1 Xota̱ Korinto̱ 13

Bi̱ tsꞌén akóyá Pabloo̱ kjo̱a̱a̱ kjo̱a̱tjoó

1Tsi mana ngayeje én xí chji̱a̱ xota̱ nga̱sondiee̱, ko̱jo én xí chji̱a̱ ndítsjiee̱, ta̱nga tsi jmíjínna kjo̱a̱tjó, ta̱ xikónií ngo ki̱cha̱ xi ꞌniú fonie, ko̱jo tsi ngo platiyo̱ xi ta̱xkiya fonie kjima an. 2Kó tsi tjínna ngo kjo̱a̱nda nga xiyà an én xí Néná tsjá, kó tsi makjínna ngayeje ni xi íꞌmá Néná ngasꞌe̱, kó tsi makjínna ta̱jmì niní, kó tsi ꞌniú sꞌijinna Néná, nga ngaskande ka̱mana sa̱ꞌintíyáa̱ ngo na̱xi̱, ta̱nga tsi jmíjínna kjo̱a̱tjó, jmí ni chjíjiín an. 3Tsi sa̱ꞌinkjaꞌasóo̱n xota̱ ni̱ma̱a̱ ngayeje ni xi tjínna, kó tsi sa̱ꞌinkꞌasꞌien an yojona tsi̱ꞌe̱ nga ku̱i̱ti̱ an, ngandaa̱ xota̱ xi ngasee̱, ta̱nga tsi jmíjínna kjo̱a̱tjó, ta̱kjo̱a̱ndaní ni xi tjítsꞌen an.

4Tsi tjínná kjo̱a̱tjó, kjiꞌá boá nga niꞌánchíkjo̱a̱, ko̱jo nga ndaxota̱ niꞌán yojoná, ko̱jo ꞌbéjínná kjo̱a̱ꞌontakón, ko̱jo ndokjo̱a̱jín ñá én xí nkꞌa, ko̱jo nkꞌakonjín ꞌna̱xié yojoná. 5Tsi tjínná kjo̱a̱tjó ta̱xkiya si̱ꞌánjín ñá ngo ni, jmí kjo̱a̱ndikonkón kꞌuiéjínná, si̱ꞌanxchánjín ñá, jmí kjo̱a̱ꞌontakón kꞌuíjin jàn ini̱ma̱ná. 6Tsi tjínná kjo̱a̱tjó, tsjajín ka̱máná ngo ni xi kixi̱jín, ta̱sá ni xi ja̱koxi̱i̱ xi tsja ka̱máná. 7Tsi tjínná kjo̱a̱tjó si̱ꞌanjetakón ngayeje ni xi ku̱i̱tjájin, si̱ꞌansꞌijin ngayeje ni xi tsi̱ꞌe̱ Néná, xchiyàa̱ ngayeje ni xi ndaa̱, si̱ꞌanchíkjo̱a̱ ngayeje ni xi ka̱mataꞌin.

8Kjo̱chó ni̱xtjin nga ngiti̱ jmíjín xi ku̱i̱chji̱a̱ én xí Néná tsjaá, kó ngiti̱ ko̱ndókjo̱a̱jín ja̱ kje̱ꞌe ja̱ kje̱ꞌe én, ti̱nde ngiti̱ ka̱machjiénjín nga xcha̱ xikótsꞌèn ya ngotꞌe̱, ta̱nga kjo̱a̱tjoó jmíni̱xtjin kju̱i̱e̱. 9Ngatꞌa̱ tjín ni xi ya chií ngotꞌe̱, kó ta̱ chií tsí má ni xi tsóyàná xota̱ xi chji̱a̱ én xí Néná tsjaá, 10ta̱nga kjiꞌanga kjo̱tjosón ndo̱jò ndójo̱ ni xi índa Néná nga ka̱ma, kjiꞌá boá nga kju̱i̱e̱ ni xi ta̱ chiboa tsí ya ngotꞌe̱.

11Kjiꞌanga nda̱chí kamá an, tsíchji̱a̱ an xikoó ngo nda̱chí, katsꞌenkjó án xikoó ngo nda̱chí, ko̱jo katsꞌenkjìi̱n ko̱n an xikoó ngo nda̱chí, ta̱nga ngije kamáxchá án, xín íjñá an ni xi tsꞌén ngo nda̱chí. 12Ta̱nga ngotꞌe̱ ꞌne̱ ta̱ ndyi̱yà xa̱ tsí ñá ni xi tsi̱ꞌe̱ Néná, xikoó tsi ngo chi̱tsen tsitsienjenjin xi xa̱ ya, ta̱nga nga kjo̱chó ni̱xtjin tíkje̱n tíkje̱n xcha̱ Néná. Ngatꞌa̱ chiboa tsí be an ngotꞌe̱, ta̱nga kjo̱chó ngo ni̱xtjin nga sku̱i̱e̱ cha̱n cha̱n an Néná xikótsꞌèn bena kui. 13Jmí ni̱xtjin kju̱i̱e̱ nga sꞌijinná ni xi tsi̱ꞌe̱ Néná, ko̱jo nga ndyi̱chiyá ni xi tsja̱aná, ko̱jo nga tjínná kjo̱a̱tjó, ta̱nga ngi̱jii̱n nga ján kui nii̱, kjo̱a̱tjoó boá xi ꞌniú chjí ngasenii̱.

Currently Selected:

1 Xota̱ Korinto̱ 13: MAIX

Highlight

Compare

Copy