1 Já ree̱ 15
15
Nga atíxoma Abiaa̱n
(2Kr 13:1-22)
1Nó tjiꞌún ján nga kisꞌijña re Jeroboaa̱n ndií Nabaa̱t, Abiaa̱n ítsꞌi̱yanii̱ nga atíxoma na̱xi̱ńdá Jundáa̱, 2kó ján nó atíxoma ki̱a̱ na̱xi̱ńdáꞌniú Jerusale̱n. Na̱aa̱n Abiaa̱n na̱ Maakaa̱ kiꞌmí, tsa̱kji̱ín Absaloo̱n.
3Kó Abiaa̱n ki̱a̱ kijítji̱ngi ngayeje jé xi katsꞌén na̱ꞌmii̱ ngindiee̱ nga ko̱tíxoma kui, kó jmí tsi kixi̱ kamá ini̱ma̱a̱ nga kamáꞌniátakón Néná, xikó tsꞌén kixi̱ kamá xota̱ xi xchaá xi kiꞌmí Ndabii̱. 4Ta̱nga ta̱ngatꞌanii̱ nga Néná tjó kamaá Ndabii̱, kuíni nga Néná xikoó tsi ngo ndiꞌí katsjaá xi tsꞌentsíjen ki̱a̱ na̱xi̱ńdáꞌniú Jerusale̱n, kó katsjaá ngo ndí xí kisꞌijña ngajoo̱, kó katsjángaꞌniuú na̱xi̱ńdáꞌniú Jerusale̱n nga, 5ngatꞌa̱ Ndabii̱ ni xi kixi̱ katsꞌén ngindyi̱ko̱n Néná, kó jmíni̱xtjin nga íjñátꞌaxín ngayeje ni xi atíxoma Néná nga kisꞌijña nga̱sondie, ta̱kuítsí ni xi katsꞌén kjo̱a̱a̱ Uriyaa̱, nda̱ xi chji̱a̱ni xota̱ Ee̱t.
6Kó Roboaa̱n ko̱jo Jeroboaa̱n ngatsjéni̱xtjin nga kisꞌińdo nga̱sondie nga kisꞌiee̱ kjo̱a̱xchán nga jó kui jaá. 7Kó ngayeje ni xi ngase xi katsꞌén Abiaa̱n, a ki̱a̱jín kjitꞌa ki̱a̱ xo̱jo̱n xi kjitꞌa ni xi katsꞌén já ree̱ nangi Jundáa̱. Kó kisꞌie kjo̱a̱xchán Abiaa̱n ko̱jo Jeroboaa̱n. 8Kó ngije kꞌien Abiaa̱n ki̱a̱ nijan kisꞌijñajo̱ xota̱ xi xchaá, ngatꞌa̱ ki̱a̱ akjanijín nínga tikón na̱xi̱ńdáꞌniuú Ndabii̱, kó Asa̱ ndií kui kisꞌijña ngajoo̱ nga re kamá.
Nga atíxoma Asaa̱
(2Kr 14:1-5; 15:16-19)
9Nó kan nga kisꞌijña re Jeroboaa̱n ki̱a̱ na̱xi̱ńdá Israee̱l, Asaa̱ ítsꞌi̱yanii̱ nga atíxoma nangi Jundáa̱. 10Kó yichán ngo nó kamaá nga atíxoma na̱xi̱ńdáꞌniú Jerusale̱n, kó na̱aa̱n na̱ Maakaa̱ kiꞌmí tsa̱kji̱ín Absaloo̱n.
11Kó Asaa̱ katsꞌén ni xi kixi̱ ngindyi̱ko̱n Néná, xikó katsꞌén Ndabii̱, kui xi xota̱ tji̱e̱e̱ kamá. 12Ngatꞌa̱ jaꞌáxín ki̱a̱ na̱xi̱ńdaá ngayeje jáxíꞌín xi katsꞌénmasien yojoo̱ ki̱a̱ ngi̱ndie ndikoón, kó ti̱ jaꞌáxín ngayeje ne xi katsꞌénda xota̱ xi xchaá nga. 13Kó ti̱ jaꞌáxiín xá na̱ Maakaa̱, nga kui xi na̱ re xi na̱aa̱n kamá, ngatꞌa̱ ngo ne xi a ta̱ chꞌo kjiꞌi xi chji̱a̱ni na̱ ne Aseraa̱ katsꞌénda. Kó Asaa̱ katsꞌénkjatsón a̱sie̱én kui nee̱, kó ki̱a̱ ítí ki̱a̱ tꞌa xo̱ngàndántꞌié Sendroo̱n. 14Ta̱nga jaꞌáxínjín ngi̱ndie nínga nkꞌaa̱ na̱xi̱ńdaá. Kó Asaa̱ ngayeje ni̱xtjin nga kisꞌijña nga kixi̱ kamá ini̱ma̱a̱ ngindyi̱ko̱n Néná. 15Kó jachójo̱ Ndiꞌaa̱ Néná ni xi katsꞌénkꞌasꞌien na̱ꞌmii̱, ko̱jo ni xi katsꞌénkꞌasꞌien kui xikoó: Ni to̱nsinié, ko̱jo ni to̱ntiboa, ko̱jo ni xi niꞌánkjién ki̱a̱ ngi̱ya Ndiꞌaa̱ Néná.
16Kó Asaa̱ ko̱jo Baasaa̱, nda̱ ree̱ na̱xi̱ńdá Israee̱l ngatsjéni̱xtjin nga kisꞌińdo nga̱sondie nga kisꞌiee̱ kjo̱a̱xchán. 17Baasaa̱, nda̱ ree̱ na̱xi̱ńdá Israee̱l kijínijíngí nga kijíkjánjo̱ nangi Jundáa̱, kó katsꞌénda ngi̱ndie ꞌniú ki̱a̱ na̱xi̱ńdáꞌniú Ramaa̱, tsi̱ꞌe̱ nga ngojín xi tsja̱ndieè nga ko̱e̱je̱koo̱n Asaa̱, ree̱ nangi Jundáa̱.
18Kósꞌe̱ Asaa̱ iskjíbé ngayeje to̱ntiboa ko̱jo to̱nsinié xi tsꞌangi ngase ki̱a̱ kjo̱a̱cho̱o̱n Ndiꞌaa̱ Néná, ko̱jo kjo̱a̱cho̱o̱n ndiꞌa nínga botixómá nda̱ ree̱, kó katsꞌénkꞌasꞌiee̱n já mosoo̱, kósꞌe̱ nda̱ re Asaa̱ katsangiyaa̱ Bee̱n-Andaa̱nd ndií Tabrimoo̱n, ndíndeè Esioo̱n, nda̱ ree̱ nangi Siria̱, xi kisꞌijña ki̱a̱ na̱xi̱ńdáꞌniú Ndamasko̱, kó bi̱ katsoó:
19Ngo kjo̱a̱ꞌbínda ngatꞌiéná ji ko̱jo an, xikoó xi kisꞌiee̱ na̱ꞌmina ko̱jo na̱ꞌmíi̱. Kꞌi̱e̱ tsꞌéntsangiyaa ni to̱nsinié ko̱jo ni xi to̱ntiboa, kuíni nga míꞌaá nga ti̱ꞌinkjie ji ni xi je ikꞌíndeje̱ ji Baasaa̱ nda̱ ree̱ na̱xi̱ńdá Israee̱l, tsi̱ꞌe̱ nga sa̱ꞌínkjinna yojoo̱ kui.
20Kó Bee̱n-Andaa̱nd tsintꞌié ni xi katsó nda̱ re Asaa̱, kó katsangiya já ngito̱ko̱o̱ jájuún tsi̱ꞌe̱ nga skjánjo̱ na̱xi̱ńdá Israee̱l, kó askjanjo̱ nangi Ijoo̱n, ko̱jo nangi Ndaa̱n, ko̱jo nangi Abee̱t-Maakaa̱, ko̱jo ngayeje ngi̱ndie xi síndo nangi Kineree̱t, ko̱jo ngayeje nangii̱ xota̱ tji̱e̱e̱ Neftalii̱.
21Kó ngije tsintꞌié kuí nii̱ Baasaa̱, ngiti̱ iskjininkꞌajín ngase na̱xi̱ńdáꞌniú Ramaa̱, kó ki̱a̱ kisꞌijña na̱xi̱ńdáꞌniú Tirsaa̱. 22Kósꞌe̱ nda̱ re Asaa̱ ítikó ngayeje xota̱ xi chji̱a̱ni nangi Jundáa̱, kó ngayejee̱ nga kijíjo̱ ndi̱jo̱ ko̱jo yá xí ndyi̱tsꞌènkjién ki̱a̱ na̱xi̱ńdáꞌniú Ramaa̱, kui xi katsꞌénkjién Baasaa̱ nga tsꞌénkjininkꞌa kui na̱xi̱ńdáꞌniuú katsaki, kó bo̱a̱ tsꞌén nda̱ re Asaa̱ katsjángaꞌniuú na̱xi̱ńdáꞌniú Ngebaa̱, ngi̱ndie xi chji̱a̱ni xota̱ tji̱e̱e̱ Benjaa̱, ko̱jo na̱xi̱ńdáꞌniú Mispaa̱.
23Kó ngayeje ni xi ngase xi katsꞌén Asaa̱, ko̱jo ngaꞌniú xí kisꞌiee̱, ko̱jo na̱xi̱ńdáꞌniú xí katsꞌénda, a ki̱a̱jín kjitꞌa ki̱a̱ xo̱jo̱n nínga kjitꞌa ni xi katsꞌén já ree̱ nangi Jundáa̱.
Ta̱nga ngije ꞌniú xchá, ngo chiꞌin kisꞌiee̱ se. 24Kó Asaa̱ ki̱a̱ nijan akjanijínjo̱ xi xchaá, ki̱a̱ na̱xi̱ńdáꞌniuú Ndabii̱, kó Josafaa̱t ndií kui nda̱a̱ kisꞌijña ngajoo̱.
Nga atíxoma Nandaa̱b
25Xí ma joó nó nga kisꞌijña Asaa̱ nda̱ ree̱ nangi Jundáa̱, Nandaa̱b ndií Jeroboaa̱n, ítsꞌi̱yanii̱ nga atíxomaa̱ na̱xi̱ńdá Israee̱l kó jó nó kamaá. 26Kó katsꞌén ni xi ndajín ngindyi̱ko̱n Néná, kó ki̱a̱ kijí ndi̱yà nínga kijí na̱ꞌmii̱, ta̱ngatꞌanii̱ jé xí katsꞌén nga ti̱ katsꞌénjé xota̱ Israee̱l nga.
27Kó Baasaa̱ ndií Ayiaa̱, xi chji̱a̱ni xota̱ tji̱e̱e̱ Isakaa̱r, askjanjo̱ kui nda̱a̱, kó Baasaa̱ katsꞌénkꞌién ki̱a̱ na̱xi̱ńdáꞌniú Ngibetoo̱n, ngi̱ndie xi chji̱a̱ni xota̱ Filisteaa̱, ngatꞌa̱ Nandaa̱b ko̱jo xota̱ Israee̱l ngayejee̱ nga je íchjáꞌyá na̱xi̱ńdáꞌniú Ngibetoo̱n tsi̱ꞌe̱ nga askjanjo̱. 28Xi ma jaán nó nga atíxoma nda̱ re Asaa̱ nangi Jundáa̱, Baasaa̱ katsꞌénkꞌién Nandaa̱b, kó kuí kisꞌijña ngajoo̱. 29Kó ngije kamá re, katsꞌénkꞌién ngayeje xota̱ ndiꞌaa̱ Jeroboaa̱n, nde ngojín xi katsꞌénkꞌangi xi xota̱ tji̱e̱e̱ Jeroboaa̱n kamá, xikó má katsó Néná nga tsíchji̱a̱jo nda̱ mosoo̱ xi ꞌmí Ayiaa̱, nda̱ xi chji̱a̱ni Siloo̱n, 30ta̱ngatꞌanii̱ jé xí katsꞌén Jeroboaa̱n, ko̱jo kjo̱a̱a̱ nga kui nii̱ xi katsꞌénjéní xota̱ Israee̱l nga, ko̱jo kjo̱a̱a̱ nga katsꞌénxtií Néná, kui xi Nee̱ xota̱ Israee̱l.
31Kó ngayeje ni xi ngase xi katsꞌén Nandaa̱b, a ki̱a̱jín kjitꞌa ki̱a̱ xo̱jo̱n nínga kjitꞌa ni xi katsꞌén já re xi chji̱a̱ni na̱xi̱ńdá Israee̱l. 32Kó kisꞌiee̱ kjo̱a̱xchán Asaa̱ ko̱jo Baasaa̱, nda̱ ree̱ na̱xi̱ńdá Israee̱l, ngayeje ni̱xtjin nga kisꞌińdo nga̱sondie nga joó.
Nga atíxomaa̱ Baasaa̱
33Nó xí ma jaán nga kisꞌijña re Asaa̱ ki̱a̱ nangi Jundáa̱, ítsꞌi̱yanii̱ Baasaa̱ ndií Ayiaa̱ nga atíxoma ngayeje na̱xi̱ńdá Israee̱l ki̱a̱ na̱xi̱ńdáꞌniú Tirsaa̱, kó kan nijón nó kamaá nga atíxoma. 34Kó ni xi ndajín katsꞌén ngindyi̱ko̱n Néná, kó ti̱ bo̱a̱ ti̱ katsꞌén xikó katsꞌén Jeroboaa̱n, kó jé xí katsꞌén kuí, xi katsꞌénjéní xota̱ Israee̱l nga.
Currently Selected:
1 Já ree̱ 15: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
