1 Xota̱ Korinto̱ 15
15
Pabloo̱ bi̱ tsꞌén katsꞌénkjaꞌátsjiee̱n xota̱ na̱ngo̱xi̱ na̱xi̱ńdáꞌniú Korinto̱ ni xi tjón akóyaá
1Ngotꞌe̱ ꞌne̱ já ntsꞌie, mejénna sa̱ꞌinkjaꞌátsjienjnúꞌun éntjatsi̱e̱e̱ Ndi̱a̱ná xí je ini̱jmijnúꞌun, kui xi je kiniꞌánjo̱ꞌojnú, kó ta̱ngatꞌanii̱ kui nga je ꞌniú tindyiónjnú, 2kuí éntjatsi̱e̱e̱ xi sa̱ꞌín nga kjo̱tjoꞌajnú, kó bo̱a̱ ka̱ma tsi si̱ꞌankjatjosónjnú én xí ini̱jmijnúꞌun, ngatꞌa̱ tsi bo̱a̱jín ka̱ma, ta̱kjo̱a̱ndaní nga kisꞌijinjnú kui éntjatsi̱e̱e̱ tsobo̱a̱.
3Ngatꞌa̱ tjón má ni xi kiniꞌánkꞌasꞌienna xi katsꞌenkꞌasꞌienjnúꞌun: Akoyájnúꞌun nga Kristoo̱, jéná xí kꞌientjé xikótsꞌèn kjitꞌa xo̱jo̱n eén Néná, 4ko̱jo nga akjanijín, kó nga xi ma ján ni̱xtjin jaꞌáꞌyaá, xikótsꞌèn kjitꞌa xo̱jo̱n eén Néná, 5kó nga Kristoo̱, akoó yojoo̱ Peé, sꞌe̱ jaskan akoó yojoo̱ nga tiejó xota̱ tsi̱ꞌe̱. 6Jaskan akoó yojoo̱ nga ta̱ ngo kaꞌa mara̱ tsꞌatio ún úchán já ntsꞌie, kó achichí má kui jaá xi síndo tsjé ngotꞌe̱, ndatsi je jesón chiboa. 7Sꞌe̱ jaskan Kristoo̱ akoó yojoo̱ Sandiyaá, sꞌe̱ akoó yojoo̱ ngayeje já apostroo̱.
8Kó nga fetꞌani Kristoo̱ jaskan akóna yojoo̱ an, an xi xikoó tsi ngo ndí xí katsen xtió. 9Ngatꞌa̱ xian an, nga an xí apostro̱ xi chichí ngase an ngi̱jii̱n já apostro̱ xi ngasee̱, nde tsoboájínna an nga apostro̱ xiáa̱n yojona, ngatꞌa̱ án xí tsangatji̱ngíi̱ xota̱ na̱ngo̱xi̱i̱ Néná. 10Ta̱nga ta̱ngatꞌanii̱ kjo̱a̱ndaa̱ Néná nga án xi an, kó kui kjo̱a̱nda xi katsjána, ta̱ kjo̱a̱ndajín kamá, ta̱sá ꞌniú ngase katsꞌenxá an ta̱bo̱a̱jiín ngayeje já apostro̱ xi ngasee̱, ndatsi jmí tsi an xi bo̱a̱ katsꞌen an, kjo̱a̱nda xi katseꞌéna boá xi bo̱a̱ katsꞌén. 11Kuíni nga tsi an, ko̱jo tsi já apostro̱ xi ngasee̱, ti̱kuíní éntjatsi̱e̱e̱ xi ikꞌíni̱jmìjne̱, kó bo̱a̱ tsꞌén nga jún kisꞌijinjnú.
Bi̱ tsꞌén akóyá Pabloo̱ kjo̱a̱a̱ nga foaꞌáꞌyá nginií xota̱ xi je jesoón
12Ta̱nga tsi tjíꞌbíni̱jmì kjo̱a̱a̱ nga jaꞌáꞌyaá Kristoo̱ ngi̱jii̱n xota̱ xi je jesoón, kótsꞌèn nga tjín jún xi bo̱a̱ ndyi̱ꞌmìjnú nga xota̱ xi je jesoón ngiti̱ foaꞌáꞌyájiín. 13Ngatꞌa̱ tsi xota̱ xi fesoón ngiti̱ foaꞌáꞌyájiín, ja̱ Kristoo̱ ti̱ bo̱a̱ ti̱ tsꞌén jaꞌáꞌyájiín tsobo̱a̱, 14kó tsi jaꞌáꞌyájiín Kristoo̱, ja̱ ta̱kjo̱a̱ndaní kui én xí tsꞌénꞌbini̱jmì an, kó ta̱kjo̱a̱ndaní kjo̱a̱sꞌijin xi tjínjnú jún tsobo̱a̱. 15Tsi bo̱a̱ kjiꞌi kui nii̱, ja̱ chistiko̱ ndisoo̱ Nénárá kjimajne̱ tsobo̱a̱, ngatꞌa̱ bo̱a̱ ndyi̱ꞌmìjne̱ nga Néná xí katsꞌénkjaꞌáꞌyaá Kristoo̱, kui xi jaꞌáꞌyájínraa̱ tsobo̱a̱, tsi ja̱koxi̱ nga xota̱ xi je jesoón ngiti̱ foaꞌáꞌyájiín. 16Ngatꞌa̱ tsi ngiti̱ foaꞌáꞌyájiín xota̱ xi je jesoón, ja̱ ti̱ bo̱a̱ ti̱ tsꞌén Kristoo̱ jaꞌáꞌyájiín tsobo̱a̱. 17Kó tsi Kristoo̱ jaꞌáꞌyájiín, ta̱kjo̱a̱ndaní kjo̱a̱sꞌijinjnú tsobo̱a̱, kó ta̱kó bo̱a̱ra̱ tsꞌén tindyionjinjnú jéjnú. 18Kósꞌe̱ ja̱ ngaskande xota̱ xi je jesón xi kisꞌijii̱n Kristoo̱ jè kichajá tsobo̱a̱. 19Tsi ta̱kuítsí nga̱sondiee̱ xi ndyi̱chiyá nga tjín ni xi sa̱kóná ngatꞌa̱ sꞌijinná Kristoo̱, ñárá xi tsoboáná nga xi̱xꞌi̱a̱n ngase ka̱tso̱ná xota̱ xi ngasee̱, ta̱bo̱a̱jiín xota̱ xi tjín nga̱sondiee̱.
20Ta̱nga ngotꞌe̱ ꞌne̱ Kristoo̱ jè jaꞌáꞌyaá ngi̱jii̱n xota̱ xi je jesoón, kó kuí boá xi xikoó ngo cha̱n xi tjón xi niꞌánkꞌasꞌiee̱n Néná, ngatꞌa̱ kuí boá xi tjón jaꞌáꞌyaá ngi̱jii̱n xota̱ xi je jesoón. 21Ngatꞌa̱ xikótsꞌèn nga ta̱ngatꞌanii̱ ngo nda̱ nga jeꞌe kjo̱a̱bo̱yaa̱, ti̱ bo̱a̱ ti̱ tsꞌén ta̱ngatꞌanii̱ ngo nda̱ nga jeꞌe kjo̱a̱foaꞌáꞌyaá xota̱ xi je jesoón. 22Ngatꞌa̱ xikótsꞌèn nga ta̱ngatꞌanii̱ Andaa̱n nga ngayeje xotaa̱ fesón, ti̱ bo̱a̱ ti̱ tsꞌén ta̱ngatꞌanii̱ Kristoo̱ nga ngayeje xotaa̱ kꞌuíndo nginí. 23Ta̱nga ńgó tji̱e̱n ńgó tji̱e̱n kjo̱a̱ꞌáꞌyaá xikótsꞌèn tsoboaá nga ngo nga ngo: Tjón má Kristoo̱ je jaꞌáꞌyaá, sꞌe̱ jaskan kjiꞌanga kjo̱e̱ꞌe nginí Kristoo̱, kjo̱a̱ꞌáꞌyaá xota̱ xi tsi̱ꞌe̱. 24Kósꞌe̱ kjo̱tjosón ni xi ka̱ma kui nga̱sondiee̱, Kristoo̱ tjón sa̱ꞌínkjié ngayeje xi botixómá, ko̱jo xi tjiín xá, ko̱jo xi tjiín ngaꞌniú, sꞌe̱ jaskan sa̱ꞌínkꞌasꞌien nínga botíxoma ngi̱ya tsja Néná xí Na̱ꞌmii̱. 25Ngatꞌa̱ Kristoo̱ chjiéngá kuí ko̱tíxoma ngaskande nga ngayeje kondra̱ tsi̱ꞌe̱ ku̱i̱ꞌíndo ngindie se. 26Kó kui kondra̱ xi kju̱i̱e̱tꞌa xi kju̱i̱e̱e̱, kjo̱a̱bo̱yaa̱ boá. 27Ngatꞌa̱ Néná jè índo ngayeje nii̱ ngindie se Kristoo̱. Kó kjiꞌanga tsó nga ngayeje nii̱ je síndo ngindie se Kristoo̱, jè ya cha̱n cha̱n nga jmí tsi ko̱jo Néná xi tsó, ngatꞌa̱ kuí Néná xí índo ngayeje nii̱ nga Kristoo̱ xi ko̱tíxomaa̱. 28Kó ngije ngayeje nii̱ je síndo ngindie se Kristoo̱, kjiꞌá boá nga ti̱ kui Kristoo̱, kui xi ndií Néná, sa̱ꞌínkꞌasꞌiee̱n yojoo̱ Néná kui xi katsꞌénkꞌasꞌiee̱n ngayeje nii̱, kó bo̱a̱ tsꞌén nga ngayeje nii̱, nga tsi̱ꞌe̱ Néná ka̱ma.
29Tjín xí botíndá yojoo̱ ngajoo̱ xota̱ xi je jesoón, kó tsꞌénkjó nga bo̱a̱ tsꞌén kjo̱tjoꞌa kui xi je jesoón nga. Ta̱nga tsi ngiti̱ foaꞌáꞌyájiín xota̱ xi je jesoón, mí tsjá ngajoo̱ kui xota̱ xi je jesoón ndyi̱botíndá yojoo̱ xi bo̱a̱ ndyi̱tsꞌe̱én.
30Kó ji̱n, ánní nga ndyi̱niꞌánchíkjo̱a̱jne̱ ngayeje ni xi ndajín xi kjimataꞌinjne̱ ngatsjéni̱xtjin. 31Jún ntsꞌie, be án nga ta̱jmì ni̱xtjinní ka̱mana ko̱yà án kjo̱a̱a̱ ni xi tjítsꞌen an, ja̱koxi̱ kuí nii̱, xikótsꞌèn ja̱koxi̱ nga tsja mana nga sꞌijinjnú Ndi̱a̱ná Jesukristoo̱. 32Tsi xikoó ngo xota̱ an nga askjanjo̱ an cho̱ tamá ki̱a̱ na̱xi̱ńdáꞌniú Éfeso̱, mí ni xi katsꞌen an xi katseꞌéna. Tsi ja̱koxi̱ nga xota̱ xi je jesoón ngiti̱ foaꞌáꞌyájiín, ta̱sá bo̱a̱ si̱ꞌán xikó tsó kui eén “ja̱ ta̱sá xi̱ni̱e̱ ko̱jo sꞌi̱o̱ ngotꞌe̱, ngatꞌa̱ ndyiojón jè ko̱yà.”
33Ngata̱ boeꞌéndièjínjnú nga tjín xí kꞌo̱ṉcha̱jojnú, xikó tsó kui eén “xota̱ xi ꞌbítso̱majo̱ xota̱ xi ndajín, ti̱ ndajín má ndatsi kui nga” 34Chjáxꞌájnú ndyikonjnú, kó ngata̱ niꞌánjéjínjnú, ngatꞌa̱ tjín ngi̱jinjnú xota̱ xi bejín ni xi tsi̱ꞌe̱ Néná, xiyà án kui nii̱ tsi̱ꞌe̱ nga soboá ka̱majnú.
Bi̱ tsꞌén akóyá Pabloo̱ kó ka̱ma nga kjo̱a̱ꞌáꞌyaá xota̱ xi je jesoón
35Tjínrá xi ko̱síyá nga bi̱ ka̱tso̱: “Kó ka̱ma nga kjo̱a̱ꞌáꞌyá nginií xota̱ xi je jesoón. Kókón ka̱ma yojoo̱ nga kjo̱a̱ꞌáꞌyaá.” 36¡Nda̱ chi̱ni xi bo̱a̱ tꞌísé ji! Ni xi ꞌbítji̱e̱ ji, kjo̱a̱ꞌájiín tsi tjónjín ko̱yà, tsi̱ꞌe̱ nga ku̱i̱ꞌíńtsꞌién, kó kꞌuieé xka̱, 37kó ni xi kꞌuítji̱e̱ ji, jmí tsi bo̱a̱ kjiꞌi yojo xi kjo̱a̱ꞌaá, ta̱ ngo tsí xojmá, tsi xojmaá to ndso̱ko̱a̱n ṉño̱pan ko̱jo tsi kje̱ꞌe xojmá. 38Néná xí tsjaá xojmaá ngo yojo xi mejeén kui, kó nga ngo nga ngo xojmaá, Néná xí tsjaá ngo yojo xi bokiín. 39Jmí tsi ngayeje yojoo̱ xi ti̱ bo̱a̱ ti̱ konni. Kje̱ꞌe kón yojoo̱ xotaa̱, kje̱ꞌe kón yojoo̱ cho̱o̱, kje̱ꞌe kón yojoo̱ ni̱siee̱, kó kje̱ꞌe kón yojoo̱ cho̱ xi tjín ngi̱jin ndáfoaa̱. 40Kó kje̱ꞌe kón ni xi síndo nkꞌa jàn, kje̱ꞌe kón ni xi síndo kꞌi̱e̱ tꞌanangii̱. Ta̱nga kje̱ꞌe kjiꞌi kjo̱a̱tsjakjiꞌii̱ ni xi síndo nkꞌa jàn, kó kje̱ꞌe kjiꞌi kjo̱a̱tsjakjiꞌii̱ ni xi síndo kꞌi̱e̱ tꞌanangii̱. 41Kje̱ꞌe kjiꞌi kjo̱a̱tsjakjiꞌii̱ tsꞌueé, kje̱ꞌe kjiꞌi kjo̱a̱tsjakjiꞌii̱ saá, kó kje̱ꞌe kjiꞌi kjo̱a̱tsjakjiꞌii̱ ńñoo. Kó nga ngo nga ngo ńñoo ja̱ kje̱ꞌe ja̱ kje̱ꞌe kjiꞌi kjo̱a̱tsjakjiꞌii̱.
42Ti̱ bo̱a̱ ti̱ ka̱ma kjo̱a̱a̱ nga kjo̱a̱ꞌáꞌyaá xota̱ xi je jesoón. Ni xi fonijiín, ni xi maa̱ fondo boá, ta̱nga ni xi kjo̱a̱ꞌáꞌyaá, ni xi ngiti̱ ka̱májiín kjo̱ndo boá. 43Ni xi fonijiín, ni xi jmí ni chjíjiín boá, ta̱nga nga kjo̱a̱ꞌáꞌyá nginií, ni xi tjiín kjo̱a̱je boá. Ni xi fonijiín, ni xi jmíjiín ngaꞌniú boá, ta̱nga nga kjo̱a̱ꞌáꞌyá nginií, ni xi kꞌuieé ngaꞌniú boá. 44Ni xi fonijiín, yojo xi kichꞌiá ngotꞌe̱ boá, ta̱nga nga kjo̱a̱ꞌáꞌyá nginií yojo xi A̱si̱énni̱xtjii̱n Néná ku̱i̱ꞌínda boá. Tsi tjín yojo xikoó xi kichꞌiá, ti̱ bo̱a̱ ti̱ tsꞌén tjín yojo xi A̱si̱énni̱xtjii̱n Néná ku̱i̱ꞌínda.
45Bi̱ tsꞌén kjitꞌa xo̱jo̱n eén Néná: “Nda̱ xi tjón xi ꞌmí Andaa̱n, kiniꞌánda kó kisꞌijña nga̱sondie.” Ta̱nga kui Anda̱n xi jetꞌaa̱ kui xi Kristoo̱, kuí boá xi A̱siénni̱xtjin xi tsjá kjo̱a̱mindyioo̱n. 46Ta̱nga jmí tsi kjo̱a̱mindyion xi tsjá a̱siénni̱xtjin xi tjoón. Kjo̱a̱mindyion xi tsjá kui nga̱sondiee̱ boá xi tjón tikón, jaskanní kꞌuijñá kjo̱a̱mindyion xi tsjá a̱si̱énni̱xtjii̱n. 47Kui nda̱ xi tjoón ńdie kamándani, kó xota̱ xi chji̱a̱ni kui tꞌanangii̱ kamá, kó nda̱ xi ma joó, kui xi Ndi̱a̱ná, ndiꞌakꞌajmii̱ kjindibáni. 48Xikoó nda̱ xi kiniꞌándani ńdiee̱, ti̱ bo̱a̱ ti̱ kon ngayeje xota̱ nga̱sondiee̱. Xikoó nda̱ xi kjindibáni ndiꞌakꞌajmi jàn, ti̱ bo̱a̱ ti̱ kon ngayeje xi chji̱a̱ni ndiꞌakꞌajmi jàn. 49Kó xikótsꞌèn nga bo̱a̱ kón ñá, xikoó nda̱ xi ńdie kamándanii̱, ti̱ bo̱a̱ ti̱ tsꞌén bo̱a̱ kón ka̱ma ñá xikó kjiꞌi nda̱ xi kjindibáni ndiꞌakꞌajmi jàn.
50Jún ntsꞌie, xiyàjnúꞌun nga kui yojo xi tikónná ngotꞌe̱ ka̱májín sꞌi̱jña nga ko̱tíxoma Néná, ti̱nde ni xi maa̱ fotsoo̱n, sakójiín ngi̱ndie ngi̱jii̱n ni xi fotsonjiín. 51Ta̱nga mejénna nga xcha̱jnú ngo ni xi tjiꞌmaá Néná: Jmí tsi ngayeje ñá nga ko̱yà, ta̱nga ngayeje ñá nga sa̱si̱kjoyá, 52ngotjón chií, xikó maá tsi nga chjáxꞌá ko̱jo nga ꞌbíchjá ndyikón, bo̱a̱ tsꞌén sa̱síkjoyá, ngije kjo̱ni̱e̱ tjio xi fetꞌaa̱. Ngatꞌa̱ nga kjo̱ni̱e̱ tjioo̱, kjiꞌá boá nga ngayeje xota̱ xi je jesoón kjo̱a̱ꞌáꞌyaá tsi̱ꞌe̱ nga ngiti̱ ko̱yàjín, kó ñá sa̱si̱kjoyá. 53Ngatꞌa̱ kui yojo xi kichꞌiá ngotꞌe̱ xi maa̱ fotsoo̱n, chjiéngá ka̱ma yojo xi ngiti̱ kjo̱tsònjín, kó yojo xi ꞌmee̱ ngotꞌe̱, chjiéngá ka̱ma yojo xi ngiti̱ ko̱yàjín. 54Kó ngije yojo xi maa̱ fotsoo̱n, ka̱ma yojo xi ngiti̱ fotsonjiín, kó ngije yojo xi maa̱ ꞌme, ka̱ma yojo xi ngiti̱ májiín ꞌmee̱, kjiꞌá boá nga kjo̱tjosón ni xi tsó xo̱jo̱n eén Néná: “Kjo̱a̱bo̱yaa̱ jè kiniꞌaán nga kiniꞌánchaja.” 55Ji kjo̱a̱bo̱ya, ñá nií ꞌne̱ nga ji xi kiniꞌín ji. Ji Kjo̱a̱bo̱ya, ñání tikón ngaꞌniúu̱ xi niꞌínkꞌínje̱ ji xotaa̱ ꞌne̱. 56Ngatꞌa̱ kjo̱a̱bo̱yaa̱, jeé tsꞌénkjién nga tsꞌenkꞌién xotaa̱, kó jeé kjo̱a̱kitii̱ tsꞌénkjién tsi̱ꞌe̱ nga xcha̱ jeé. 57Ta̱nga ndokꞌóchji̱nií Néná nga katsjáná nga kiniꞌáa̱n kjo̱a̱bo̱yaa̱ ta̱ngatꞌaa̱ ni xi katsꞌén Ndi̱a̱ná Jesukristoo̱.
58Kó kuíni jún bo̱a̱ ndí ntsꞌie xi tjóna, ꞌniú ti̱ndyiàjnú, kó ndyiojón ndyiojón, ko̱jo saꞌniú sáꞌniú ti̱ꞌánjnú xaá Ndi̱a̱ná, ngatꞌa̱ jún jè yàjnú nga ta̱kjo̱a̱ndajiín xaá Ndi̱a̱ná xí ndyi̱niꞌánjnú.
Currently Selected:
1 Xota̱ Korinto̱ 15: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
