1 Xota̱ Korinto̱ 3

Bi̱ tsꞌén akóyá Pabloo̱ kjo̱a̱a̱ xota̱ xi tsꞌénxátꞌaa̱ Néná

1Kó án já ntsꞌie, kamájínna tsíchji̱a̱jojnúꞌun xikoó xota̱ xi je tikónjii̱n A̱si̱énni̱xtjii̱n Néná, tsíchji̱a̱jojnúꞌun xikoó xota̱ xi kui nga̱sondiee̱ chji̱a̱ni, xikoó xota̱ xi sꞌe̱ tsí kisꞌijii̱n Kristoo̱. 2Kjiꞌanga akoyájnúꞌun jmí tsi én tajá tsíchji̱a̱jojnúꞌun, ta̱sá én xí tajájín, ngatꞌa̱ jún xikónií jákjíndí xí xi̱xi̱ xi ntsjén ꞌbi, xi jmí tsi nichinie xi tajá kjinie kamájnú, kó kamákjínjínjnú, kó ngotꞌe̱ ꞌne̱, kji̱e̱ ti̱ndyiondajínjnú tsi̱ꞌe̱ nga ka̱makjínjnú ni xi niꞌii̱n. 3Ngatꞌa̱ ta̱kó bo̱a̱ tsꞌén tindyiónjnú xikoó xota̱ xi kui nga̱sondiee̱ chji̱a̱ni, ngatꞌa̱ tjínjnú kjo̱a̱chi̱ni̱, ko̱jo kjo̱a̱bixkán, ko̱jo ndyi̱bokjángájnú yojojnú. Jún xota̱ nga̱sondiejnú, kó bo̱a̱ tsꞌén timájnú xikoó xota̱ xi kui nga̱sondiee̱ chji̱a̱ni. 4Kjiꞌanga tsi tjín xi bi̱ tsó: “Pabloo̱ xí chjiá an”, kó kje̱ꞌe xi bi̱ tsó: “Apoloo̱ xí chjiá an”, jún bo̱a̱ tsꞌén timájnú xikoó xota̱ xi kui nga̱sondiee̱ chji̱a̱ni.

5Kó ꞌyání bo̱a̱ xi Apoloo̱, ko̱jo ꞌyání bo̱a̱ xi Pabloo̱. Moso̱ boá, kui xi Néná katsꞌénkjién, tsi̱ꞌe̱ nga kisꞌijinjnú, nga ngo nga ngo ji̱n kiniꞌánjne̱ xá xí katsjájne̱ Ndi̱a̱ná. 6Án xí xikoó ngo nda̱ xi ítji̱e̱ ngo xojmá, kó Apoloo̱ boá xikoó tsi kui xi asíndaá, ta̱nga Néná boá xi katsꞌénxchá kuí ni tjieé. 7Kó kuíni nga nda̱ xi ítji̱e̱e̱, ko̱jo nda̱ xi asíndaá, jmí ni chjíjiín, ta̱kuítsí Néná xí chjínií, ngatꞌa̱ kuí xí katsꞌénxchá xojmá xí kamátji̱e̱e̱. 8Xi ꞌbítji̱e̱e̱ ko̱jo xi asíndaá ta̱ ngo ndse̱je̱n nga joó, ta̱nga nga ngo nga ngo, Néná boá xi tsjaá chjií kjo̱a̱a̱ xá xí katsꞌén. 9Ngatꞌa̱ ji̱n, xaá Néná boá xi nijan ndyi̱niꞌánjne̱, kó jún boá xi xikoó ngi̱ndie nínga ꞌbítji̱e̱e̱, ko̱jo xikoó ndiꞌa xi tsi̱ꞌe̱ Néná. 10Ngo chi̱bo̱a̱ kꞌuijñájnúꞌun. Xikó kjiꞌi kjo̱a̱nda xi katsjána Néná, tsi chji̱ni̱e̱xo̱ó án, án xí íjñá an xó xi ikꞌítjatsꞌennii̱ kui ndiꞌaa̱, kó kje̱ꞌe xí tjítsꞌénda nkꞌaa̱, ta̱nga chjiéngá ta̱xkiya sa̱ꞌíndajín ni xi tsoboaá nga sa̱ꞌínda nga ngo nga ngo. 11Jesukristoo̱ boá xi xikoó kui xó xí tjón ikꞌítjatsꞌennii̱ kui ndiꞌaa̱, kó ta̱ꞌyajín xi ka̱maa̱ ku̱i̱ꞌíjñá kje̱ꞌe xó xí ꞌbítjatsꞌennii̱. 12Kó nga̱soón kui xó xí tjón ikꞌítjatsꞌennii̱ ka̱ma si̱ꞌanda ngo ndiꞌa nga si̱ꞌankjién to̱nsinié, ko̱jo to̱ntiboa, ko̱jo ndi̱jo̱ tsjakon, ko̱jo yá, ko̱jo yáxá, ko̱jo ndi̱ji̱. 13Xcha̱ xá xí katsꞌén nga ngo nga ngo xotaa̱ ni̱xtjin nga Néná tsja̱á ni xi tsoboaá xotaa̱, ngatꞌa̱ ndiꞌí xí kjo̱e̱ꞌe kuí ni̱xtjii̱n, ko̱kó kókón xá xí katsꞌén nga ngo nga ngo xotaa̱. 14Xi katsꞌénda xó xí xchikjoaá ndiꞌií, kuí xí sa̱ko̱ó ni xi niꞌaán. 15Ta̱nga xi ndiꞌií ku̱i̱ꞌítí kui ni xi katsꞌéndaa̱, kuí xí xcha̱ja xá xí katsꞌén, ndatsi kui kjo̱tjoꞌa soboá, xikoó ngo xi kaꞌnaxiéjin ngi̱jin ndiꞌií.

16A yàjínjnú nga na̱ngo̱xi̱i̱ Néná boá jún, ko̱jo nga A̱si̱énni̱xtjii̱n Néná tikónjinjnú. 17Tsi tjín xí sa̱ꞌínkjatsón na̱ngo̱xi̱i̱ Néná, Néná sa̱ꞌínkjatsón xí bo̱a̱ sa̱ꞌiín, ngatꞌa̱ tsjie na̱ngo̱xi̱i̱ Néná, kó jún boá xi na̱ngo̱xi̱i̱ Néná.

18Ngata̱ ngojín xi ꞌboṉcha̱jo yojoo̱, tsi tjín ngi̱jinjnú ngo nda̱ xi nda̱ kjínkón kjimaa̱ yojoo̱, xikoó xota̱ kjínkoón kui nga̱sondiee̱, ta̱sá xikoó tsi ngo xota̱ xi jmí ni bejín nga tsꞌén yojoo̱, tsi̱ꞌe̱ nga ngo nda̱ xi kjínkón ja̱koxi̱ ka̱ma. 19Ngatꞌa̱ kjo̱a̱kjínkón xi tjín nga̱sondiee̱ ta̱ ton tsꞌén be Néná, ngatꞌa̱ jè kjitꞌa xo̱jo̱n eén Néná nínga bi̱ tsoó: “Néná boá xi tsꞌénkjién kjo̱a̱mañaa̱ já kjínkoón tsi̱ꞌe̱ nga ti̱kuii ku̱i̱xo̱jin.” 20Kó ti̱ bi̱ ti̱ tsꞌén tjítꞌa nga: “Ndi̱a̱ná be nga kjo̱a̱kjíntakoón xota̱ xi kjínkoón ta̱kjo̱a̱ndaní bo̱a̱.” 21Kó kuíni nga, ngata̱ ngojín jún xi je ngatamaa̱ yojoo̱ kjo̱a̱a̱ ꞌyá xota̱ xi ndokjo̱a̱nijnú. Ngatꞌa̱ tsa̱jún boá ngayeje ni xi tjiín: 22Tsi tsi̱ꞌe̱ Pabloo̱, tsi tsi̱ꞌe̱ Apoloo̱, tsi tsi̱ꞌe̱ Peé, tsi tsi̱ꞌe̱ nga̱sondiee̱, tsi tsi̱ꞌe̱ kjo̱a̱mindyioo̱n, tsi tsi̱ꞌe̱ kjo̱a̱bo̱yaa̱, tsi tsi̱ꞌe̱ ni xi kjima ngotꞌe̱, tsi tsi̱ꞌe̱ ni xi sꞌe̱ ka̱ma, ngayeje kui nii̱ nga tsa̱jún boá, 23kó jún Kristoo̱ ndokjo̱a̱nijnú, kó Kristoo̱ Néná chji̱a̱ni.

Currently Selected:

1 Xota̱ Korinto̱ 3: MAIX

Highlight

Compare

Copy