1 Xota̱ Korinto̱ 16

Bi̱ tsꞌén katsóyà Pabloo̱ xikótsꞌèn chja̱ꞌásón chji̱e̱ xi ko̱na̱ngíyaá xota̱ na̱ngo̱xi̱i̱ na̱xi̱ńdáꞌniú Jerusale̱n

1Kjo̱a̱a̱ chji̱e̱ xi chja̱ꞌásón tsi̱ꞌe̱ xota̱ tsjiee̱ Néná xi síndo na̱xi̱ńdáꞌniú Jerusale̱n, bo̱a̱ tsꞌén chja̱ꞌásónjnú xikó kixiáa̱n xota̱ na̱ngo̱xi̱ xi chji̱a̱ni na̱xi̱ńdáꞌniú Ngalasia̱. 2Xki̱ tamingo̱ nga ngo nga ngojnú chjiéngá kꞌuijñátꞌaxínjnú chií to̱n xikó kjiꞌi kiniꞌánjnú, kó chja̱ꞌátjójnú tsi̱ꞌe̱ nga, nga kjóchó an jmí tsi kjiꞌa chja̱ꞌásónjnú chji̱e̱e̱. 3Kó kjiꞌanga kjóchó an, sangiya an na̱xi̱ńdáꞌniú Jerusalee̱n xota̱ xi jún chja̱ꞌájinjnú xi tsjàa̱ ngo xo̱jo̱n tsi̱ꞌe̱ nga kjo̱jo chji̱e̱ xi kiniꞌánkixójnú, 4kó tsi ndakjiꞌi nga ko̱jo an kjuín án, ka̱ma kjuínjo̱ an nga.

Bi̱ tsꞌén katsóyà Pabloo̱ ni xi índa nga sa̱ꞌín

5Kó kjuínkónjnúꞌun jaskan nga kjo̱a̱ꞌa an nangi Masendonia̱, ngatꞌa̱ chjiéngá ki̱a̱ kjo̱a̱ꞌa an. 6Kó ka̱mara̱ kjín ni̱xtjin ka̱mana nínga tindyiónjnú, axa̱ ka̱mara̱ ki̱a̱ kjo̱a̱ꞌana cho̱nchꞌaàn, tsi̱ꞌe̱ nga jún ka̱ma ko̱si̱ko̱jójnúꞌun nínga tsꞌénfí an ngijee̱. 7Ngatꞌa̱ mejénjínna nga ta̱ ngotjón tsí skuiejnúꞌun ngotꞌe̱ nga kjo̱a̱ꞌa an, ngatꞌa̱ ta̱sá skoyáa̱ nga kjín ni̱xtjin ka̱mana nínga tindyiónjnú, tsi Ndi̱a̱ná xí tsja̱ndièna. 8Ta̱nga na̱xi̱ńdáꞌniú Éfeso̱ kotíjña̱ an ngaskande nga ka̱ma sꞌué Pentekostee̱, 9ngatꞌa̱ ki̱a̱ tjisákóndiéna nga ka̱ma sa̱ꞌinxá an, ndatsi kjín má xota̱ xi kondra̱na síndo xi sasiénjiín ni xi tjítsꞌen an.

10Kó tsi ki̱a̱ kjo̱chókónjnú Timoo̱, tjó ti̱ꞌánjnú tsi̱ꞌe̱ nga tsja kꞌuieé nga kꞌuijñájinjnú, ngatꞌa̱ ti̱kuíní xaá Ndi̱a̱ná xí tjítsꞌén kuí xikoó an. 11Kó kuíni, ngata̱ boeꞌéndièjínjnú nga tjín xí sa̱ꞌínchꞌó kui nda̱a̱, ta̱sá tasíko̱jojnú tsi̱ꞌe̱ nga xió tsꞌén kji̱ndi̱bákónna, ngatꞌa̱ an tsꞌénkoyàa̱ kui ko̱jo já ntsꞌie xi nijan ndibájo̱.

12Kó kjo̱a̱a̱ nda̱ ntsꞌié xi ꞌmí Apoloo̱, achichí índasée̱n tsi̱ꞌe̱ nga kjo̱jo já ntsꞌiee̱, ta̱nga kamámejénjiín kijí ngotꞌe̱, kjiꞌanga sa̱kóndieè kui ko̱e̱je̱kónjnú.

Pabloo̱ bi̱ tsꞌén katsꞌénkjietꞌa xo̱jo̱o̱n

13Ti̱ndyiondajnú, kó ꞌniú ti̱ndyiàjnú kjo̱a̱a̱ kjo̱a̱sꞌijinjnú, ngata̱ ndakonjínmájnú, kó te̱ꞌéngaꞌniújnúu̱ yojojnú. 14Kó ngayeje ni xi si̱ꞌanjo̱jnú xingi̱jnú nga ta̱kó nga tjínjnú kjo̱a̱tjó.

15Jún ntsꞌie, jè yàjnú nga xota̱ xkjín Estéfanaa̱ kuí boá xi tjón katsꞌénkꞌoyá yojoo̱ nga tsintꞌié eén Néná, ngi̱jii̱n xota̱ xi síndo nangi Akaya̱, kó kui xotaa̱ katsjá yojoo̱ nga ndyi̱bosikójo xota̱ tsjiee̱ Néná. 16ꞌNiú míꞌájnúꞌun jún, nga tasiénijónjnúu̱ kui xota̱ xi xikoó xota̱ xi̱ꞌbi̱, ko̱jo ngayeje xota̱ xi ndyi̱bosikójo kui jaá, ko̱jo xi ti̱kuii kui xaá ndyi̱tsꞌèn. 17Achichí tsja kamána nga jeꞌekónna Estéfanaa̱, ko̱jo Natoo̱, ko̱jo Akaikoo̱, ngatꞌa̱ kuí jaá xi asíko̱jona ngajojnú. 18Ngatꞌa̱ kuí jaá xi katsjaá kjo̱a̱xió, ko̱jo ngaꞌniú ini̱ma̱na xikó katsꞌénjo̱jnú jún nga, cha̱ndikónjnú kui xota̱ xi xikoó kui jaá.

19Tinde xò bo̱a̱ tsó xota̱ na̱ngo̱xi̱ xi síndo nangi Asia̱. Akilaa̱ ko̱jo na̱ Prisilaa̱ ko̱jo xota̱ na̱ngo̱xi̱ xi matikó ndiꞌaa̱, tsꞌentíndejnú jún nga ti̱ sꞌijinjnú Néná nga. 20Tinde xò bo̱a̱ tsó ngayeje já ntsꞌie xi síndo kꞌi̱e̱e̱. Ti̱ꞌantindéjnú xingi̱jnú nga ngo nga ngojnú.

21Pabloo̱ boá an, kó ngo tinde tsꞌéntsangiyajnúꞌun nga an má xi tsꞌénꞌbitꞌa an kui xo̱jo̱o̱n.

22Tsi tjín xi tjójiín Ndi̱a̱ná Jesukristoo̱, ngatꞌíko̱jonii̱. ¡Ja̱bíꞌi̱n Ndi̱a̱!

23Ndi̱a̱ná Jesukristoo̱ ngatsjájnú kjo̱a̱ndaa̱. 24Tjóna ngayejejnú xikótsꞌèn Ndi̱a̱na Kristo̱ Kjisoo̱ tjoó ñá. Bo̱a̱ kjiꞌi.

Currently Selected:

1 Xota̱ Korinto̱ 16: MAIX

Highlight

Compare

Copy