1 Xota̱ Korinto̱ 14

Bi̱ tsꞌén akóyá Pabloo̱ kjo̱a̱a̱ nga ja̱ kje̱ꞌe ja̱ kje̱ꞌe én xí Néná tsja̱á xi ku̱i̱chji̱a̱ xotaa̱

1Ti̱ndyi̱séjnú kjo̱a̱tjoó, kó ngatamamejénjnú kjín to̱ko̱ya kjo̱a̱nda xi tsjá A̱si̱énni̱xtjii̱n Néná, ta̱nga ngi̱jii̱n kui kjo̱a̱ndaa̱ ꞌniú ngase ti̱ꞌanmejénjnú nga kꞌuiyájnú én xí Néná tsjá. 2Ngatꞌa̱ xi chji̱a̱ kje̱ꞌe én xi A̱si̱énni̱xtjii̱n Néná tsjaá, jmí tsi xotaa̱ xi chji̱a̱jo, Néná xí chji̱a̱jo, ngatꞌa̱ ta̱ꞌyajín xi makjiín kui eén, ngatꞌa̱ tsi̱ꞌe̱ A̱si̱énni̱xtjii̱n Néná boá ni xi tjiꞌmá xi chji̱a̱, 3ta̱nga xi tsóyà én xí Néná tsjaá, kuí boá xi chji̱a̱jo xotaa̱, tsi̱ꞌe̱ nga skjinínkꞌá, ko̱jo ko̱síko̱jo, ko̱jo sa̱ꞌíndajoo̱n. 4Ta̱nga kui xota̱ xi chji̱a̱ ngo én xí makjínjiín xota̱ xi ngasee̱, xi tsjá A̱siénni̱xtjin Néná, ta̱ kui kjininkꞌá soboá tsi yojoo̱, kó kui xota̱ xi chji̱a̱ én xí Néná tsóyaà, xota̱ na̱ngo̱xi̱i̱ xí kjininkꞌá.

5Mejénna nga ngayejejnú nga ko̱ndókjo̱a̱jnú kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná, ta̱nga ꞌniú mején ngasena nga xota̱ xi tsóyà én xí Néná tsjaá ka̱majnú, ngatꞌa̱ nkꞌa ngase xaá xota̱ xi tsóyà én xí Néná tsjaá, ta̱bo̱a̱jiín xi chji̱a̱ kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná, ndakjíꞌí kui nii̱ ngototo tsi tjín xí sa̱ꞌínkꞌatioya ni xi mejeén tsó kui eén, tsi̱ꞌe̱ nga xtjonínkꞌá xota̱ na̱ngo̱xi̱i̱. 6Kó ngotꞌe̱ ꞌne̱ já ntsꞌie, tsi kjóchokonjnúꞌun nga tsꞌénchji̱a̱ an kje̱ꞌe én, xi makjínjiín xotaa̱ xi tsjá A̱si̱énni̱xtjii̱n Néná. Mí nganda xi sa̱kójnú tsi bo̱a̱ sa̱ꞌin an. Kjiꞌá nga ndakjiꞌi tsi kuichjiájojnúꞌun ngo ni xi akóna Néná, ko̱jo tsi ngo ni xi makjínna xi xiyàjnúꞌun, ko̱jo tsi xiyàjnúꞌun ngo én xí Néná tsjá, ko̱jo tsi ngo ni xi kokoyájnúꞌun.

7Tsi ngayeje ni xi foniee̱ xikoó yána̱xo̱o̱, ko̱jo arpaa̱, ja̱ kje̱ꞌe já kje̱ꞌejín tsꞌén fonie nga ngo nga ngo, kótsꞌèn xcha̱ só xi tjíniꞌánkjaniejo̱ yána̱xo̱o̱, ko̱jo kótsꞌèn xcha̱ só xi tjíniꞌánkjaniejo̱ arpaa̱. 8Kó tsi tjio xi fonie nga ma kjo̱a̱xcha̱án ndajín tsꞌén kjo̱ni̱e̱, nde ngojín xi ku̱i̱ꞌíjñanda yojoo̱ tsi̱ꞌe̱ nga ko̱e̱je̱ kjo̱a̱xcha̱án nga ko̱ndókjo̱a̱a̱. 9Bo̱a̱ ma ngi̱jinjnú, tsi ko̱ndókjo̱a̱jnú ngo én xi jmíjín xi ka̱makjiín, kótsꞌèn ka̱makjiín xotaa̱ ni xi ko̱ndókjo̱a̱jnú. ¡Xikónií tsi ta̱ tjo̱o̱ xí ndyi̱ndokjo̱a̱jo tiyajnú! 10Kjénní nga achichí kjín to̱ko̱ya ma én xi tjín nga̱sondiee̱, kó ngayejee̱ nga tjiín mí ni xi tsó. 11Ta̱nga tsi makjínjínna kó tsó ngo én xí tjindókjo̱a̱jona, xota̱ xi kje̱ꞌe nangi ka̱maa̱ an xi ku̱i̱chji̱a̱jona, kó xi ku̱i̱chji̱a̱jona xikónií xota̱ xi kje̱ꞌe nangi ka̱mana an. 12Ti̱ bo̱a̱ ti̱ kjiꞌinii̱ ngi̱jinjnú, nga mejénjnú nga kꞌuiéjnú kjín to̱ko̱ya kjo̱a̱ndaa̱ A̱si̱énni̱xtjii̱n, ta̱nga ta̱sá ti̱ndyi̱séjnú ngi̱jii̱n kui kjo̱a̱ndaa̱, nga kjín ka̱ma kjo̱a̱nda xi skjinínkꞌá xota̱ na̱ngo̱xi̱i̱.

13Kó kuíni nga kui xota̱ xi chji̱a̱ kje̱ꞌe én xi makjínjiín xotaa̱ xi tsjá A̱si̱énni̱xtjii̱n Néná, ngatíchji̱a̱a̱ Néná tsi̱ꞌe̱ nga ka̱maa̱ sa̱ꞌínkꞌatioya ni xi tsó kui eén. 14Ngatꞌa̱ tsi kjiꞌanga kuichjiáa̱ Néná sa̱ꞌinkjièn án kje̱ꞌe én xí makjínjínna xi tsjá A̱si̱énni̱xtjii̱n, ini̱ma̱na xí chji̱a̱a̱ Néná, ta̱nga kui nii̱ bosikójojín kjo̱a̱kjíntakónna. 15Ja̱ kó mí xí sa̱ꞌin an. Ini̱ma̱na kuichjiáñáa̱ Néná, ta̱nga ti̱ sa̱ꞌinkjièn án kjo̱a̱kjíntakónna nga. Ini̱ma̱na sieñáa̱ Néná, ta̱nga ti̱ sa̱ꞌinkjièn án kjo̱a̱kjíntakónna nga. 16Ngatꞌa̱ tsi ta̱ ini̱màa̱ xí tiniꞌínkjìn kjiꞌanga tiniꞌíntsjée̱ Néná, kó tsi ku̱i̱ntꞌie̱é jí ngo nda̱ xi bejín ni xi tiniꞌín, kótsꞌèn nga “bo̱a̱ kjiꞌi” ka̱tso̱ nga tiboeꞌé ji ndokꞌóchjì, kjo̱a̱a̱ nga bejín ni xi tꞌísé. 17Ngatꞌa̱ ji, nga ja̱koxi̱ nda tsꞌén tiboeꞌé ji ndokꞌóchjì, ta̱nga nda̱ xi ingoo̱ tjoninkꞌajín ngi̱yaa̱ ni xi tsi̱ꞌe̱ Néná. 18Tsjàa̱ ndokꞌóchjì Néná, ngatꞌa̱ chjiá ngase an kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná ta̱bo̱a̱jiín ngayejejnú, 19ta̱nga ngi̱jii̱n xota̱ na̱ngo̱xi̱i̱ ta̱sá mejénna kuichjiá an ún ndso̱ꞌba én xí kjo̱tjojin kjo̱a̱kjíntakónna tsi̱ꞌe̱ nga kokoyáa̱ kje̱ꞌe xota̱, ta̱bo̱a̱jiín tsi tie mi̱ ndso̱ꞌba én xi nde ta̱ꞌyajín xi makjiín xi kuichjiá an.

20Jún ntsꞌie, ngata̱ bo̱a̱jín tsꞌén fojintakónjnú xikótsꞌèn tsꞌénkjó jákjíndií, ta̱sá bo̱a̱ ti̱ꞌánjnú xikoó jákjíndií nga tsꞌensénjiín ni xi ndajiín, ta̱nga ti̱ꞌankjójnú xikoó ngo xota̱ xi xchá. 21Bi̱ tsꞌén je kjitꞌa xo̱jo̱n kjo̱a̱kitii̱: “Kje̱ꞌe én kuichjiájo an kui xota̱ na̱xi̱ńdaá, kó tsꞌoa xota̱ xi xín nangi sa̱ꞌinkjièn án, ta̱nga nde bo̱a̱ tsꞌén ku̱i̱ntꞌièjínna, tsó Néná.” 22Kó kuíni nga, nga ndokjo̱a̱ kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná, kuí nii̱ xi bokó ngaꞌniuú Néná, tsi̱ꞌe̱ xota̱ xi sꞌijinjiín Néná, jmí tsi tsi̱ꞌe̱ xota̱ xi sꞌijii̱n Néná. Ta̱nga nga chji̱a̱ xota̱ xi tsóyà én xí Néná tsjaá, ngo chi̱bo̱a̱ tsi̱ꞌe̱ xota̱ xi sꞌijii̱n Néná, jmí tsi tsi̱ꞌe̱ xota̱ xi sꞌijinjiín Néná. 23Kó tsi nga ka̱matikó xota̱ na̱ngo̱xi̱i̱, kó ngayejee̱ nga ndyi̱chji̱a̱ kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná, kó tsi ngo xota̱ xi bejín ni xi tjíniꞌán, ko̱jo tsi ngo xota̱ xi sꞌijinjiín Néná xí kꞌo̱sꞌien ngi̱ya na̱ngo̱xi̱i̱, kó ku̱i̱ntꞌie̱é, a mí tsi “tsobérií kui xotaa̱” ka̱tso̱. 24Ta̱nga tsi ngayeje xotaa̱ xi ndyi̱tsóyà én xí Néná tsjaá, kó tsi ngo xota̱ xi bejín ni xi tjíniꞌán, ko̱jo tsi ngo xota̱ xi sꞌijinjiín Néná xí kꞌo̱sꞌien ngi̱ya na̱ngo̱xi̱i̱, kó nga ku̱i̱ntꞌiè ni xi tjindókjo̱a̱a̱, ka̱makjiín nga xota̱ jé boá kui, kó bo̱a̱ ka̱maa̱ kui, xikoó tsi ngayeje xotaa̱ xi ndyi̱tsóyà tsi nda ko̱jo tsi ndajín katsꞌén, 25kó ni xi tjiꞌmaá ini̱ma̱a̱ ka̱matsijen, kó ko̱siéntikoó nga sa̱ꞌíndikón Néná, kó bo̱a̱ ka̱tso̱ nga ja̱koxi̱ boá nga Néná ki̱a̱ tikónjinjnú.

Bi̱ tsꞌén akóyá Pabloo̱ kjo̱a̱a̱ xikó si̱ꞌán ngi̱ya na̱ngo̱xi̱i̱

26Kó mí ni xi xiánjnúꞌun já ntsꞌie. Kjiꞌanga matikójo̱jnú xingi̱jnú tjín xí sie salmo̱, tjín xí bokoyaá xota̱ xi ngasee̱, tjín xí tsóyà ni xi bokoó Néná, tjín xí chji̱a̱ kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná, tjín xí tsꞌenkꞌátioya én xí makjínjiín xotaa̱ xi tsjá A̱si̱énni̱xtjii̱n Néná. Ngayeje ni xi si̱ꞌánjnú nga ngo nga ngojnú, bo̱a̱ ti̱ꞌánjnú tsi̱ꞌe̱ nga xtjonínkꞌá xota̱ na̱ngo̱xi̱i̱. 27Tsi tjín xí ku̱i̱chji̱a̱ kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná, jó ngatama xota̱ xi bo̱a̱ sa̱ꞌiín, ko̱jo tsi ngaskande ján tsí ngatama, kó ńgó ńgó ngatíchji̱a̱, kó ngo xi ngatsꞌénkꞌátioya mí xí mejeén tsó kui eén, 28ta̱nga tsi jmíjín xi sa̱ꞌínkꞌatioya mí ni xi mejeén tsó kui eén, kui xi tsꞌénchji̱a̱ kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná, ta̱sá xió ngatꞌíjñá ngi̱jii̱n xota̱ na̱ngo̱xi̱i̱, kó ta̱ kui ngatíchji̱a̱jo soboá yojoo̱, ko̱jo ngatíchji̱a̱jo soboá Néná. 29Kó jáchji̱ni̱e̱ꞌe̱én tsi jó, ko̱jo tsi ján ngatama nga ku̱i̱chji̱a̱, kó xota̱ xi ngasee̱, nga tsꞌén kjín cha̱n cha̱n kon kó tsó ni xi tsintꞌié. 30Kó tsi Néná katsóyaà ngo ni ngo xota̱ xi tikón ki̱a̱a̱, ja̱ ta̱sá kuí tjón xió ngatꞌíjñá. 31Kó bo̱a̱ tsꞌén ngayejejnú, ńgó ńgó nga stso̱bo̱a̱a̱ ka̱ma ka̱tso̱yà én xí Néná katsjaá nga ku̱i̱chji̱a̱, tsi̱ꞌe̱ nga ngayeje xotaa̱ sku̱i̱e̱, kó ngayejee̱ nga sa̱kó ngaꞌniuú. 32Xi katseꞌeé kjo̱a̱nda nga jáchji̱ni̱e̱ꞌén, kuí xí tjiín kjo̱a̱ nga sku̱i̱e̱ chi̱bo̱a̱a̱ nga ku̱i̱chji̱a̱ jáchji̱ni̱e̱ꞌe̱én. 33Ngatꞌa̱ Néná Nee̱ kjo̱a̱xió boá, kó mejénjiín nga ta̱xkiya si̱ꞌan ngo ni ngi̱ya na̱ngo̱xi̱i̱.

Xikó má na̱ngo̱xi̱i̱ xota̱ tsjiee̱ Néná, 34ínchjiín ka̱májín ku̱i̱chji̱a̱ ngi̱ya na̱ngo̱xi̱i̱, ngatꞌa̱ jmí kjo̱a̱jiín nga ka̱ma ku̱i̱chji̱a̱, chjiéngá ku̱i̱ntꞌiéꞌeén xi̱ꞌii̱n xikó tsó kjo̱a̱kitii̱. 35Kó tsi tjín ni xi mejeén sku̱i̱e̱, ndiꞌaa̱ ngatasíyaá xi̱ꞌii̱n, ngatꞌa̱ ndajínkjiꞌi tsi ínchjiín ku̱i̱chji̱a̱ ngi̱jii̱n xota̱ na̱ngo̱xi̱i̱.

36A ngi̱jinjnú ítjatsꞌennii̱ nga kandokjo̱a̱ eén Néná, axa̱ ta̱ jún tsí xi kiꞌmíyàjnú.

37Tsi tjín xí tsꞌénkjó nga kui xi nda̱chji̱ni̱e̱ꞌe̱én Néná, ko̱jo tsi kui xi maa̱ nga A̱si̱énni̱xtjii̱n Néná xí katsjaá ngo kjo̱a̱nda, ta̱sá ngatamabe nga kjo̱a̱botíxomaa̱ Ndi̱a̱ná boá ni xi tjítsꞌenꞌindójnúꞌun kꞌi̱e̱e̱. 38Ta̱nga tsi tjín xí sa̱ꞌínsénjiín ni xi tsꞌénꞌbitꞌajnúꞌun kꞌi̱e̱e̱, ti̱nde kui si̱ꞌansénjiín nga.

39Kó kuíni já ntsꞌie, ngatamamejénjnú nga kꞌuiyájnú én xí Néná tsja̱ajnú, kó ngata̱ ꞌbíchjájínjnúu̱ nga ngo xi ku̱i̱chji̱a̱ kje̱ꞌe én xí makjínjiín xotaa̱ xi tsjá A̱si̱énni̱xtjii̱n Néná. 40Ta̱nga ngayeje ni xi si̱ꞌánjnú, ńgó tji̱e̱n ńgó tji̱e̱n ti̱ꞌánjnú.

Currently Selected:

1 Xota̱ Korinto̱ 14: MAIX

Highlight

Compare

Copy