1 Já ree̱ 14
14
Én xí katsóyàtjón Ayiaa̱ kondra̱a̱ Jeroboaa̱n
1Kui ni̱xtjin jàn Abiyaa̱, ndií Jeroboaa̱n, kamáꞌoón, 2kó Jeroboaa̱n, bi̱ katsoó chjo̱ón:
—Ti̱sítji̱n ji ngotꞌe̱ ꞌne̱, kó kje̱ꞌe ti̱ꞌinkꞌiè jí yojòo̱, tsi̱ꞌe̱ nga jmíjín xi sku̱i̱e̱e̱ nga chjo̱ón Jeroboaa̱n boá ji, kó tꞌen ji na̱xi̱ńdáꞌniú Silo̱, ngatꞌa̱ ki̱a̱ tikón nda̱chji̱ni̱e̱ꞌe̱én Néná xi ꞌmí Ayiaa̱, kui nda̱ xi bo̱a̱ katsóna nga án boá xi ka̱ma an ree̱ kui xota̱ na̱xi̱ńdaá. 3Kó chjábé jí tie pan, ko̱jo pan xi kjikjojó, ko̱jo ngo ndí ti̱ji̱ì ntsjién, kó tꞌenchíi̱n kui, kó kui ka̱tso̱yaa̱ mí ni xi ka̱maa̱ kui ndií.
4Kó chjo̱ón Jeroboaa̱n bo̱a̱ katsꞌén, jastjíe̱n, kó kijí na̱xi̱ńdáꞌniú Silo̱, sꞌe̱ jachó ndiꞌaa̱ Ayiaa̱. Kó Ayiaa̱ ngiti̱ kamájín kamábe ꞌyá kuí bo̱a̱, ngatꞌa̱ je ngiti̱ tsijénjín kamaá kjo̱a̱a̱ nga je ꞌniú xchá kamá. 5Ta̱nga Néná, bi̱ katsoó Ayiaa̱: Chjo̱on Jeroboaa̱n kji̱ndi̱bákoón tsi̱ꞌe̱ nga ko̱síyaá kjo̱a̱a̱ kui ndí xí oo̱n, kó chjiéngá bi̱ tsꞌén kꞌuiyée̱, ngatꞌa̱ kjiꞌanga kꞌo̱sꞌien kui naa̱ xche̱ nga kje̱ꞌe sa̱ꞌínkꞌié yojoo̱ tsi̱ꞌe̱ nga xcha̱jín ꞌyá kuií bo̱a̱. 6Kó bo̱a̱ tsꞌén kjiꞌanga tsintꞌié Ayiaa̱ nga janie se kui naa̱ nga tsꞌasꞌien nga̱ntjo̱a̱a̱, bi̱ katsó:
—¡Ti̱tjásꞌi̱n ji chjo̱ón Jeroboaa̱n, ánní nga kje̱ꞌe kiniꞌínkꞌié jí yojòo̱! Án boá xi kanangiyana tsi̱ꞌe̱ nga xiyaá ngo én xí ndikón. 7Kó bi̱ kiꞌmína: Tꞌen ji, kó bi̱ tꞌíi̱n Jeroboaa̱n: Kui nii̱ xi tsó Néná, kui xi Nee̱ xota̱ Israee̱l: Ngatꞌa̱ nga án boá xi katsꞌenkjastjíee̱n ngi̱jii̱n xota̱ na̱xi̱ńdána, kó án boá xi ngito̱ko̱ katsꞌeen ki̱a̱ ngi̱jii̱n xota̱ na̱xi̱ńdána Israee̱l, 8kó katsꞌenkjié an ngi̱ndie nínga botixómá xota̱ tji̱e̱e̱ Ndabii̱, kó ji katsꞌenkꞌasꞌieen, ta̱nga ji, bo̱a̱jín kiniꞌín ji xikoó moso̱na Ndabii̱, kui xi katsꞌénkjatjosón kjo̱a̱botíxomana, kó ngayeje ini̱ma̱a̱ nga kijítji̱ngina, kó ta̱kuítsí ni xi kixi̱ kamá ngindyikón án xi katsꞌén kuí, 9kó jí, ta̱sá ni xi ndajínkjiꞌi kiniꞌínje̱ ji ngayeje xota̱ xi kisꞌińdo ngindiee̱ nga ku̱i̱ndyin ji, kó kꞌin ji, kó kiniꞌínde ji kje̱ꞌe ne, ko̱jo a̱si̱én xí kiniꞌánńdá tsi̱ꞌe̱ nga kiniꞌínxtínní, kó je ikꞌíjñímasinní, 10kuíni nga ngotꞌe̱ ꞌne̱, án boá xi sa̱ꞌin an ni xi ndajín xi kji̱ndi̱bánié xota̱ ndiꞌaa̱ Jeroboaa̱n, kó sa̱ꞌinkjié an ngayeje jáxíꞌín xi chji̱a̱ni kui nda̱a̱, tsi moso̱ xi kastiñá ko̱jo tsi xi tjimándé ki̱a̱ na̱xi̱ńdá Israee̱l, kó sa̱ꞌinkjié yeje an xota̱ tji̱e̱ xi jaskan kꞌuieé Jeroboaa̱n xikótsꞌèn niꞌántsjie yeꞌee̱, ngaskande nga kju̱i̱e̱ yeje. 11Kó kui xota̱ tji̱e̱e̱ Jeroboaa̱n xi ko̱yà ki̱a̱ ngi̱jii̱n na̱xi̱ńdáꞌniuú, ńñaá skji̱ni̱e̱, kó xi ki̱a̱ ko̱yà ngi̱jin kꞌijñá jàn, ni̱sie xi tjín nkꞌa jàn skji̱ni̱e̱, ngatꞌa̱ Néná boá xi je tsíchji̱a̱ kui nii̱.
12Kó jí ti̱sítji̱n ji, kó tꞌen ndiꞌàa̱, ngatꞌa̱ ngije ku̱i̱tjásꞌi̱n ji kui na̱xi̱ńdáꞌniuú, ko̱yà kuí ndií. 13Kó ngayeje xota̱ Israee̱l skja̱ndátjé, kó ko̱ónijín, ngatꞌa̱ ta̱kuítsí kui ndií xi kjónijín ngi̱jii̱n xota̱ tji̱e̱e̱ Jeroboaa̱n, ngatꞌa̱ ta̱kuítsí xi nda kisꞌijña ngindyi̱ko̱n Néná, kui xi Nee̱ xota̱ Israee̱l.
14Kó Néná kjo̱a̱ꞌájin ngo nda̱ re xi ko̱tíxoma na̱xi̱ńdá Israee̱l, kui xi sa̱ꞌínkjié xota̱ tji̱e̱e̱ Jeroboaa̱n kui ni̱xtjii̱n, kó ngotꞌe̱ má bo̱a̱ nga bo̱a̱ sa̱ꞌín. 15Néná ku̱i̱ꞌítsanieyá xota̱ Israee̱l, xikó má tsꞌén ꞌbítsanieyá ngo yána̱xo̱ ngi̱jin ndáfoaa̱, kó kuí boá xi kꞌo̱xié xota̱ Israee̱l kui tꞌanangi nda xi katsjaá xota̱ tji̱e̱ xchaá, kó sa̱ꞌíntsojoboa nínga kjin ngasenii̱ ndejèꞌ Éufratee̱, ngatꞌa̱ a̱sie̱én na̱ ne xi ꞌmí Aseraa̱ je katsꞌénda, kó bo̱a̱ katsꞌén nga katsꞌénkjaán Néná. 16Kó sa̱ꞌínkꞌasꞌien xota̱ Israee̱l ta̱ngatꞌanii̱ jé xí katsꞌén Jeroboaa̱n, kjo̱a̱a̱ kui jé xí katsꞌén kuí, kósꞌe̱ ti̱ katsꞌénjé xota̱ Israee̱l nga.
17Kósꞌe̱ chjo̱ón Jeroboaa̱n jastjíe̱n, kó kijí, sꞌe̱ jachó ki̱a̱ na̱xi̱ńdáꞌniú Tirsaa̱, kó nga tsꞌasꞌien xtji̱e̱e̱n nga̱ntjo̱a̱a̱ ndiꞌaa̱, kꞌien kui ndií. 18Kó akjanijín, kó ngayeje xota̱ Israee̱l kisꞌińdo xa̱ꞌya̱, xikó má katsó Néná nga katsꞌénkíchji̱a̱ nda̱chji̱ni̱e̱ꞌe̱én Néná xi ꞌmí Ayiaa̱.
19Kó ni xi ngase xi katsꞌén Jeroboaa̱n, xikoó kjo̱a̱xchán xí katsꞌén, ko̱jo kótsꞌèn atíxoma, ki̱a̱ kjitꞌa kui nii̱ ki̱a̱ Xo̱jo̱n nínga kjitꞌa ni xi katsꞌén já re xi chji̱a̱ni na̱xi̱ńdá Israee̱l. 20Kan jó nó kamaá Jeroboaa̱n nga atíxoma na̱xi̱ńdá Israee̱l, kó ngije kꞌien, ki̱a̱ nijan kamátikójo̱ xota̱ xi xchaá, kó Nandaa̱b ndií kisꞌijña ngajoo̱.
Ni̱xtjin nga atíxoma Roboaa̱n
(2Kr 12:1-16)
21Kó Roboaa̱n ndií Salomoo̱ atíxoma nangi Jundáa̱. Yichán ngo noó Roboaa̱n nga ítsꞌi̱yanii̱ nga atíxoma, kó tjiꞌún jó nó kamaá nga atíxoma ki̱a̱ na̱xi̱ńdáꞌniú Jerusale̱n, kui na̱xi̱ńdáꞌniú xí Néná jaꞌájin ngi̱jii̱n ngayeje xota̱ tji̱e̱e̱ xota̱ Israee̱l, tsi̱ꞌe̱ nga ki̱a̱ íjñá Jaꞌeén. Naamaa̱ boá xi kamá na̱aa̱n Roboaa̱n, kui xi xota̱ tji̱e̱e̱ Amoo̱n chji̱a̱ni.
22Kó Jundáa̱ ni xi ndajín katsꞌén ngindyi̱ko̱n Néná, kó ꞌniú ngase katsꞌénxchán Néná, kjo̱a̱a̱ jé xí katsꞌén ta̱bo̱a̱jiín ni xi katsꞌén xota̱ xi xchaá nga katsꞌénjé. 23Ngatꞌa̱ kui xotaa̱ ti̱ katsꞌénda ngi̱ndie nínga nkꞌa, ko̱jo ndi̱jo̱ xi katsꞌendikón, ko̱jo a̱sie̱én na̱ ne Aseraa̱, kó ki̱a̱ índo xki̱ tji̱ngi̱ xi nkꞌa, ko̱jo xki̱ ngindie ngayeje yá xí yiꞌi. 24Ti̱ kisꞌińdo kui na̱xi̱ńdáꞌniuú jáxíꞌín xi katsꞌénmasien yojoo̱, xikoó xota̱ Sondomaa̱, xi katsꞌén xikó kjiꞌi ni xi ta̱nisién ꞌniú chꞌokjiꞌi xi katsꞌén kui xota̱ na̱xi̱ńdá xí Néná tsangatji̱ngii̱ xikótsꞌèn kijí xota̱ Israee̱l.
25Nó xí ma uún nga kisꞌijña nda̱ re Roboaa̱n, nda̱ re Sisaa̱k xi chji̱a̱ni nangi Ejiptoo̱ kijínijíngí na̱xi̱ńdáꞌniú Jerusale̱n, 26kó katsꞌéntsi̱ꞌe̱ kjo̱a̱cho̱n xi kisꞌie Ndiꞌaa̱ Néná, ko̱jo kjo̱a̱cho̱n xi kisꞌie ndiꞌaa̱ nda̱ ree̱, kó kijíjo̱ ngayeje kui nii̱, kó ti̱ kijíjo̱ ngayeje ni xi ꞌbíchjaá ni xi ndajín xi to̱nsinié kamándani xi katsꞌénda Salomoo̱ nga. 27Kó nda̱ re Roboaa̱n ngajoo̱ kui nii̱ katsꞌénda xi ki̱cha̱ bronse̱, kó katsjaá já ngito̱ko̱o̱ já xí koón, kui xi askondá nga̱ntjo̱a̱ ndiꞌaa̱ nda̱ ree̱. 28Kó kjiꞌanga nda̱ ree̱ tsꞌasꞌien ndiꞌaa̱ Néná, jájún xi konda Ndiꞌaa̱ Néná kijíjo̱ kui ni xi ꞌbíchjaá ni xi ndajiín, kósꞌe̱ ki̱a̱ índo ngi̱ya ndiꞌa nínga síndo jájún xi konda kui Ndiꞌaa̱.
29Kó ni xi ngase xi katsꞌén Roboaa̱n, a ki̱a̱jín kjitꞌa ki̱a̱ xo̱jo̱n xi chji̱a̱ni ni xi katsꞌén já ree̱ nangi Jundáa̱. 30Kó ngatsjéni̱xtjin nga kisꞌiee̱ kjo̱a̱xchán Roboaa̱n ko̱jo Jeroboaa̱n.
31Kó ngije kꞌien Roboaa̱n ki̱a̱ nijan kisꞌinijínjo̱ xota̱ xi xchaá, ki̱a̱ na̱xi̱ńdáꞌniuú Ndabii̱. Naamaa̱ boá xi na̱aa̱n kamá, na̱ xi chji̱a̱ni xota̱ tji̱e̱e̱ Amoo̱n. Kó ndií Roboaa̱n xi ꞌmí Abiaa̱n kisꞌijña ngajoo̱ nga atíxoma.
Currently Selected:
1 Já ree̱ 14: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
