1 Xota̱ Korinto̱ 11

1Chja̱ꞌángíjnúꞌun xikó tjítsꞌen an, xikótsꞌèn an tsꞌénfoaꞌangíi̱ Kristoo̱.

Bi̱ tsꞌén akóyá Pabloo̱ nga chjiéngá ku̱i̱ꞌíꞌmá to̱ko̱ ínchjiín

2Tsjatsꞌèn chjiá an kjo̱a̱a̱ jún, já ntsꞌie, ngatꞌa̱ ngatsjéni̱xtjin foaꞌátsjienjnú án, kó ndyi̱niꞌánjnú ngayeje nii̱ xikótsꞌèn akoyájnúꞌun, kuí nii̱ xi katseꞌéna, kó ti̱ bo̱a̱ ti̱ tsꞌén katsꞌenkꞌasꞌienjnúꞌun nga. 3Ta̱nga mejénna nga xcha̱jnú nga Kristoo̱ xí tikóntjoón nga ngo nga ngo já xíꞌiín, kó xi xi̱ꞌii̱n, kuí xí tikóntjoón chjo̱ón, xikótsꞌèn nga Néná boá xi tikóntjoón Kristoo̱. 4Ngayeje jáxíꞌín xi boꞌmá to̱ko̱ nga chji̱a̱a̱ Néná, ko̱jo tsi nga ka̱tso̱yà ngo én xí Néná tsjaá, bendikónjín xi tikóntjoón kui. 5Ta̱nga ngayeje ínchjín xí ku̱i̱ꞌíꞌmájín to̱ko̱, nga ku̱i̱chji̱a̱a̱ Néná, ko̱jo tsi nga ka̱tso̱yà ngo én xí Néná tsjaá, bendikónjín xi tikóntjoón kui, kó nga bo̱a̱ tjítsꞌén, ti̱ bo̱a̱ ti̱ kjiꞌinii̱ tsi íjón taka takaa̱ to̱ko̱. 6Ngatꞌa̱ tsi ko̱óꞌmájín to̱ko̱ ínchjiín, ta̱sá ngatatie tsjaa̱, ko̱jo tsi ngatꞌijón taka takaa̱ to̱ko̱, ta̱nga tsi soboaá nga ko̱tie tsjaa̱, ko̱jo tsi nga ku̱i̱ꞌíjón taka takaa̱ to̱ko̱, ja̱ ta̱sá ngatꞌíꞌmá to̱ko̱. 7Xi xi̱ꞌii̱n ka̱májín ko̱óꞌmá to̱ko̱, ngatꞌa̱ xikótsꞌèn tjíjii̱n Néná bo̱a̱ tsꞌén katsꞌénda nda̱ xi tjoón, kó kuí nda̱a̱ xi akó kjo̱a̱jee̱ Néná, ta̱nga xi chjo̱ón kuí xí bokó kjo̱a̱jee̱ xi xi̱ꞌii̱n. 8Ngatꞌa̱ nda̱ xi tjoón jmí tsi yojoo̱ naa̱ kaꞌnaxiéni, naa̱ xí kaꞌnaxiéni yojoo̱ nda̱ xi tjoón. 9Ngatꞌa̱ nda̱ xi tjoón jmí tsi kamánda ta̱ngatꞌanii̱ naa̱, naa̱ xí kamánda ta̱ngatꞌanii̱ nda̱ xi tjoón. 10Kó kuíni nga ínchjiín chjiéngá ko̱a̱ꞌa̱ ngo chi̱bo̱a̱ to̱ko̱, tsi̱ꞌe̱ nga sku̱i̱e̱ndikón xí botixómaá kui, ko̱jo sku̱i̱e̱ndikón ndítsjiee̱ nga. 11Ta̱nga ngi̱jii̱n ñá xí je sꞌijinná Ndi̱a̱ná, xi xi̱ꞌii̱n, jmíjínra̱ tsi jmíjín xi ínchjiín, kó xi ínchjiín, jmíjínra̱ tsi jmíjín xi xi̱ꞌii̱n, 12ngatꞌa̱ xikótsꞌèn yojoo̱ nda̱ xi tjoón kjindibáni xi chjo̱ón, ti̱ bo̱a̱ ti̱ tsꞌén xi chjo̱ón kuí xí tokjànií xi xi̱ꞌii̱n, ta̱nga ngayeje ni xi tjiín, ngindyi̱ko̱n Néná ndibání.

13Ti̱ juún bo̱a̱ tꞌínjnú tsi nda ko̱jo tsi ndajínkjiꞌi: A ndakjíꞌí nga ngo na̱ ku̱i̱chji̱a̱a̱ Néná, kó ko̱óꞌmájín to̱ko̱. 14Xikó tsꞌén ya, a bokoyájínná kuí nii̱ nga kjo̱a̱soboá boá nga xi xi̱ꞌii̱n sa̱ꞌíndojó tsja̱to̱ko̱. 15Ta̱nga kjo̱a̱tsjakjiꞌi boá nga ínchjiín sa̱ꞌíndojó tsja̱a̱, ngatꞌa̱ bo̱a̱ tsꞌén katseꞌeé nga tsja̱ ndojoó, kuí xí ko̱óꞌmáni to̱ko̱. 16Ta̱nga tsi tjín xi mejeén ku̱i̱chji̱a̱ti kjo̱a̱a̱ ni xi̱ꞌbi̱, ngájínjne̱ kje̱ꞌe ni ji̱n, ko̱jo ngayeje xota̱ na̱ngo̱xi̱i̱ Néná nga.

Bi̱ tsꞌén akóyá Pabloo̱ xikótsꞌèn si̱ꞌankjaꞌátsjien kjo̱a̱bo̱yaá Ndi̱a̱ná

(Mat 26:26-29; Mar 14:22-25; Rka 22:14-20)

17Tsjájín tsꞌén kuichjiájojnúꞌun ni xi xiánjnúꞌun ngotꞌe̱, ngatꞌa̱ ngindiee̱ nga nda sa̱ꞌínjnú nga matikójnú, ta̱sá ndajín tsꞌénjnú kui nii̱. 18Tjón mára xiyàjnúꞌun xikó kiꞌmína, nga kjiꞌa xò nga matikójnú jún xi xota̱ na̱ngo̱xi̱i̱, kja̱chꞌià kja̱chꞌià xòjnú yojojnú, kó ngaskande sꞌijin chiboana kui nii̱. 19Chjiéngá nga kja̱xꞌi̱a̱ kja̱xꞌi̱a̱jnú xingi̱jnú, ta̱nga tsi̱ꞌe̱ nga xcha̱ ꞌyání xi ja̱koxi̱ nga ꞌniú síndo ngindyi̱ko̱n Néná. 20Kjiꞌanga matikójnú, jmí tsi bo̱a̱ ndyi̱niꞌánjnú xikótsꞌèn akóyáná Ndi̱a̱ná nga iskjiniejo̱ ngase nichinie xota̱a̱, 21ngatꞌa̱ nga chiniejnú nichinie niꞌánkjaꞌasónjínjnú ni xi kichꞌiájnú, kó ta̱ jún chinie so̱bo̱a̱jnú ni xi tsa̱jún, kó tjín xi sakójiín nichinie, kó tjín xi ma chꞌi̱. 22A jmíjínjnú ndiꞌa nínga ka̱ma xi̱ni̱e̱ ko̱jo nínga ka̱ma sꞌi̱o̱jnú. Míkjo̱a̱a̱ nga niꞌánchꞌójnú xota̱ na̱ngo̱xi̱i̱ Néná, kó mejénjnú ko̱e̱ꞌéjnúu̱ kjo̱a̱soboá xota̱ xi ta̱ jmíjín ni xi tjiín. Mí xí xiánjnúꞌun. A tsjatsꞌèn kuichjiájojnúꞌun. ¡Kjo̱a̱a̱ kui nii̱, jmí!

23Ngatꞌa̱ ni xi akóyána Ndi̱a̱ná kuí má ni xi akoyájnúꞌun: Nga Ndi̱a̱ná Kjisoo̱ iskjíbé paa̱n kui ni̱xtji̱e̱n nga kiniꞌánkꞌasꞌien kui, 24kó ngije katsjaá ndokꞌóchjì Néná, akjángá, kó bi̱ katsó: “Kuí xi̱ꞌbi̱ xi yojona, kui xi si̱ꞌankꞌasꞌien nganda tsa̱jún, ti̱ꞌánjnú kui nii̱ tsi̱ꞌe̱ nga kjo̱a̱ꞌátsjienjnú án.” 25Ti̱ bo̱a̱ ti̱ tsꞌén, ngije iskjinie nichiniee̱, iskjíbé chi̱tse̱én, kó bi̱ katsó: “Kui chi̱tsen xí ndyi̱a̱ jínna, kuí xí bokó kjo̱a̱ꞌbínda tja̱tsi̱e̱ xi katsꞌén Néná ko̱jo xota̱ tsi̱ꞌe̱, kui nii̱ xi ti̱ꞌánjnú, ta̱ xikó tjín ndi̱yà sꞌi̱o̱jnú, tsi̱ꞌe̱ nga kjo̱a̱ꞌátsjienjnú án.” 26Kuíni nga ta̱ xi kótjín ndi̱yà nga xi̱ni̱e̱jnú kui paa̱n, ko̱jo ta̱ xi kótjín ndi̱yà nga sꞌi̱o̱jnú kui chi̱tse̱én, ndyi̱ꞌmìyájnú nga kꞌien Ndi̱a̱ná, ngaskande ni̱xtjin nga kjo̱e̱ꞌe nginí kuí.

27Kó kuíni nga ngayeje xota̱ xi sku̱i̱e̱ndikónjín nga ta̱xkiya skji̱ni̱e̱ pan, ko̱jo nga ta̱xkiya kꞌuí kui chi̱tse̱én, nga sa̱ꞌínjín xikó katsó Ndi̱a̱ná, tjitsjíe̱nrií jé nga tsꞌén bendikónjín yojoo̱ ko̱jo jiín Ndi̱a̱ná. 28Kuíni nga ngindiee̱ nga skji̱ni̱e̱ paa̱n, ko̱jo nga kꞌuí kuí chi̱tse̱én, nga kotꞌa cha̱n cha̱n yojoo̱ xikótsꞌèn síndo ngindyi̱ko̱n Néná, 29ngatꞌa̱ xi ta̱xkiya skji̱ni̱e̱, ko̱jo xi ta̱xkiya kꞌuí nga bejín nga yojoo̱ Ndi̱a̱ná boá kui nii̱, jé tsꞌénmongii̱ yojoo̱ nga tsꞌénꞌbi, ko̱jo nga tsꞌénkjinie. 30Kó ta̱ngatꞌaa̱ kui nii̱ nga ngi̱jinjnú tjín xí oo̱n, ko̱jo xi xkꞌién tjimá, kó kje̱ꞌe xí je jesón. 31Ta̱nga tsi ti̱ña̱á xi xchítꞌa cha̱n cha̱n yojoná, Néná sa̱ꞌínkaꞌanijínjínná ngo jé. 32Kjiꞌanga Néná kotsijee̱n tsi nda ko̱jo tsi ndajín ndyi̱niꞌán, tsꞌénchji̱ni̱e̱ná tsi̱ꞌe̱ nga sa̱tíjéjínná xikoó xotaa̱ kui nga̱sondiee̱.

33Kó kuíni ntsꞌie, kjiꞌanga ka̱matikójnú nga xi̱ni̱e̱jnú nichinie, chiyájnúu̱ xingi̱jnú, 34tsi tjín xi bojoó, ndiꞌaa̱ nga kjinie ṉño̱, tsi̱ꞌe̱ nga Néná ko̱tíjéjiín kjo̱a̱a̱ nga bo̱a̱ tsꞌén kamátikó. Kó kjo̱a̱a̱ ngayeje ni xi ngasee̱ an kꞌuijñánda an nga kjóchó an.

Currently Selected:

1 Xota̱ Korinto̱ 11: MAIX

Highlight

Compare

Copy