1 Xota̱ Korinto̱ 4

Bi̱ tsꞌén akóyá Pabloo̱ kjo̱a̱a̱ xaá já apostroo̱

1Kó kuíni nga mejénna nga jún kjójintakónjnú nga moso̱ xi tsi̱ꞌe̱ Kristoo̱ boá ji̱n, ko̱jo nga ndyi̱bokojne̱ ngotꞌe̱ ni xi tsi̱ꞌe̱ Néná, kui ni xi kisꞌijña ꞌmaa̱ xotaa̱ ngasꞌe̱. 2Kjiꞌanga ngo xi tjiín ngo xá, xi tsi̱ꞌe̱ xaá míꞌaá nga kixi̱ tsꞌén ko̱e̱je̱jo xaá. 3Kó kjo̱a̱a̱ an ndasénjínna tsi jún, ko̱jo tsi jáxaá xi bo̱a̱ ka̱tso̱ tsi nda ko̱jo tsi ndajín tjítsꞌen an, ngatꞌa̱ nde ti̱ an tsꞌénjáa̱n yojona kui nii̱. 4Ngatꞌa̱ ndatsi nda tikón kjo̱a̱kjíntakónna, jmí tsi ta̱ngatꞌanii̱ kui nii̱, nga kixi̱ tikòn an ngindyi̱ko̱n Néná, ngatꞌa̱ Ndi̱a̱ná xí tsóyà tsi nda ko̱jo tsi ndajín tjítsꞌen an. 5Kó kuíni nga, ngata̱ júnjín bo̱a̱ ꞌmíjnú tsi nda ko̱jo tsi ndajín ndyi̱tsꞌèn xotaa̱ nga ngindie ni̱xtjin, ta̱sá chiyájnúu̱ ngaskande nga kjo̱e̱ꞌe nginí Ndi̱a̱ná, ngatꞌa̱ kuí boá xi ku̱i̱ꞌíjñátsijen ni xi tjiꞌmaá, ko̱jo ni xi niꞌánkjó nga ngo nga ngo ñá, kó ko̱kó ngayeje ni xi mejeén sa̱ꞌín ini̱ma̱a̱ xotaa̱, kósꞌe̱ bo̱a̱ tsꞌén kui ni̱xtjii̱n nga Néná nda tsꞌén ku̱i̱chji̱a̱ kjo̱a̱a̱ ni xi katsꞌén nga ngo nga ngo xotaa̱.

6Jún ntsꞌie, jè ako an xikoó ngo chi̱bo̱a̱ kjo̱a̱a̱ an, ko̱jo Apoloo̱ nganda tsa̱jún, tsi̱ꞌe̱ nga ka̱makjínjnú nga ka̱májín ku̱i̱tjátjónjnúu̱ ni xi kjitꞌa xo̱jo̱n eén Néná. Ngata̱ ja̱kꞌi̱e̱ ja̱ngajánjín je ꞌnaxiéjnú yojojnú kjo̱a̱a̱ kje̱ꞌe xota̱. 7Ngatꞌa̱, ꞌyá xí bo̱a̱ tjítsó nga nda ngase ji xota̱. Kó mí ni xi tjiín jí xi Nénájín xi katsjaá. Kó tsi Néná xí katsjaá, míkjo̱a̱a̱ nga je tiꞌnaxié ji yojòo̱, xikoó tsi ji kasako so̱bo̱a̱a̱ kui nii̱.

8Jún xi xota̱ xi sꞌijii̱n nga je nda kitsiejnú, jè cho̱njnú. ¡Jún xikónií já re xi machjiénjiín ji̱n. Mejénna nga re ja̱koxi̱ ka̱majnú, tsi̱ꞌe̱ nga bo̱a̱ tsꞌén ko̱jo ji̱n sa̱kójne̱ xá nga nijan ko̱ti̱xomá! 9Ngatꞌa̱ tsꞌenkjó án nga Néná boá xi índojne̱ ji̱n xi já apostro̱ ji̱n ngaskande nga fetꞌaa̱, xikoó xota̱ xi je katseꞌéjeé nga ko̱yà, ngatꞌa̱ ngaskande xotaa̱, ko̱jo ndítsjiee̱ je índikónjne̱. 10Ta̱ngatꞌanii̱ nga ndyi̱ndaꞌyáꞌénjne̱ Kristoo̱ nga xota̱ chi̱ni kjimajne̱ tsi̱ꞌe̱ xota̱ xi ngasee̱, ta̱nga jún kjo̱a̱a̱ ni xi bokoyaá Kristoo̱ boá nga xota̱ xi kjínkón kjimajnú. Ji̱n xota̱ indajne̱, kó jún xota̱ xi tjiín ngaꞌniú, ji̱n chꞌo tsꞌén ndyi̱bejne̱ xotaa̱, kó jún tjiyándikónjnú. 11Ngaskande kui ni̱xtjii̱n xi̱ꞌbi̱ bojójne̱, ko̱jo xíndájne̱, ko̱jo jmíjínjne̱ ńjño, ko̱jo akjatꞌa tꞌanijonjne̱, ko̱jo jmíjínjne̱ ngo ndiꞌa xi tsa̱ji̱n. 12Ji̱n xí tjíniéjne̱ yojojne̱, kó jè jendajne̱ nga ndyi̱niꞌánxájo̱jne̱ ndsa̱jne̱. Tsi chꞌo tjíꞌmíjne̱, ta̱nga ji̱n ndyi̱niꞌánchikonñéjne̱, tsi tjimíyotji̱ngijne̱, ta̱nga ji̱n ndyi̱niꞌánchíkjo̱a̱jne̱. 13Kjiꞌanga tjín xí chꞌo tsójne̱, én nda ndokjo̱a̱jojne̱. Ngaskande ngotꞌe̱ xikó maá tsi xtjieé nga̱sondiee̱, ko̱jo tsi ni xi je tsꞌajmi xotaa̱ kjimajne̱.

14Jmí tsi tjítsꞌenꞌindó an kui eén, tsi̱ꞌe̱ nga kjo̱a̱soboá tsjajnúꞌun, ta̱sá tsi̱ꞌe̱ nga tsjajnúꞌun ngo kjo̱a̱botíxoma xikó maá tsi ndí tjóna májnú jún. 15Ngatꞌa̱ ndatsi tie mi̱ mostro̱ xi ko̱kóyájnú eén Kristoo̱, ta̱ ngo tsí na̱ꞌmi tikónjnú, ngatꞌa̱ an xí xikoó tsi na̱ꞌmijnú má an nga kixiyajnúꞌun éntjatsi̱e̱e̱ Kristoo̱, kui én xí katsjájnú kjo̱a̱mindyioo̱n. 16Kó kuíni nga ꞌniú míꞌájnúꞌun nga chja̱ꞌángíjnúꞌun.

17Kuíni nga katsangiyajnúꞌun nda̱ xi ꞌmí Timoo̱, nga kui xi xikoó tsi ndí tjóna, ngo nda̱ xi kixi̱ tsoꞌbájo̱ Ndi̱a̱ná, kuí xí sa̱ꞌínkjaꞌátsjienjnú xikó tjítsꞌen an nga tjítsꞌenxátꞌáa̱ Kristo̱ Kjisoo̱, xikótsꞌèn bokoyá an ngayeje na̱ngo̱xi̱ nínga foaꞌa an. 18Ta̱nga tjín káꞌá xi ngito̱ko̱ ndyi̱tsꞌèn yojoo̱ ngatꞌa̱ ndyi̱tsꞌènkjó nga kjuínkátsijenjáa̱n. 19Ta̱nga tsi Ndi̱a̱ná xí mejeén tsá ka̱ma kjuínkónjnúꞌun, kó kjiꞌa skuie an kókjiꞌi nkꞌa xaá xota̱ xi yiꞌi ndyi̱tsꞌèn yojoo̱, jmí tsi ta̱ én xí ndyi̱chji̱a̱ tsí. 20Ngatꞌa̱ kjiꞌanga Néná botixómaá xotaa̱, ni xi tsꞌén xotaa̱ bokó nga Néná xí botixómaá, kó jmí tsi ni xi tsó xotaa̱. 21Kjiꞌanga kjuínkátsijenjnúꞌun. Kótsꞌèn mejénjnú nga kjóchó an. A nga tajá kuichjiájojnúꞌun, axa̱ nga kjo̱a̱tjó, ko̱jo kjo̱a̱nda ini̱ma̱ yaꞌa an nga kjóchó an.

Currently Selected:

1 Xota̱ Korinto̱ 4: MAIX

Highlight

Compare

Copy