1 Xota̱ Korinto̱ 10

Bi̱ tsꞌén akóyá Pabloo̱ nga katsꞌénkjién ni xi kamátaꞌin xota̱ tji̱e̱ xchaá xota̱ jundíoo̱

1Mejénjínna já ntsꞌie, nga xchi̱yàjnú nga xota̱ tji̱e̱ xchaá xota̱ jundíoo̱, ngayejee̱ nga ṉdi̱i̱ Néná kistsoꞌbátjoón, kó ngayejee̱ nga jaꞌatio ndáchíkoón. 2Kó bo̱a̱ tsꞌén ngayejee̱ nga nijan kamángo Moisee̱, xikoó tsi nijan kastindá ngi̱jii̱n kui ṉdi̱i̱, ko̱jo ngi̱jii̱n kui ndáchíkoón, 3kó ngayejee̱ nga ta̱ ngo tsí nichinie xi iskjinie xi Néná katsjaá, 4ko̱jo ta̱ ngo tsí niꞌyó xi katsꞌe xi Néná katsjaá. Ngatꞌa̱ kuí xí katsꞌe kui ndáfoa xi jatjoo̱ kui ndi̱jo̱je xi Néná katsjaá, kó kui ndi̱jo̱o̱ kuí xí Kristoo̱, xi kistsoꞌbátji̱ngii̱. 5Ta̱nga Néná tsjajín kamaá xikótsꞌèn kisꞌińdo kjín kui xotaa̱, kuíni nga ki̱a̱ jesón nangi kixií.

6Ngayeje kui nii̱ kamá xikoó ngo chi̱bo̱a̱ tsa̱ñá, tsi̱ꞌe̱ nga ka̱mamejénjínná ni xi ndajiín, xikó katsꞌén kui xotaa̱. 7Kó kuíni, ngata̱ niꞌántsjajo̱jínjnú a̱sie̱én ngo ne xi tsꞌénda xotaa̱, xikó katsꞌén chiboa kui xotaa̱, xikótsꞌèn kjitꞌa xo̱jo̱n eén Néná, nínga bi̱ tsoó: “Ngayeje xotaa̱ kisꞌińdotie nga iskjinie ko̱jo nga katsꞌe, sꞌe̱ jaskan jastjíe̱n nga kitié nga katsꞌéntsjaà kui nii̱.” 8Ti̱nde ngata̱ tondo̱jín májnú, xikó katsꞌén chiboa kui xotaa̱, kuíni nga nga ta̱ ngo ni̱xtjin kan ján mi̱ kamá xi jesón. 9Ti̱nde ngata̱ chjátꞌayákónjín ñá Ndi̱a̱ná, xikó katsꞌén chiboa kui xotaa̱ nga askotꞌayákón, kó ye̱ iskjiniee̱ nga jesón. 10Ti̱nde ngata̱ ndokjo̱a̱taꞌínjínjnú Néná, xikó katsꞌén chiboa kui xotaa̱, kó ndítsjie xi botixómaá kjo̱a̱bo̱yaa̱ katsꞌénkjiesón.

11Ngayeje kui nii̱ xi kamaá xota̱ tji̱e̱ xchaá xota̱ jundíoo̱, tsi̱ꞌe̱ nga kisꞌijñaná ngo chi̱bo̱a̱, kó kui nii̱ kiniꞌánꞌindó ngi̱yaa̱ xo̱jo̱n eén Néná, tsi̱ꞌe̱ nga bo̱a̱jín si̱ꞌán ñá xí tindyión kuí nga̱sondie xi je kjifetꞌaa̱. 12Kó kuíni nga, kui xota̱ xi ndyi̱tsꞌènkjó nga ꞌniú síndo kjimaa̱ yojoo̱ ngi̱yaa̱ ni xi tsi̱ꞌe̱ Néná, nga koo̱n yojoo̱ tsi̱ꞌe̱ nga kꞌo̱kajín. 13Ni xi kjimataꞌinjnú nga tjíchjatꞌayákónjnú, jmí tsi tsꞌatio ngase kjo̱a̱a̱ ni xi kjimataꞌin xotaa̱. Ka̱ma ka̱maꞌniátakónjnú Néná, kó tsja̱ndièjín nga ꞌniú ngase chjátꞌayákónjnú kjo̱a̱a̱ ni xi kjo̱chíkjo̱a̱jnú. Ta̱sá kjiꞌanga chjátꞌayákónjnú, Néná ko̱kójnú kótsꞌèn kjo̱tjongijnú yojojnú tsi̱ꞌe̱ nga xchíkjo̱a̱jnú ni xi ka̱majnú.

14Kó kuíni, ndí já ntsꞌie xi tjóna, ti̱yótꞌaxínjnúu̱ a̱sie̱én ngo ne xi tsꞌénda xotaa̱. 15Tsꞌénchji̱a̱jojnúꞌun xikoó xota̱ xi makjiín: Ti̱ juún ti̱ꞌankjójnú ni xi tꞌíxián an. 16Kui chi̱tsen kamáchikon xi ndyi̱chjiáꞌá nga Néná sa̱ꞌínchikonñé, a ngayejejín ñá nga nijan kjimá nga ndyi̱ꞌyò jiín Kristoo̱. Kó kjiꞌanga ndyi̱chinié pan xi akakjangaa̱, a nijánjín kjimá nga ndyi̱chinié yojoo̱ Kristoo̱. 17Ngatꞌa̱ paa̱n ta̱ ngo tsí má, kó ndatsi kjín má ñá, ta̱ ngo tsí yojo má, ngatꞌa̱ ngayeje ñá, nga ta̱ ngo tsí pan xi ndyi̱chinié.

18Tsitsíjen chi̱bo̱a̱yajnúu̱ xota̱ Israee̱l, nga kuí boá xota̱ xi ndyi̱kjinie ni xi je kiniꞌánkꞌasꞌiee̱n nga kjo̱a̱tjó Néná, kó a ki̱a̱jín nijan ndyi̱tsꞌèngo yojoo̱ kui ko̱jo kui ṉchaa̱n, nga ndyi̱kjinie kjo̱a̱tjó xi kiniꞌánkꞌasꞌiee̱n. 19Jmí tsi tꞌíxián an nga kui a̱sie̱én ne xi tsꞌénda xotaa̱ xi chjínií, ko̱jo tsi kui ni xi tjíniꞌánkꞌasꞌiee̱n xi chjínií. 20Ta̱sá tꞌíxián an nga xota̱ xi tsꞌenkꞌásꞌieén kjo̱a̱tjó ne xi tsꞌénda xotaa̱, nga xindajín boá xi ndyi̱tsꞌènkꞌásꞌieén kui nii̱, jmí tsi Néná xí ndyi̱tsꞌènkꞌásꞌieén, kó mejénjínna nga jún si̱ꞌanngojo̱jnú yojojnú xindajiín. 21Ka̱májín sꞌi̱o̱yàjnú chi̱tse̱én Ndi̱a̱ná, sꞌe̱ ti̱ sꞌi̱o̱yàjnú chi̱tse̱én xindajín nga, ti̱nde ka̱májín yámíxa̱a̱ Ndi̱a̱ná ku̱i̱ndyiontꞌajnú, sꞌe̱ ti̱ ku̱i̱ndyiontꞌajnú yámíxa̱a̱ xindajín nga. 22Axa̱ mejénná nga si̱ꞌanchi̱ni̱ Ndi̱a̱ná. A tjín ngasená ngaꞌniú ta̱bo̱a̱jiín kui.

Bi̱ tsꞌén akóyá Pabloo̱ nga ka̱májín ta̱xkiya xi̱ni̱e̱ ni xi je kiniꞌánkꞌasꞌiee̱n ni xi nénájín

23“Ma niꞌán ngayeje nii̱” tsó xotaa̱, ta̱nga jmí tsi ngayeje nii̱ xi nda sa̱ꞌínná. “Ma niꞌán ngayeje nii̱” tsó xotaa̱, ta̱nga jmí tsi ngayeje nii̱ xi tsja̱ngaꞌniúná. 24Ngata̱ ngojín xi ngatangase kjo̱a̱nda tsi̱ꞌe̱, ta̱sá kjo̱a̱a̱ ni xi nda sa̱ꞌiín xota̱ xi ngasee̱.

25Ngayeje ni xi stiñá nínga stiñá yojoo̱ xi ka̱ma xi̱ni̱e̱jnú, kó ngata̱ bo̱a̱jín tsꞌén fojintakónjnú tsi kui nii̱ xi sa̱ꞌíndándíjnú ngindyi̱ko̱n Néná. 26Ngatꞌa̱ tꞌanangii̱ ko̱jo ngayeje ni xi tjiín, tsi̱ꞌe̱ Ndi̱a̱ná boá.

27Tsi ngo xota̱ xi sꞌijinjiín Néná ka̱tso̱yàjnú tsi̱ꞌe̱ nga kongínchi̱ni̱e̱jnú nichinie ndiꞌaa̱, kó tsi mejénjnú kongínjnú, tangínjnú, kó chi̱ni̱e̱jnú ngayeje ni xi ko̱e̱ꞌéjnú, kó chjiénjín nga bo̱a̱ tsꞌén kjójintakónjnú tsi kui nii̱ xi sa̱ꞌíndándíjnú ngindyi̱ko̱n Néná. 28Ta̱nga tsi tjín xí bi̱ ka̱tso̱jnú: “Kui nii̱ jè kiniꞌánkꞌasꞌienjne̱ ngo ne xi tsꞌénda xotaa̱.” Ngata̱ chiniejínjnú, ta̱ngatꞌanii̱ kui xi bo̱a̱ katsoó, ko̱jo ta̱ngatꞌanii̱ tsi kjo̱tsòn kjo̱a̱kjíntakoón xota̱ xi bo̱a̱ tsoó, ngatꞌa̱ tꞌanangii̱ ko̱jo ngayeje ni xi tjiín, tsi̱ꞌe̱ Ndi̱a̱ná boá. 29Kjo̱a̱kjíntakón xí xian an, ta̱nga jmí tsi tse̱, tsi̱ꞌe̱ xi ingoo̱ xí xian an.

Ngatꞌa̱ míkjo̱a̱a̱ nga xikótsꞌèn tsꞌénchji̱a̱ kjo̱a̱kjíntakoón xota̱ xi ngasee̱ nga kui xi ko̱kó mí ni xi tjítsꞌen an. 30Tsi tsjàa̱ ndokꞌóchjì Néná, kjo̱a̱a̱ nga kui katsjána nichiniee̱, míkjo̱a̱a̱ nga tjín kón xi ku̱i̱ꞌíchjána nga skjíni̱e̱ an nichinie kjo̱a̱a̱ ni xi je katsja an ndokꞌóchjì.

31Kó kuíni, tsi xi̱ni̱e̱jnú, ko̱jo tsi sꞌi̱o̱jnú, ko̱jo tsi kje̱ꞌe ni si̱ꞌánjnú, ngayeje ni xi si̱ꞌánjnú nga ta̱kó kjo̱a̱jee̱ Néná. 32Ngata̱ júnjín xi niꞌánkꞌákajnú xota̱ xi jundíoo̱, ko̱jo xota̱ xi jundío̱jín, ko̱jo xota̱ na̱ngo̱xi̱i̱ Néná. 33Xikó tsꞌen an nga ngayeje ni xi tsꞌen an, sasiénnií ngayeje xotaa̱, jmí tsi mongase an ni xi nda mána an, ni xi nda maá xota̱ xi ngasee̱ xí tsꞌen an, bo̱a̱ tsꞌen an, tsi̱ꞌe̱ nga kjo̱tjoꞌa kui xotaa̱.

Currently Selected:

1 Xota̱ Korinto̱ 10: MAIX

Highlight

Compare

Copy