1 Xota̱ Korinto̱ 12

Bi̱ tsꞌén akóyá Pabloo̱ nga A̱si̱énni̱xtjii̱n Néná ja̱ kje̱ꞌe ja̱ kje̱ꞌe kjo̱a̱nda xi tsjá

1Jún ntsꞌie, mejénna nga xcha̱jnú nga ja̱ kje̱ꞌe ja̱ kje̱ꞌe kjo̱a̱nda xi A̱si̱énni̱xtjii̱n Néná tsjaá xota̱ na̱ngo̱xi̱i̱.

2Jún jè yàjnú nga ngasꞌe̱, nga xota̱ xi sꞌijinjiín Néná kamájnú, xikoó tsi kachjafé kjo̱a̱ꞌniújnú nga ki̱a̱ tsangíntji̱ngijnúu̱ a̱sie̱én ngo ne xi tsꞌénda xotaa̱, xi ni̱ma̱ xi májiín chji̱a̱. 3Kó kuíni nga xiyàjnúꞌun nga nde ngojín xota̱ xi A̱si̱énni̱xtjii̱n Néná tjítsꞌénkíchji̱a̱ xi “ngatꞌíko̱jonii̱ Kjisoo̱” ka̱tso̱, kó ti̱nde ngojín xota̱ xi tikónjinjiín A̱si̱énni̱xtjii̱n Néná xi “Kjisoo̱ xí Ndi̱a̱ná” ka̱tso̱.

4Ja̱ kje̱ꞌe ja̱ kje̱ꞌe kjo̱a̱nda xi tjínná ñá, ta̱nga ta̱ ngo tsí má A̱si̱énni̱xtjii̱n Néná xi tsjá kuí kjo̱a̱ndaa̱. 5Ja̱ kje̱ꞌe ja̱ kje̱ꞌe tsꞌén niꞌánxá ñá nga bosíko̱jo xingi̱, ta̱nga ta̱ ngo tsí má Ndi̱a̱ná. 6Ja̱ kje̱ꞌe ja̱ kje̱ꞌe xá xí máná niꞌán ñá, ta̱nga ta̱ ngo tsí má Néná xí tsꞌén ngayejee̱ nii̱ nga tsꞌénxájii̱n ngayeje xota̱ na̱ngo̱xi̱i̱. 7Nga ngo nga ngo ñá katseꞌéná nga A̱si̱énni̱xtjii̱n Néná xí sa̱ꞌínxájin ngi̱jin yojoná nganda tsi̱ꞌe̱ xota̱ xi ngasee̱. 8Tjín xí A̱si̱énni̱xtjii̱n Néná xí tsjaá nga ka̱tso̱yaa̱ xotaa̱ én xi kjínkón, kó tjín xí ti̱ kui A̱si̱énni̱xtjii̱n xi tsjaá nga ka̱tso̱yaa̱ xotaa̱ ni xi ka̱makjiín xotaa̱. 9Tjín xí ti̱ kui A̱si̱énni̱xtjii̱n Néná xí tsjaá nga ꞌniú sꞌijii̱n Néná, kó ti̱ tjín nga, xi ti̱kuii A̱si̱énni̱xtjii̱n xi tsjaá nga ka̱maa̱ sa̱ꞌíndaya xota̱ xi oo̱n. 10Tjín xí maá tsꞌén kjo̱a̱ndikón, kó kje̱ꞌe xí maá tsóyà én xí Néná tsjaá, kje̱ꞌe xí makjiín tsi ja̱koxi̱ nga A̱si̱énni̱xtjii̱n Néná xí tjíjii̱n xotaa̱, axa̱ a̱si̱énni̱xtjii̱n xindajín, kó kje̱ꞌe xí maá chji̱a̱ én xí makjínjiín xota̱ xi ngasee̱ xi tsjá A̱si̱énni̱xtjii̱n Néná, kó ti̱ tjín xí maá tsꞌenkꞌátioya kui eén. 11Ta̱nga ta̱ ngo tsí A̱si̱énni̱xtjii̱n Néná xí tsꞌén kuí nii̱, ko̱jo xikótsꞌèn mejeén kui, kó bo̱a̱ tsꞌén tsjaá nga ngo nga ngo xota̱ na̱ngo̱xi̱i̱.

Bi̱ tsꞌén akóyá Pabloo̱ kjo̱a̱a̱ nga ñá xi xota̱ na̱ngo̱xi̱ ta̱ ngo tsí kichꞌiá yojoná

12Ngatꞌa̱ xikótsꞌèn nga ngo yojo kjín má ni xi yaꞌajo̱ni, kó ndatsi kjín ni xi yaꞌajo̱, ta̱ ngo tsí yojo ma, ti̱ bo̱a̱ ti̱ kjiꞌinii̱ Kristoo̱. 13Ngatꞌa̱ ta̱ ngo tsí A̱si̱énni̱xtjii̱n Néná xi kastindá ngayeje ñá, kó ngayeje ñá nga katseꞌéná nga kiꞌyó ti̱ kui A̱si̱énni̱xtjii̱n, kó bo̱a̱ tsꞌén nga ta̱ ngo yojo kamá, tsi xota̱ jundío̱, ko̱jo tsi xota̱ xi jundío̱jín, tsi moso̱ xi kastiñá, ko̱jo tsi xota̱ xi tjimándé.

14Ngatꞌa̱ ngo yojo jmí tsi ta̱ ngo ndo̱jò má, kjín má ni xi yaꞌajo̱nii̱. 15Tsi ngo ndsa̱ko xí bi̱ ka̱tso̱: “Kjo̱a̱a̱ nga ndsa̱jín an, yojoo̱jín chji̱a̱ an”, jmí tsi ta̱ngatꞌanii̱ nga bo̱a̱ katsó, sꞌe̱ ngiti̱ ki̱a̱jín yojoo̱ ku̱i̱chji̱a̱ni. 16Kó tsi ngo tji̱bo̱a̱nijon xi bi̱ ka̱tso̱: “Kjo̱a̱a̱ nga ndyikonjín an, yojoo̱jín chji̱a̱ an”, jmí tsi ta̱ngatꞌanii̱ nga bo̱a̱ katsó, sꞌe̱ ngiti̱ ki̱a̱jín yojoo̱ ku̱i̱chji̱a̱ni. 17Tsi ngayeje yojoná nga ndyikon ka̱ma, kótsꞌèn ka̱ma ko̱nda̱ꞌyá. Kó tsi ngayeje yojoná nga tji̱bo̱a̱nijon ka̱ma, kótsꞌèn ka̱ma xchíjen. 18Ta̱nga xikótsꞌèn kasasiennii̱ Néná, bo̱a̱ tsꞌén íjñá nga ngo nga ngo ni xi tjiín yojoná. 19Ta̱nga tsi ngayeje yojoo̱ nga ta̱ ngo tsí ni xi yaꞌajo̱ni kui yojoo̱ ka̱ma, kótsꞌèn yojo kꞌuínní kui nii̱. 20Nga ja̱koxi̱ achichí kjín má ni xi yaꞌajo̱nii̱ yojoo̱, ta̱nga yojoo̱ ta̱ ngo tsí má.

21Ndyikoo̱n ka̱májín bi̱ ka̱tso̱o̱ ndsa̱a̱: “Chjiénjínna ji”, ti̱nde tokoo̱ ka̱májín bi̱ ka̱tso̱o̱ ndsa̱koo̱: “Chjiénjínna jún”, 22ta̱sá ni xi chji̱a̱ni yojoná xi nde ꞌniújín machjién máná, kuí xí ꞌniú machjién ngase, 23kó ni xi yaꞌaa̱ yojoná xi nde ꞌniújín chjínií máná, kuí xí ꞌniú nda niꞌánchoo̱n. Kó ni xi mejénjínná nga xcha̱, kuí xí nda ngase foꞌmá. 24Ngatꞌa̱ chjiénjín nga kjoꞌmá nínga ka̱ma xcha̱, Néná bo̱a̱ tsꞌén índonda yojoná, nga ꞌniú ngase si̱ꞌandikón ni xi ꞌniújín chjínií máná. 25Bo̱a̱ katsꞌén Néná tsi̱ꞌe̱ nga kjo̱tjotꞌájiín xkjín ni xi yaꞌaa̱ yojoná, kó nga ja̱kꞌi̱e̱ ja̱ngaján skoón xkjín. 26Kó kuíni nga, tsi tjín ni xi yaꞌaa̱ yojoná xí kjo̱a̱ni̱ma̱ kjo̱a̱ꞌatio, ngayeje xi ngasee̱ xi on ka̱maa̱ nga, kó tsi tjín ni xi yaꞌa yojoná xí ndikón si̱ꞌanjo̱, ngayeje xi ngasee̱ xi tsja ka̱maa̱ nga.

27Jún boá xi yojoo̱ Kristoo̱, kó nga ngo nga ngojnú tikónjnú ngo ngi̱ndie ki̱a̱ kui yojoo̱. 28Néná íjñá nga ngi̱jii̱n xota̱ na̱ngo̱xi̱i̱ tjón má já apostro̱ kꞌuié, sꞌe̱ xi ma joó, jáchji̱ni̱e̱ꞌén, sꞌe̱ xi ma jaán, já mostro̱, sꞌe̱ jaskan xota̱ xi tsꞌén kjo̱a̱ndikón, ko̱jo xi tsꞌendáyà xi oo̱n, ko̱jo xi bosikójo, ko̱jo xi ngito̱ko̱, ko̱jo xi chji̱a̱ ja̱ kje̱ꞌe ja̱ kje̱ꞌe én xí tsjá A̱siénni̱xtjin Néná. 29A ngayeje xota̱ na̱ngo̱xi̱i̱ xí já apostro̱. A ngayeje xí jáchji̱ni̱e̱ꞌe̱én. A ngayeje xí já mostro̱. A ngayeje xi tsꞌén kjo̱a̱ndikón. 30A ngayeje xí tjiín kjo̱a̱nda nga tsꞌendáyà xota̱ xi oo̱n. A ngayeje xí chji̱a̱ ja̱ kje̱ꞌe ja̱ kje̱ꞌe én xí tsjá A̱siénni̱xtjin Néná. A ngayeje xí tsꞌenkꞌátioya én xí Néná tsjaá xotaa̱. 31Ti̱ꞌanmejénjnú kjo̱a̱nda xi nda ngasee̱ Néná. Ngotꞌe̱ ꞌne̱, an kokojnúꞌun ngo ndi̱yà xí ꞌniú nda ngase kjiꞌi.

Currently Selected:

1 Xota̱ Korinto̱ 12: MAIX

Highlight

Compare

Copy