1 Já ree̱ 12
12
Kjo̱a̱kitikjo̱a̱a̱ xota̱ Israee̱l
(2Kr 10:1—11:4)
1Kó Roboa̱n kijí nangi Sikee̱n, ngatꞌa̱ ngayeje xota̱ Israee̱l ki̱a̱ jachó kui ngi̱ndiee̱, tsi̱ꞌe̱ nga ki̱a̱ si̱ꞌan re. 2Kó nga tsintꞌié kuí nii̱ Jeroboaa̱n ndií Nabaa̱t, kui xi to̱kó ki̱a̱ tikón ngase ki̱a̱ nangi Ejipto̱, nínga tsanga ta̱ngatꞌanii̱ nda̱ re Salomoo̱, nga tikón ki̱a̱ nangi Ejiptoo̱, 3kandokjo̱a̱a̱, kó Jeroboaa̱n jachó kuí ko̱jo ngayeje xota̱ na̱xi̱ńdá Israee̱l, tsi̱ꞌe̱ nga ku̱i̱chji̱a̱jo Roboa̱n, kó bi̱ katsoó:
4—Na̱ꞌmíi̱ katsꞌén é ngase ni xi ikꞌíniéjne̱. Ngotꞌe̱ ꞌne̱, ti̱ꞌinxtje̱ ji kui xá eé, ko̱jo ni é xí íniéjne̱, kó ta̱sá ji si̱ꞌanxájo̱jne̱ ngijee̱.
5Kó Roboaa̱n, bi̱ katsoó:
—Tangínjnú, kó ngotꞌe̱ ján ni̱xtjin ndibáchon nginíjnúꞌun.
Kó kijí kui xota̱ na̱xi̱ńdaá. 6Kósꞌe̱ nda̱ re Roboa̱n, asíyaá xota̱ xi xchá xí kisꞌińdo ngindyi̱ko̱n Salomo̱ na̱ꞌmii̱ nga kisꞌijña nga̱sondie, kó bi̱ katsoó:
—Kótsꞌèn ko̱ti̱xomájnúꞌun jún nga kuichjiájo an kui xota̱ na̱xi̱ńdaá.
7Kó kui jaá, bi̱ katsó:
—Tsi ji xi si̱ꞌinxétꞌée̱ kui xota̱ na̱xi̱ńdaá ngotꞌe̱, kó tsi nda én xí ko̱ndókjo̱e̱je ji, ja̱ kjiꞌá boá nga kui xotaa̱ ngatsjéni̱xtjin nga moso̱ tse̱ ka̱ma.
8Ta̱nga Roboaa̱n íjñámasien kjo̱a̱botíxoma xi katsjaá já xchá ngito̱ko̱o̱, kó asíyaá já xo̱ngò xí nijan kamáxchájo̱, kui xi síndo ngindyi̱ko̱n kui. 9Kó bi̱ katsoó:
—Mí kjo̱a̱botíxoma xi ko̱e̱ꞌéjnúꞌun jún nga xiyàa̱ kui xota̱ na̱xi̱ńdaá, kui xi bi̱ katsóna: Ti̱ꞌinxtje̱ chií ji kui ni é xí na̱ꞌmíi̱ íniéjne̱.
10Kósꞌe̱ kui já xo̱ngò xí nijan kamáxchájo̱ kui nda̱a̱, bi̱ katsoó:
—Bi̱ tsꞌén ko̱ndókjo̱e̱je ji kui xota̱ na̱xi̱ńdá xí bi̱ katsoó: Na̱ꞌmíi̱ boá xi ꞌniú é katsꞌén xájne̱, ta̱nga ji ka̱ma si̱ꞌinxtje̱ ji Bi̱ tsꞌén ko̱ndókjo̱e̱je ji: Xtín xí chichií ndsa̱ án, ꞌniú ngase je ta̱bo̱a̱jiín yojoyìtsꞌe̱n na̱ꞌmina. 11Kó ngotꞌe̱ ꞌne̱, tsi na̱ꞌmina xi kjo̱a̱ni̱ma̱ katsꞌénkjaꞌájnú nga xá xí é íniéjnú, an ꞌniú ngase é sa̱ꞌin an kui nii̱. Na̱ꞌmina yá tsaꞌónjnú nga atíjéjnú, ta̱nga an cho̱ndáyá sa̱ꞌinkjièn án nga kotijéjnúꞌun.
12Kó xi ma ján ni̱xtjin jachó Jeroboaa̱n, kó ngayeje xota̱ na̱xi̱ńdaá jachókoón Roboaa̱n, xikó má katsó kui nda̱ ree̱, nga bi̱ katsoó: Ngotꞌe̱ ján ni̱xtjii̱n ndibáchon nginíjnúꞌun. 13Kósꞌe̱ nda̱ ree̱ achichí ꞌniú tsíchji̱a̱jo xota̱ na̱xi̱ńdaá, kó katsꞌénsénjiín kjo̱a̱botíxoma xi katsjaá xota̱ xi xchaá, 14kó bi̱ katsoó, xikótsꞌèn atíxomaa̱ já xo̱ngo̱ò, nga bi̱ katsoó:
—Na̱ꞌmina xá xí é íniéjnú, ta̱nga an ꞌniú ngase é sa̱ꞌin an kui nii̱. Na̱ꞌmina yá tsaꞌónjnú nga atíjéjnú, ta̱nga an cho̱ndáyá sa̱ꞌinkjièn án nga kotijéjnúꞌun.
15Kó bo̱a̱ tsꞌén nga nda̱ ree̱ katsꞌénsénjiín xota̱ na̱xi̱ńdaá, ngatꞌa̱ Néná boá xi índa kui nii̱, tsi̱ꞌe̱ nga kjo̱tjosón ni xi katsoó Néná nda̱ xi kiꞌmí Ajiaa̱ xi chji̱a̱ni nangi Siloo̱n nga tsíchji̱a̱jo Jeroboaa̱n ndií Nabaa̱t.
16Nga kamábe ngayeje xota̱ na̱xi̱ńdaá nga nda̱ ree̱ tsintꞌiéjiín én xí tsíchji̱a̱, bi̱ katsoó nda̱ ree̱:
—Mí ni xi tjínjne̱ ji̱n kjo̱a̱a̱ Ndabii̱. Jmí ni xi kasakojínjne̱ kjo̱a̱a̱ kui ndií Isaii̱ xi̱ꞌbi̱. ¡Jún xota̱ Israee̱l, tangínjnú ndiꞌa nínga tindyiónjnú! ¡Ngotꞌe̱ ꞌne̱, Ndabi̱ ti̱ndyi̱sé so̱bo̱e̱ ji ni xi skji̱ni̱e̱ xota̱ ndiꞌáa̱!
Kósꞌe̱ xota̱ Israee̱l kijí ndiꞌa nínga kisꞌińdo. 17Ta̱nga Roboaa̱n to̱kó kuí atíxomaa̱ xota̱ Israee̱l xi kisꞌińdo ki̱a̱ na̱xi̱ńdáꞌniú xí chji̱a̱ni nangi Jundáa̱.
18Jaskan nda̱ re Roboa̱n katsangiya Andoraa̱n, kui nda̱ xi ngito̱ko̱o̱ já xí foaꞌáꞌyá to̱n xi machjítjé nii̱ kamá, ta̱nga ngayeje xota̱ Israee̱l ndi̱jo̱ tsꞌaya nga katsꞌénkꞌién kui nda̱a̱. Kósꞌe̱ nda̱ re Roboa̱n xi tsá xi boaꞌa tsꞌasꞌien ngo karro̱, kó na̱xi̱ńdáꞌniú Jerusale̱n tsanga. 19Kó bo̱a̱ tsꞌén nga xota̱ Israee̱l kondra̱a̱ xota̱ tji̱e̱e̱ Ndabii̱ kisꞌińdoni ngaskande ngotꞌe̱.
20Kó nga tsintꞌié ngayeje xota̱ Israee̱l nga je jeꞌeꞌoyá nginí Jeroboaa̱n, katsangiyakjaꞌá ki̱a̱ ngindyi̱ko̱n nínga kamátikó xota̱ na̱xi̱ńdaá, kó ki̱a̱ katsꞌén re, tsi̱ꞌe̱ nga kui xi ko̱tíxomaa̱ xota̱ Israee̱l. Nde ngojín xota̱ tji̱e̱ xi ꞌniú kijítji̱ngi nga kamáꞌniátakón xota̱ ndiꞌaa̱ Ndabii̱, ta̱kuítsí xota̱ tji̱e̱e̱ Jundáa̱.
21Kó nga jachó Roboa̱n ki̱a̱ na̱xi̱ńdáꞌniú Jerusale̱n, ítikó ngayeje xota̱ tji̱e̱e̱ Jundáa̱ ko̱jo xota̱ tji̱e̱e̱ Benjaa̱, kó úchán ichítié ko̱jo kantié mi̱ kamá jáxíꞌín xi jaꞌájin xi ꞌniú nda kján, tsi̱ꞌe̱ nga skjánjo̱ xota̱ Israee̱l, ko̱jo nga Roboa̱n ndií Salomoo̱ tsja̱á nginí ngi̱ndie nga kui xi ko̱tíxoma. 22Ta̱nga Néná tsíchji̱a̱jo nda̱ xi ꞌmí Semayiaa̱, mosoo̱ Néná, kó bi̱ katsoó: 23Ndokjo̱e̱je ji Roboaa̱n ndií Salomoo̱, nda̱ ree̱ nangi Jundáa̱, ko̱jo ngayeje xota̱ tji̱e̱e̱ Jundáa̱, ko̱jo xota̱ tji̱e̱e̱ Benjaa̱, ko̱jo xota̱ na̱xi̱ńdá xí ngasee̱, kó bi̱ tꞌíi̱n: 24Bi̱ katsó Néná: Ngata̱ mongínijíngíjínjnú nga ku̱i̱xkánjo̱jnú ntsꞌié, kui xi xota̱ Israee̱l, ta̱sá tangín nginíjnú ndiꞌajnú nga ngo nga ngojnú, ngatꞌa̱ án boá xi bo̱a̱ katsꞌen an.
Kó kui xotaa̱ tsintꞌié eén Néná, kósꞌe̱ kijíꞌoyá nginí xikó má katsó Néná nga tsíchji̱a̱.
Jé xí katsꞌén Jeroboaa̱n
25Kósꞌe̱ Jeroboaa̱n iskjininkꞌa nginí na̱xi̱ńdáꞌniú Sikee̱n, ki̱a̱ na̱xi̱ xi chji̱a̱ni xota̱ tji̱e̱e̱ Efraii̱n, kó ki̱a̱ kisꞌijña, sꞌe̱ jatjoni kui ngi̱ndiee̱, kósꞌe̱ iskjininkꞌa nginí na̱xi̱ńdáꞌniú Penuee̱l. 26Kó Jeroboaa̱n, bi̱ tsꞌén katsꞌénkjó ngi̱jin ini̱ma̱a̱: Ngotꞌe̱ ꞌne̱, xota̱ tji̱e̱e̱ Ndabii̱ je ko̱tíxoma nginí, 27tsi kui xota̱ na̱xi̱ńdaá xi ko̱e̱je̱nijíngí nga sa̱ꞌínkꞌasꞌien kjo̱a̱tjó ki̱a̱ Ndiꞌaa̱ Néná xí tikón ki̱a̱ na̱xi̱ńdáꞌniú Jerusale̱n, kó ini̱ma̱a̱ kui xotaa̱ sa̱ꞌíntjó nginí ndi̱a̱a̱, kui xi Roboaa̱n nda̱ ree̱ nangi Jundáa̱, kó an sa̱ꞌínkꞌiénna, kósꞌe̱ ko̱e̱je̱tji̱ngi nginií Roboaa̱n, nda̱ ree̱ nangi Jundáa̱.
28Kó nda̱ ree̱ ngije asíyaá xkjín mí ni xi sa̱ꞌín, katsꞌénda jó ndií cho̱yojo xi to̱nsinié, kó bi̱ katsoó xota̱ na̱xi̱ńdaá: Jè ndakjiꞌi nga je tsangínjnú na̱xi̱ńdáꞌniú Jerusale̱n, kꞌi̱e̱ síndo nejnú kꞌi̱e̱e̱, jún xota̱ Israee̱l, kui xi ta̱ngatꞌanii̱ kui nga tsangínijíngíjnú ki̱a̱ nangi Ejipto̱. 29Kó ngo kui nee̱ íjñá ki̱a̱ na̱xi̱ńdáꞌniú Betee̱l, sꞌe̱ xi ingoo̱ ki̱a̱ íjñá ki̱a̱ na̱xi̱ńdáꞌniú Ndaa̱n. 30Kó kui nii̱ xi katsꞌénjéní xota̱ na̱xi̱ńdaá, ngatꞌa̱ ngaskande na̱xi̱ńdáꞌniú Ndaa̱n kijítsꞌéndíkón nga asieéntikoó.
31Kó ti̱ katsꞌéndaa̱ ndiꞌandikón ngi̱ndie nínga nkꞌaa̱, kó índo chináꞌmi ngi̱jii̱n xota̱ na̱xi̱ńdaá, kui xi jmí tsi xota̱ tji̱e̱e̱ Lebii̱ kjindibáni. 32Kósꞌe̱ Jeroboaa̱n íjñá nga ka̱ma ngo sꞌué xí ꞌniú, ni̱xtjin tjiꞌuún sá xí ma jii̱n, ngo sꞌué xí xikó maá xi niꞌán ki̱a̱ nangi Jundáa̱, kó kijínijíngí ki̱a̱ ṉchandikón xi tikón ki̱a̱ Betee̱l, nga kijítsꞌènkꞌásꞌién kjo̱a̱tjó, nga katsꞌénkjiesón ndií cho̱yojo xi je índonda, kó ki̱a̱ ítí nga̱són ṉchaa̱n. Kó ti̱ índo chináꞌmi ki̱a̱ na̱xi̱ńdáꞌniú Betee̱l, ki̱a̱ ngi̱ndie xi ꞌniú nkꞌa xi katsꞌéndaa̱. 33Kó ni̱xtjin tjiꞌuún sá xi ma jii̱n, íjin ngi̱jin ini̱ma̱a̱ nga katsjaákon nga kijínijíngí ki̱a̱ nínga tikón ṉchandikón xi katsꞌénda ki̱a̱ na̱xi̱ńdáꞌniú Betee̱l, kó íjñá kui ni̱xtjii̱n nga ka̱ma ngo sꞌué tsi̱ꞌe̱ xota̱ Israee̱l, kó kijínijíngí ki̱a̱ ṉchandikoón nga ítí nisijee̱n.
Currently Selected:
1 Já ree̱ 12: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
