1 Xota̱ Korinto̱ 5

Bi̱ tsꞌén atíxoma Pabloo̱ kjo̱a̱a̱ ngo ni xi ndajínkjiꞌi xi kamá ngi̱jii̱n xota̱ na̱ngo̱xi̱i̱

1Ja̱koxi̱ nga ta̱jñàní ndaꞌyá nga tjín kjo̱a̱tondo̱ ngi̱jinjnú, ngatꞌa̱ ngo nda̱ tikónjinjnú xi na̱anjoón tikónjo̱. ¡Ngaskande xota̱ xi bejín Néná tsꞌénjín kui nii̱! 2Kótsꞌèn nga tsja kjimajnú kjo̱a̱a̱ xikótsꞌèn síndo xota̱ na̱ngo̱xi̱i̱. A mí tsí ta̱sá ndasen ku̱i̱ndyionjnú, nga bo̱a̱ kjiꞌi ni xi tjítsꞌén kuí nda̱a̱. Chjiéngá ngiti̱ ko̱e̱ꞌéndièjínjnúu̱ nga ki̱a̱ kꞌuijñájinjnú kui nda̱ xi bo̱a̱ tjítsꞌeén.

3Kó án ndatsi ki̱a̱jín tikónjo̱jnúꞌun nga jín nga yojo an, ta̱nga ini̱ma̱na ki̱a̱ tikónjo̱jnú, kó jè bo̱a̱ kixian an nga tjínrií jé kuí nda̱ xi katsꞌén kui nii̱, xikoó tsi ki̱a̱ má tikòn an. 4Jaꞌeén Jesukristoo̱ ngatamatikónijnú kó ini̱ma̱na ki̱a̱ kꞌuijñájo̱jnú, kó ngaꞌniú xi katsjájnú Ndi̱a̱ná Jesukristoo̱ kꞌuijñájo̱jnú nga. 5Kósꞌe̱ kjiꞌá boá nga kui nda̱a̱ si̱ꞌankꞌasꞌienjnúu̱ xindajín Satanaa̱, kó kuí si̱ꞌankjatsón yojoo̱, tsi̱ꞌe̱ nga kjo̱tjoꞌa kjin kjin a̱si̱énni̱xtjii̱n, ni̱xtjin nga kjo̱e̱ꞌe Ndi̱a̱ná Jesukristoo̱.

6Ndajínkjiꞌi nga tsja kjimajnú kjo̱a̱a̱ xikótsꞌèn síndo xota̱ na̱ngo̱xi̱i̱, kjiꞌanga ki̱a̱ tikónjinjnú nda̱ xi bo̱a̱ tjítsꞌeén. A yàjínjnú nga tsi ndeta̱ chií tsí nisaa̱n xi mindyiakátjo̱ ngayeje nda̱ꞌyo̱paa̱n. 7Kó kuíni nga chje̱ꞌéxínjnú kui jeé, ngatꞌa̱ kui jeé tsꞌénkjátsónjnú jún. Kuí xí xikoó nisan xi mindyiakátjo̱ nda̱ꞌyo̱paa̱n, kó ta̱sá xikoó tsi nda̱ꞌyo̱ tja̱tsi̱e̱ ngatamajnú, kui xi niꞌánkjién nga manda pan xi chinie ni̱xtjii̱n sꞌué paskuaa̱, nda̱ꞌyo̱ xi tja̱tsi̱e̱ xi jmíjiín nisan xchá. Ja̱koxi̱ nga jún xi bo̱a̱ kónjnú ngotꞌe̱, ngatꞌa̱ Kristoo̱ kuí xí cho̱tsa̱nga̱a̱ sꞌué paskua̱ná kui xi kiniꞌánkꞌién nganda tsa̱ñá. 8Kó kuíni nga chjiéngá si̱ꞌán sꞌué paskuaa̱ nga nda tjíjintakón, ko̱jo nga ja̱koxi̱ ni xi ndyi̱niꞌán, xikó maá pan xi jmí nisan xchájiín. Ngiti̱ si̱ꞌánjín ñá ni xi ndajiín ko̱jo kjo̱a̱too̱n, ngatꞌa̱ kui nii̱ xikónií nisan xi xchaá.

9Xo̱jo̱n xi je katsꞌendajnúꞌun ngasꞌe̱, bo̱a̱ kixianjnúꞌun nga ki̱a̱jín si̱ꞌankamajo̱jnú xota̱ xi tondo̱, 10jmí tsi kixian an nga ta̱nisién xín ku̱i̱ndyionjnúu̱ xota̱ xi tondo̱ xi bejín Néná, ko̱jo xi chejé, ko̱jo xi ndyi̱tsꞌéndíkón a̱sie̱én ngo ne xi tsꞌénda xotaa̱, ngatꞌa̱ tsi ki̱a̱jín ku̱i̱ndyionjinjnúu̱ kui xotaa̱, chjiéngá ngiti̱ kuijín nga̱sondiee̱ ku̱i̱ndyionjnú. 11Ni xi kixian án nga ka̱májín si̱ꞌankamajo̱jnú ngo xota̱ xi ntsꞌié ka̱tso̱, xi tondo̱, ko̱jo xi xki̱ꞌá ni, ko̱jo xi a̱sie̱én ngo ne xi tsꞌénda xotaa̱ tsꞌéntsjàjo̱, ko̱jo xi chꞌo a, ko̱jo xi chꞌi̱, ko̱jo xi chejé, xi bo̱a̱ sa̱ꞌiín nde ka̱májín nijan xi̱ni̱e̱jójnú ṉño̱. 12Ngatꞌa̱ ánjín tsoboána nga xiyà an tsi nda ko̱jo tsi ndajín ndyi̱tsꞌèn xota̱ xi na̱ngo̱xi̱i̱jín chji̱a̱ni. Ta̱nga, a júnjín tsoboájnú nga jún xi bo̱a̱ kꞌuínjnú tsi nda ko̱jo tsi ndajín ndyi̱tsꞌèn xota̱ xi na̱ngo̱xi̱i̱ chji̱a̱ni. 13Ngatꞌa̱ Néná xí bo̱a̱ ka̱tso̱ tsi nda ko̱jo tsi ndajínkjiꞌi ni xi ndyi̱tsꞌèn xota̱ xi na̱ngo̱xi̱i̱jín chji̱a̱ni, ta̱nga jún chjiéngá ku̱i̱yotjingíjnúu̱ kui nda̱jé xí ki̱a̱ tikónjinjnú.

Currently Selected:

1 Xota̱ Korinto̱ 5: MAIX

Highlight

Compare

Copy