1 Já ree̱ 16
16
1Kósꞌe̱ Néná tsíchji̱a̱jo Jeuu̱ ndií Ananii̱ kondra̱ tsi̱ꞌe̱ Baasaa̱, kó bi̱ katsoó:
2Ngatꞌa̱ Án boá xi katsꞌenkjastjíee̱n ji ngi̱jii̱n chojoo̱, kó katsjaa nga ji xi ka̱ma ji ngito̱ko̱o̱ xota̱ na̱xi̱ńdána Israee̱l, ta̱nga ji ti̱ bo̱a̱ ti̱ tiniꞌín ji xikó katsꞌén Jeroboaa̱n nga, kó jí boá xi kiniꞌín ji nga xota̱ na̱xi̱ńdána katsꞌénjé, kó án kiniꞌínxtíní kjo̱a̱a̱ jé xí kiniꞌín ji, 3kuíni nga Án boá xi sa̱ꞌinkjié An ngayeje xota̱ tji̱e̱e̱ Baasaa̱, kó jaskan sa̱ꞌinkjié An ngayeje xota̱ ndiꞌaa̱, kó ndiꞌaa̱ bo̱a̱ tsꞌén sa̱ꞌinkꞌié An xikoó ndiꞌaa̱ Jeroboaa̱n ndií Nabaa̱t. 4Kui xota̱ tji̱e̱e̱ Baasaa̱ xi ki̱a̱ ko̱yà ngi̱jii̱n na̱xi̱ńdáꞌniuú, ńñaá skji̱ni̱e̱, kó xi ki̱a̱ ko̱yà ngi̱jin kꞌijñá jàn, ni̱sie xi tjín nkꞌa jàn skji̱ni̱e̱.
5Kó ngayeje ni xi ngase xi katsꞌén Baasaa̱, ko̱jo ngaꞌniú xí kisꞌiee̱, a ki̱a̱jín kjitꞌa ki̱a̱ Chꞌo̱ xo̱jo̱n nínga kjitꞌa ni xi katsꞌén já ree̱ na̱xi̱ńdá Israee̱l. 6Kó ngije kꞌien Baasaa̱, ki̱a̱ nijan kamátikójo̱ xi xchaá, nga akjanijín na̱xi̱ńdáꞌniú Tirsaa̱, kó Elaa̱ ndií kui nda̱a̱, kisꞌijña re ngajoo̱ kui. 7Ta̱nga Néná tsíchji̱a̱ nga katsꞌénkjién nda̱chji̱ni̱e̱ꞌén xi ꞌmí Jeuu̱ ndií Ananii̱ nga tsíchji̱a̱ kondra̱ tsi̱ꞌe̱ Baasaa̱, ko̱jo kondraa̱ xota̱ ndiꞌaa̱, kjo̱a̱a̱ ngayeje ni xi ndajín xi katsꞌén ngindyi̱ko̱n Néná, ko̱jo nga katsꞌénxtií Néná, kjo̱a̱a̱ ni xi katsꞌén, ngatꞌa̱ ti̱ bo̱a̱ ti̱ katsꞌén xikoó xota̱ ndiꞌaa̱ Jeroboaa̱n, nga katsꞌénkjié kui ngi̱ndiee̱ nga.
Nga atíxoma Elaa̱ ko̱jo Simrii̱
8Nó kan jun nga atíxomaa̱ Asaa̱, nda̱ ree̱ nangi Jundáa̱, ítsꞌi̱yanii̱ Elaa̱ ndií Baasaa̱ nga atíxoma na̱xi̱ńdá Israee̱l ki̱a̱ na̱xi̱ńdáꞌniú Tirsaa̱, kó jó nó kamaá nga atíxoma ki̱a̱a̱. 9Kó nda̱ mosoo̱ xi ꞌmí Simrii̱, kui xi kamá ngito̱ko̱o̱ xi atíxomaa̱ masien xikó kjiꞌi ma karro̱ kjo̱a̱xchán xí kisꞌiee̱, kjiꞌanga kisꞌijña na̱xi̱ńdáꞌniú Tirsaa̱ ndiꞌaa̱ Arsaa̱, nda̱ xi koo̱n ndiꞌaa̱, ki̱a̱ kamáchꞌi̱, kó ngo ni índa kondra̱a̱ Elaa̱, 10kó nga jachó Simrii̱, katsꞌénꞌoón, sꞌe̱ katsꞌénkꞌién nda̱ re Elaa̱, nó kan yito nga kisꞌijña Asaa̱ nda̱ ree̱ nangi Jundáa̱, kó kuí atíxoma ngajoo̱ ngijee̱.
11Kó kjiꞌanga ítsꞌi̱yanii̱ nga ko̱tíxoma, ngije tikónsón yáxíríe̱ nínga botíxomaa̱, katsꞌénkꞌién ngayeje xota̱ ndiꞌaa̱ Baasaa̱, kó nde ngojín jáxíꞌín xi katsꞌénkꞌangi, ti̱nde ngojín xkjín, ti̱nde ngojín xota̱ xi nda tsaꞌa. 12Kó bo̱a̱ tsꞌén Simrii̱ katsꞌénkjié ngayeje xota̱ ndiꞌaa̱ Baasaa̱, xikó má katsó én xí Néná katsóyàtjón kondraa̱ Baasaa̱ nga katsꞌénkjién nda̱chji̱ni̱e̱ꞌe̱én Néná xi ꞌmí Jeuu̱, 13ta̱ngatꞌanii̱ ngayeje jé xí katsꞌén Baasaa̱, ko̱jo jé xí katsꞌén Elaa̱ ndií, kui xi katsꞌénjé, kó katsꞌén nga katsꞌénjéní xota̱ Israee̱l, kó katsꞌénxtií Néná, kui xi Nee̱ xota̱ Israee̱l, nga kisꞌiee̱ ne xi jmí ni chjíjiín.
14Kó ngayeje ni xi ngase xi katsꞌén Elaa̱, a ki̱a̱jín kjitꞌa ki̱a̱ Chꞌo̱ xo̱jo̱n nínga kjitꞌa ni xi katsꞌén já re xi chji̱a̱ni na̱xi̱ńdá Israee̱l.
15Nó kan yito nga atíxoma Asaa̱, nda̱ ree̱ nangi Jundáa̱, Simrii̱ yito ni̱xtjin atíxoma ki̱a̱ na̱xi̱ńdáꞌniú Tirsaa̱, tji̱e̱nga xota̱ na̱xi̱ńdá Israee̱l ki̱a̱ kisꞌińdo tsá ki̱a̱ na̱xi̱ńdáꞌniú Ngibetoo̱n, ngi̱ndie xi chji̱a̱ni xota̱ Filisteaa̱, 16ta̱nga kjiꞌanga je ndyi̱tsꞌènkjaꞌyá xota̱ Israee̱l, tsintꞌié nga bi̱ kiꞌmií: Simrii̱ ngo ni índa, kó katsꞌénkꞌién nda̱ ree̱. Kó ti̱kuii ni̱xtjin ngayeje xota̱ Israee̱l katsjáxaá nga re kamá Omrii̱, nda̱ ngito̱ko̱o̱ jájuún, ki̱a̱ ngamasiee̱n ngi̱ndie nínga síndo ndiꞌańjñoo̱. 17Kósꞌe̱ Omrii̱ ndeskande na̱xi̱ńdáꞌniú Ngibetoo̱n jatjoni nga kijínijíngí, kó nijan kijíjo̱ ngayeje xota̱ Israee̱l, kó íchjáꞌyá na̱xi̱ńdáꞌniú Tirsaa̱. 18Ta̱nga ngije kamábe Simrii̱ nga je kiniꞌaán na̱xi̱ńdáꞌniuú, tsꞌasꞌien ngi̱ya ꞌniuú ndiꞌa nínga botixómá nda̱ ree̱, kó ítꞌa ndiꞌí ndiꞌaa̱ nda̱ ree̱, kó ki̱a̱ síndoꞌyá, kó bo̱a̱ tsꞌén jesón, 19ta̱ngatꞌanii̱ jé xí katsꞌén, nga ndajín katsꞌén ngindyi̱ko̱n Néná, ko̱jo nga bo̱a̱ katsꞌén xikó katsꞌén Jeroboaa̱n, ko̱jo kjo̱a̱a̱ jé xí katsꞌén nga ti̱ katsꞌénjé xota̱ Israee̱l nga.
20Kó ngayeje ni xi ngase xi katsꞌén Simrii̱ ko̱jo ni xi índa, a ki̱a̱jín kjitꞌa ki̱a̱ Chꞌo̱ xo̱jo̱n nínga kjitꞌa ngayeje ni xi katsꞌén já ree̱ na̱xi̱ńdá Israee̱l.
Nga atíxoma Omrii̱
21Kósꞌe̱ xota̱ na̱xi̱ńdá Israee̱l jó tjín kamá: Masien xota̱ na̱xi̱ńdaá xi kijítji̱ngii̱ Tibnii̱ ndií Jinaa̱t, tsi̱ꞌe̱ nga kui xi ko̱tíxomaa̱, kó xi ngi masiee̱n xota̱ na̱xi̱ńdaá ki̱a̱ kijítji̱ngii̱ Omrii̱. 22Ta̱nga xota̱ na̱xi̱ńdá xi kijítji̱ngii̱ Omrii̱ kisꞌie ngasee̱ ngaꞌniú, ta̱bo̱a̱jiín xota̱ xi kijítji̱ngii̱ Tibnii̱ ndií Jinaa̱t, kó Tibnii̱ kꞌien, kósꞌe̱ Omrii̱ atíxoma. 23Nó kantjiꞌún ngo nga kisꞌijña nda̱ re Asaa̱ nangi Jundáa̱, Omrii̱ ítsꞌi̱yanii̱ nga atíxoma ki̱a̱ na̱xi̱ńdá Israee̱l, kó tiejó nó kamaá nga atíxoma, jun nó atíxoma ki̱a̱ na̱xi̱ńdáꞌniú Tirsaa̱. 24Kó Omrii̱ tsꞌatsie na̱xi̱ Samaria̱ nga ichítié ko̱jo tjiꞌún ngo kilo̱ to̱ntiboa íchjíní, kó ngo ndiꞌa katsꞌénda ki̱a̱ na̱xi̱i̱, ko̱jo ngo na̱xi̱ńdáꞌniú katsꞌénda ki̱a̱a̱, xi Samaria̱ ítꞌajaꞌén, xikó kiꞌmí Semee̱r, kui nda̱ xi tsi̱ꞌe̱ kamá kui na̱xi̱i̱.
25Kó Omrii̱, ni xi ndajín katsꞌén ngindyi̱ko̱n Néná, kó ꞌniú ndajín ngase ni xi katsꞌén ta̱bo̱a̱jiín ngayeje já xí atíxoma ngindiee̱ kui, 26ngatꞌa̱ ti̱ bo̱a̱ ti̱ katsꞌén xikó katsꞌén Jeroboaa̱n ndií Nabaa̱t, ko̱jo kjo̱a̱a̱ jé xí katsꞌén nga katsꞌénjéní xota̱ Israee̱l, kó katsꞌénxtií Néná, kui xi Nee̱ xota̱ Israee̱l, ko̱jo kjo̱a̱a̱ kui a̱sie̱én ne xi jmí ni chjíjiín xi kisꞌiee̱.
27Kó ngayeje ni xi ngase xi katsꞌén Omrii̱, ko̱jo ngaꞌniú xí kisꞌiee̱, a ki̱a̱jín kjitꞌa ki̱a̱ Cho̱ xo̱jo̱n nínga kjitꞌa ni xi katsꞌén já ree̱ na̱xi̱ńdá Israee̱l. 28Kó Omrii̱ kamátikójo̱ xota̱ xi xchaá, kó ki̱a̱ akjanijín ki̱a̱ nangi Samaria̱, kó Akaa̱b ndií kui nda̱a̱ atíxoma ngajoo̱.
Nga atíxoma Akaa̱b
29Kó Akaa̱b ndií Omrii̱, ítsꞌi̱yanii̱ nga atíxoma na̱xi̱ńdá Israee̱l, nó kantjiꞌún ján nga kisꞌijña Asaa̱, nda̱ ree̱ nangi Jundáa̱, kó Akaa̱b ndií Omrii̱ kan jó nó atíxomaa̱ xota̱ Israee̱l ki̱a̱ nangi Samaria̱.
30Kó Akaa̱b ni xi ndajín katsꞌén ngindyi̱ko̱n Néná, chꞌo ngase katsꞌén ta̱bo̱a̱jiín ngayeje já xí atíxoma ngindiee̱ nga ko̱tíxoma kui, 31ngatꞌa̱ nde niꞌínjín kamaá nga katsꞌénjé xikoó Jeroboaa̱n ndií Nabaa̱t, kó ixánjo̱ na̱ Jesabee̱, tsa̱kji̱ín Ee̱t-Baa̱l nda̱ ree̱ nangi Sindoo̱n, kó ki̱a̱ katsꞌénxátꞌaa̱ ne Baa̱l, ko̱jo katsꞌéndikón nga asieéntikoó. 32Kó ngo ṉchandikón katsꞌéndaa̱ ne Baa̱l, ki̱a̱ na̱ngo̱xi̱i̱ ne Baa̱l ki̱a̱ nangi Samaria̱. 33Kó Akaa̱b ti̱ katsꞌénda ngo yá nínga kiniꞌándikón na̱ ne Aseraa̱, kó katsꞌénxtií Néná, kui xi Nee̱ xota̱ Israee̱l, ꞌniú ngase katsꞌénxtií ta̱bo̱a̱jiín ngayeje já re xi kisꞌińdo ngindiee̱ nga ko̱tixoma kui.
34Kui ni̱xtjin jàn Jiee̱l, nda̱ xi chji̱a̱ni Betee̱l iskjininkꞌa nginí na̱xi̱ńdáꞌniú Jerikoo̱. Kó Abiraa̱n ndí xí tjoón kuí íchjí kuí nii̱, ngatꞌa̱ kiniꞌánkꞌién nga íjñá xó xí ikꞌítjatsꞌennii̱ kui na̱xi̱ńdáꞌniuú, kó ti̱ íchjí kuí nii̱ Sengoo̱b ndí xí kjindií nga, ngatꞌa̱ kiniꞌánkꞌién ndatsa kui nga, kjiꞌanga íjñá nga̱ntjo̱a̱a̱, xikó má katsó Néná nga katsꞌénkíchji̱a̱ Josuee̱ ndií Nuu̱n.
Currently Selected:
1 Já ree̱ 16: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
