1 Já ree̱ 13
13
Ngo nda̱chji̱ni̱e̱ꞌe̱én Néná xi chji̱a̱ni nangi Jundáa̱ tsíchji̱a̱jo Jeroboaa̱n
1Ta̱nga ngo nda̱ xi chji̱a̱ni Néná, kui xi Néná tsíchji̱a̱jo kjindibáni nangi Jundáa̱, kó jachó ki̱a̱ na̱xi̱ńdáꞌniú Betee̱l, tji̱e̱nga Jeroboaa̱n ki̱a̱ sikóntꞌa ṉchandikoón nga tsꞌénꞌbití nisije̱n. 2Néná tsíchji̱a̱jo kui nda̱a̱, kó bi̱ katsó nga askjandáyà kondraa̱ ṉchandikoón:
Ji ṉchandikoón, ji ṉchandikoón, bi̱ tsó Néná: Ngotꞌe̱ ꞌne̱, ngi̱jii̱n xota̱ tji̱e̱e̱ Ndabii̱ stse̱n ngo ndí xí Josiya̱ kꞌuìn, kó kuí boá xi sa̱ꞌínkꞌién nga̱sóo̱n, kui já chináꞌmi xi síndo ngi̱ndie nínga nkꞌaa̱, kui xi nga̱sóo̱n ndyi̱ꞌbítí nisijee̱n, kó ji ku̱i̱ꞌítísoón ńdaa̱ xotaa̱.
3Kó ti̱kuii ni̱xtjin kui ndaa̱, katsjaá ngo chi̱bo̱a̱ kui xotaa̱, nga bi̱ katsó: Kuí bí kui chi̱bo̱a̱ xi̱ꞌbi̱ xi Néná katsjá nga tsíchji̱a̱: ¡Kui ṉchandikoón jó tjín ka̱ma, kó ndiso xi tsꞌájinni xinieé ki̱a̱ xtjónsón nga̱soón!
4Kó kjiꞌanga tsintꞌié nda̱ re Jeroboaa̱n én xí katsó kui nda̱ xi chji̱a̱ni Néná, kui xi askjandáyà kondra̱a̱ kui ṉchandikoón ki̱a̱ na̱xi̱ńdáꞌniú Betee̱l, yejéntie tsja ndeskande ki̱a̱ nínga tikón ṉchandikoón, kó bi̱ katsó: ¡Ndo̱bo̱a̱jnú kui nda̱a̱! Kó ti̱ kjiꞌa kixíyà tsja xi yején kondra̱a̱ kui nda̱a̱, kó ngiti̱ kamájín kisꞌijñanda. 5Kósꞌe̱ kui ṉchandikoón tsakjanga, kó ndiso xi tjiín xinieé ki̱a̱ katjonjón ṉchaa̱n xikó maá chi̱bo̱a̱ xi katsó kui nda̱ xi chji̱a̱ni Néná, nga atíxomaa̱ Néná ni xi ka̱tso̱. 6Kósꞌe̱ nda̱ ree̱, bi̱ katsoó nda̱ xi chji̱a̱ni Néná:
—ꞌNiú míꞌaá ji nga ꞌniú chji̱e̱ꞌèe̱ Néná tsi̱ꞌe̱ nga kjo̱a̱ꞌajenda, kó ndókjo̱e̱tjéní tsi̱ꞌe̱ nga ka̱mandaya ndsa̱ án.
Kó kui nda̱ xi chji̱a̱ni Néná, tsíchji̱a̱a̱ Néná, kó Néná jaꞌajenda, sꞌe̱ kamándaya tsja nda̱ ree̱, kó kisꞌijñanda nginí xikoó ngasꞌe̱. 7Kósꞌe̱ nda̱ ree̱, bi̱ katsoó nda̱ xi chji̱a̱ni Néná:
—Tjiàn ndiꞌana, tsi̱ꞌe̱ nga xi̱ni̱ ji chií nichinie, kó ngo ni tsjaa.
8Ta̱nga kui nda̱ xi chji̱a̱ni Néná, bi̱ katsoó nda̱ ree̱:
—Ndatsi masien ndiꞌàa̱ ko̱e̱ꞌéní, kjuínjo̱jaán ji, ti̱nde jmí nichinie skjíni̱e̱jín an, ti̱nde kꞌuiján an ndáfoa kui ngi̱ndiee̱. 9Ngatꞌa̱ Néná boá xi katsjána ngo kjo̱a̱, nga bi̱ katsóna: Ngata̱ chinijín ji nichinie, ti̱nde ngata̱ ꞌyíjín ji ndáfoa, ti̱nde ngata̱ ki̱a̱jín ndibé nginí ji ndi̱yà nínga kꞌin ji.
10Kó kui nda̱chji̱ni̱e̱ꞌe̱én kje̱ꞌe ndi̱yà kijí nginí, ngiti̱ ki̱a̱jín kijí ndi̱yà nínga jachóni na̱xi̱ńdáꞌniú Betee̱l.
11Kui ni̱xtjin jàn ki̱a̱ na̱xi̱ńdáꞌniú Betee̱l kisꞌijña ngo nda̱chji̱ni̱e̱ꞌe̱én Néná xí je xchá kamá, ndií kui nda̱a̱ kijíkoón, kó katsóyaà ngayeje ni xi katsꞌén nda̱ xi chji̱a̱ni Néná kui ni̱xtjii̱n ki̱a̱ na̱xi̱ńdáꞌniú Betee̱l, kó ti̱ katsóyaà na̱ꞌmii̱ kui ni xi tsíchji̱a̱jo nda̱ ree̱ nga. 12Kó na̱ꞌmii̱, bi̱ katsó:
—Ñá ndi̱ya̱à nínga kijí.
Kó ndií kui xingaá akoó ndi̱yà nínga kijíni kui nda̱ xi chji̱a̱ni Néná, kui xí kjindibáni nangi Jundáa̱. 13Kó kui xingaá, bi̱ katsoó ndií:
Tꞌísónjnúu̱ xiri̱e̱e̱ bórroó.
Kó kui jaá ísoón xiri̱e̱e̱ bórroó, kósꞌe̱ kui xingaá kisꞌijñasoón kui cho̱o̱. 14Kó kijíngase nda̱ xi chji̱a̱ni Néná, kó ki̱a̱ kasakoo̱ nga tikón ngindiee̱ ngo yáꞌáxka̱, kó bi̱ katsó nga asíyaá:
—A jí boá kui nda̱ xi chji̱a̱ni Néná xi kjindibáni nangi Jundáa̱.
Kó bi̱ katsó kui nda̱a̱:
—Jo̱o̱n, án boá.
15Kósꞌe̱ bi̱ katsoó kui nda̱a̱:
—Tjiàn ndiꞌana, kó chi̱ni chií ji nichinie.
16Ta̱nga kui nda̱a̱, bi̱ katsó:
—Ka̱májín kjuínjo̱ꞌoyá ngiñaá, ti̱nde ka̱májín kjuín án ndiꞌáa̱, ti̱nde ka̱májín skjíni̱e̱ an nichinie, ti̱nde ka̱májín kꞌuí an ndáfoa kꞌi̱e̱ kui ngi̱ndiee̱. 17Ngatꞌa̱ Néná boá xi katsjána ngo én nga bi̱ katsóna:
—Ngata̱ chinijín ji nichinie, ti̱nde ngata̱ ꞌyíjín ji ndáfoa kui ngi̱ndiee̱, ti̱nde ngata̱ ki̱a̱jín ndi̱yà nínga kꞌin ji ndibé nginí ji.
18Ta̱nga kui xingaá, bi̱ katsó:
—¡Ti̱ nda̱chji̱ni̱e̱ꞌén án xikoó ji nga, kó ngo ndítsjie tsíchji̱a̱jona nga katsóyàtjónna eén Néná, nga bi̱ katsóna:
—Ti̱ꞌin ji nga kji̱ndi̱báꞌoyá nginí ki̱a̱ ndiꞌàa̱, tsi̱ꞌe̱ nga skji̱ni̱e̱ chií nichinie ko̱jo kꞌuí ndáfoa!
Ta̱nga índiso kuí xingaá. 19Kósꞌe̱ kijíjo̱ nginí kui nda̱a̱, kó iskjinie nichinie ko̱jo katsꞌe ndáfoa ndiꞌaa̱. 20Kó tji̱e̱nga síndotꞌa yámíxa̱a̱, Néná tsíchji̱a̱jo kui nda̱chji̱ni̱e̱ꞌe̱én Néná xi katsꞌénkjindibaꞌóyá nginí kui nda̱a̱. 21Kó bi̱ katsoó nga ꞌniú tsíchji̱a̱jo kui nda̱ xi chji̱a̱ni Néná xi kjindibáni nangi Jundáa̱:
—Bi̱ tsó Néná: Ánní nga kiniꞌínkitikjo̱e̱e̱ Nèe̱, kó kiniꞌínkjatjosénjín ji kjo̱a̱botíxoma xi katsjaá Néná, 22nga ta̱sá kꞌinꞌoyé nginí ji, kó kichini ji nichinie, ko̱jo kiꞌyí ji ndáfoa ki̱a̱ ngi̱ndie nínga bo̱a̱ kiꞌmií nga ka̱májín xi̱ni̱ ji nichinie, ti̱nde ka̱májín sꞌi̱ ji ndáfoa, kuíni nga ngotꞌe̱ ꞌne̱, yojo kꞌièe̱n ki̱a̱jín nijan sꞌi̱nijín nínga kjiyojonijín xota̱ xi xcháa̱.
23Kó ngije iskjinie nichinie ko̱jo ngije katsꞌe ndáfoa, kui nda̱chji̱ni̱e̱ꞌe̱én xi katsꞌén nga kijíꞌoyá nginí kui nda̱a̱, ísoón xiri̱e̱ bórroó. 24Ta̱nga ngije tsꞌénfí ngi̱ya ndi̱ya̱à, ngo xandi̱je̱ jatjokjaà, kó katsꞌénkꞌién, kó yojoo̱ kꞌiee̱n kui nda̱a̱, ki̱a̱ kisꞌie ngi̱ya ndi̱ya̱à, kó bórróo̱ ki̱a̱ xió kasasientꞌaa̱, kó ko̱jo kui xandi̱je̱e̱ ki̱a̱ xió kisꞌijñatꞌa ki̱a̱ tꞌa nínga kisꞌie kui nda̱a̱ nga. 25Kó jó já jaꞌa ki̱a̱a̱, kó nga kamábe yojo kꞌiee̱n nga ki̱a̱ kjiꞌijña ngi̱ya ndi̱ya̱à, ko̱jo nga ki̱a̱ tikón xandi̱je̱e̱ ki̱a̱ tꞌa kui yojo kꞌiee̱n, kijítsóyà ki̱a̱ na̱xi̱ńdáꞌniú ki̱a̱ nínga tikón nda̱chji̱ni̱e̱ꞌe̱én Néná xí xchaá. 26Kó nga tsintꞌié kuí nii̱ kui nda̱chji̱ni̱e̱ꞌe̱én Néná kui xi katsꞌénkjíꞌóyá nginí ndi̱ya̱à, bi̱ katsó:
—Kui nda̱a̱, kuí boá nda̱ xi chji̱a̱ni Néná, kui xi tsintꞌiéꞌénjiín én xí atíxomaa̱ Néná, kuíni nga Néná kui xandi̱je̱e̱ katsꞌénkꞌasꞌiee̱n, kó kui cho̱o̱ katsꞌénxi̱ ko̱jo katsꞌénkꞌién, xikó má katsó én xí Néná tsíchji̱a̱jo.
27Kósꞌe̱ kui nda̱a̱ tsíchji̱a̱jo ndií, nga bi̱ katsoó:
—Tꞌíjñásónjnúu̱ xiri̱e̱ bórroó.
Kó kui jaá ísoón xiri̱e̱e̱. 28Sꞌe̱ kijí kui nda̱a̱, kó ki̱a̱ kasakoo̱ yojo kꞌiee̱n ngi̱ya ndi̱ya̱à, kó bórroó ko̱jo xandi̱je̱e̱ ki̱a̱ síndotꞌa kui yojo kꞌiee̱n. Xandi̱je̱e̱ iskjiniejín kui yojoo̱, ti̱nde katsꞌénꞌónjiín bórroó nga.
29Kósꞌe̱ kui nda̱chji̱ni̱e̱ꞌe̱én Néná iskjíbé yojo kꞌiee̱n nda̱ xi chji̱a̱ni Néná, kó íjñasón yojo kꞌiee̱n ki̱a̱ bórroó, sꞌe̱ kijíjo̱. Kó kui nda̱chji̱ni̱e̱ꞌén xchaá kijí na̱xi̱ńdáꞌniuú tsi̱ꞌe̱ nga kꞌuíndo xa̱ꞌya̱ kjo̱a̱a̱ kui nda̱ xi chji̱a̱ni Néná, sꞌe̱ ko̱ónijín ngijee̱. 30Kó ki̱a̱ íjñá yojo kꞌiee̱n kui nda̱a̱ ki̱a̱ nga̱tsjò xí tsi̱ꞌe̱, kó ꞌniú askjandátjé, nga bi̱ katsoó:
—¡Xi̱xꞌi̱a̱n xò ji ntsꞌie!
31Kó ngije yínijín kui yojo kꞌiee̱n, bi̱ katsoó ndií:
—Ngije ko̱yà an, ki̱a̱ tjanijínjnúꞌun ki̱a̱ nga̱tsjò nínga tjínijín nda̱ xi chji̱a̱ni Néná, kó ki̱a̱ tꞌíndojnú ńdana ki̱a̱ tꞌa nínga síndo tsi̱ꞌe̱ kui nda̱a̱ nga. 32Ngatꞌa̱ ja̱koxi̱ boá nga kjo̱tjosón eén Néná xi kiꞌmíyaà kui nda̱a̱, xi tsíchji̱a̱ kjo̱a̱a̱ kondra̱a̱ ṉchandikón xí tikón ki̱a̱ na̱xi̱ńdáꞌniú Betee̱l, ko̱jo kondra̱a̱ ngayeje ndiꞌa xi síndo nínga nkꞌaa̱ na̱xi̱ńdáꞌniú xí chji̱a̱ni nangi Samaria̱.
33Jaskan ngije kamá kui nii̱, Jeroboaa̱n, íjñámasienjín ndi̱yà xí ndajín xi kistsoꞌbá, ta̱sá má ti̱ índo nginí chináꞌmi ki̱a̱ ngi̱ndie nínga nkꞌaa̱ ngi̱jii̱n xota̱ na̱xi̱ńdaá, kó xi kamámejeén katsjaá xá chináꞌmi kui ngi̱ndiee̱, tsi̱ꞌe̱ nga kui xi ka̱ma chináꞌmii̱ ngi̱ndie nínga nkꞌaa̱. 34Kó kuí nii̱ xi jeé xota̱ ndiꞌaa̱ Jeroboaa̱n kamá, kuíni nga kiniꞌánkjié kjin kjin kui xotaa̱ kꞌi̱e̱ nga̱són tꞌanangii̱.
Currently Selected:
1 Já ree̱ 13: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
