nga Jí boá xi niꞌín Ji nga ini̱ma̱a̱ xotaa̱ fíkón nginií Jí.

38Kósꞌe̱ ndiꞌí xí tsi̱ꞌe̱ Néná kjindibájénni nkꞌajmii̱, kó ítí ngayeje kui kjo̱a̱tjoó, ko̱jo chikiín, ko̱jo ndi̱jo̱o̱, ko̱jo xa̱a̱, kó ngaskande katsꞌénxíjón má ndáfoa xi ndyi̱a̱ ngi̱ya xo̱nga̱à. 39Nga kamábe kui nii̱ ngayeje xota̱ na̱xi̱ńdaá, asiéntikoó ngaskande nga kisitꞌaa̱ xtjien tꞌanangii̱, kó bi̱ katsó: ¡Ndi̱a̱ná boá xi Néná, Ndi̱a̱ná boá xi Néná!

40Kósꞌe̱ Eliyaa̱, bi̱ katsoó:

—¡Ndo̱bo̱a̱jnú jáchji̱ni̱e̱ꞌe̱én Baa̱l! ¡Kó nga ngojín xi ko̱ngaꞌma!

Kó kandobá kui jaá, sꞌe̱ Eliyaa̱ nijan kijíjaya ki̱a̱ xo̱ngàndántꞌié Sisoo̱n, kó ki̱a̱ katsꞌénkꞌién nga tsatiesen.

Eliyaa̱ tsíchji̱a̱a̱ Néná tsi̱ꞌe̱ nga ko̱a̱ꞌa nginí stseé

41Kósꞌe̱ Eliyaa̱ bi̱ katsoó Akaa̱b:

—Ti̱sítji̱n ji, chi̱ni ko̱jo tꞌi̱ ji, ngatꞌa̱ jè ndaꞌyaá stsé xí ꞌniuú.

42Kó Akaa̱b kijínijíngí nga iskjinie ko̱jo nga katsꞌe, sꞌe̱ Eliyaa̱ kijínijíngí nga̱soón na̱xi̱ Karmeloo̱, kósꞌe̱ kisꞌijñaxtien ngaskande nga kisitꞌaa̱ xtjien tꞌanangii̱, kó kje̱n ki̱a̱ íjñá ngamasiee̱n ngajó tikoó kuí. 43Kósꞌe̱ bi̱ katsoó nda̱ mosoo̱:

—Tꞌennijíngí ji ngotꞌe̱, kó tsitsíjin ndé ndé ji xtji̱e̱e̱n nínga tikón ndáchíkoón.

Kó kui nda̱ mosoo̱ kijínijíngí, kó askotsijen cha̱n cha̱n, sꞌe̱ bi̱ katsó:

—¡Jmí nijín!

Kó nda̱chji̱ni̱e̱ꞌén Eliyaa̱ yito ndi̱yà ti̱ bi̱ ti̱ katsó nginií:

—Tꞌen nginí ji.

44Kó xi ma yitoo̱ ndi̱yà, bi̱ katsó kui nda̱ mosoo̱:

—Ngotꞌe̱ ꞌne̱, jè kamábe an ngo ndí ṉdi̱ xi ja̱kjiꞌi tsja ngo nda̱ má kjiꞌi.

Kósꞌe̱ Eliyaa̱, bi̱ katsó:

—Tꞌen ji, kó bi̱ tꞌíi̱n Akaa̱b: Tꞌíjñinde ji karroo̱, kó ti̱tjaje̱n ji tsi̱ꞌe̱ nga sa̱ꞌínkasiénjiín stseé.

45Kó tji̱e̱nga bo̱a̱ kamaá, ítsꞌi̱yanii̱ nga kisꞌiejñó nkꞌa jàn, kó kisꞌie ṉdi̱, ko̱jo jaꞌa tjo̱, kó ítsꞌi̱yanii̱ nga tsaꞌá ngo stsé xí ta̱nisién ꞌniú. Kó Akaa̱b tsꞌasꞌien ngi̱ya karroo̱, sꞌe̱ kijí na̱xi̱ńdáꞌniú Jesree̱l. 46Kó Néná katsjaá ngaꞌniú Eliyaa̱, nga tji̱xi̱ín ꞌniú íkjá ndáyaá, sꞌe̱ tsanga má nga kijítjoón Akaa̱b ngaskande nga jachó na̱xi̱ńdáꞌniú Jesree̱l.

Currently Selected:

1 Já ree̱ 18: MAIX

Highlight

Compare

Copy